ನವದೆಹಲಿ: ಹೊಸ ವರ್ಷದ ಆರಂಭದ ದಿನವಾದ 2026ರ ಜನವರಿ 1 ರಿಂದ ದೇಶಾದ್ಯಂತ ‘ಭಾರತ್ ಟ್ಯಾಕ್ಸಿ’ ಎಂಬ ಹೊಸ ರೈಡ್-ಹೇಲಿಂಗ್ ಅಪ್ಲಿಕೇಶನ್ ಅಧಿಕೃತವಾಗಿ ಕಾರ್ಯಾರಂಭ ಮಾಡಲಿದೆ. ಕೇಂದ್ರ ಸಹಕಾರ ಸಚಿವ ಅಮಿತ್ ಶಾ ಅವರ ಮಾರ್ಗದರ್ಶನದಲ್ಲಿ ರೂಪುಗೊಂಡಿರುವ ಈ ಆಪ್, ಖಾಸಗಿ ಕಂಪನಿಗಳಾದ ಓಲಾ (Ola) ಮತ್ತು ಉಬರ್ (Uber) ಸಂಸ್ಥೆಗಳಿಗೆ ಪ್ರಬಲ ಪೈಪೋಟಿ ನೀಡಲು ಸಜ್ಜಾಗಿದೆ.
ಏನಿದು ಭಾರತ್ ಟ್ಯಾಕ್ಸಿ?ಇದು ‘ಸಹಕಾರ್ ಟ್ಯಾಕ್ಸಿ ಕೋ-ಆಪರೇಟಿವ್ ಲಿಮಿಟೆಡ್’ (Sahakar Taxi Cooperative Limited) ಮೂಲಕ ಕಾರ್ಯಾಚರಿಸುವ ವಿಶ್ವದ ಮೊದಲ ರಾಷ್ಟ್ರೀಯ ಚಾಲಕ ಸಹಕಾರಿ ಸಂಸ್ಥೆಯಾಗಿದೆ. ಅಮೂಲ್ (Amul), ಇಫ್ಕೊ (IFFCO), ಮತ್ತು ನಬಾರ್ಡ್ (NABARD) ನಂತಹ ಪ್ರಮುಖ ಸಹಕಾರಿ ಸಂಸ್ಥೆಗಳ ಬೆಂಬಲದೊಂದಿಗೆ ಇದು ಆರಂಭವಾಗುತ್ತಿದೆ.
ಚಾಲಕರಿಗೇನು ಲಾಭ?
- ಶೂನ್ಯ ಕಮಿಷನ್: ಖಾಸಗಿ ಆಪ್ಗಳು ಚಾಲಕರಿಂದ ಶೇ. 20-30 ರಷ್ಟು ಕಮಿಷನ್ ಪಡೆಯುತ್ತವೆ. ಆದರೆ ಭಾರತ್ ಟ್ಯಾಕ್ಸಿಯಲ್ಲಿ ಚಾಲಕರಿಗೆ ಯಾವುದೇ ಕಮಿಷನ್ ಇರುವುದಿಲ್ಲ. ಅಂದರೆ ಗಳಿಸಿದ ಶೇ. 100 ರಷ್ಟು ಹಣ ಚಾಲಕರಿಗೇ ಸೇರುತ್ತದೆ.
- ಲಾಭದ ಪಾಲು: ಇದೊಂದು ಸಹಕಾರಿ ಮಾದರಿಯಾಗಿದ್ದರಿಂದ, ಸಂಸ್ಥೆಗೆ ಬರುವ ಲಾಭದ ಪಾಲನ್ನು ಚಾಲಕರಿಗೆ ಲಾಭಾಂಶದ (Dividend) ರೂಪದಲ್ಲಿ ನೀಡಲಾಗುತ್ತದೆ.
- ವಿಮೆ ಸೌಲಭ್ಯ: ಚಾಲಕರಿಗೆ ಆರೋಗ್ಯ ಮತ್ತು ಅಪಘಾತ ವಿಮೆ ಸೌಲಭ್ಯಗಳನ್ನು ನೀಡಲಾಗುವುದು.
ಪ್ರಯಾಣಿಕರಿಗೇನು ಲಾಭ?
- ಸರ್ಜ್ ಪ್ರೈಸಿಂಗ್ ಇಲ್ಲ: ಮಳೆ ಬಂದಾಗ ಅಥವಾ ಜನದಟ್ಟಣೆ ಇರುವ ಸಮಯದಲ್ಲಿ ಖಾಸಗಿ ಆಪ್ಗಳಲ್ಲಿ ದರ ಎರಡು-ಮೂರು ಪಟ್ಟು ಹೆಚ್ಚಾಗುತ್ತದೆ. ಆದರೆ ಭಾರತ್ ಟ್ಯಾಕ್ಸಿಯಲ್ಲಿ ಯಾವುದೇ ‘ಸರ್ಜ್ ಪ್ರೈಸಿಂಗ್’ ಇರುವುದಿಲ್ಲ.
- ಸ್ಥಿರ ಮತ್ತು ಪಾರದರ್ಶಕ ದರ: ಎಲ್ಲಾ ಸಮಯದಲ್ಲೂ ನ್ಯಾಯಯುತ ಮತ್ತು ಸ್ಥಿರ ದರಗಳನ್ನು ಪ್ರಯಾಣಿಕರು ನಿರೀಕ್ಷಿಸಬಹುದು.
- ಸುರಕ್ಷತೆ: ದೆಹಲಿ ಪೊಲೀಸರ ಸಹಯೋಗದೊಂದಿಗೆ ಚಾಲಕರ ಪೂರ್ಣ ಪರಿಶೀಲನೆ ಮತ್ತು ನೈಜ-ಸಮಯದ ಲೊಕೇಶನ್ ಟ್ರ್ಯಾಕಿಂಗ್ ವ್ಯವಸ್ಥೆ ಇರಲಿದೆ.
ಸೇವೆಗಳು ಲಭ್ಯ:ಬೈಕ್ ಟ್ಯಾಕ್ಸಿ, ಆಟೋ ರಿಕ್ಷಾ, ಮತ್ತು ಕಾರ್ ಟ್ಯಾಕ್ಸಿ ಸೇರಿದಂತೆ ಎಲ್ಲಾ ರೀತಿಯ ಸಾರಿಗೆ ಸೌಲಭ್ಯಗಳು ಈ ಆಪ್ನಲ್ಲಿ ಲಭ್ಯವಿರಲಿವೆ. ಈಗಾಗಲೇ ದೆಹಲಿ ಮತ್ತು ಗುಜರಾತ್ನ ರಾಜ್ಕೋಟ್ನಲ್ಲಿ ಪ್ರಾಯೋಗಿಕವಾಗಿ ಚಾಲನೆ ನೀಡಲಾಗಿದ್ದು, 56,000 ಕ್ಕೂ ಹೆಚ್ಚು ಚಾಲಕರು ನೋಂದಾಯಿಸಿಕೊಂಡಿದ್ದಾರೆ.
ಗ್ರಾಹಕರು ‘Bharat Taxi’ ಆಪ್ ಅನ್ನು ಗೂಗಲ್ ಪ್ಲೇ ಸ್ಟೋರ್ ಮತ್ತು ಆಪಲ್ ಆಪ್ ಸ್ಟೋರ್ ಮೂಲಕ ಡೌನ್ಲೋಡ್ ಮಾಡಿಕೊಳ್ಳಬಹುದು.
