ಪ್ರಸ್ತುತ ದಿನಗಳಲ್ಲಿ ಬದಲಾದ ಜೀವನಶೈಲಿ, ಅನಾರೋಗ್ಯಕರ ಆಹಾರ ಪದ್ಧತಿ ಮತ್ತು ದೈಹಿಕ ಶ್ರಮದ ಕೊರತೆಯಿಂದಾಗಿ ಫ್ಯಾಟಿ ಲಿವರ್ ಸಮಸ್ಯೆ ಪ್ರತಿಯೊಬ್ಬರಲ್ಲೂ ಸಾಮಾನ್ಯವಾಗುತ್ತಿದೆ. ಆಹಾರ ಜೀರ್ಣಕ್ರಿಯೆ, ಜೀವಸತ್ವಗಳ ಶೇಖರಣೆ, ರಕ್ತದಲ್ಲಿನ ಸಕ್ಕರೆ ಮತ್ತು ಕೊಲೆಸ್ಟ್ರಾಲ್ ನಿಯಂತ್ರಣ ಹಾಗೂ ದೇಹದಿಂದ ವಿಷಕಾರಿ ಅಂಶಗಳನ್ನು ಹೊರಹಾಕುವಲ್ಲಿ ಯಕೃತ್ತು ಅತ್ಯಂತ ಪ್ರಮುಖ ಪಾತ್ರ ವಹಿಸುತ್ತದೆ. ಆದರೆ ಸೂಕ್ತ ಆಹಾರ ಕ್ರಮ ಹಾಗೂ ಜೀವನಶೈಲಿಯ ಬದಲಾವಣೆಗಳ ಮೂಲಕ ಫ್ಯಾಟಿ ಲಿವರ್ ಸಮಸ್ಯೆಯನ್ನು ನೈಸರ್ಗಿಕವಾಗಿ ಸಂಪೂರ್ಣವಾಗಿ ಶಮನಗೊಳಿಸಲು ಸಾಧ್ಯವಿದೆ ಎಂದು ಆಯುರ್ವೇದ ತಜ್ಞರು ತಿಳಿಸಿದ್ದಾರೆ.
ಆಯುರ್ವೇದ ತಜ್ಞೆ ಡಾ. ಹಂಸಾಜಿ ಅವರ ಪ್ರಕಾರ, 21 ದಿನಗಳ ವಿಶೇಷ ದಿನಚರಿಯನ್ನು ಅನುಸರಿಸುವ ಮೂಲಕ ಯಕೃತ್ತಿನ ಆರೋಗ್ಯವನ್ನು ಮರುಪಡೆಯಬಹುದು. ಈ ಯೋಜನೆಯಲ್ಲಿ ಸಕ್ಕರೆಯಂಶವಿರುವ ಪಾನೀಯಗಳು, ತಂಪಾದ ಪಾನೀಯಗಳು ಮತ್ತು ಪ್ಯಾಕ್ ಮಾಡಿದ ಜ್ಯೂಸ್‌ಗಳನ್ನು ಸಂಪೂರ್ಣವಾಗಿ tyಜಿಸುವುದು ಮೊದಲ ಹಂತವಾಗಿದೆ. ಇದಕ್ಕೆ ಪರ್ಯಾಯವಾಗಿ ನಾರಿನಂಶ ಹೆಚ್ಚಿರುವ ನೆಲ್ಲಿಕಾಯಿ, ಸೀಬೆಹಣ್ಣು, ಕಿತ್ತಳೆ ಹಾಗೂ ಪರಂಗಿ ಹಣ್ಣುಗಳನ್ನು ಸೇವಿಸುವುದು ಉತ್ತಮ. ಊಟದ ತಟ್ಟೆಯಲ್ಲಿ ಅರ್ಧದಷ್ಟು ಭಾಗ ತರಕಾರಿಗಳು, ಕಾಲು ಭಾಗ ಪ್ರೋಟೀನ್ ಸರಿಹೊಂದುವ ಆಹಾರ ಮತ್ತು ಉಳಿದ ಕಾಲು ಭಾಗ ಧಾನ್ಯಗಳಿರಬೇಕು.
ಬಾದಾಮಿ, ವಾಲ್‌ನಟ್ಸ್, ಅಗಸೆಬೀಜ ಮತ್ತು ಕುಂಬಳಕಾಯಿ ಬೀಜಗಳಲ್ಲಿರುವ ಆರೋಗ್ಯಕರ ಕೊಬ್ಬನ್ನು ಆಹಾರದಲ್ಲಿ ಸೇರಿಸಿಕೊಳ್ಳುವುದು ಅಗತ್ಯ. ಇದರೊಂದಿಗೆ ನಿತ್ಯವೂ ನಡಿಗೆ, ಉತ್ತಾಸನ, ಸೇತುಬಂಧಾಸನ ಹಾಗೂ ಪ್ಲಾಂಕ್‌ನಂತಹ ಸರಳ ವ್ಯಾಯಾಮಗಳು ಮತ್ತು ಪ್ರಾಣಾಯಾಮಗಳನ್ನು ಅಭ್ಯಾಸ ಮಾಡುವುದು ಒಳಿತು. ರಾತ್ರಿಯ ಊಟವನ್ನು ಮಲಗುವ ಕನಿಷ್ಠ ಎರಡು ಮೂರು ಗಂಟೆಗಳ ಮುಂಚಿತವಾಗಿ ಮುಗಿಸುವುದು, ಧೂಮಪಾನ ಮತ್ತು ಮದ್ಯಪಾನದಿಂದ ದೂರವಿರುವುದು ಹಾಗೆಯೇ ಸರಿಯಾದ ನಿದ್ರೆ ಮತ್ತು ಮಾನಸಿಕ ಒತ್ತಡ ನಿರ್ವಹಣೆ ಈ ದಿನಚರಿಯ ಪ್ರಮುಖ ಭಾಗಗಳಾಗಿವೆ.
ಯಕೃತ್ತಿನ ರಕ್ಷಣೆಗೆ ‘LIVER’ ಎಂಬ ಸರಳ ಸೂತ್ರವನ್ನು ನಿತ್ಯವೂ ಪಾಲಿಸುವುದು ಸೂಕ್ತ. ಅಂದರೆ ದ್ರವ ರೂಪದ ಸಕ್ಕರೆಯನ್ನು ಸಂಪೂರ್ಣವಾಗಿ ತ್ಯಜಿಸುವುದು, ನಾರಿನಂಶ ಹಾಗೂ ಪ್ರೋಟೀನ್‌ಯುಕ್ತ ಆಹಾರ ಸೇವನೆ, ಸಕ್ರಿಯ ದೈಹಿಕ ಚಟುವಟಿಕೆ, ಬೇಗನೇ ರಾತ್ರಿ ಊಟ ಮುಗಿಸುವುದು ಹಾಗೂ ದೇಹಕ್ಕೆ ವಿಶ್ರಾಂತಿ ನೀಡುವುದು ಈ ಸೂತ್ರದ ಮುಖ್ಯ ಕಲ್ಪನೆಯಾಗಿದೆ. ಯಾವುದೇ ಕಠಿಣ ಪಥ್ಯಗಳಿಗಿಂತ ನಿರಂತರವಾಗಿ ಪಾಲಿಸುವ ಇಂತಹ ಉತ್ತಮ ಅಭ್ಯಾಸಗಳು ಫ್ಯಾಟಿ ಲಿವರ್ ತಡೆಯಲು ಸಹಕಾರಿ.
