ನವದೆಹಲಿ: ಕ್ಯಾನ್ಸರ್ ಎನ್ನುವ ಹೆಸರು ಕೇಳಿದರೆ ಇಂದಿಗೂ ಅನೇಕರು ಬೆಚ್ಚಿಬೀಳುತ್ತಾರೆ. ಆದರೆ, ಇತ್ತೀಚಿನ ಸಂಶೋಧನೆಯೊಂದು ಈ ಭಯಕ್ಕೆ ಮದ್ದನ್ನು ನೀಡಿದೆ. ನಾವು ನಮ್ಮ ಜೀವನಶೈಲಿಯಲ್ಲಿ ಸಣ್ಣ ಬದಲಾವಣೆಗಳನ್ನು ಮಾಡಿಕೊಂಡರೆ ಮತ್ತು ಪರಿಸರವನ್ನು ಸುಧಾರಿಸಿದರೆ, ಬರಲಿರುವ ಒಟ್ಟು ಕ್ಯಾನ್ಸರ್ ಪ್ರಕರಣಗಳಲ್ಲಿ ಶೇಕಡಾ 38 ಕ್ಕಿಂತ ಹೆಚ್ಚಿನ ಪ್ರಕರಣಗಳನ್ನು ತಡೆಗಟ್ಟಬಹುದು ಎಂದು ವಿಶ್ವ ಆರೋಗ್ಯ ಸಂಸ್ಥೆ (WHO) ಮತ್ತು ‘ನೇಚರ್ ಮೆಡಿಸಿನ್’ ವರದಿ ತಿಳಿಸಿದೆ.
19 ಮಿಲಿಯನ್ ಪ್ರಕರಣಗಳ ಆಳವಾದ ವಿಶ್ಲೇಷಣೆ
ಸಂಶೋಧಕರು 2022 ರಿಂದ ದಾಖಲಾದ ಸುಮಾರು 1.9 ಕೋಟಿ (19 ಮಿಲಿಯನ್) ಹೊಸ ಕ್ಯಾನ್ಸರ್ ಪ್ರಕರಣಗಳನ್ನು ಕೂಲಂಕಷವಾಗಿ ಅಧ್ಯಯನ ಮಾಡಿದ್ದಾರೆ. ಈ ವೇಳೆ ಮನುಷ್ಯರು ಮತ್ತು ಸರ್ಕಾರಗಳು ನಿಯಂತ್ರಿಸಬಹುದಾದ 30 ನಿರ್ದಿಷ್ಟ ಅಪಾಯಕಾರಿ ಅಂಶಗಳನ್ನು ಗುರುತಿಸಲಾಗಿದೆ. ಈ ಅಂಶಗಳನ್ನು ಸರಿಪಡಿಸಿಕೊಂಡರೆ ಶ್ವಾಸಕೋಶ, ಹೊಟ್ಟೆ ಮತ್ತು ಗರ್ಭಾಶಯದ ಕ್ಯಾನ್ಸರ್ನಿಂದ ಸುಲಭವಾಗಿ ಪಾರಾಗಬಹುದು ಎಂದು ವಿಜ್ಞಾನಿಗಳು ಧೈರ್ಯ ತುಂಬಿದ್ದಾರೆ.
ಕ್ಯಾನ್ಸರ್ಗೆ ಆಹ್ವಾನ ನೀಡುವ ಪ್ರಮುಖ ‘ಶತ್ರುಗಳು’ ಇವೇ ನೋಡಿ:
• ತಂಬಾಕು ಮತ್ತು ಧೂಮಪಾನ: ಕ್ಯಾನ್ಸರ್ಗೆ ಅತಿ ದೊಡ್ಡ ಕಾರಣವೆಂದರೆ ತಂಬಾಕು. ಜಗತ್ತಿನ ಒಟ್ಟು ಕ್ಯಾನ್ಸರ್ ಸಾವುಗಳಲ್ಲಿ ಶೇ. 15 ರಷ್ಟು ಮತ್ತು ಹೊಸದಾಗಿ ಪತ್ತೆಯಾಗುತ್ತಿರುವ ಪ್ರಕರಣಗಳಲ್ಲಿ ಶೇ. 23 ರಷ್ಟು ಕೇವಲ ಧೂಮಪಾನದಿಂದಲೇ ಸಂಭವಿಸುತ್ತಿವೆ. ಧೂಮಪಾನ ತ್ಯಜಿಸುವುದೇ ಕ್ಯಾನ್ಸರ್ ತಡೆಗೆ ಮೊದಲ ಮೆಟ್ಟಿಲು.
• ಮದ್ಯಪಾನ: ಮದ್ಯ ಸೇವನೆಯಿಂದಾಗಿ ವರ್ಷಕ್ಕೆ ಸುಮಾರು 7 ಲಕ್ಷ ಹೊಸ ಕ್ಯಾನ್ಸರ್ ಪ್ರಕರಣಗಳು ದಾಖಲಾಗುತ್ತಿವೆ. ಧೂಮಪಾನ ಮತ್ತು ಮದ್ಯಪಾನ ಎರಡನ್ನೂ ಬಿಟ್ಟರೆ ಕ್ಯಾನ್ಸರ್ ಅಪಾಯ ಗಣನೀಯವಾಗಿ ಕಡಿಮೆಯಾಗುತ್ತದೆ.
• ವಾಯು ಮಾಲಿನ್ಯ: ಬದಲಾಗುತ್ತಿರುವ ಪರಿಸರ ಮತ್ತು ಕೆಟ್ಟ ಗಾಳಿಯ ಗುಣಮಟ್ಟದಿಂದಲೂ ಕ್ಯಾನ್ಸರ್ ಹರಡುತ್ತಿದೆ. ವಿಶೇಷವಾಗಿ ಏಷ್ಯಾದ ದೇಶಗಳಲ್ಲಿ ಮಹಿಳೆಯರಲ್ಲಿ ಕಂಡುಬರುವ ಶೇ. 15 ರಷ್ಟು ಶ್ವಾಸಕೋಶದ ಕ್ಯಾನ್ಸರ್ಗೆ ವಾಯು ಮಾಲಿನ್ಯವೇ ನೇರ ಕಾರಣ ಎಂದು ತಿಳಿದುಬಂದಿದೆ.
• ಬೊಜ್ಜು ಮತ್ತು ವ್ಯಾಯಾಮದ ಕೊರತೆ: ದೇಹದ ತೂಕ ಮಿತಿ ಮೀರುವುದು (BMI), ದೈಹಿಕ ಶ್ರಮವಿಲ್ಲದ ಜೀವನ ಮತ್ತು ಸೂರ್ಯನ ನೇರಳಾತೀತ ಕಿರಣಗಳಿಗೆ (UV rays) ಅತಿಯಾಗಿ ಒಡ್ಡಿಕೊಳ್ಳುವುದರಿಂದ ವಿವಿಧ ರೀತಿಯ ಕ್ಯಾನ್ಸರ್ ಅಪಾಯ ಹೆಚ್ಚುತ್ತಿದೆ.
ವೈದ್ಯರ ಸಲಹೆ: ಚಿಕಿತ್ಸೆಗಿಂತ ಮುನ್ನೆಚ್ಚರಿಕೆ ಲೇಸು
ಕ್ಯಾನ್ಸರ್ ಬಂದ ಮೇಲೆ ಚಿಕಿತ್ಸೆ ಪಡೆಯುವುದಕ್ಕಿಂತ, ಅದು ಬರದಂತೆ ತಡೆಯುವುದು ಸುಲಭ ಎಂದು ತಜ್ಞರು ಹೇಳುತ್ತಾರೆ.
• ಸರಿಯಾದ ತೂಕವನ್ನು ಕಾಪಾಡಿಕೊಳ್ಳುವುದು.
• ದಿನನಿತ್ಯ ವ್ಯಾಯಾಮ ಮಾಡುವುದು.
• ಪೌಷ್ಠಿಕಾಂಶಯುಕ್ತ ಆಹಾರ ಸೇವನೆ.
• ಕೆಟ್ಟ ವ್ಯಸನಗಳಿಂದ ದೂರವಿರುವುದು.
ಈ ನಾಲ್ಕು ಸೂತ್ರಗಳನ್ನು ಪಾಲಿಸಿದರೆ ಈ ಮಹಾಮಾರಿಯನ್ನು ನಮ್ಮ ಹತ್ತಿರ ಸುಳಿಯದಂತೆ ನೋಡಿಕೊಳ್ಳಬಹುದು.
