ನವದೆಹಲಿ: ಇತ್ತೀಚೆಗೆ ಆ್ಯಂಟಿ ಬಯೋಟಿಕ್(ರೋಗ ನಿರೋಧಕ)ಗಳ ಅತಿಯಾದ ಬಳಕೆಯಿಂದ ಅವುಗಳ ಪರಿಣಾಮ ಕಡಿಮೆಯಾಗುತ್ತಿರುವ ಬಗ್ಗೆ ಪ್ರಧಾನಿ ಮೋದಿ ಕಳವಳ ವ್ಯಕ್ತಪಡಿಸಿದ್ದಾರೆ.
ವೈದ್ಯರ ಶಿಫಾರಸು ಇಲ್ಲದೆ ಅಂತಹ ಔಷಧಗಳನ್ನು ಸ್ವಯಂಪ್ರೇರಿತವಾಗಿ ಬಳಕೆ ಮಾಡದಂತೆ ದೇಶದ ಜನತೆಗೆ ಮನವಿ ಮಾಡಿದ್ದಾರೆ.
ಮಾಸಿಕ ಬಾನುಲಿ ಕಾರ್ಯಕ್ರಮ ‘ಮನ್ ಕಿ ಬಾತ್’ನಲ್ಲಿ ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ ವರದಿಯನ್ನು ಉಲ್ಲೇಖಿಸಿ ಮಾತನಾಡಿದ ಪ್ರಧಾನಿ ಮೋದಿ ನ್ಯುಮೋನಿಯಾ, ಮೂತ್ರನಾಳ ಸೋಂಕಿನಂತಹ ಕಾಯಿಲೆಗಳಿಗೆ ರೋಗನಿರೋಧಕ ಔಷಧಗಳು ಕೆಲಸ ಮಾಡುತ್ತಿಲ್ಲ ಎನ್ನುವ ವರದಿ ಅತ್ಯಂತ ಕಳವಳಕಾರಿಯಾಗಿದೆ. ಎಲ್ಲಾ ಸಮಸ್ಯೆಗಳಿಗೂ ಒಂದು ಮಾತ್ರೆ ಮೂಲಕ ಉಪಶಮನ ಪಡೆಯಬಹುದೆಂಬ ಜನರ ನಂಬಿಕೆ ಔಷಧಗಳ ಮನಸೋ ಇಚ್ಛೆ ಬಳಕೆಗೆ ಕಾರಣವಾಗಿದೆ. ವೈದ್ಯರ ಶಿಫಾರಸು ಹೊರತಾಗಿ ಅಂತಹ ಆ್ಯಂಟಿ ಬಯೋಟಿಕ್ ಬಳಕೆ ಮಾಡದಂತೆ ಜನರಿಗೆ ಮನವಿ ಮಾಡುತ್ತೇನೆ ಎಂದು ಮೋದಿ ತಿಳಿಸಿದ್ದಾರೆ.
