ಲಂಡನ್: ಖ್ಯಾತ ಬ್ರಿಟಿಷ್ ಕಾದಂಬರಿಕಾರ ಹಾಗೂ ಮಾಜಿ ಕನ್ಸರ್ವೇಟಿವ್ ಪಕ್ಷದ ಸಂಸದ ಜೆಫ್ರಿ ಆರ್ಚರ್ ಅವರು 86ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ. ಅವರ ನಿಧನವನ್ನು ಪ್ರಕಾಶನ ಸಂಸ್ಥೆ ಹಾರ್ಪರ್‌ಕಾಲಿನ್ಸ್ ಸೋಮವಾರ ಖಚಿತಪಡಿಸಿದೆ.
ಆರ್ಚರ್ ಅವರು ತಮ್ಮ ಬರವಣಿಗೆಯ ಅವಧಿಗಳ ನಡುವೆಯೇ ತಮ್ಮ ನಿವಾಸದಲ್ಲಿ “ಹಠಾತ್ ಹಾಗೂ ಶಾಂತಿಯುತವಾಗಿ” ನಿಧನರಾದರು ಎಂದು ಪ್ರಕಾಶಕರು ತಿಳಿಸಿದ್ದಾರೆ. ಅವರ ಸಂಪಾದಕಿ ಕೇಟ್ ಎಲ್ಟನ್ ಅವರು ಆರ್ಚರ್ ಅವರನ್ನು “ಅದ್ಭುತ ಕಥೆಗಾರ ಹಾಗೂ ಸಂಪಾದಕರ ಕನಸಿನ ಲೇಖಕ” ಎಂದು ಬಣ್ಣಿಸಿದ್ದಾರೆ.
ಐದು ದಶಕಗಳ ಕಾಲ ಸಾಹಿತ್ಯ ಕ್ಷೇತ್ರದಲ್ಲಿ ಸಕ್ರಿಯರಾಗಿದ್ದ ಆರ್ಚರ್ ಅವರು, ಈ ವಾರ ನಡೆಯಲಿದ್ದ ಚೆಲ್ಟೆನ್‌ಹ್ಯಾಮ್ ಸಾಹಿತ್ಯ ಉತ್ಸವದಲ್ಲಿ ಭಾಗವಹಿಸಿ ತಮ್ಮ ಕಾದಂಬರಿ ‘Adam and Eve’ ಕುರಿತು ಮಾತನಾಡಬೇಕಿತ್ತು. ಇದನ್ನು ಅವರು ತಮ್ಮ ಕೊನೆಯ ಕಾದಂಬರಿ ಎಂದು ಹೇಳಿದ್ದರು. ಈ ಪುಸ್ತಕ ಮಂಗಳವಾರ ಪ್ರಕಟವಾಗಬೇಕಿತ್ತು.
ಸಂಸದನಿಂದ ಬೆಸ್ಟ್‌ಸೆಲ್ಲರ್ ಲೇಖಕರಾದ ಆರ್ಚರ್
ಜೆಫ್ರಿ ಆರ್ಚರ್ ಅವರು ಆಕ್ಸ್‌ಫರ್ಡ್ ವಿಶ್ವವಿದ್ಯಾಲಯದಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗಲೇ ಕನ್ಸರ್ವೇಟಿವ್ ಪಕ್ಷ ಸೇರಿದ್ದರು. 1969ರಲ್ಲಿ ನಡೆದ ಉಪಚುನಾವಣೆಯಲ್ಲಿ ಗೆದ್ದು ತಮ್ಮ 29ನೇ ವಯಸ್ಸಿನಲ್ಲಿ ಸಂಸದರಾದರು. ಆ ಸಮಯದಲ್ಲಿ ಬ್ರಿಟನ್‌ನ ಅತ್ಯಂತ ಕಿರಿಯ ಸಂಸದರಲ್ಲಿ ಒಬ್ಬರಾಗಿದ್ದರು.
ಆದರೆ 1974ರಲ್ಲಿ ಕೆನಡಾದ ಹೂಡಿಕೆಯೊಂದು ವಿಫಲಗೊಂಡ ಪರಿಣಾಮ ಅವರು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದರು. ನಂತರ ರಾಜಕೀಯದಿಂದ ದೂರ ಸರಿದು ಬರವಣಿಗೆಯತ್ತ ಮುಖ ಮಾಡಿದರು.
1975ರಲ್ಲಿ ಅವರು ‘Not a Penny More, Not a Penny Less’ ಕಾದಂಬರಿಯನ್ನು ಪ್ರಕಟಿಸಿದರು. ಇದರಿಂದ ಅವರ ಸಾಹಿತ್ಯಿಕ ವೃತ್ತಿಜೀವನಕ್ಕೆ ಭರ್ಜರಿ ಚಾಲನೆ ದೊರೆಯಿತು.
ರಾಜಕೀಯ, ಹಣ, ಮಹತ್ವಾಕಾಂಕ್ಷೆ ಮತ್ತು ದ್ರೋಹದಂತಹ ವಿಷಯಗಳನ್ನು ಕೇಂದ್ರವಾಗಿಟ್ಟುಕೊಂಡು ಅವರು ಹಲವಾರು ಕಾದಂಬರಿಗಳನ್ನು ಬರೆದರು. ಅವರ ಕೃತಿಗಳು ಜಗತ್ತಿನಾದ್ಯಂತ 30 ಕೋಟಿಗೂ ಹೆಚ್ಚು ಪ್ರತಿಗಳು ಮಾರಾಟವಾಗಿವೆ ಎಂದು ಅವರ ಅಧಿಕೃತ ವೆಬ್‌ಸೈಟ್ ತಿಳಿಸುತ್ತದೆ.
ಮತ್ತೆ ರಾಜಕೀಯಕ್ಕೆ ಎಂಟ್ರಿ
ಸಾಹಿತ್ಯ ಕ್ಷೇತ್ರದಲ್ಲಿ ಯಶಸ್ಸು ಗಳಿಸಿದ ಬಳಿಕ ಆರ್ಚರ್ ಅವರ ರಾಜಕೀಯ ಬದುಕು ಕೂಡ ಮತ್ತೆ ಚೇತರಿಸಿಕೊಂಡಿತು. 1985ರಲ್ಲಿ ಅಂದಿನ ಬ್ರಿಟನ್ ಪ್ರಧಾನಿ ಮಾರ್ಗರೆಟ್ ಥ್ಯಾಚರ್ ಅವರು ಅವರನ್ನು ಕನ್ಸರ್ವೇಟಿವ್ ಪಕ್ಷದ ಉಪಾಧ್ಯಕ್ಷರನ್ನಾಗಿ ನೇಮಿಸಿದರು. ನಂತರ ಅವರು ಬ್ರಿಟನ್‌ನ ಹೌಸ್ ಆಫ್ ಲಾರ್ಡ್ಸ್ ಸದಸ್ಯರಾಗಿಯೂ ಸೇವೆ ಸಲ್ಲಿಸಿದರು.
ವಿವಾದ, ಹಗರಣ ಮತ್ತು ಜೈಲು ಶಿಕ್ಷೆ
ಜೆಫ್ರಿ ಆರ್ಚರ್ ಅವರ ರಾಜಕೀಯ ಜೀವನ ಹಲವು ವಿವಾದಗಳಿಂದ ಕೂಡಿತ್ತು. 1986ರಲ್ಲಿ ಅವರು ಉಪಾಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿದರು. ಲೈಂಗಿಕ ಕಾರ್ಯಕರ್ತೆ ಮೋನಿಕಾ ಕೊಗ್ಲನ್‌ಗೆ 2,000 ಪೌಂಡ್ ನೀಡಿದ್ದಾಗಿ ಅವರು ಒಪ್ಪಿಕೊಂಡಿದ್ದರು. ಆದರೆ ಆ ಹಣವನ್ನು ಆಕೆಗೆ ದೇಶ ತೊರೆಯಲು ಸಹಾಯ ಮಾಡಲು ನೀಡಿದ್ದಾಗಿ ಹೇಳಿಕೊಂಡಿದ್ದರು.
1999ರಲ್ಲಿ ಲಂಡನ್‌ನ ಮೊದಲ ಚುನಾಯಿತ ಮೇಯರ್ ಆಗುವ ಅವರ ರಾಜಕೀಯ ಪ್ರಯತ್ನವೂ ವಿವಾದದಿಂದಾಗಿ ಅಂತ್ಯಗೊಂಡಿತು. ಹಿಂದಿನ ಮಾನನಷ್ಟ ಮೊಕದ್ದಮೆಗೆ ಸಂಬಂಧಿಸಿದಂತೆ ಸುಳ್ಳು ಅಲಿಬಿ ಸಿದ್ಧಪಡಿಸಲು ಪ್ರಯತ್ನಿಸಿದ್ದ ಆರೋಪ ಎದುರಾದ ಬಳಿಕ ಅವರು ಚುನಾವಣಾ ಸ್ಪರ್ಧೆಯಿಂದ ಹಿಂದೆ ಸರಿದರು.
2001ರಲ್ಲಿ ಆರ್ಚರ್ ಅವರು ಸುಳ್ಳು ಸಾಕ್ಷ್ಯ ನೀಡುವುದು ಹಾಗೂ ನ್ಯಾಯದ ಪ್ರಕ್ರಿಯೆಗೆ ಅಡ್ಡಿಪಡಿಸುವುದು ಸೇರಿದಂತೆ ಪ್ರಕರಣಗಳಲ್ಲಿ ದೋಷಿ ಎಂದು ತೀರ್ಪುಗೊಂಡರು. ಅವರಿಗೆ ನಾಲ್ಕು ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಯಿತು. 2003ರಲ್ಲಿ ಪೆರೋಲ್ ಮೇಲೆ ಬಿಡುಗಡೆಯಾದರು.
ಆದರೂ ಅವರು ಬರವಣಿಗೆಯನ್ನು ಮುಂದುವರಿಸಿದರು. ತಮ್ಮ ನಿಧನದವರೆಗೂ ಪುಸ್ತಕಗಳನ್ನು ಬರೆಯುತ್ತಾ, ಪ್ರಕಟಿಸುತ್ತಾ ಸಕ್ರಿಯರಾಗಿದ್ದರು.2024ರಲ್ಲಿ ಜೆಫ್ರಿ ಆರ್ಚರ್ ಅವರು ಹೌಸ್ ಆಫ್ ಲಾರ್ಡ್ಸ್‌ನಿಂದ ನಿವೃತ್ತರಾಗಿದ್ದರು.ವಿಶ್ವದಾದ್ಯಂತ ಕೋಟ್ಯಂತರ ಓದುಗರನ್ನು ಹೊಂದಿದ್ದ ಈ ಖ್ಯಾತ ಕಾದಂಬರಿಕಾರನ ನಿಧನ ಸಾಹಿತ್ಯ ಲೋಕಕ್ಕೆ ದೊಡ್ಡ ನಷ್ಟವಾಗಿದೆ.
