ಚೀನಾದಲ್ಲಿ ಅತ್ತೆಯೊಬ್ಬರು ಕಳೆದ 17 ವರ್ಷಗಳಿಂದ ತಮ್ಮ ಸೊಸೆಯನ್ನು ಸ್ವಂತ ಮಗಳಂತೆ ಆರೈಕೆ ಮಾಡುತ್ತಿರುವ ಹೃದಯಸ್ಪರ್ಶಿ ಘಟನೆ ಎಲ್ಲರ ಗಮನ ಸೆಳೆದಿದೆ. ಮದುವೆಯಾದ ಕೇವಲ ಒಂದು ತಿಂಗಳಲ್ಲೇ ರಸ್ತೆ ಅಪಘಾತಕ್ಕೆ ಒಳಗಾಗಿ ಗಂಭೀರವಾಗಿ ಗಾಯಗೊಂಡಿದ್ದ ಸೊಸೆಯನ್ನು 68 ವರ್ಷದ ಕ್ಸುವಾನ್ ಫೆಂಗ್ಯಿಂಗ್ ಇಂದಿಗೂ ಪ್ರೀತಿಯಿಂದ ನೋಡಿಕೊಳ್ಳುತ್ತಿದ್ದಾರೆ. ಹಲವು ವರ್ಷಗಳ ಆರೈಕೆಯ ಬಳಿಕ ಸೊಸೆಯ ಆರೋಗ್ಯದಲ್ಲಿ ಸ್ವಲ್ಪ ಚೇತರಿಕೆ ಕಂಡುಬಂದಿದ್ದು, ಈಗ ಅವರು ಕೆಲವು ಪದಗಳನ್ನು ಮಾತನಾಡುವ ಮತ್ತು ಸರಳ ಕೆಲಸಗಳನ್ನು ಮಾಡುವ ಮಟ್ಟಕ್ಕೆ ಸುಧಾರಿಸಿದ್ದಾರೆ.
ಸಾಮಾನ್ಯವಾಗಿ ಅತ್ತೆ-ಸೊಸೆಯ ಸಂಬಂಧದ ಬಗ್ಗೆ ಹಲವು ರೀತಿಯ ಮಾತುಗಳು ಕೇಳಿಬರುತ್ತವೆ. ಆದರೆ, ಚೀನಾದ ಈ ಘಟನೆ ಸಂಬಂಧಗಳಲ್ಲಿ ಪ್ರೀತಿ ಮತ್ತು ಮಾನವೀಯತೆ ಎಷ್ಟು ಮುಖ್ಯ ಎಂಬುದನ್ನು ತೋರಿಸುತ್ತದೆ. ಈ ಕುರಿತು ಸೌತ್ ಚೈನಾ ಮಾರ್ನಿಂಗ್ ಪೋಸ್ಟ್ (SCMP) ವರದಿ ಮಾಡಿದೆ.
ಮದುವೆಯಾದ ತಿಂಗಳಲ್ಲೇ ಸಂಭವಿಸಿದ ದುರಂತ
ಚೀನಾದ ಶಾನ್‌ಡಾಂಗ್ ಪ್ರಾಂತ್ಯದ ಕ್ವಿಂಗ್‌ಯುನ್ ಕೌಂಟಿಯಲ್ಲಿ 2009ರಲ್ಲಿ ಈ ಘಟನೆ ನಡೆದಿತ್ತು. ಕ್ಸು ಎಂಬ ಯುವತಿಗೆ ಮದುವೆಯಾಗಿ ಕೇವಲ ಒಂದು ತಿಂಗಳಾಗಿತ್ತು. ಹೊಸ ಜೀವನದ ಕನಸು ಕಾಣುತ್ತಿದ್ದ ಆಕೆ ರಸ್ತೆ ಅಪಘಾತಕ್ಕೆ ಒಳಗಾದರು. ವೇಗವಾಗಿ ಬಂದ ಟ್ರಕ್ ಡಿಕ್ಕಿ ಹೊಡೆದ ಪರಿಣಾಮ ಅವರ ಮೆದುಳಿಗೆ ಗಂಭೀರ ಹಾನಿಯಾಯಿತು. ಇದರಿಂದ ಅವರು ದೀರ್ಘಕಾಲ ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದರು.
ಈ ಘಟನೆ ಕುಟುಂಬಕ್ಕೆ ದೊಡ್ಡ ಆಘಾತ ನೀಡಿತ್ತು. ಆದರೆ, ಸೊಸೆಯನ್ನು ಕೈಬಿಡದ ಅತ್ತೆ ಕ್ಸುವಾನ್ ಫೆಂಗ್ಯಿಂಗ್ ಆಕೆಯ ಆರೈಕೆಯ ಜವಾಬ್ದಾರಿಯನ್ನು ಹೊತ್ತುಕೊಂಡರು. ಅಂದಿನಿಂದ ಇಂದಿನವರೆಗೂ ಸೊಸೆಯ ಅಗತ್ಯಗಳನ್ನು ಪೂರೈಸುತ್ತಾ ಬಂದಿದ್ದಾರೆ.
ಸೊಸೆಗೆ ಆಹಾರ ನೀಡುವುದು, ವೈಯಕ್ತಿಕ ಸ್ವಚ್ಛತೆ ಕಾಪಾಡುವುದು ಮತ್ತು ದೈನಂದಿನ ಅಗತ್ಯಗಳನ್ನು ಪೂರೈಸುವುದು ಸೇರಿದಂತೆ ಬಹುತೇಕ ಎಲ್ಲ ಕೆಲಸಗಳನ್ನು ಕ್ಸುವಾನ್ ಅವರೇ ಮಾಡುತ್ತಾರೆ. ಸೊಸೆಗೆ ದ್ರವ ಆಹಾರವನ್ನು ಚಮಚದ ಮೂಲಕ ನಿಧಾನವಾಗಿ ತಿನ್ನಿಸುತ್ತಾರೆ. ಒಂದು ಹೊತ್ತಿನ ಊಟ ಮುಗಿಸಲು ಸುಮಾರು ಒಂದು ಗಂಟೆ ಬೇಕಾಗುತ್ತದೆ.
ದೀರ್ಘಕಾಲ ಹಾಸಿಗೆಯಲ್ಲೇ ಇರುವುದರಿಂದ ದೇಹದ ಮೇಲೆ ಗಾಯಗಳಾಗದಂತೆ ದಿನಕ್ಕೆ ಹತ್ತಕ್ಕೂ ಹೆಚ್ಚು ಬಾರಿ ಮಲಗುವ ಭಂಗಿಯನ್ನು ಬದಲಾಯಿಸುತ್ತಾರೆ. ಸ್ನಾಯುಗಳಿಗೆ ಮಸಾಜ್ ಮಾಡುವುದರ ಜೊತೆಗೆ, ಸ್ವಚ್ಛತೆಯ ಬಗ್ಗೆಯೂ ವಿಶೇಷ ಕಾಳಜಿ ವಹಿಸುತ್ತಾರೆ.
ಸೊಸೆಯ ಆರೋಗ್ಯದಲ್ಲಿ ಸುಧಾರಣೆ ಕಾಣಲಿ ಎಂಬ ಆಶಯದಿಂದ ಅವರೊಂದಿಗೆ ನಿರಂತರವಾಗಿ ಮಾತನಾಡುತ್ತಾರೆ. ಮನೆಯ ಮತ್ತು ಗ್ರಾಮದ ಸುದ್ದಿಗಳನ್ನು ಹಂಚಿಕೊಳ್ಳುತ್ತಾರೆ. ಆಕೆಗೆ ಇಷ್ಟವಾದ ಹಾಡುಗಳನ್ನು ಕೇಳಿಸುತ್ತಾರೆ. ಹೆಸರಿಡಿದು ಕರೆದು ಪ್ರತಿಕ್ರಿಯೆಗಾಗಿ ಕಾಯುತ್ತಾರೆ.
https://x.com/SCMPNews/status/2114202277049176125?s=20
ಹಲವು ವರ್ಷಗಳ ಬಳಿಕ ಚೇತರಿಕೆಯ ಲಕ್ಷಣ
ದೀರ್ಘಕಾಲದ ಆರೈಕೆಯ ಬಳಿಕ ಕ್ಸು ಅವರಲ್ಲಿ ಪ್ರಜ್ಞೆಯ ಕೆಲವು ಲಕ್ಷಣಗಳು ಕಾಣಿಸಿಕೊಂಡವು. ಆದರೆ, ಮೆದುಳಿಗೆ ಉಂಟಾದ ಗಂಭೀರ ಹಾನಿಯಿಂದಾಗಿ ಅವರ ಅರಿವು ಮತ್ತು ಗ್ರಹಿಕೆಯ ಸಾಮರ್ಥ್ಯ ನಾಲ್ಕು ವರ್ಷದ ಮಗುವಿನ ಮಟ್ಟದಲ್ಲಿದೆ ಎಂದು ವರದಿಯಾಗಿದೆ.
ಈಗ ಕ್ಸು ಕೆಲವು ಪದಗಳನ್ನು ಮಾತನಾಡಬಲ್ಲರು. ಸರಳವಾದ ಅಡುಗೆಯನ್ನು ಮಾಡಿಕೊಳ್ಳುವಷ್ಟು ಚೇತರಿಸಿಕೊಂಡಿದ್ದಾರೆ. ಈ ಬೆಳವಣಿಗೆ ಅತ್ತೆ ಕ್ಸುವಾನ್ ಅವರಿಗೆ ಸಂತಸ ತಂದಿದೆ. ಹಲವು ವರ್ಷಗಳ ಆರೈಕೆಯ ನಡುವೆ ಸೊಸೆಯಲ್ಲಿ ಕಂಡುಬಂದ ಈ ಸಣ್ಣ ಪ್ರಗತಿಯೂ ಅವರಿಗೆ ದೊಡ್ಡ ನೆಮ್ಮದಿಯಾಗಿದೆ.
‘ನಾನು ಇಲ್ಲದಿದ್ದರೂ ಅವಳಿಗೆ ಊಟ ಸಿಗಬೇಕು’
ವಯಸ್ಸಾಗುತ್ತಿದ್ದರೂ ಕ್ಸುವಾನ್ ಅವರ ಚಿಂತೆ ಮಾತ್ರ ಕಡಿಮೆಯಾಗಿಲ್ಲ. ತಾವು ಇಲ್ಲದ ಸಮಯದಲ್ಲಿ ಸೊಸೆಯನ್ನು ಯಾರು ನೋಡಿಕೊಳ್ಳುತ್ತಾರೆ ಎಂಬ ಆತಂಕ ಅವರನ್ನು ಕಾಡುತ್ತಿದೆ. ಸೊಸೆ ಇನ್ನಷ್ಟು ಚೇತರಿಸಿಕೊಂಡು ಸ್ವತಂತ್ರವಾಗಿ ಬದುಕುವಂತಾಗಬೇಕು ಎಂಬುದು ಅವರ ಆಸೆ.
ಸೊಸೆಗೆ ಸರಳವಾದ ಅಡುಗೆ ಮಾಡಿಕೊಳ್ಳಲು ಬರುತ್ತಿರುವುದರಿಂದ ಸ್ವಲ್ಪ ನೆಮ್ಮದಿಯಾಗಿದೆ ಎಂದು ಅವರು ಹೇಳಿದ್ದಾರೆ. ತಮ್ಮ ನಂತರವೂ ಮಗ ಪತ್ನಿಯನ್ನು ಚೆನ್ನಾಗಿ ನೋಡಿಕೊಳ್ಳಬೇಕು ಎಂದು ಮಗನಿಗೆ ತಿಳಿಸಿದ್ದಾರೆ.
17 ವರ್ಷಗಳಿಂದ ನಿರಂತರವಾಗಿ ಸೊಸೆಯನ್ನು ನೋಡಿಕೊಳ್ಳುತ್ತಿರುವ ಕ್ಸುವಾನ್ ಅವರ ಆರೋಗ್ಯದ ಮೇಲೂ ಇದರ ಪರಿಣಾಮ ಬೀರಿದೆ. ಅವರಿಗೆ ಕಾಲು ನೋವು ಮತ್ತು ಅಧಿಕ ರಕ್ತದೊತ್ತಡದ ಸಮಸ್ಯೆಗಳಿವೆ. ಸೊಸೆಯನ್ನು ಎತ್ತಲು ಕಷ್ಟವಾದ ಸಂದರ್ಭಗಳಲ್ಲಿ ನೆರೆಹೊರೆಯವರ ಸಹಾಯವನ್ನೂ ಪಡೆಯಬೇಕಾಗಿದೆ.
ಇತರರಂತೆ ಆರಾಮವಾಗಿ ಜೀವನ ನಡೆಸುವ ಆಸೆ ತಮಗೂ ಇದೆ. ಕೆಲವರು ಹೊರಗೆ ಹೋಗಿ ನೃತ್ಯ ಮಾಡುತ್ತಾ ಸಮಯ ಕಳೆಯುತ್ತಾರೆ. ಆದರೆ, ತನ್ನ ಜವಾಬ್ದಾರಿ ಸೊಸೆಯ ಆರೈಕೆ ಮಾಡುವುದು ಎಂದು ಕ್ಸುವಾನ್ ಹೇಳಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆ
ಕ್ಸುವಾನ್ ಅವರ ತ್ಯಾಗ ಮತ್ತು ನಿಸ್ವಾರ್ಥ ಪ್ರೀತಿಯ ಬಗ್ಗೆ ತಿಳಿದ ಅನೇಕರು ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಸಂಕಷ್ಟದ ಸಮಯದಲ್ಲಿ ಸೊಸೆಯನ್ನು ಕೈಬಿಡದೆ, ಸ್ವಂತ ಮಗಳಂತೆ ನೋಡಿಕೊಳ್ಳುತ್ತಿರುವ ಅವರ ಕಾರ್ಯಕ್ಕೆ ಹಲವರು ಗೌರವ ಸಲ್ಲಿಸಿದ್ದಾರೆ.
ಕುಟುಂಬದ ಸದಸ್ಯರು ಅನಾರೋಗ್ಯಕ್ಕೆ ಒಳಗಾದಾಗ ಅವರ ಆರೈಕೆ ಮಾಡುವುದು ಸುಲಭದ ಕೆಲಸವಲ್ಲ. ಅದಕ್ಕೆ ಅಪಾರ ತಾಳ್ಮೆ, ಪ್ರೀತಿ ಮತ್ತು ತ್ಯಾಗದ ಮನೋಭಾವ ಬೇಕಾಗುತ್ತದೆ. ಸೊಸೆಯನ್ನು 17 ವರ್ಷಗಳಿಂದ ಆರೈಕೆ ಮಾಡುತ್ತಿರುವ ಕ್ಸುವಾನ್ ಫೆಂಗ್ಯಿಂಗ್ ಅವರ ಕಥೆ, ಸಂಬಂಧಗಳ ಮೌಲ್ಯವನ್ನು ನೆನಪಿಸುವುದರ ಜೊತೆಗೆ ಮಾನವೀಯತೆಗೆ ಸಾಕ್ಷಿಯಾಗಿದೆ.
