ಅಡುಗೆ ಮನೆಯಲ್ಲಿ ಗ್ಯಾಸ್ ಖಾಲಿಯಾಗಿದೆಯೇ? ಹೊಸ ಸಿಲಿಂಡರ್ ಬುಕ್ ಮಾಡಿದರೂ ಬರುತ್ತಿಲ್ಲವೇ? ಹಾಗಿದ್ದರೆ ಚಿಂತಿಸುವ ಅಗತ್ಯವಿಲ್ಲ. ಯುದ್ಧದ ಕಾರಣದಿಂದಾಗಿ ದೇಶದಲ್ಲಿ ಎಲ್ಪಿಜಿ ಸಿಲಿಂಡರ್ ಸಬರಾಜಿನಲ್ಲಿ ವ್ಯತ್ಯಯ ಉಂಟಾಗಿದ್ದು, ದಿನಗಟ್ಟಲೆ ಕಾಯುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಈ ಗ್ಯಾಸ್ ಸಂಕಷ್ಟದಿಂದ ಪಾರಾಗಿ ನಿಮ್ಮ ಅಡುಗೆ ನಿಲ್ಲದಂತೆ ನೋಡಿಕೊಳ್ಳಲು ಇರುವ ಕಡಿಮೆ ಖರ್ಚಿನ ಸ್ಮಾರ್ಟ್ ಆಯ್ಕೆಗಳ ಬಗ್ಗೆ ಇಲ್ಲಿ ತಿಳಿಯೋಣ.
ಸಿಲಿಂಡರ್ ಬಿಕ್ಕಟ್ಟಿನಿಂದ ಪಾರಾಗಲು ಸ್ಮಾರ್ಟ್ ಅಡುಗೆ ಪರ್ಯಾಯಗಳು
ಬೆಳಗ್ಗೆ ಎದ್ದ ತಕ್ಷಣ ಟೀ ಮಾಡಲು ಸ್ಟವ್ ಹಚ್ಚಿದಾಗ ಸಿಲಿಂಡರ್ ಖಾಲಿಯಾಗಿದೆ ಎಂದು ತಿಳಿದರೆ ಆ ಆತಂಕ ಹೇಳತೀರದು. ಪ್ರಸ್ತುತ ದೇಶಾದ್ಯಂತ ಅನೇಕ ಕುಟುಂಬಗಳು ಇಂತಹ ಕಠಿಣ ಪರಿಸ್ಥಿತಿಯನ್ನು ಎದುರಿಸುತ್ತಿವೆ. ಪಶ್ಚಿಮ ಏಷ್ಯಾದಲ್ಲಿನ ಯುದ್ಧದ ವಾತಾವರಣದಿಂದಾಗಿ ‘ಹಾರ್ಮುಜ್ ಜಲಸಂಧಿ’ ಮೂಲಕ ಸರಬರಾಜು ಸ್ಥಗಿತಗೊಂಡಿರುವುದು ಭಾರತದಲ್ಲಿ ಎಲ್ಪಿಜಿ ಕೊರತೆಗೆ ಕಾರಣವಾಗಿದೆ. ನಮ್ಮ ದೇಶಕ್ಕೆ ಬೇಕಾದ ಗ್ಯಾಸ್ನಲ್ಲಿ ಶೇ. 60ಕ್ಕಿಂತ ಹೆಚ್ಚು ಅಲ್ಲಿಂದಲೇ ಆಮದಾಗುತ್ತಿರುವುದು ಇದಕ್ಕೆ ಪ್ರಮುಖ ಕಾರಣ. ಬೆಂಗಳೂರು, ಚೆನ್ನೈ, ಮುಂಬೈನಂತಹ ಮೆಟ್ರೋ ನಗರಗಳಲ್ಲಿ ಸಿಲಿಂಡರ್ ಡೆಲಿವರಿ ವಿಪರೀತ ವಿಳಂಬವಾಗುತ್ತಿದೆ. ಕಾಳಸಂತೆಯನ್ನು ತಡೆಯಲು ಸರ್ಕಾರವು ಎರಡು ಬುಕಿಂಗ್ಗಳ ನಡುವೆ 25 ದಿನಗಳ ಕಡ್ಡಾಯ ಅಂತರ ವಿಧಿಸಿರುವುದು ಸಾಮಾನ್ಯ ಜನರನ್ನು ಕಂಗಾಲು ಮಾಡಿದೆ. ಈ ಗಂಡಾಂತರದಿಂದ ಪಾರಾಗಲು ನಮ್ಮ ಮುಂದಿರುವ ಕೆಲವು ಬುದ್ಧಿವಂತಿಕದ ಮಾರ್ಗಗಳು ಇಲ್ಲಿವೆ.
- ಎಲೆಕ್ಟ್ರಿಕ್ ಸ್ಟವ್ (ಇಂಡಕ್ಷನ್)
ಸಿಲಿಂಡರ್ ಕಿರಿಕಿರಿ ತಪ್ಪಿಸಲು ಇಂಡಕ್ಷನ್ ಸ್ಟವ್ಗಳು ಅತ್ಯಂತ ವೇಗದ ಮಾರ್ಗ. ಇವು ಮಾರುಕಟ್ಟೆಯಲ್ಲಿ ಕೇವಲ ₹1,500 ರಿಂದ ಲಭ್ಯವಿವೆ.
• ಅನುಕೂಲ: ಗ್ಯಾಸ್ ಲೀಕೇಜ್ ಭಯವಿಲ್ಲ, ಅಡುಗೆ ಬೇಗ ಆಗುತ್ತದೆ ಮತ್ತು ಮಕ್ಕಳಿಗೆ ಸುರಕ್ಷಿತ.
• ಅನಾನುಕೂಲ: ವಿದ್ಯುತ್ ಕಡಿತವಿದ್ದಾಗ ಕೆಲಸ ಮಾಡುವುದಿಲ್ಲ ಮತ್ತು ಇದಕ್ಕೆ ಪ್ರತ್ಯೇಕ ಪಾತ್ರೆಗಳ ಅಗತ್ಯವಿರುತ್ತದೆ. - ಪೈಪ್ಡ್ ನ್ಯಾಚುರಲ್ ಗ್ಯಾಸ್ (PNG)
ನಿಮ್ಮ ನಗರದಲ್ಲಿ ಅದಾನಿ ಗ್ಯಾಸ್ ಅಥವಾ ಐಜಿಎಲ್ನಂತಹ ಸೇವೆಗಳಿದ್ದರೆ ತಕ್ಷಣ ಪಿಎನ್ಜಿ ಕನೆಕ್ಷನ್ ಪಡೆಯುವುದು ಉತ್ತಮ.
• ಅನುಕೂಲ: ವಿದ್ಯುತ್ ಬಿಲ್ನಂತೆ ಬಳಸಿದಷ್ಟಕ್ಕೆ ಮಾತ್ರ ಹಣ ಪಾವತಿಸಬಹುದು. 24 ಗಂಟೆಯೂ ಗ್ಯಾಸ್ ಪೂರೈಕೆ ಇರುತ್ತದೆ. ಸಿಲಿಂಡರ್ ಬುಕಿಂಗ್ ತಲೆನೋವು ಇರುವುದಿಲ್ಲ ಮತ್ತು ಎಲ್ಪಿಜಿಗಿಂತ ಅಗ್ಗ.
• ಅನಾನುಕೂಲ: ಆರಂಭಿಕ ಇನ್ಸ್ಟಾಲೇಶನ್ ವೆಚ್ಚ ಸ್ವಲ್ಪ ಹೆಚ್ಚಿರಬಹುದು. - ಬಯೋಗ್ಯಾಸ್ (ಜೈವಿಕ ಅನಿಲ)
ಗ್ರಾಮೀಣ ಅಥವಾ ಅರೆ ಪಟ್ಟಣ ಪ್ರದೇಶಗಳಲ್ಲಿ ಅಡುಗೆ ಮನೆಯ ತ್ಯಾಜ್ಯ ಅಥವಾ ಸಗಣಿಯಿಂದ ನಡೆಯುವ ಬಯೋಗ್ಯಾಸ್ ಪ್ಲಾಂಟ್ಗಳು ಅತ್ಯುತ್ತಮ ಆಯ್ಕೆ.
• ಅನುಕೂಲ: ಇಂಧನ ಉಚಿತವಾಗಿ ದೊರೆಯುತ್ತದೆ ಮತ್ತು ತ್ಯಾಜ್ಯ ವಿಲೇವಾರಿ ಸುಲಭವಾಗುತ್ತದೆ.
• ಅನಾನುಕೂಲ: ಪ್ಲಾಂಟ್ ಅಳವಡಿಸಲು ಸ್ಥಳಾವಕಾಶ ಬೇಕು ಮತ್ತು ನಿರ್ವಹಣೆ ಸ್ವಲ್ಪ ಕಷ್ಟವೆನಿಸಬಹುದು. - ಸೀಮೆಎಣ್ಣೆ ಅಥವಾ ಪ್ರೆಶರ್ ಸ್ಟವ್
ಗ್ಯಾಸ್ ಲಭ್ಯವಿಲ್ಲದ ತುರ್ತು ಸಂದರ್ಭಗಳಲ್ಲಿ ಹಳೆಯ ಕಾಲದ ಸೀಮೆಎಣ್ಣೆ ಸ್ಟವ್ಗಳು ಉತ್ತಮ ಬ್ಯಾಕಪ್ ಆಗಿ ಕೆಲಸ ಮಾಡುತ್ತವೆ. ಇವು ₹500 ರಿಂದ ₹1,500 ಬೆಲೆಯಲ್ಲಿ ಸಿಗುತ್ತವೆ.
• ಅನುಕೂಲ: ವಿದ್ಯುತ್ ಅಗತ್ಯವಿಲ್ಲ, ಸಣ್ಣಪುಟ್ಟ ಅಡುಗೆ ಅಥವಾ ಟೀ ಮಾಡಲು ವೇಗವಾಗಿ ಶಾಖ ನೀಡುತ್ತವೆ.
• ಅನಾನುಕೂಲ: ಸೀಮೆಎಣ್ಣೆ ವಾಸನೆ ಬರಬಹುದು ಮತ್ತು ಪಾತ್ರೆಗಳು ಕಪ್ಪಾಗುವ ಸಾಧ್ಯತೆ ಇರುತ್ತದೆ. - ಕಟ್ಟಿಗೆ ಒಲೆ
ಯಾವುದೇ ಆಧುನಿಕ ಸೌಲಭ್ಯಗಳಿಲ್ಲದ ಕಡೆ ಕಟ್ಟಿಗೆ ಅಥವಾ ಬೆರಣಿ ಬಳಸಿ ಒಲೆ ಹಚ್ಚುವುದು ಕೊನೆಯ ಪರ್ಯಾಯ.
• ಅನುಕೂಲ: ಇಂಧನ ಸ್ಥಳೀಯವಾಗಿ ಉಚಿತವಾಗಿ ಸಿಗುತ್ತದೆ. ತಂದೂರಿಯಂತಹ ಅಡುಗೆಗಳಿಗೆ ಉತ್ತಮ ರುಚಿ ನೀಡುತ್ತದೆ.
• ಅನಾನುಕೂಲ: ಅತಿಯಾದ ಹೊಗೆಯಿಂದಾಗಿ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು.
ಗ್ಯಾಸ್ ಬಿಕ್ಕಟ್ಟು ಯಾವಾಗ ಮುಗಿಯುತ್ತದೆ ಎಂದು ತಿಳಿಯದ ಈ ಸಮಯದಲ್ಲಿ, ಕೇವಲ ಸಿಲಿಂಡರ್ ಮೇಲೆ ಅವಲಂಬಿತವಾಗದೆ ಇಂತಹ ಪರ್ಯಾಯಗಳನ್ನು ಸಿದ್ಧಪಡಿಸಿಕೊಳ್ಳುವುದು ಪ್ರತಿ ಮನೆಯ ಅಗತ್ಯವಾಗಿದೆ.
