ಪಾಟ್ನಾ-ಬಿಹಾರದ ಬೇಗುಸರಾಯ್ ಜಿಲ್ಲೆಯಲ್ಲಿ ವರದಿಯಾದ ಮನುಕುಲ ತಲೆತಗ್ಗಿಸುವಂತಹ ಘಟನೆಯೊಂದು ಇಡೀ ದೇಶದ ಗಮನ ಸೆಳೆದಿದೆ.
ಅತ್ಯಾಚಾರದ ದೂರು ನೀಡಿದ ಸಂತ್ರದ ಮಹಿಳೆಗೆ ನ್ಯಾಯ ಒದಗಿಸುವ ಬದಲು, ಸ್ಥಳೀಯ ಪಂಚಾಯತ್ ಅಮಾನವೀಯ ಶಿಕ್ಷೆ ವಿಧಿಸಿ, ಸಾರ್ವಜನಿಕವಾಗಿ ಅವಮಾನಿಸಿರುವ ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಘಟನೆಯ ವಿವರ
ಆಗಸ್ಟ್ 1 ರಂದು ದಾಖಲಾಗಿರುವ ಎಫ್ಐಆರ್ ಪ್ರಕಾರ, ಕಳೆದ ಜೂನ್ 2 ರ ರಾತ್ರಿ ನೆರೆಹೊರೆಯ ವ್ಯಕ್ತಿಯೊಬ್ಬ ಮಹಿಳೆಯ ಮನೆಗೆ ಬಲವಂತವಾಗಿ ನುಗ್ಗಿ, ಜೀವ ಬೆದರಿಕೆ ಹಾಕಿ ಅತ್ಯಾಚಾರ ಎಸಗಿದ್ದನು. ಆರೋಪಿ ಕಿಟಕಿಯ ಮೂಲಕ ಪರಾರಿಯಾಗಲು ಯತ್ನಿಸಿದಾಗ ಗ್ರಾಮಸ್ಥರು ಆತನನ್ನು ಹಿಡಿದರು. ಆದರೆ, ಕಾನೂನು ಪ್ರಕಾರ ಪೊಲೀಸರಿಗೆ ಮಾಹಿತಿ ನೀಡಬೇಕಿದ್ದ ಸ್ಥಳೀಯ ಮುಖಂಡರು ಮತ್ತು ಗ್ರಾಮಸ್ಥರು ಅನಧಿಕೃತ ಪಂಚಾಯತ್ ನಡೆಸಿ, ಸಂತ್ರತ ಮಹಿಳೆ ಹಾಗೂ ಆರೋಪಿ ಇಬ್ಬರಿಗೂ ಅಮಾನವೀಯ ಶಿಕ್ಷೆ ವಿಧಿಸಿದ್ದಾರೆ.
ವೈರಲ್ ವೀಡಿಯೊದಲ್ಲಿ ದಾಖಲಾದ ದೌರ್ಜನ್ಯ
ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ದೃಶ್ಯಾವಳಿಗಳ ಪ್ರಕಾರ,ಸಂತ್ರತ ಮಹಿಳೆ ಕಿವಿಗಳನ್ನು ಹಿಡಿದು ಕಣ್ಣೀರಿನೊಂದಿಗೆ ನಿಂತಿರುವುದು ಕಂಡುಬಂದಿದೆ.
ಪಂಚಾಯತ್ ನಿರ್ದೇಶನದಂತೆ ಆಕೆಗೆ ಬಲವಂತವಾಗಿ ನೆಲದ ಮೇಲೆ ಉಗುಳಿ, ಅದನ್ನು ನೆಕ್ಕುವಂತೆ ದೌರ್ಜನ್ಯ ಎಸಗಲಾಗಿದೆ.
ಇದೇ ವೇಳೆ, ಅತ್ಯಾಚಾರದ ಆರೋಪಿ ಎನ್ನಲಾದ ವ್ಯಕ್ತಿಗೂ ಸಹ ಕಿವಿಗಳನ್ನು ಹಿಡಿದು ಕ್ಷಮೆಯಾಚಿಸಿ, ಸಭೆಯ ಮುಂದೆ ಉಗುಳುವಂತೆ ಒತ್ತಾಯಿಸಲಾಗಿದೆ.
ಜೂನ್ನಲ್ಲಿಯೇ ನಡೆದಿದ್ದ ಈ ಕೃತ್ಯದ ವೀಡಿಯೊ ಜುಲೈ 31 ರಂದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆದ ಬಳಿಕವಷ್ಟೇ ಬೆಳಕಿಗೆ ಬಂದಿದೆ. ವಿಡಿಯೋ ವೈರಲ್ ಆಗಿ ಸಾರ್ವಜನಿಕ ವಲಯದಿಂದ ತೀವ್ರ ಆಕ್ರೋಶ ವ್ಯಕ್ತವಾದ ನಂತರ, ಪೊಲೀಸರು ಎಚ್ಚೆತ್ತುಕೊಂಡು ಆಗಸ್ಟ್ 1 ರಂದು ಅಧಿಕೃತವಾಗಿ ದೂರು ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.
ಗ್ರಾಮಸ್ಥರ ವಾದ ಮತ್ತು ಕಾನೂನು ತಜ್ಞರ ಅಭಿಪ್ರಾಯ
ಮತ್ತೊಂದೆಡೆ, ಗ್ರಾಮದ ಸ್ಥಳೀಯರು ಈ ಘಟನೆಯ ಕುರಿತು ವಿಭಿನ್ನ ವಾದವನ್ನು ಮುಂದಿಟ್ಟಿದ್ದಾರೆ. ಮಹಿಳೆ ಮತ್ತು ಆರೋಪಿ ಪರಸ್ಪರ ಸಂಬಂಧ ಹೊಂದಿದ್ದು, ಆಕ್ಷೇಪಾರ್ಹ ಪರಿಸ್ಥಿತಿಯಲ್ಲಿ ಸಿಕ್ಕಿಬಿದ್ದಿದ್ದರಿಂದ ಗ್ರಾಮಸ್ಥರು ಈ ರೀತಿ ಸಾರ್ವಜನಿಕವಾಗಿ ಶಿಕ್ಷೆ ವಿಧಿಸಿದರು ಎಂದು ಸ್ಥಳೀಯರು ಸಮರ್ಥಿಸಿಕೊಳ್ಳಲು ಯತ್ನಿಸುತ್ತಿದ್ದಾರೆ. ಆದರೆ, ಅತ್ಯಾಚಾರದಂತಹ ಗಂಭೀರ ಅಪರಾಧವನ್ನು ಬಚ್ಚಿಟ್ಟು, ಸಂವಿಧಾನಬದ್ಧ ಕಾನೂನನ್ನು ಕೈಗೆತ್ತಿಕೊಂಡು ಖಾಪ್ ಪಂಚಾಯತ್ಗಳ ಮಾದರಿಯಲ್ಲಿ ಮಹಿಳೆಯ ಮೇಲೆ ದೌರ್ಜನ್ಯ ಎಸಗಿರುವುದು ಕಾನೂನು ಬಾಹಿರ ಹಾಗೂ ಖಂಡನೀಯ ಎಂದು ಕಾನೂನು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಇಂದಿನ ಆಧುನಿಕ ಯುಗದಲ್ಲೂ ದೇಶದ ಕೆಲವು ಗ್ರಾಮೀಣ ಭಾಗಗಳಲ್ಲಿ ಇಂತಹ ಅಮಾನವೀಯ ಜಾತಿ-ಪಂಚಾಯತ್ ಸಂಸ್ಕೃತಿ ಜೀವಂತವಾಗಿರುವುದು ಮಹಿಳಾ ಸುರಕ್ಷತೆಯ ಪ್ರಶ್ನೆಯನ್ನು ಮುನ್ನೆಲೆಗೆ ತಂದಿದೆ. ಪೊಲೀಸರು ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ್ದು, ಸಂತ್ರತೆಯ ಮೇಲಿನ ಅತ್ಯಾಚಾರ ಆರೋಪ ಹಾಗೂ ಪಂಚಾಯತ್ ಸದಸ್ಯರ ಸಾರ್ವಜನಿಕ ಅವಮಾನದ ಕೃತ್ಯ ಎರಡೂ ಆಯಾಮಗಳಲ್ಲೂ ಸಮಗ್ರ ತನಿಖೆ ಮುಂದುವರೆಸಿದ್ದಾರೆ.
