ಬಿರಿಯಾನಿ ಪ್ರಿಯರಿಗೆ ವಾರಾಂತ್ಯದಲ್ಲಿ ಅಥವಾ ವಿಶೇಷ ದಿನಗಳಲ್ಲಿ ಮನೆಯಲ್ಲೇ ರುಚಿಕರವಾದ ಚಿಕನ್ ದಮ್ ಬಿರಿಯಾನಿ ಸವಿಯುವ ಖುಷಿಯೇ ಬೇರೆ. ರೆಸ್ಟೋರೆಂಟ್ ಶೈಲಿಯಲ್ಲಿಯೇ ಅದ್ಭುತ ರುಚಿ ನೀಡುವ ಹೈದರಾಬಾದಿ ಮಾದರಿಯ ಚಿಕನ್ ದಮ್ ಬಿರಿಯಾನಿಯನ್ನು ಮನೆಯಲ್ಲೇ ಸುಲಭವಾಗಿ ಸಿದ್ಧಪಡಿಸುವ ವಿಧಾನ ಇಲ್ಲಿದೆ.
ಬೇಕಾಗುವ ಮುಖ್ಯ ಸಾಮಗ್ರಿಗಳು ಚಿಕನ್, ಬಾಸ್ಮತಿ ಅಕ್ಕಿ, ಮೊಸರು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಖಾರದ ಪುಡಿ, ಗರಂ ಮಸಾಲ, ಅರಿಶಿನ, ನಿಂಬೆ ರಸ, ಪುದೀನಾ, ಕೊತ್ತಂಬರಿ ಸೊಪ್ಪು, ಕರಿದ ಈರುಳ್ಳಿ, ಚಕ್ಕೆ, ಲವಂಗ, ಏಲಕ್ಕಿ, ಪಲಾವ್ ಎಲೆ, ಶಹಾಜೀರಾ, ತುಪ್ಪ ಮತ್ತು ಎಣ್ಣೆ.
ಮಾಡುವ ಸರಳ ವಿಧಾನ ಮೊದಲಿಗೆ ಚಿಕನ್ ಅನ್ನು ಚೆನ್ನಾಗಿ ತೊಳೆದು ಅದಕ್ಕೆ ಮೊಸರು, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಖಾರದ ಪುಡಿ, ಅರಿಶಿನ, ಗರಂ ಮಸಾಲ, ನಿಂಬೆ ರಸ, ಸ್ವಲ್ಪ ಕರಿದ ಈರುಳ್ಳಿ, ಪುದೀನಾ, ಕೊತ್ತಂಬರಿ ಸೊಪ್ಪು ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಕಲಸಿ ಕನಿಷ್ಠ ಒಂದು ಗಂಟೆ ನೆನೆಯಲು ಇಡಬೇಕು.
ಮತ್ತೊಂದೆಡೆ ಬಾಸ್ಮತಿ ಅಕ್ಕಿಯನ್ನು ಅರ್ಧ ಗಂಟೆ ನೆನೆಸಿಟ್ಟು, ನಂತರ ಕುದಿಯುವ ನೀರಿಗೆ ಚಕ್ಕೆ, ಲವಂಗ, ಏಲಕ್ಕಿ, ಶಹಾಜೀರಾ, ಪಲಾವ್ ಎಲೆ ಮತ್ತು ಸ್ವಲ್ಪ ಎಣ್ಣೆ ಸೇರಿಸಿ ಅಕ್ಕಿಯನ್ನು ಶೇಕಡಾ ೭೦ ರಷ್ಟು ಮಾತ್ರ ಬೇಯಿಸಿ ನೀರನ್ನು ಬಸಿಯಬೇಕು.
ಈಗ ಬಿರಿಯಾನಿ ಪಾತ್ರೆಗೆ ಸ್ವಲ್ಪ ಎಣ್ಣೆ ಮತ್ತು ತುಪ್ಪ ಹಾಕಿ ಮಸಾಲೆಯೊಂದಿಗೆ ನೆನೆಸಿದ ಚಿಕನ್ ಅನ್ನು ತಳಭಾಗದಲ್ಲಿ ಸಮನಾಗಿ ಹರಡಬೇಕು. ಅದರ ಮೇಲೆ ಬೇಯಿಸಿದ ಬಾಸ್ಮತಿ ಅನ್ನದ ಪದರವನ್ನು ಹಾಕಿ, ಮೇಲಿಂದ ಕರಿದ ಈರುಳ್ಳಿ, ಕೊತ್ತಂಬರಿ ಸೊಪ್ಪು, ಪುದೀನಾ ಮತ್ತು ಸ್ವಲ್ಪ ತುಪ್ಪವನ್ನು ಚಿಮುಕಿಸಬೇಕು.
ನಂತರ ಪಾತ್ರೆಯ ಮುಚ್ಚಳವನ್ನು ಗಾಳಿ ಹೊರಗೆ ಹೋಗದಂತೆ ಹಿಟ್ಟಿನಿಂದ ಸೀಲ್ ಮಾಡಿ, ಸಣ್ಣ ಉರಿಯಲ್ಲಿ ಸುಮಾರು ೨೦ ರಿಂದ ೨೫ ನಿಮಿಷಗಳ ಕಾಲ ದಮ್ ನೀಡಬೇಕು. ಸ್ಟೌವ್ ಆಫ್ ಮಾಡಿದ ನಂತರ ಹತ್ತು ನಿಮಿಷ ಬಿಟ್ಟು ಮುಚ್ಚಳ ತೆರೆದರೆ ಘಮಘಮಿಸುವ ರುಚಿಕರ ಚಿಕನ್ ದಮ್ ಬಿರಿಯಾನಿ ಸವಿಯಲು ಸಿದ್ಧ.
