ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ಸದಾ ಕಟ್ಟುನಿಟ್ಟಿನ ಆಡಳಿತಕ್ಕೆ ಹೆಸರಾದವರು. ಆದರೆ ಇತ್ತೀಚೆಗೆ ಗೋರಖ್‌ಪುರದಲ್ಲಿ ಪುಟ್ಟ ಮಗುವೊಂದರ ಜೊತೆ ಅವರು ನಡೆಸಿದ ಸಂಭಾಷಣೆ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಜನರ ಮನ ಗೆಲ್ಲುತ್ತಿದೆ. ಮುಖ್ಯಮಂತ್ರಿಗಳ ಪ್ರಶ್ನೆಗೆ ಮಗು ನೀಡಿದ ಅನಿರೀಕ್ಷಿತ ಮತ್ತು ಮುಗ್ಧ ಉತ್ತರಕ್ಕೆ ಸ್ವತಃ ಯೋಗಿ ಅವರೇ ಜೋರಾಗಿ ನಕ್ಕಿದ್ದಾರೆ.
ಏನಿದು ಘಟನೆ? ಮಕರ ಸಂಕ್ರಾಂತಿ ಹಬ್ಬದ ಸಂದರ್ಭದಲ್ಲಿ ಸಿಎಂ ಯೋಗಿ ಆದಿತ್ಯನಾಥ್ ಅವರು ಗೋರಖ್‌ನಾಥ ದೇವಸ್ಥಾನದಲ್ಲಿ ವಿಶೇಷ ಪೂಜೆ ಸಲ್ಲಿಸಿ, ನಂತರ ಸಾರ್ವಜನಿಕರನ್ನು ಭೇಟಿ ಮಾಡುತ್ತಿದ್ದರು. ಈ ವೇಳೆ ಪುಟ್ಟ ಮಗುವೊಂದು ಮುಖ್ಯಮಂತ್ರಿಗಳ ಆಶೀರ್ವಾದ ಪಡೆಯಲು ಹತ್ತಿರ ಬಂದಿದೆ. ಮಗುವನ್ನು ಪ್ರೀತಿಯಿಂದ ಮಾತನಾಡಿಸಿದ ಯೋಗಿ, “ನಿನಗೆ ಏನು ಬೇಕು?” (ಕ್ಯಾ ಚಾಹಿಯೇ?) ಎಂದು ಕೇಳಿದ್ದಾರೆ.
ಮೊದಮೊದಲು ಮಗು ಸುಮ್ಮನಿದ್ದರೂ, ಮುಖ್ಯಮಂತ್ರಿಗಳು ಎರಡು-ಮೂರು ಬಾರಿ ಪ್ರೀತಿಯಿಂದ ಅದೇ ಪ್ರಶ್ನೆಯನ್ನು ಕೇಳಿದಾಗ, ಆ ಮಗು ಮೆಲ್ಲಗೆ ಯೋಗಿ ಅವರ ಕಿವಿಯಲ್ಲಿ “ನನಗೆ ಚಿಪ್ಸ್ ಬೇಕು” ಎಂದು ಹೇಳಿದೆ. ಮಗುವಿನ ಈ ಮುಗ್ಧ ಉತ್ತರವನ್ನು ಕೇಳಿದ ತಕ್ಷಣ ಮುಖ್ಯಮಂತ್ರಿಗಳು ನಗೆಗಡಲಲ್ಲಿ ತೇಲಿದ್ದಾರೆ. ಅಲ್ಲಿದ್ದ ಅಧಿಕಾರಿಗಳು ಮತ್ತು ಸಾರ್ವಜನಿಕರು ಕೂಡ ಮಗುವಿನ ಬೇಡಿಕೆಗೆ ನಕ್ಕಿದ್ದಾರೆ.
ವೈರಲ್ ಆದ ವಿಡಿಯೋ ಎಕ್ಸ್ (ಹಿಂದಿನ ಟ್ವಿಟರ್) ಪ್ಲಾಟ್‌ಫಾರ್ಮ್‌ನಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋ ಕೆಲವೇ ಗಂಟೆಗಳಲ್ಲಿ ಸಾವಿರಾರು ವೀಕ್ಷಣೆಗಳನ್ನು ಪಡೆದುಕೊಂಡಿದೆ. ಮುಖ್ಯಮಂತ್ರಿಗಳ ಮೃದು ಸ್ವಭಾವ ಮತ್ತು ಮಗುವಿನ ಮುಗ್ಧತೆಯನ್ನು ನೆಟ್ಟಿಗರು ಕೊಂಡಾಡುತ್ತಿದ್ದಾರೆ. ಸಂಕ್ರಾಂತಿ ಹಬ್ಬದಂದು ಗೋರಖ್‌ನಾಥ ದೇವಸ್ಥಾನದಲ್ಲಿ ಸಾಂಪ್ರದಾಯಿಕ ‘ಕಿಚಡಿ’ ಅರ್ಪಿಸಿದ ಬಳಿಕ ಈ ಸುಂದರ ಕ್ಷಣ ದಾಖಲಾಗಿದೆ.
