ಬೆಂಗಳೂರು: ಜಾಗತಿಕ ತಂತ್ರಜ್ಞಾನ ಹಾಗೂ ಎಐ ಸೇವಾ ಸಂಸ್ಥೆಯಾದ ಕಾಗ್ನಿಜೆಂಟ್, ಭಾರತದಲ್ಲಿ ತನ್ನ ನೂತನ ಟ್ಯಾಲೆಂಟ್ ಆಕ್ಸಿಲರೇಟರ್ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದೆ. ಈ ಯೋಜನೆಯಡಿ ದೇಶದ 37 ನಗರಗಳಲ್ಲಿರುವ ಐಐಎಂ ಬೆಂಗಳೂರು, ಐಐಎಂ ಲಕ್ನೋ, ಐಐಎಂ ಕೋಳಿಕ್ಕೋಡ್, ಎಕ್ಸ್‌ಎಲ್‌ಆರ್‌ಐ ಹಾಗೂ ಐಎಸ್‌ಬಿ ಹೈದರಾಬಾದ್ ಸೇರಿದಂತೆ 58 ಪ್ರಮುಖ ಬಿಸಿನೆಸ್ ಸ್ಕೂಲ್‌ಗಳಿಂದ ಒಟ್ಟು 489 ಹೊಸ ಪದವೀಧರರನ್ನು ನೇಮಕ ಮಾಡಿಕೊಳ್ಳಲಾಗಿದೆ.ಈ ನೇಮಕಾತಿಯಲ್ಲಿ ಶೇ. 42ಕ್ಕೂ ಹೆಚ್ಚು ಮಹಿಳೆಯರು ಆಯ್ಕೆಯಾಗಿರುವುದು ವಿಶೇಷ.
ಏನಿದು ‘ಟ್ಯಾಲೆಂಟ್ ಆಕ್ಸಿಲರೇಟರ್’ ಕಾರ್ಯಕ್ರಮ?
ಹೊಸದಾಗಿ ಆಯ್ಕೆಯಾದ ಉದ್ಯೋಗಿಗಳಿಗೆ ಬೆಂಗಳೂರು, ಚೆನ್ನೈ, ಹೈದರಾಬಾದ್ ಮತ್ತು ಪುಣೆ ಕ್ಯಾಂಪಸ್‌ಗಳಲ್ಲಿ ಏಕಕಾಲದಲ್ಲಿ 2 ವಾರಗಳ ತರಬೇತಿ ನೀಡಲಾಗುತ್ತದೆ. ಈ ಅವಧಿಯಲ್ಲಿ:
ಕಂಪನಿಯ ತತ್ವಗಳು, ಸೇಲ್ಸ್ ಹಾಗೂ ಮಾರ್ಕೆಟಿಂಗ್ ಕುರಿತು ತರಬೇತಿ ನೀಡಲಾಗುತ್ತದೆ.
ಕಾಗ್ನಿಜೆಂಟ್‌ನ ಹಿರಿಯ ನಾಯಕತ್ವ ತಂಡದೊಂದಿಗೆ ನೇರವಾಗಿ ಸಂವಾದ ನಡೆಸುವ ಅವಕಾಶ ಸಿಗಲಿದೆ.
ನಾನ್-ಟೆಕ್ ಅಭ್ಯರ್ಥಿಗಳಿಗೂ ಅವಕಾಶ
ಎಐ ಯುಗದಲ್ಲಿ ಇಂಜಿನಿಯರ್‌ಗಳ ಜೊತೆಗೆ ವಿಭಿನ್ನ ಕೌಶಲ್ಯವುಳ್ಳವರ ಅಗತ್ಯವನ್ನು ಮನಗಂಡಿರುವ ಕಾಗ್ನಿಜೆಂಟ್, ಶೇ. 37ಕ್ಕೂ ಹೆಚ್ಚು ನಾನ್-ಸ್ಟೆಮ್ (STEM ಅಲ್ಲದ) ಹಿನ್ನೆಲೆಯ ಅಭ್ಯರ್ಥಿಗಳನ್ನು ನೇಮಿಸಿಕೊಂಡಿದೆ. ಸಮಾಜಶಾಸ್ತ್ರ, ಮನೋವಿಜ್ಞಾನ, ಇಂಡಸ್ಟ್ರಿಯಲ್ ಡಿಸೈನ್ ಹಾಗೂ ಆಫೀಸ್ ಮ್ಯಾನೇಜ್‌ಮೆಂಟ್ ಪದವೀಧರರಿಗೂ ಇಲ್ಲಿ ಅವಕಾಶ ಕಲ್ಪಿಸಲಾಗಿದೆ.
“ವೈವಿಧ್ಯಮಯ ಚಿಂತನೆಗಳು ಗ್ರಾಹಕರಿಗೆ ಉತ್ತಮ ಮೌಲ್ಯ ತಂದುಕೊಡುತ್ತವೆ. ಎಐ ತಂತ್ರಜ್ಞಾನವನ್ನು ಬಳಸಿ ನೈಜ ಜಗತ್ತಿನ ವಾಣಿಜ್ಯ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲು ಈ ತರಬೇತಿ ಹೊಸಬರನ್ನು ಸಜ್ಜುಗೊಳಿಸಲಿದೆ.”
ರಾಜೇಶ್ ವಾರಿಯರ್, ಸಿಎಂಡಿ, ಕಾಗ್ನಿಜೆಂಟ್ ಇಂಡಿಯಾ
ಎಐ ಯುಗದ ಹೊಸ ಗುರಿ
ಕಾಗ್ನಿಜೆಂಟ್ ತನ್ನ ಎಐ ಸೇವೆಗಳನ್ನು ವಿಸ್ತರಿಸಲು ಬೃಹತ್ ಯೋಜನೆ ರೂಪಿಸಿದ್ದು, ಭವಿಷ್ಯದಲ್ಲಿ 5,000 ಫ್ರಾಂಟಿಯರ್ ಸರ್ಟಿಫೈಡ್ ಇಂಜಿನಿಯರ್‌ಗಳು ಹಾಗೂ 10,000 ಬಿಸಿನೆಸ್ ಆಪರೇಟರ್‌ಗಳನ್ನು ಸೃಷ್ಟಿಸುವ ಗುರಿ ಹೊಂದಿದೆ.
