ಪಾಟ್ನಾ: ಏಕಾಂಗಿಯಾಗಿ ಪ್ರಯಾಣಿಸುವ ಮಹಿಳೆಯರ ಸುರಕ್ಷತೆಯ ಕುರಿತು ಗಂಭೀರ ಕಳವಳ ಮೂಡಿಸಿರುವ ಆಘಾತಕಾರಿ ಘಟನೆಯೊಂದು ಬಿಹಾರದ ಕಟಿಹಾರ್ ಜಂಕ್ಷನ್ನಲ್ಲಿ ಸಂಭವಿಸಿದೆ. ಜಯನಗರ-ಮನಿಹಾರಿ ಜಾನಕಿ ಎಕ್ಸ್ಪ್ರೆಸ್ ರೈಲಿನ ಕಂಪಾರ್ಟ್ಮೆಂಟ್ಗೆ ಸುಮಾರು 30 ರಿಂದ 40 ಪುರುಷರ ಗುಂಪು ಅಕ್ರಮವಾಗಿ ನುಗ್ಗಿ ದೊಡ್ಡ ಗಲಾಟೆ ಸೃಷ್ಟಿಸಿದ್ದರಿಂದ, ಮಹಿಳಾ ಪ್ರಯಾಣಿಕರೊಬ್ಬರು ತಮ್ಮನ್ನು ಶೌಚಾಲಯದೊಳಗೆ ಲಾಕ್ ಮಾಡಿಕೊಳ್ಳುವ ಪರಿಸ್ಥಿತಿ ಬಂದಿದೆ.
ಏಕಾಂಗಿ ಪ್ರಯಾಣಿಕರಾದ ಈ ಮಹಿಳೆ ಭಯಾನಕ ಪರಿಸ್ಥಿತಿಯನ್ನು ವಿಡಿಯೋ ರೆಕಾರ್ಡ್ ಮಾಡಿ ನಂತರ ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿದ್ದಾರೆ.
ಬಾಗಿಲು ಬಡಿದಾಗ ಹೆಚ್ಚಿದ ಭಯ
ರೈಲು ಕಟಿಹಾರ್ ಜಂಕ್ಷನ್ನಲ್ಲಿ ನಿಂತಿದ್ದಾಗ ಈ ಘಟನೆ ನಡೆದಿದ್ದು, ಇದ್ದಕ್ಕಿದ್ದಂತೆ 30-40 ಮಂದಿ ಯುವಕರು ಕೂಗಾಡುತ್ತಾ ಮತ್ತು ಒಬ್ಬರಿಗೊಬ್ಬರು ತಳ್ಳುತ್ತಾ ರೈಲು ಬೋಗಿಯೊಳಗೆ ನುಗ್ಗಿದ್ದಾರೆ. ಈ ಅವ್ಯವಸ್ಥೆ ಸೃಷ್ಟಿಯಾಗುತ್ತಿದ್ದಂತೆ ಶೌಚಾಲಯದಲ್ಲಿದ್ದ ಮಹಿಳೆ ಬಾಗಿಲು ತೆರೆಯಲು ಸಹ ಸಾಧ್ಯವಾಗದೆ ಒಳಗೆ ಸಿಲುಕಿಕೊಂಡಿದ್ದಾರೆ.
ಶೌಚಾಲಯದ ಬಾಗಿಲು ಹಾಕಿಕೊಂಡು ಒಳಗಿನಿಂದಲೇ ವಿಡಿಯೋ ಮಾಡಿದ ಮಹಿಳೆ, “ರೈಲಿನಲ್ಲಿ ಜಗಳವಾಗುತ್ತಿದೆ. ಜನರು ಶೌಚಾಲಯದ ಬಾಗಿಲಿಗೆ ಬಡಿಯುತ್ತಿದ್ದಾರೆ. ನನಗೆ ಬಹಳ ಭಯವಾಗುತ್ತಿದೆ” ಎಂದು ಭಯಭೀತರಾಗಿ ಪಿಸುಗುಟ್ಟುತ್ತಿರುವುದು ಕೇಳಿಬಂದಿದೆ. ಈ ಅನುಭವವನ್ನು ಅವರು “ಅತ್ಯಂತ ಭಯಾನಕ” ಎಂದು ಬಣ್ಣಿಸಿದ್ದಾರೆ. ನುಗ್ಗಿದ ಪುರುಷರು ಟಿಕೆಟ್ ಪರೀಕ್ಷಕರೊಂದಿಗೂ ವಾದಕ್ಕಿಳಿದಿದ್ದಾರೆ ಎಂದು ಮಹಿಳೆ ಆರೋಪಿಸಿದ್ದಾರೆ.
ಆರ್ಪಿಎಫ್ನಿಂದ ರಕ್ಷಣೆ
ತಕ್ಷಣವೇ ಜಾಣ್ಮೆ ತೋರಿದ ಮಹಿಳೆ ರೈಲ್ವೆ ಸಹಾಯವಾಣಿ (139) ಗೆ ಕರೆ ಮಾಡಿ ನೆರವು ಯಾಚಿಸಿದ್ದಾರೆ. ಕರೆಯ ಬೆನ್ನಲ್ಲೇ ರೈಲ್ವೆ ಸಂರಕ್ಷಣಾ ಪಡೆ (ಆರ್ಪಿಎಫ್) ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ ಪರಿಸ್ಥಿತಿಯನ್ನು ನಿಯಂತ್ರಿಸಿದ್ದಾರೆ. ಅವರು ಬೋಗಿಯ ದಾರಿಯನ್ನು ತೆರವುಗೊಳಿಸಿ, ಮಹಿಳೆಗೆ ಅವರ ಆಸನಕ್ಕೆ ಸುರಕ್ಷಿತವಾಗಿ ಮರಳಲು ಸಹಾಯ ಮಾಡಿದ್ದಾರೆ.
ಘಟನೆಯಿಂದ ತೀವ್ರವಾಗಿ ನೊಂದ ಮಹಿಳೆ, “ನೀವು ಎಷ್ಟೇ ಮಾಡಿದರೂ ಬಿಹಾರವನ್ನು ಸರಿಪಡಿಸಲು ಸಾಧ್ಯವಿಲ್ಲ” ಎಂದು ಸಾಮಾಜಿಕ ಮಾಧ್ಯಮದಲ್ಲಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಈ ಘಟನೆಯು ದೇಶದ ರೈಲುಗಳಲ್ಲಿ ಮಹಿಳೆಯರ ಏಕಾಂಗಿ ಪ್ರಯಾಣದ ಸುರಕ್ಷತೆಯ ಕುರಿತು ಮತ್ತೊಮ್ಮೆ ದೊಡ್ಡ ಚರ್ಚೆಗೆ ನಾಂದಿ ಹಾಡಿದೆ.
