ದಕ್ಷಿಣ ಭಾರತೀಯ ಚಿತ್ರರಂಗದ ಖ್ಯಾತ ನಟಿ ಚಾರ್ಮಿಳಾ ತಮ್ಮ ವೃತ್ತಿಜೀವನ ಹಾಗೂ ವೈಯಕ್ತಿಕ ಜೀವನದಲ್ಲಾದ ಏಳುಬೀಳುಗಳ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. ತಮಿಳು ಮೂಲದವರಾಗಿದ್ದರೂ ಮಲಯಾಳಂ ಚಿತ್ರರಂಗದ ಮೂಲಕ ಭಾರಿ ಜನಪ್ರಿಯತೆ ಗಳಿಸಿದ ಈ ನಟಿ, ತಮ್ಮ ವೈಯಕ್ತಿಕ ಜೀವನದಲ್ಲಾದ ಕಹಿ ಘಟನೆಗಳು ಹಾಗೂ ಪ್ರೇಮ ಸಂಬಂಧಗಳು ತಮ್ಮ ಬದುಕನ್ನೇ ಹಾಳುಮಾಡಿದವು ಎಂದು ನೋವು ತೋಡಿಕೊಂಡಿದ್ದಾರೆ. 1979ರಲ್ಲಿ ಬಾಲನಟಿಯಾಗಿ ಚಿತ್ರರಂಗ ಪ್ರವೇಶಿಸಿದ ಚಾರ್ಮಿಳಾ, ಆ ಬಳಿಕ ಮೋಹನ್‌ಲಾಲ್ ಮತ್ತು ಜಯರಾಮ್‌ ಅವರಂತಹ ನಟರ ಜೊತೆ ನಟಿಸಿ ಯಶಸ್ವಿ ಅಭಿನೇತ್ರಿಯಾಗಿ ಗುರುತಿಸಿಕೊಂಡಿದ್ದರು.
ತಮ್ಮ 19ನೇ ವಯಸ್ಸಿನಲ್ಲಿ ನಟ ಬಾಬು ಆಂಟೋನಿ ಜೊತೆಗಿನ ಪ್ರೇಮ ಸಂಬಂಧ ಮುರಿದುಬಿದ್ದಾಗ ತೀವ್ರ ಮನನೊಂದು ಕೈಬೆರಳುಗಳನ್ನು ಕೊಯ್ದುಕೊಂಡು ಆತ್ಮಹತ್ಯೆಗೆ ಯತ್ನಿಸಿದ್ದಾಗಿ ಚಾರ್ಮಿಳಾ ಹೇಳಿದ್ದಾರೆ. ತಂದೆಯ ಶಿಸ್ತಿನ ನಡವಳಿಕೆ ಹಾಗೂ ಪ್ರೇಮ ಭಂಗದಿಂದ ಕಂಗಾಲಾಗಿದ್ದಾಗ, ಚಿತ್ರರಂಗದಲ್ಲಿ ಸಹಾಯಕ ನಿರ್ದೇಶಕರಾಗಿದ್ದ ಕಿಶೋರ್ ಸತ್ಯ ಎಂಬುವರನ್ನು ವಿವಾಹವಾದರು. ಆದರೆ ಮದುವೆಯ ನಂತರ ನಟನೆಯನ್ನು ಬಿಡುವಂತೆ ಒತ್ತಾಯಿಸಿದ ಕಿಶೋರ್, ನಾಲ್ಕು ವರ್ಷಗಳ ನಂತರ ತಮಗೆ ವಿಚ್ಛೇದನ ನೀಡಿದರು ಎಂದು ಅವರು ಸ್ಮರಿಸಿದ್ದಾರೆ. ಆ ನಂತರ ತಮಗಿಂತ ಎಂಟು ವರ್ಷ ಚಿಕ್ಕವರಾದ ತಂಗಿಯ ಸ್ನೇಹಿತ ರಾಜೇಶ್ ಎಂಬ ತಂತ್ರಜ್ಞಾನಿಯನ್ನು ವಿವಾಹವಾದರಾದರೂ, ಧಾರ್ಮಿಕ ಭಿನ್ನಾಭಿಪ್ರಾಯಗಳಿಂದ ಆ ಬಾಂಧವ್ಯವೂ ವಿಚ್ಛೇದನದಲ್ಲಿ ಕೊನೆಗೊಂಡಿತು.
ಇತ್ತೀಚೆಗೆ ಸ್ಯಾಂಡಲ್‌ವುಡ್ ಹಾಗೂ ಮಲಯಾಳಂ ರಂಗದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದ ಹೇಮಾ ಕಮಿಟಿ ವರದಿ ಉಲ್ಲೇಖಿಸಿ ಮಾತನಾಡಿರುವ ಚಾರ್ಮಿಳಾ, ತಮ್ಮ ಸುದೀರ್ಘ ವೃತ್ತಿಜೀವನದಲ್ಲಿ ಸುಮಾರು 28 ಜನರು ತಮ್ಮೊಂದಿಗೆ ಅಸಭ್ಯವಾಗಿ ವರ್ತಿಸಿದ್ದರು ಎಂದು ಗಂಭೀರ ಆರೋಪ ಮಾಡಿದ್ದಾರೆ. ಹಿರಿಯ ನಿರ್ಮಾಪಕರು ಹಾಗೂ ನಿರ್ದೇಶಕರಿಂದ ಎದುರಾದ ಲೈಂಗಿಕ ಕಿರುಕುಳ ಮತ್ತು ರಾಜಿ ಮಾಡಿಕೊಳ್ಳುವಂತೆ ಬಂದ ಆಫರ್‌ಗಳನ್ನು ತಿರಸ್ಕರಿಸಿದ್ದರಿಂದ ತಮಗೆ ಹಲವು ದೊಡ್ಡ ಸಿನಿಮಾಗಳ ಅವಕಾಶಗಳು ಕೈತಪ್ಪಿದವು ಎಂದು ಬಹಿರಂಗಪಡಿಸಿದ್ದಾರೆ. ಪ್ರಸ್ತುತ ಚಿತ್ರರಂಗದಿಂದ ತುಸು ದೂರವಿರುವ ಚಾರ್ಮಿಳಾ, ಕಿರುತೆರೆ ಹಾಗೂ ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
