ದೇಹದ ಸೌಂದರ್ಯ ಮತ್ತು ಆರೋಗ್ಯದ ವಿಷಯಕ್ಕೆ ಬಂದಾಗ ಪ್ರತಿಯೊಬ್ಬರೂ ಕೂದಲಿನ ಆರೈಕೆಗೆ ಹೆಚ್ಚಿನ ಆದ್ಯತೆ ನೀಡುತ್ತಾರೆ. ಆದರೆ ಇತ್ತೀಚಿನ ದಿನಗಳಲ್ಲಿ ವಯಸ್ಸಿನ ವ್ಯತ್ಯಾಸವಿಲ್ಲದೆ ಹೆಚ್ಚಿನವರನ್ನು ಕಾಡುವ ಮುಖ್ಯ ಸಮಸ್ಯೆ ಎಂದರೆ ತಲೆ ಹೊಟ್ಟು. ಇದನ್ನು ಕೇವಲ ಕೂದಲಿನ ಸಾಧಾರಣ ಸಮಸ್ಯೆ ಎಂದು ನಿರ್ಲಕ್ಷಿಸುವುದು ಸೂಕ್ತವಲ್ಲ. ಸಮಯಕ್ಕೆ ಸರಿಯಾಗಿ ಇದಕ್ಕೆ ಸೂಕ್ತ ಉಪಚಾರ ಮಾಡದಿದ್ದರೆ, ಇದು ದೇಹ ಮತ್ತು ತ್ವಚೆಯ ಮೇಲೆಯೂ ಹಲವು ಅಡ್ಡಪರಿಣಾಮ ಬೀರಬಹುದು.
ತಲೆ ಹೊಟ್ಟು ಹೆಚ್ಚಾದಂತೆ ತಲೆಯಲ್ಲಿ ತೀವ್ರ ಪ್ರಮಾಣದ ತುರಿಕೆ ಆರಂಭವಾಗುತ್ತದೆ. ಇದರಿಂದ ನೆತ್ತಿಯ ಚರ್ಮ ಹಾನಿಗೊಳಗಾಗಿ ಸೋಂಕು ಉಂಟಾಗುವ ಸಾಧ್ಯತೆ ಇರುತ್ತದೆ. ಕೂದಲಿನ ಬುಡ ದುರ್ಬಲಗೊಂಡು ಅತಿಯಾದ ಕೂದಲು ಉದುರುವಿಕೆ ಸಮಸ್ಯೆಗೆ ಕಾರಣವಾಗುತ್ತದೆ. ನೆತ್ತಿಯ ಚರ್ಮ ಒಣಗಿ ಸಿಪ್ಪೆೇಳುವುದು ಮತ್ತು ಉರಿಯೂತ ಸೃಷ್ಟಿಯಾಗುವುದು ಈ ಸಮಸ್ಯೆಯ ಮುಖ್ಯ ಲಕ್ಷಣವಾಗಿದೆ.
ಇದಲ್ಲದೆ ತಲೆ ಹೊಟ್ಟಿನ ಪ್ರಭಾವ ಮುಖದ ಮೇಲೆಯೂ ಬೀರುತ್ತದೆ. ತಲೆಯಿಂದ ಉದುರುವ ಹೊಟ್ಟಿನ ಸೂಕ್ಷ್ಮ ಕಣಗಳು ಮುಖ, ಕುತ್ತಿಗೆ ಮತ್ತು ಬೆನ್ನಿನ ಭಾಗಕ್ಕೆ ಬಿದ್ದಾಗ ಮೊಡವೆಗಳು ಏಳಲು ಪ್ರಾರಂಭಿಸುತ್ತವೆ. ಮುಖದ ತ್ವಚೆ ಕೆಂಪಾಗುವುದು ಮತ್ತು ತುರಿಕೆ ಉಂಟಾಗುವುದು ಸಹ ಇದರ ದುಷ್ಪರಿಣಾಮಗಳಲ್ಲಿ ಒಂದಾಗಿದೆ. ಕೆಲವರಲ್ಲಿ ಕಣ್ಣಿನ ಹುಬ್ಬು ಮತ್ತು ರೆಪ್ಪೆಗಳ ಮೇಲೆಯೂ ಹೊಟ್ಟು ಕಾಣಿಸಿಕೊಂಡು ಕಣ್ಣುಗಳ ಕಿರಿಕಿರಿಯನ್ನು ಹೆಚ್ಚಿಸುತ್ತದೆ.
ಅತಿಯಾದ ಮಾನಸಿಕ ಒತ್ತಡ, ತಪ್ಪಾದ ಆಹಾರ ಪದ್ಧತಿ, ರಾಸಾಯನಿಕಯುಕ್ತ ಶಾಂಪೂಗಳ ಬಳಕೆ ಮತ್ತು ನೈರ್ಮಲ್ಯದ ಕೊರತೆಯಿಂದ ಈ ಸಮಸ್ಯೆ ಇನ್ನಷ್ಟು ತೀವ್ರಗೊಳ್ಳುತ್ತದೆ. ಆದ್ದರಿಂದ ತಲೆ ಹೊಟ್ಟು ಕಾಣಿಸಿಕೊಂಡ ತಕ್ಷಣವೇ ಸೂಕ್ತ ಮನೆಮದ್ದು ಅಥವಾ ತಜ್ಞ ವೈದ್ಯರ ಸಲಹೆ ಪಡೆದು ಚಿಕಿತ್ಸೆ ಪಡೆದುಕೊಳ್ಳುವುದು ಅತ್ಯಗತ್ಯ.
