ಬೆಂಗಳೂರು: ಎಲ್ಪಿಜಿ (LPG) ಗ್ರಾಹಕರಿಗಾಗಿ ಇತ್ತೀಚೆಗೆ ಕೆಲವು ಪ್ರಮುಖ ನಿಯಮಗಳು ಜಾರಿಗೆ ಬಂದಿವೆ. ವಿಶೇಷವಾಗಿ ಮನೆ ಅಥವಾ ನಗರ ಬದಲಾಯಿಸುವವರು ಹಾಗೂ ಪೈಪ್ ಮೂಲಕ ಸರಬರಾಜಾಗುವ ನೈಸರ್ಗಿಕ ಅನಿಲ (PNG) ಸಂಪರ್ಕ ಪಡೆಯಲು ಬಯಸುವವರು ಈ ಮಾರ್ಗಸೂಚಿಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು. ಇಲ್ಲವಾದರೆ ಸಂಪರ್ಕ ವರ್ಗಾವಣೆಯಲ್ಲಿ ವಿಳಂಬವಾಗುವುದು ಮಾತ್ರವಲ್ಲದೆ, ಕೆಲವು ಸಂದರ್ಭಗಳಲ್ಲಿ ಗ್ಯಾಸ್ ಸಂಪರ್ಕ ರದ್ದಾಗುವ ಸಾಧ್ಯತೆಯೂ ಇದೆ.
ಮನೆ ಅಥವಾ ನಗರ ಬದಲಾಯಿಸಲು ಯೋಜಿಸುತ್ತಿರುವ ಎಲ್ಪಿಜಿ (LPG) ಗ್ರಾಹಕರು ಎಚ್ಚರಿಕೆಯಿಂದ ಇರಬೇಕು. ಸಂಪರ್ಕ ವರ್ಗಾವಣೆಗೆ ಸಂಬಂಧಿಸಿದ ಕೆಲವು ಪ್ರಮುಖ ನಿಯಮಗಳನ್ನು ತೈಲ ಮಾರುಕಟ್ಟೆ ಕಂಪನಿಗಳು ಜಾರಿಗೊಳಿಸಿದ್ದು, ಅವುಗಳನ್ನು ಪಾಲಿಸದಿದ್ದರೆ ಸಂಪರ್ಕ ವರ್ಗಾವಣೆಯಲ್ಲಿ ವಿಳಂಬ ಉಂಟಾಗುವ ಸಾಧ್ಯತೆ ಇದೆ. ಆದ್ದರಿಂದ ಮನೆ ಬದಲಾಯಿಸುವ ಮೊದಲು ಅಗತ್ಯ ದಾಖಲೆಗಳೊಂದಿಗೆ ಗ್ಯಾಸ್ ಏಜೆನ್ಸಿಯನ್ನು ಸಂಪರ್ಕಿಸಿ ನಿಗದಿತ ಪ್ರಕ್ರಿಯೆ ಪೂರ್ಣಗೊಳಿಸುವುದು ಅಗತ್ಯವಾಗಿದೆ.
1. ಮನೆ ಬದಲಾಯಿಸುವ ಮೊದಲು ಏನು ಮಾಡಬೇಕು?
ನೀವು ಮನೆ ಬದಲಾಯಿಸಲು ಯೋಜಿಸುತ್ತಿದ್ದರೆ, ಮೊದಲು ನಿಮ್ಮ LPG ವಿತರಕರಿಗೆ ಮಾಹಿತಿ ನೀಡಬೇಕು. ಸಂಪರ್ಕ ವರ್ಗಾವಣೆಗೆ ಅರ್ಜಿ ಸಲ್ಲಿಸಿ, ಗುರುತಿನ ಚೀಟಿ, ಹೊಸ ವಿಳಾಸದ ದಾಖಲೆ, ಗ್ಯಾಸ್ ಬುಕ್ಕಿಂಗ್ ವಿವರಗಳು ಹಾಗೂ ಸಂಪರ್ಕ ವೌಚರ್ ಸೇರಿದಂತೆ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕಾಗುತ್ತದೆ.
2. ಅದೇ ಗ್ಯಾಸ್ ಏಜೆನ್ಸಿ ವ್ಯಾಪ್ತಿಯೊಳಗೆ ಮನೆ ಬದಲಾಯಿಸಿದರೆ
ನೀವು ಅದೇ ಗ್ಯಾಸ್ ಏಜೆನ್ಸಿಯ ಸೇವಾ ವ್ಯಾಪ್ತಿಯಲ್ಲಿಯೇ ಹೊಸ ಮನೆಗೆ ಸ್ಥಳಾಂತರವಾದರೆ, ಹೊಸ ಸಂಪರ್ಕ ಪಡೆಯುವ ಅಗತ್ಯವಿಲ್ಲ. ಕೇವಲ ನಿಮ್ಮ ವಿಳಾಸವನ್ನು ನವೀಕರಿಸಿದರೆ ಸಾಕು. ಇದರಿಂದ LPG ಸಿಲಿಂಡರ್ ಸರಬರಾಜಿನಲ್ಲಿ ಯಾವುದೇ ಅಡಚಣೆ ಉಂಟಾಗುವುದಿಲ್ಲ.
3. ಬೇರೆ ಪ್ರದೇಶಕ್ಕೆ ಸ್ಥಳಾಂತರವಾದರೆ
ಹೊಸ ಮನೆ ಬೇರೆ ಗ್ಯಾಸ್ ಏಜೆನ್ಸಿಯ ಸೇವಾ ವ್ಯಾಪ್ತಿಯಲ್ಲಿದ್ದರೆ, ನಿಮ್ಮ ಹಳೆಯ ಏಜೆನ್ಸಿಯಿಂದ ಟ್ರಾನ್ಸ್ಫರ್ ಟರ್ಮಿನೇಶನ್ ವೌಚರ್ (TTV) ಪಡೆಯಬೇಕು. ಈ ದಾಖಲೆಯ ಆಧಾರದ ಮೇಲೆ ಹೊಸ ಏಜೆನ್ಸಿಯಲ್ಲಿ LPG ಸಂಪರ್ಕ ವರ್ಗಾಯಿಸಿಕೊಳ್ಳಬಹುದು. ಇದಕ್ಕಾಗಿ ಅಗತ್ಯ ದಾಖಲೆಗಳನ್ನೂ ಸಲ್ಲಿಸಬೇಕು.
4. ಬೇರೆ ನಗರಕ್ಕೆ ಹೋದರೆ
ನೀವು ಬೇರೆ ನಗರಕ್ಕೆ ಸ್ಥಳಾಂತರವಾಗುತ್ತಿದ್ದರೆ, ಮೊದಲು ನಿಮ್ಮ ಹಳೆಯ ಗ್ಯಾಸ್ ಏಜೆನ್ಸಿಗೆ LPG ಸಿಲಿಂಡರ್ ಮತ್ತು ರೆಗ್ಯುಲೇಟರ್ ಹಿಂತಿರುಗಿಸಬೇಕು. ನಂತರ ಏಜೆನ್ಸಿ ಟರ್ಮಿನೇಶನ್ ವೌಚರ್ ನೀಡಿ, ನೀವು ಪಾವತಿಸಿದ್ದ ಭದ್ರತಾ ಠೇವಣಿಯನ್ನು (Security Deposit) ಮರುಪಾವತಿಸುತ್ತದೆ. ಬಳಿಕ ಹೊಸ ನಗರದ ಏಜೆನ್ಸಿಯಲ್ಲಿ ದಾಖಲೆಗಳನ್ನು ಸಲ್ಲಿಸಿ ಹೊಸ ಸಂಪರ್ಕ ಪಡೆಯಬಹುದು.
5. PNG ಸಂಪರ್ಕ ಪಡೆಯಲು ಬಯಸಿದರೆ
ದೇಶಾದ್ಯಂತ ಕಳೆದ ಆರು ತಿಂಗಳಲ್ಲಿ 13.4 ಲಕ್ಷಕ್ಕೂ ಹೆಚ್ಚು ಹೊಸ PNG ಸಂಪರ್ಕಗಳು ನೀಡಲಾಗಿದೆ. ಸರ್ಕಾರದ ಹೊಸ ಮಾರ್ಗಸೂಚಿಗಳ ಬಳಿಕ PNG ಸಂಪರ್ಕಗಳ ಸಂಖ್ಯೆ ವೇಗವಾಗಿ ಹೆಚ್ಚುತ್ತಿದೆ. ಸರ್ಕಾರವು ಒಟ್ಟು 60 ಲಕ್ಷ PNG ಸಂಪರ್ಕಗಳನ್ನು ಒದಗಿಸುವ ಗುರಿ ಹೊಂದಿದೆ. ಹೊಸ ನಿಯಮಗಳ ಪ್ರಕಾರ, LPG ಮತ್ತು PNG ಎರಡೂ ಸಂಪರ್ಕಗಳನ್ನು ಒಂದೇ ಸಮಯದಲ್ಲಿ ಮುಂದುವರಿಸಲು ಅವಕಾಶ ಇರುವುದಿಲ್ಲ. ಆದ್ದರಿಂದ PNG ಸಂಪರ್ಕ ಪಡೆಯಲು ಬಯಸುವವರು ತಮ್ಮ LPG ಸಂಪರ್ಕವನ್ನು ಸ್ವಯಂಪ್ರೇರಿತವಾಗಿ ರದ್ದುಪಡಿಸಬೇಕಾಗಬಹುದು.
ಮನೆ ಅಥವಾ ನಗರ ಬದಲಾಯಿಸುವ ಮುನ್ನ ನಿಮ್ಮ LPG ವಿತರಕರನ್ನು ಸಂಪರ್ಕಿಸಿ ಅಗತ್ಯ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸುವುದು ಅತ್ಯಂತ ಮುಖ್ಯ. ಸರಿಯಾದ ದಾಖಲೆಗಳನ್ನು ಸಲ್ಲಿಸುವ ಮೂಲಕ ಸಂಪರ್ಕ ವರ್ಗಾವಣೆ ಸುಗಮವಾಗುತ್ತದೆ ಮತ್ತು ಗ್ಯಾಸ್ ಸರಬರಾಜಿನಲ್ಲಿ ಯಾವುದೇ ತೊಂದರೆ ಎದುರಾಗುವುದಿಲ್ಲ.
