ಪ್ರಯಾಣಿಕರಿಗೆ ಗುಡ್’ನ್ಯೂಸ್ ; ಶೀಘ್ರವೇ ಬೆಂಗಳೂರು–ಮುಂಬೈ ವಂದೇ ಭಾರತ್ ಸ್ಲೀಪರ್ ರೈಲು ಸಂಚಾರ ಆರಂಭ

ಬೆಂಗಳೂರು : ದೇಶದ ಪ್ರಮುಖ ವಾಣಿಜ್ಯ ನಗರಿ ಮುಂಬೈ ಹಾಗೂ ಸಿಲಿಕಾನ್ ಸಿಟಿ ಬೆಂಗಳೂರು ನಡುವಿನ ಪ್ರಯಾಣಿಕರಿಗೆ ಭಾರತೀಯ ರೈಲ್ವೆ ಸಿಹಿ ಸುದ್ದಿ ನೀಡಿದೆ. ಕೆಎಸ್ಆರ್ ಬೆಂಗಳೂರು ಮತ್ತು ಮುಂಬೈನ ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್ ( ನಡುವೆ ಬಹುನಿರೀಕ್ಷಿತ ‘ವಂದೇ ಭಾರತ್ ಸ್ಲೀಪರ್ ಎಕ್ಸ್‌ಪ್ರೆಸ್’ ರೈಲು ಸೇವೆ ಶೀಘ್ರದಲ್ಲೇ ಆರಂಭಗೊಳ್ಳಲಿದೆ.

ರೈಲ್ವೆ ಮಂಡಳಿಯು ಈ ನೂತನ ರೈಲು ಸೇವೆಗೆ ಅಧಿಕೃತ ಅನುಮೋದನೆ ನೀಡಿದ್ದು, ಮಾರ್ಗ, ವೇಳಾಪಟ್ಟಿ ಹಾಗೂ ಆವರ್ತನದ ಕುರಿತು ಪ್ರಮುಖ ವಿವರಗಳನ್ನು ಬಿಡುಗಡೆ ಮಾಡಿದೆ.

ರೈಲಿನ ವೇಳಾಪಟ್ಟಿ

ವೇಳಾಪಟ್ಟಿ ವಿವರ:

ರೈಲು ಸಂಖ್ಯೆ 27652 (ಕೆಎಸ್ಆರ್ ಬೆಂಗಳೂರು – ಮುಂಬೈ CSMT):

ಹೊರಡುವ ಸಮಯ: ಕೆಎಸ್ಆರ್ ಬೆಂಗಳೂರಿನಿಂದ ರಾತ್ರಿ 22:00 (10:00 PM) ಗಂಟೆಗೆ ನಿರ್ಗಮಿಸಲಿದೆ.

ತಲುಪುವ ಸಮಯ: ಮರುದಿನ ಮಧ್ಯಾಹ್ನ 14:50 (02:50 PM) ಗಂಟೆಗೆ ಮುಂಬೈ (CSMT) ತಲುಪಲಿದೆ.

ಸಂಚಾರದ ದಿನಗಳು: ಸೋಮವಾರವನ್ನು ಹೊರತುಪಡಿಸಿ ವಾರದಲ್ಲಿ 6 ದಿನ ಸಂಚರಿಸಲಿದೆ.

ರೈಲು ಸಂಖ್ಯೆ 27651 (ಮುಂಬೈ CSMT – ಕೆಎಸ್ಆರ್ ಬೆಂಗಳೂರು):

ಹೊರಡುವ ಸಮಯ: ಮುಂಬೈ CSMT ಯಿಂದ ರಾತ್ರಿ 22:30 (10:30 PM) ಗಂಟೆಗೆ ನಿರ್ಗಮಿಸಲಿದೆ.

ತಲುಪುವ ಸಮಯ: ಮರುದಿನ ಮಧ್ಯಾಹ್ನ 14:50 (02:50 PM) ಗಂಟೆಗೆ ಕೆಎಸ್ಆರ್ ಬೆಂಗಳೂರು ತಲುಪಲಿದೆ.

ಸಂಚಾರದ ದಿನಗಳು: ಮಂಗಳವಾರವನ್ನು ಹೊರತುಪಡಿಸಿ ವಾರದಲ್ಲಿ 6 ದಿನ ಸಂಚರಿಸಲಿದೆ.

ವಾಣಿಜ್ಯ ನಿಲುಗಡೆಗಳು

ವಾಣಿಜ್ಯ ನಿಲುಗಡೆಗಳು

ಈ ಹೈ-ಸ್ಪೀಡ್ ಸ್ಲೀಪರ್ ರೈಲು ಮಾರ್ಗಮಧ್ಯೆ ಪ್ರಮುಖ ನಗರಗಳಾದ ಅನಂತಪುರ, ಧರ್ಮಾವರಂ, ಗುಂತಕಲ್, ರಾಯಚೂರು, ಕಲಬುರಗಿ, ವಾಡಿ, ಸೋಲಾಪುರ, ಪುಣೆ ಮತ್ತು ಕಲ್ಯಾಣ್ ನಿಲ್ದಾಣಗಳಲ್ಲಿ ವಾಣಿಜ್ಯ ನಿಲುಗಡೆ ಹೊಂದಿರಲಿದೆ.

ರೇಕ್ ಸಂಯೋಜನೆ

ರೇಕ್ ಸಂಯೋಜನೆ:

ಈ ಸೇವೆಗಾಗಿ 2 ಅತ್ಯಾಧುನಿಕ ವಂದೇ ಭಾರತ್ ಸ್ಲೀಪರ್ ರೇಕ್‌ಗಳನ್ನು ಬಳಸಲಾಗುತ್ತದೆ. ರೈಲಿನ ಸ್ವಚ್ಛತೆ ಮತ್ತು ನೀರು ತುಂಬಿಸುವ ಪ್ರಕ್ರಿಯೆಗಳನ್ನು (CTS) ಸೋಲಾಪುರ ಮತ್ತು ಪುಣೆ ನಿಲ್ದಾಣಗಳಲ್ಲಿ ನಿರ್ವಹಿಸಲಾಗುತ್ತದೆ.

ಶೀಘ್ರದಲ್ಲೇ ಸೂಕ್ತ ದಿನಾಂಕವನ್ನು ನಿಗದಿಪಡಿಸಿ ವಿಶೇಷ ಉದ್ಘಾಟನಾ ರೈಲು ಸೇವೆಗೆ ಚಾಲನೆ ನೀಡಲಾಗುವುದು, ತದನಂತರ ನಿಗದಿತ ವೇಳಾಪಟ್ಟಿಯಂತೆ ನಿಯಮಿತ ಸಂಚಾರ ಆರಂಭವಾಗಲಿದೆ.

ಪ್ರಯಾಣಿಕರ ಸೌಲಭ್ಯ

ಐಟಿ ಉದ್ಯೋಗಿಗಳು, ಉದ್ಯಮಿಗಳು ಹಾಗೂ ಸಾರ್ವಜನಿಕರಿಗೆ ಬೆಂಗಳೂರು ಮತ್ತು ಮುಂಬೈ ನಡುವೆ ವೇಗದ, ಆರಾಮದಾಯಕ ಹಾಗೂ ಹೈಟೆಕ್ ರಾತ್ರಿ ಪ್ರಯಾಣದ ಸೌಲಭ್ಯ ಕಲ್ಪಿಸಲು ಈ ವಂದೇ ಭಾರತ್ ಸ್ಲೀಪರ್ ರೈಲು ಸಹಕಾರಿಯಾಗಲಿದೆ.

ರೈಲ್ವೆ ಮಂಡಳಿಯ ಪತ್ರದಲ್ಲಿ ಸೇವೆಯನ್ನು ಶೀಘ್ರವಾಗಿ ಜಾರಿಗೆ ತರಲು ಸೂಚಿಸಿರುವುದರ ಜೊತೆಗೆ, ಅಗತ್ಯವಿದ್ದರೆ ಉದ್ಘಾಟನಾ ರೈಲನ್ನು ವಿಶೇಷ ಸೇವೆಯಾಗಿ ನಡೆಸಿ ನಂತರ ನಿಗದಿತ ಸಂಪರ್ಕ ಸೇವೆಗೆ ಜೋಡಿಸಬಹುದು ಎಂದು ತಿಳಿಸಲಾಗಿದೆ. ಈ ಸಂಬಂಧ ವ್ಯಾಪಕ ಪ್ರಚಾರ ಕೈಗೊಳ್ಳುವಂತೆಯೂ ರೈಲ್ವೆ ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದೆ.

ಆದರೆ, ರೈಲ್ವೆ ಮಂಡಳಿಯ ಈ ಅನುಮೋದನೆ ಮತ್ತು ಪ್ರಸ್ತಾವಿತ ವೇಳಾಪಟ್ಟಿ ಹೊರಬಂದಿರುವುದರಿಂದಲೇ ಸೇವೆ ಈಗಾಗಲೇ ಪ್ರಯಾಣಿಕರಿಗೆ ಲಭ್ಯವಾಗಿದೆ ಎಂದು ಪರಿಗಣಿಸಲಾಗದು. ನಿಖರ ಉದ್ಘಾಟನಾ ದಿನಾಂಕ, ಟಿಕೆಟ್ ದರ, ಕಾಯ್ದಿರಿಸುವಿಕೆ ಆರಂಭದ ದಿನಾಂಕ ಮತ್ತು ಅಂತಿಮ ಸಾರ್ವಜನಿಕ ವೇಳಾಪಟ್ಟಿಯನ್ನು ರೈಲ್ವೆ ಅಧಿಕೃತವಾಗಿ ಪ್ರಕಟಿಸಿದ ಬಳಿಕವೇ ಸೇವೆಯ ವಾಣಿಜ್ಯ ಕಾರ್ಯಾಚರಣೆ ಖಚಿತವಾಗಲಿದೆ.

ಬೆಂಗಳೂರು–ಮುಂಬೈ ನಡುವಿನ ವೇಗದ, ರಾತ್ರಿ ಪ್ರಯಾಣಕ್ಕೆ ಅನುಕೂಲಕರ ಹಾಗೂ ಆಧುನಿಕ ರೈಲು ಸಂಪರ್ಕದ ನಿರೀಕ್ಷೆಯಲ್ಲಿದ್ದ ಪ್ರಯಾಣಿಕರಿಗೆ ರೈಲ್ವೆ ಮಂಡಳಿಯ ಈ ಕ್ರಮ ಮಹತ್ವದ ಬೆಳವಣಿಗೆಯಾಗಿದೆ.