ನವದೆಹಲಿ: ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಮಂಡಿಸಿದ 2026-27ರ ಬಜೆಟ್ನಲ್ಲಿ ಸರ್ಕಾರವು ಒಂದು ಕಡೆ ಸಬ್ಸಿಡಿ ಮೊತ್ತವನ್ನು ಕಡಿತಗೊಳಿಸುವ ಮೂಲಕ ಆರ್ಥಿಕ ಶಿಸ್ತಿಗೆ ಮುಂದಾಗಿದ್ದರೆ, ಇನ್ನೊಂದೆಡೆ ರೈತರ ಕೈಹಿಡಿಯುವ ಮಹತ್ವದ ನಿರ್ಧಾರಗಳನ್ನು ಕೈಗೊಂಡಿದೆ.ಈ ಬಾರಿಯ ಬಜೆಟ್ನಲ್ಲಿ ನಿಮ್ಮ ಜೇಬಿನ ಮೇಲೆ ಮತ್ತು ರೈತರ ಬದುಕಿನ ಮೇಲೆ ಆಗುವ ಪರಿಣಾಮಗಳ ವಿವರ ಇಲ್ಲಿದೆ:
ಸಬ್ಸಿಡಿ ವೆಚ್ಚದಲ್ಲಿ ಶೇ. 4.47 ಇಳಿಕೆ
ಸರ್ಕಾರವು ಆಹಾರ, ರಸಗೊಬ್ಬರ ಮತ್ತು ಇಂಧನದ ಮೇಲಿನ ಒಟ್ಟು ಸಬ್ಸಿಡಿಯನ್ನು ಈ ಬಾರಿ 4,10,495 ಕೋಟಿ ರೂ.ಗಳಿಗೆ ಸೀಮಿತಗೊಳಿಸಿದೆ. ಕಳೆದ ವರ್ಷಕ್ಕೆ (4,29,735 ಕೋಟಿ ರೂ.) ಹೋಲಿಸಿದರೆ ಇದು ಸುಮಾರು 19,000 ಕೋಟಿ ರೂ.ಗಳಷ್ಟು ಕಡಿಮೆಯಾಗಿದೆ.
ಆಹಾರ ಸಬ್ಸಿಡಿ: 2,27,629 ಕೋಟಿ ರೂ. (ಪಿಎಂಜಿಕೆಎವೈ ಯೋಜನೆಯಡಿ 81 ಕೋಟಿ ಜನರಿಗೆ ಉಚಿತ ಪಡಿತರ ಮುಂದುವರಿಯಲಿದೆ).
ರಸಗೊಬ್ಬರ ಸಬ್ಸಿಡಿ: 1,70,805 ಕೋಟಿ ರೂ. (ಯೂರಿಯಾ ಸಬ್ಸಿಡಿಗಾಗಿ 1.16 ಲಕ್ಷ ಕೋಟಿ ಮೀಸಲು).
ಇಂಧನ (ಪೆಟ್ರೋಲಿಯಂ) ಸಬ್ಸಿಡಿ: 15,121 ಕೋಟಿ ರೂ.ಗಳಿಂದ 12,085 ಕೋಟಿ ರೂ.ಗಳಿಗೆ ಇಳಿಕೆ.
ರೈತರಿಗೆ ಮತ್ತು ಮೀನುಗಾರರಿಗೆ
ಬಜೆಟ್ನಲ್ಲಿ ಕೃಷಿ ಕ್ಷೇತ್ರಕ್ಕೆ ಒಟ್ಟು 1.37 ಲಕ್ಷ ಕೋಟಿ ರೂ.ಗಳನ್ನು ಹಂಚಿಕೆ ಮಾಡಲಾಗಿದ್ದು, ರೈತರ ಆದಾಯ ಹೆಚ್ಚಿಸಲು ದೊಡ್ಡ ಘೋಷಣೆ ಮಾಡಲಾಗಿದೆ:
ಕಿಸಾನ್ ಕ್ರೆಡಿಟ್ ಕಾರ್ಡ್ (KCC) ಮಿತಿ ಏರಿಕೆ: ರೈತರ ಬಹುದಿನಗಳ ಬೇಡಿಕೆಯಂತೆ ಕೆಸಿಸಿ ಸಾಲದ ಮಿತಿಯನ್ನು 3 ಲಕ್ಷ ರೂ.ಗಳಿಂದ 5 ಲಕ್ಷ ರೂ.ಗಳಿಗೆ ಹೆಚ್ಚಿಸಲಾಗಿದೆ. ಇದರಿಂದ ದೇಶದ 7.7 ಕೋಟಿ ರೈತರು ಮತ್ತು ಹೈನುಗಾರರಿಗೆ ಹೆಚ್ಚಿನ ಆರ್ಥಿಕ ನೆರವು ಸಿಗಲಿದೆ.
ಮೀನುಗಾರಿಕೆ ಅಭಿವೃದ್ಧಿ: ಮೀನುಗಾರಿಕೆಯನ್ನು ಉತ್ತೇಜಿಸಲು ದೇಶದ 500 ಜಲಾಶಯಗಳು ಮತ್ತು ಅಮೃತ ಸರೋವರಗಳನ್ನು ಸಮಗ್ರವಾಗಿ ಅಭಿವೃದ್ಧಿಪಡಿಸಲು ಸರ್ಕಾರ ಮುಂದಾಗಿದೆ.
