ಐಟಿ ಹಬ್ ಬೆಂಗಳೂರಿನಲ್ಲಿ ಕೈತುಂಬಾ ವೇತನ ನೀಡುವ ಪ್ರತಿಷ್ಠಿತ ಉದ್ಯೋಗದಲ್ಲಿದ್ದರೂ, ಕೆಲಸದ ವಿಪರೀತ ಒತ್ತಡ ಹಾಗೂ ಬರ್ನ್‌ಔಟ್ (ಮಾನಸಿಕ ಆಯಾಸ) ಸಮಸ್ಯೆಯಿಂದ ಕಂಗಾಲಾಗಿರುವ 28 ವರ್ಷದ ಟೆಕ್ ಉದ್ಯೋಗಿಯೊಬ್ಬರು ಸುಮಾರು ಆರು ತಿಂಗಳ ಕಾಲ ಕರಿಯರ್ ಬ್ರೇಕ್ ತೆಗೆದುಕೊಳ್ಳುವ ಕುರಿತು ರೆಡ್ಡಿಟ್‌ನಲ್ಲಿ ನೆಟ್ಟಿಗರ ಸಲಹೆ ಕೋರಿದ್ದಾರೆ. ವೃತ್ತಿಜೀವನದ ದೀರ್ಘಾವಧಿಯ ಹಾದಿಯಲ್ಲಿ ಈ ವಿರಾಮ ಭವಿಷ್ಯಕ್ಕೆ ಅಡ್ಡಿಯಾಗಬಹುದೇ ಎಂಬ ಅವರ ಆತಂಕ ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ.
ಬೆಂಗಳೂರಿನಲ್ಲಿ ವಾಸವಾಗಿರುವ ಈ ಯುವ ಟೆಕ್ಕಿ ಸುಮಾರು 6 ವರ್ಷಗಳ ಕೆಲಸದ ಅನುಭವ ಹೊಂದಿದ್ದು, ಪ್ರಸ್ತುತ ವಾರ್ಷಿಕ 30 ರಿಂದ 35 ಲಕ್ಷ ರೂಪಾಯಿಗಳ ಆಕರ್ಷಕ ವೇತನ ಪಡೆಯುತ್ತಿದ್ದಾರೆ. ಆದರೆ, ನಿರಂತರ ಕೆಲಸದಿಂದ ತೀವ್ರ ಆಯಾಸಗೊಂಡಿರುವ ಅವರು, ಮುಂದಿನ 3 ರಿಂದ 6 ತಿಂಗಳುಗಳ ಕಾಲ ಕೆಲಸದಿಂದ ಸಂಪೂರ್ಣ ದೂರವಿರಲು ಯೋಜಿಸುತ್ತಿದ್ದಾರೆ. ಈ ಸಮಯದಲ್ಲಿ ತಮ್ಮ ಆರೋಗ್ಯದ ಕಡೆಗೆ ಗಮನಹರಿಸುವುದು, ಪತ್ನಿಯೊಂದಿಗೆ ಕಾಲ ಕಳೆಯುವುದು, ಪ್ರವಾಸ ಕೈಗೊಳ್ಳುವುದು ಮತ್ತು ಮುಂದಿನ ವೃತ್ತಿಜೀವನದ ಹೆಜ್ಜೆಯ ಬಗ್ಗೆ ಶಾಂತವಾಗಿ ಯೋಚಿಸಲು ಬಯಸಿದ್ದಾರೆ.
ಆರ್ಥಿಕವಾಗಿ ಯಾವುದೇ ಸಾಲದ ಹೊರೆಗಳಾಗಲಿ ಅಥವಾ ಇಎಂಐ ಬಾಕಿಗಳಾಗಲಿ ತಮಗಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಇವರ ಪತ್ನಿಯೂ ಉದ್ಯೋಗದಲ್ಲಿದ್ದು, ಮನೆಯ ಮಾಸಿಕ ಖರ್ಚು ಸುಮಾರು 1.5 ಲಕ್ಷ ರೂಪಾಯಿಗಳಷ್ಟಿದೆ. ತುರ್ತು ಸಂದರ್ಭಕ್ಕೆ ಹಾಗೂ ಕನಿಷ್ಠ ಒಂದು ವರ್ಷದ ಕೌಟುಂಬಿಕ ಖರ್ಚನ್ನು ನಿಭಾಯಿಸುವಷ್ಟು ಉಳಿತಾಯ ತಮ್ಮ ಬಳಿ ಇದೆ ಎಂದು ಅವರು ತಿಳಿಸಿದ್ದಾರೆ. ಅಲ್ಲದೆ ಪೋಷಕರು ಪಿಂಚಣಿ ಹೊಂದಿದ್ದು ಆರ್ಥಿಕವಾಗಿ ಸ್ವಾವಲಂಬಿಗಳಾಗಿದ್ದಾರೆ.
ಆರ್ಥಿಕವಾಗಿ ಭದ್ರವಾಗಿದ್ದರೂ, ಪ್ರಸ್ತುತ ಕರಿಯರ್‌ನಲ್ಲಿ 3 ರಿಂದ 6 ತಿಂಗಳ ಅಂತರ (ಗ್ಯಾಪ್) ಬಂದರೆ ಮುಂದೆ ಪ್ರಾಡಕ್ಟ್ ಮ್ಯಾನೇಜ್‌ಮೆಂಟ್ (ಪಿಎಂ) ಉದ್ಯೋಗ ಮಾರುಕಟ್ಟೆಗೆ ಮರುಪ್ರವೇಶಿಸುವಾಗ ಕಂಪನಿಗಳ ನೇಮಕಾತಿದಾರರು (ರೆಕ್ರೂಟರ್ಸ್) ಇದನ್ನು ನಕಾರಾತ್ಮಕವಾಗಿ ನೋಡುತ್ತಾರೆಯೇ ಎಂಬ ಆತಂಕ ಅವರನ್ನು ಕಾಡುತ್ತಿದೆ. ಇದೇ ರೀತಿಯ ಬ್ರೇಕ್ ತೆಗೆದುಕೊಂಡ ಇತರರ ಅನುಭವ ಹೇಗಿದೆ ಎಂದು ಅವರು ಪ್ರಶ್ನಿಸಿದ್ದರು.
ಈ ಪೋಸ್ಟ್‌ಗೆ ನೆಟ್ಟಿಗರಿಂದ ಮಿಶ್ರ ಹಾಗೂ ಉಪಯುಕ್ತ ಸಲಹೆಗಳು ವ್ಯಕ್ತವಾಗಿವೆ. “ಆರು ವರ್ಷಗಳ ವೃತ್ತಿಜೀವನದಲ್ಲಿ 6 ತಿಂಗಳ ವಿರಾಮವೇನೂ ದೊಡ್ಡದಲ್ಲ, ಈ ಸಮಯದಲ್ಲಿ ನೀವು ಆರೋಗ್ಯ ಸುಧಾರಿಸಿಕೊಂಡು ಹೊಸ ಕೌಶಲ್ಯಗಳನ್ನು ಕಲಿತಿದ್ದೀರಿ ಎಂದು ಸಂದರ್ಶನದಲ್ಲಿ ಸ್ಪಷ್ಟವಾಗಿ ಸಮರ್ಥಿಸಿಕೊಂಡರೆ ಯಾವುದೇ ತೊಂದರೆಯಾಗದು” ಎಂದು ಹಲವರು ಧೈರ್ಯ ತುಂಬಿದ್ದಾರೆ. ಇನ್ನು ಕೆಲವರು, ಆರಂಭದಲ್ಲೇ ಆರು ತಿಂಗಳ ಬ್ರೇಕ್ ಎಂದು ನಿರ್ಧರಿಸುವ ಬದಲು, ಸಣ್ಣ ವಿರಾಮದಿಂದ ಆರಂಭಿಸಿ ಅಗತ್ಯವೆನಿಸಿದರೆ ಮುಂದುವರಿಸುವುದು ಸೂಕ್ತ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಉತ್ತಮ ಸಂಬಳವಿದ್ದರೂ ಮಾನಸಿಕ ಆರೋಗ್ಯಕ್ಕಾಗಿ ಬ್ರೇಕ್ ತೆಗೆದುಕೊಳ್ಳುವ ಅನಿವಾರ್ಯತೆ ಇಂದಿನ ಕಾರ್ಪೊರೇಟ್ ವಲಯದಲ್ಲಿ ಎದುರಾಗುತ್ತಿರುವ ಬಗೆಗೆ ಈ ಪೋಸ್ಟ್ ಬೆಳಕು ಚೆಲ್ಲಿದೆ.
