ಚೆನ್ನೈ: ಹಿಂದಿನ ಡಿಎಂಕೆ ಆಡಳಿತಾವಧಿಯಲ್ಲಿ ಪ್ರತಿಭಟನಾನಿರತ ರೈತರು ಮತ್ತು ಶಿಕ್ಷಕರ ವಿರುದ್ಧ ದಾಖಲಾಗಿದ್ದ ಪೊಲೀಸ್ ಪ್ರಕರಣಗಳನ್ನು ಹಿಂಪಡೆಯಲಾಗುವುದು ಎಂದು ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ಬುಧವಾರ ಘೋಷಿಸಿದರು.
ರಾಜ್ಯ ವಿಧಾನಸಭೆಯನ್ನುದ್ದೇಶಿಸಿ ಮಾತನಾಡಿದ ವಿಜಯ್, ಹಿಂದಿನ ಆಡಳಿತಾವಧಿಯಲ್ಲಿ ತಮ್ಮ ಜೀವನೋಪಾಯ ಮತ್ತು ಹಕ್ಕುಗಳಿಗಾಗಿ ಹೋರಾಡಿದ ರೈತರು ಮತ್ತು ಶಿಕ್ಷಕರ ವಿರುದ್ಧ ಮೇ 2021 ಮತ್ತು ಏಪ್ರಿಲ್ 2026 ರ ನಡುವೆ ಅನೇಕ ಪ್ರಕರಣಗಳನ್ನು ದಾಖಲಿಸಲಾಗಿದೆ ಎಂದು ಹೇಳಿದರು.
ಪ್ರಕರಣಗಳನ್ನು ಹಿಂಪಡೆಯುವುದರಿಂದ ಪ್ರಜಾಪ್ರಭುತ್ವ ಹಕ್ಕುಗಳು ಮತ್ತಷ್ಟು ಬಲಗೊಳ್ಳುತ್ತವೆ ಮತ್ತು ಸಾಮಾನ್ಯ ಜನರು ಮತ್ತು ಸರ್ಕಾರದ ನಡುವಿನ ವಿಶ್ವಾಸ ಹೆಚ್ಚಾಗುತ್ತದೆ ಎಂದು ಮುಖ್ಯಮಂತ್ರಿ ಪ್ರತಿಪಾದಿಸಿದರು.
ಮಾನವೀಯ ಆಧಾರದ ಮೇಲೆ ಪ್ರಕರಣ ವಾಪಸ್
ಪರಂದೂರು ವಿಮಾನ ನಿಲ್ದಾಣ ಮತ್ತು ಸಿಪ್ಕಾಟ್ ಕೈಗಾರಿಕಾ ಉದ್ಯಾನ ವಿಸ್ತರಣಾ ಯೋಜನೆಗಳ ವಿರುದ್ಧ ಶಾಂತಿಯುತವಾಗಿ ಪ್ರತಿಭಟಿಸಿದ ರೈತರ ವಿರುದ್ಧದ ಪೊಲೀಸ್ ಪ್ರಕರಣಗಳನ್ನು ಹಿಂಪಡೆಯಲಾಗುವುದು ಎಂದು ಅವರು ಹೇಳಿದರು. ಅದೇ ರೀತಿ, ತಮ್ಮ ಹಕ್ಕುಗಳನ್ನು ಕೋರಿ ಮತ್ತು ಬೇಡಿಕೆಗಳನ್ನು ಮುಂದಿಟ್ಟು ಪ್ರಜಾಸತ್ತಾತ್ಮಕ ಪ್ರತಿಭಟನೆ ನಡೆಸಿದ ಶಿಕ್ಷಕರ ವಿರುದ್ಧ ದಾಖಲಾಗಿದ್ದ ಪ್ರಕರಣಗಳನ್ನು ಸಹ ಕೈಬಿಡಲಾಗುವುದು ಎಂದು ವಿಜಯ್ ಹೇಳಿದರು.
“ಮಾನವೀಯ ಆಧಾರದ ಮೇಲೆ ಮತ್ತು ಪ್ರಜಾಸತ್ತಾತ್ಮಕ ತತ್ವಗಳ ಆಧಾರದ ಮೇಲೆ ಆ ಎಲ್ಲಾ ಪ್ರಕರಣಗಳನ್ನು ಹಿಂಪಡೆಯಲು ಸರ್ಕಾರ ನಿರ್ಧರಿಸಿದೆ” ಎಂದು ಅವರು ಹೇಳಿದರು.
ತಿರುವನಮ್ಮಲೈ ಜಿಲ್ಲೆಯಲ್ಲಿ, ಸಿಪ್ಕಾಟ್ ಯೋಜನೆಯನ್ನು ವಿರೋಧಿಸುವ ಪ್ರತಿಭಟನೆಗಳಲ್ಲಿ ಭಾಗವಹಿಸಿದ ರೈತರ ವಿರುದ್ಧ ಪ್ರಕರಣಗಳನ್ನು ದಾಖಲಿಸಲಾಗಿದೆ ಮತ್ತು ಕೆಲವು ರೈತರ ಮೇಲೆ ಗೂಂಡಾ ಕಾಯ್ದೆಯಡಿಯೂ ಪ್ರಕರಣ ದಾಖಲಿಸಲಾಗಿದೆ. ಅದೇ ರೀತಿ, ಪರಂದೂರು ಯೋಜನೆಯ ವಿರುದ್ಧ ರೈತರು ನಿರಂತರ ಪ್ರತಿಭಟನೆಗಳಲ್ಲಿ ತೊಡಗಿದ್ದರು ಎಂದು ಅವರು ಹೇಳಿದರು.
ಪರಂದೂರು ವಿಮಾನ ನಿಲ್ದಾಣ ಯೋಜನೆಯನ್ನು ಇತ್ತೀಚೆಗೆ ಟಿವಿಕೆ ಸರ್ಕಾರ ಕೈಬಿಟ್ಟಿದೆ. ತಮ್ಮ ಕೃಷಿ ಭೂಮಿ, ಜಲಮೂಲಗಳು ಮತ್ತು ಜೀವನೋಪಾಯಕ್ಕೆ ಧಕ್ಕೆಯಾಗುತ್ತದೆ ಎಂಬ ಕಳವಳದಿಂದ ವಿಮಾನ ನಿಲ್ದಾಣ ಯೋಜನೆಯನ್ನು ರದ್ದುಗೊಳಿಸುವಂತೆ ಒತ್ತಾಯಿಸಿ ಪ್ರತಿಭಟಿಸಿದ ಈ ರೈತರ ವಿರುದ್ಧ ಹಿಂದಿನ ಸರ್ಕಾರವು ಅಮಾನವೀಯವಾಗಿ ದಾಖಲಿಸಿದ ಪ್ರಕರಣಗಳು ಬಾಕಿ ಉಳಿದಿವೆ ಎಂದು ಹೇಳಿದ್ದಾರೆ.
ಶಾಂತಿಯುತ ಪ್ರತಿಭಟನೆಯು ಮೂಲಭೂತ ಪ್ರಜಾಸತ್ತಾತ್ಮಕ ಹಕ್ಕು. ರೈತರು ನಮ್ಮ ದೇಶದ ಆಹಾರ ಭದ್ರತೆಯ ಬೆನ್ನೆಲುಬು, ಶಿಕ್ಷಕರು ಶಿಕ್ಷಣದ ದೀಪವನ್ನು ಬೆಳಗಿಸುವ ಮೂಲಕ ಸಾಮಾಜಿಕ ಪ್ರಗತಿಯ ಸಂಪೂರ್ಣ ಅಡಿಪಾಯವನ್ನು ರೂಪಿಸುತ್ತಾರೆ. ರಾಷ್ಟ್ರ ನಿರ್ಮಾಣಕ್ಕೆ ಕೊಡುಗೆ ನೀಡುವ ರೈತರು ಮತ್ತು ಶಿಕ್ಷಕರನ್ನು ಕಾನೂನು ಕ್ರಮಗಳಿಗೆ ಒಳಪಡಿಸುವುದು ‘ತೀವ್ರ ಅನ್ಯಾಯ’ ಎಂದು ಹೇಳಿದರು.
“ಸಮಂಜಸವಾದ ಬೇಡಿಕೆಗಳನ್ನು ಈಡೇರಿಸುವಂತೆ ಒತ್ತಾಯಿಸಿದ್ದಕ್ಕಾಗಿ ರೈತರು, ಶಿಕ್ಷಕರನ್ನು ಕಾನೂನು ಕಿರುಕುಳಕ್ಕೆ ಒಳಪಡಿಸುವುದು ತೀವ್ರ ಅನ್ಯಾಯ” ಎಂದು ಅವರು ಪರಂದೂರಿನಲ್ಲಿ ಮತ್ತು ತಿರುವಣ್ಣಾಮಲೈನ ಸಿಪ್ಕಾಟ್ ನಲ್ಲಿ ಕೈಗಾರಿಕಾ ಯೋಜನೆಯ ವಿರುದ್ಧದ ರೈತರ ಪ್ರತಿಭಟನೆಯನ್ನು ಉಲ್ಲೇಖಿಸಿ ಹೇಳಿದರು. ಇಂತಹ ಪ್ರಕರಣಗಳು ಪೀಡಿತ ರೈತರು ಮತ್ತು ಶಿಕ್ಷಕರಿಗೆ ಅಪಾರ ಮಾನಸಿಕ ನೋವನ್ನುಂಟುಮಾಡಿವೆ ಎಂದು ಅವರು ಹೇಳಿದರು.
