ಮಹಾರಾಷ್ಟ್ರ ರಾಜಕೀಯದಲ್ಲಿ ಉಪಮುಖ್ಯಮಂತ್ರಿ ಸುನೇತ್ರಾ ಪವಾರ್ ಅವರನ್ನು ಕುರಿತು ಕಾಂಗ್ರೆಸ್ ಪಕ್ಷ ಮಾಡಿರುವ “ಗುಂಗಿ ಗುಡಿಯಾ” (ಮೂಕ ಗೊಂಬೆ) ಎಂಬ ವಿವಾದಾತ್ಮಕ ಹೇಳಿಕೆಯು ತೀವ್ರ ಸ್ವರೂಪ ಪಡೆದುಕೊಂಡಿದೆ.
ರಾಜ್ಯದ ಮೊದಲ ಮಹಿಳಾ ಉಪಮುಖ್ಯಮಂತ್ರಿಯವರ ವಿರುದ್ಧ ವಿರೋಧ ಪಕ್ಷ ನೀಡಿರುವ ಈ ಹೇಳಿಕೆಯು ಆಡಳಿತ ಮತ್ತು ವಿರೋಧ ಪಕ್ಷಗಳ ನಡುವೆ ತೀವ್ರ ವಾಕ್ಸಮರಕ್ಕೆ ಕಾರಣವಾಗಿದೆ.
ಮೌನ ವಹಿಸಿದ ಸುನೇತ್ರಾ ಪವಾರ್
ಬೀಡ್ ಜಿಲ್ಲೆಯ ಕಾನೂನು-ಸುವ್ಯವಸ್ಥೆ ಪರಿಸ್ಥಿತಿಯ ಕುರಿತು ಪತ್ರಕರ್ತರು ಕೇಳಿದ ಪ್ರಶ್ನೆಗಳಿಗೆ ಸುನೇತ್ರಾ ಪವಾರ್ ಅವರು ಪ್ರತಿಕ್ರಿಯಿಸದೆ ಮೌನವಾಗಿದ್ದರು. ಈ ವೇಳೆ ಎನ್‌ಸಿಪಿ ನಾಯಕ ಧನಂಜಯ್ ಮುಂಡೆ ಅವರು ಪತ್ರಕರ್ತರನ್ನು ತಡೆಯಲು ಯತ್ನಿಸಿದ್ದರು ಎಂದು ವರದಿಯಾಗಿದೆ. ಸುನೇತ್ರಾ ಪವಾರ್ ಅವರು ಬೀಡ್ ಜಿಲ್ಲೆಯ ಉಸ್ತುವಾರಿ ಸಚಿವರಾಗಿದ್ದಾರೆ.
ಈ ಘಟನೆಯನ್ನು ಆಧರಿಸಿ ಸೋಮವಾರ ಸಾಮಾಜಿಕ ಜಾಲತಾಣದಲ್ಲಿ ವೀಡಿಯೊವೊಂದನ್ನು ಪೋಸ್ಟ್ ಮಾಡಿದ್ದ ಕಾಂಗ್ರೆಸ್, “ಸುನೇತ್ರಾ ಪವಾರ್ ಅವರೇ, ನೀವು ಇನ್ನೂ ಎಷ್ಟು ದಿನಗಳ ಕಾಲ ‘ಮೂಕ ಗೊಂಬೆ’ಯಾಗಿ ಉಳಿಯುತ್ತೀರಿ?” ಎಂದು ಪ್ರಶ್ನಿಸಿತ್ತು.
ಎನ್‌ಸಿಪಿ ತೀವ್ರ ಪ್ರತಿರೋಧ
ಕಾಂಗ್ರೆಸ್‌ನ ಈ ಹೇಳಿಕೆಗೆ ನ್ಯಾಷನಲಿಸ್ಟ್ ಕಾಂಗ್ರೆಸ್ ಪಕ್ಷ (ಎನ್‌ಸಿಪಿ) ತೀವ್ರ ಆಕ್ರೋಶ ವ್ಯಕ್ತಪಡಿಸಿದೆ. ಮುಂಬೈನಲ್ಲಿರುವ ಮಹಾರಾಷ್ಟ್ರ ಕಾಂಗ್ರೆಸ್ ಕಚೇರಿಗೆ ನುಗ್ಗಿದ ಎನ್‌ಸಿಪಿ ನಾಯಕರು ಘೋಷಣೆಗಳನ್ನು ಕೂಗಿ, ರಾಜ್ಯ ಕಾಂಗ್ರೆಸ್ ಅಧ್ಯಕ್ಷ ಹರ್ಷವರ್ಧನ್ ಸಪ್ಕಾಲ್ ಅವರಿಂದ ಕ್ಷಮೆಯಾಚನೆಗೆ ಆಗ್ರಹಿಸಿದರು.
ಎನ್‌ಸಿಪಿ ವಕ್ತಾರ ಉಮೇಶ್ ಪಾಟೀಲ್,
ದಿ. ಪ್ರಧಾನಿ ಇಂದಿರಾ ಗಾಂಧಿ ಅವರ ವಿರುದ್ಧ ಹಿಂದೆ ಬಳಸಲಾಗಿದ್ದ ಕುಖ್ಯಾತ ಅವಹೇಳನಕಾರಿ ಪದವನ್ನು ಈಗ ಕಾಂಗ್ರೆಸ್ ಪಕ್ಷವೇ ಬಳಸುತ್ತಿರುವುದನ್ನು ಖಂಡಿಸಿದರು.
ವಿರೋಧ ಪಕ್ಷವು ಇಂದಿರಾ ಗಾಂಧಿಯವರ ಮೇಲಿನ ಆ ಟೀಕೆಗಳು ಸರಿ ಎಂದು ಪರೋಕ್ಷವಾಗಿ ಒಪ್ಪಿಕೊಳ್ಳುತ್ತಿದೆಯೇ ಎಂದು ಪ್ರಶ್ನಿಸಿದರು. ಮಹಿಳೆಯರನ್ನು ಕೀಳಾಗಿ ಕಾಣುವ ಭಾಷೆ ರಾಜಕೀಯಕ್ಕೆ ಸರಿಹೊಂದುವುದಿಲ್ಲ ಎಂದರು.
ಉಪಮುಖ್ಯಮಂತ್ರಿ
ಏಕನಾಥ್ ಶಿಂಧೆ,
ಮಹಾರಾಷ್ಟ್ರದ ಮೊದಲ ಮಹಿಳಾ ಉಪಮುಖ್ಯಮಂತ್ರಿಯವರ ವಿರುದ್ಧ ಕಾಂಗ್ರೆಸ್ ಮಾಡಿರುವ ಟೀಕೆಗಳು ರಾಜ್ಯದ ಮಹಿಳೆಯರಿಗೆ ಮಾಡಲಾದ ಅವಮಾನವಾಗಿದ್ದು, ಕಾಂಗ್ರೆಸ್ ಪಕ್ಷ ಈ ಬಗ್ಗೆ ನಾಚಿಕೆಪಡಬೇಕು ಎಂದು ತೀವ್ರವಾಗಿ ಖಂಡಿಸಿದರು.
ಎನ್‌ಸಿಪಿ-ಎಸ್‌ಪಿ
ರೋಹಿತ್ ಪವಾರ್,
ದಿವಂಗತ ಇಂದಿರಾ ಗಾಂಧಿಯವರ ರಾಜಕೀಯ ಜೀವನವನ್ನು ಉಲ್ಲೇಖಿಸಿ, ಅಂದು ವಿರೋಧಕರು ಅವರನ್ನು ‘ಗುಂಗಿ ಗುಡಿಯಾ’ ಎಂದು ಕರೆದರೂ ಅವರು ತಮ್ಮ ಕಾರ್ಯದ ಮೂಲಕ ಆ ಟೀಕೆಗಳು ತಪ್ಪು ಎಂದು ಸಾಬೀತುಪಡಿಸಿದ್ದರು ಎಂದು ಅಭಿಪ್ರಾಯಪಟ್ಟರು.
ಕಾಂಗ್ರೆಸ್ ತನ್ನ ನಿಲುವು ಸಮರ್ಥಿಸಿಕೊಂಡಿದೆ
ವಿವಾದ ಭುಗಿಲೆದ್ದ ಬೆನ್ನಲ್ಲೇ ತಮ್ಮ ಹೇಳಿಕೆಯನ್ನು ಸಮರ್ಥಿಸಿಕೊಂಡಿರುವ ಮಹಾರಾಷ್ಟ್ರ ಕಾಂಗ್ರೆಸ್ ಅಧ್ಯಕ್ಷ ಹರ್ಷವರ್ಧನ್ ಸಪ್ಕಾಲ್, ಇದು ಯಾವುದೇ ನಿಂದನೆಯಲ್ಲ, ಬದಲಿಗೆ ಸುನೇತ್ರಾ ಪವಾರ್ ಅವರ ಸಾರ್ವಜನಿಕ ನಡವಳಿಕೆಯ ವಿವರಣೆಯಷ್ಟೇ ಎಂದು ಸ್ಪಷ್ಟಪಡಿಸಿದ್ದಾರೆ. ಪತ್ರಕರ್ತರು ನಿರಂತರವಾಗಿ ಪ್ರಶ್ನೆಗಳನ್ನು ಕೇಳುತ್ತಿದ್ದರೂ ಉಪಮುಖ್ಯಮಂತ್ರಿಗಳು ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ ಮತ್ತು ಸ್ಥಳದಲ್ಲಿದ್ದ ಮತ್ತೊಬ್ಬ ನಾಯಕ ಪತ್ರಕರ್ತರನ್ನು ತಡೆಯುತ್ತಿದ್ದರೂ ಪವಾರ್ ಮೌನವಾಗಿದ್ದರು ಎಂದು ಅವರು ವಾದಿಸಿದ್ದಾರೆ.
ಪ್ರಜಾಪ್ರಭುತ್ವದಲ್ಲಿ ನೀತಿಗಳ ಕುರಿತು ಭಿನ್ನಾಭಿಪ್ರಾಯಗಳು ಮತ್ತು ತೀಕ್ಷ್ಣ ಟೀಕೆಗಳು ಸಾಮಾನ್ಯವಾಗಿದ್ದರೂ, ಮಹಿಳಾ ನಾಯಕಿಯರ ವಿರುದ್ಧ ಇಂತಹ ಪದಗಳ ಬಳಕೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.
