ಬಹುನಿರೀಕ್ಷಿತ ‘ರಾಮಾಯಣ’ ಚಿತ್ರದ ಪ್ರಚಾರ ಕಾರ್ಯಕ್ರಮಗಳಿಗೆ ದೇಶದ ರಾಜಧಾನಿ ನವದೆಹಲಿಯಲ್ಲಿ ಶನಿವಾರ ಅದ್ಧೂರಿಯಾಗಿ ಚಾಲನೆ ನೀಡಲಾಗಿದೆ. ಈ ವಿಶೇಷ ಸಮಾರಂಭದಲ್ಲಿ ಚಿತ್ರದ ಪ್ರಮುಖ ಕಲಾವಿದರು, ತಾಂತ್ರಿಕ ವರ್ಗ ಹಾಗೂ ಚಿತ್ರರಂಗದ ಗಣ್ಯರು ಭಾಗವಹಿಸಿದ್ದರು. ಈ ಸಂದರ್ಭದಲ್ಲಿ ಚಿತ್ರತಂಡದ ಸದಸ್ಯರು ಧರಿಸಿದ್ದ ಸಾಂಪ್ರದಾಯಿಕ ಮತ್ತು ಆಕರ್ಷಕ ಉಡುಪುಗಳು ಎಲ್ಲರ ಗಮನ ಸೆಳೆದವು.
ಚಿತ್ರದಲ್ಲಿ ಸೀತಾ ದೇವಿಯ ಪಾತ್ರದಲ್ಲಿ ನಟಿಸುತ್ತಿರುವ ಸಾಯಿ ಪಲ್ಲವಿ, ಸಮಾರಂಭಕ್ಕೆ ಚಿನ್ನದ ಬಣ್ಣದ ಭವ್ಯವಾದ ಕಾಂಜೀವರಂ ರೇಷ್ಮೆ ಸೀರೆಯನ್ನು ಉಟ್ಟು ಆಗಮಿಸಿದ್ದರು. ಮೆಜೆಂತಾ ಬಣ್ಣದ ಬಾರ್ಡರ್ ಇದ್ದ ಈ ಸೀರೆಗೆ ಹೊಂದುವಂತಹ ಬ್ಲೌಸ್, ಹಣೆಯ ಮೇಲೊಂದು ಸಣ್ಣ ಬಿಂದಿ, ಚಿನ್ನದ ಬಳೆಗಳು, ಜುಮುಕಿ ಹಾಗೂ ಚೋಕರ್ ಹಾರವನ್ನು ಧರಿಸಿ ಅವರು ಭಾರತೀಯ ನಾರಿಯ ಸಾಂಪ್ರದಾಯಿಕ ಸೌಂದರ್ಯವನ್ನು ಅನಾವರಣಗೊಳಿಸಿದರು. ಸರಳ ಮೇಕಪ್ ಮತ್ತು ಅರ್ಧ ಮೇಲಕ್ಕೆ ಕಟ್ಟಿದ ಸುರುಳಿ ಮುಂಗುರುಳು ಅವರ ಅಂದವನ್ನು ಮತ್ತಷ್ಟು ಹೆಚ್ಚಿಸಿತ್ತು.
ಇನ್ನು ಶ್ರೀರಾಮನ ಪಾತ್ರಧಾರಿಯಾಗಿ ಕಾಣಿಸಿಕೊಳ್ಳಲಿರುವ ರಣಬೀರ್ ಕಪೂರ್, ಕಪ್ಪು ಬಣ್ಣದ ಬಂದ್‌ಗಲಾ ಕುರ್ತಾ ತೊಟ್ಟು ಕ್ಲಾಸಿಕ್ ಲುಕ್‌ನಲ್ಲಿ ಮಿಂಚಿದರು. ವೆಲ್ವೆಟ್ ಜ್ಯಾಕೆಟ್‌ಗೆ ಹೊಳೆಯುವ ಪಚ್ಚೆ ಹಸಿರು ಬಣ್ಣದ ಬಟನ್‌ಗಳು, ಬಿಳಿ ಬಣ್ಣದ ಟ್ರೌಸರ್ ಮತ್ತು ಕೋಟ್‌ಗೆ ಸಿಗಿಸಿದ್ದ ಚಿನ್ನದ ಬಿಲ್ಲೆ ಆಕಾರದ ಬ್ರೋಚ್ ಅವರ ರಾಜ ಗಾಂಭೀರ್ಯಕ್ಕೆ ಸಾಕ್ಷಿಯಾಗಿತ್ತು. ಕಣ್ಣಿಗೆ ಧರಿಸಿದ ಸನ್ ಗ್ಲಾಸ್ ಮತ್ತು ಕಪ್ಪು ಶೂಸ್ ಅವರಿಗೆ ಆಧುನಿಕ ಸ್ಪರ್ಶ ನೀಡಿದ್ದವು.
ಚಿತ್ರದಲ್ಲಿ ಪ್ರಮುಖ ಪಾತ್ರವೊಂದನ್ನು ಪೋಷಿಸುತ್ತಿರುವ ರಕುಲ್ ಪ್ರೀತ್ ಸಿಂಗ್ ಸಾಸಿವೆ ಹಳದಿ ಬಣ್ಣದ ರೇಷ್ಮೆ ಸೀರೆಯಲ್ಲಿ ಕಂಗೊಳಿಸಿದರು. ಇದಕ್ಕೆ ಪೂರಕವಾಗಿ ಎಂಬ್ರಾಯ್ಡರಿ ವಿನ್ಯಾಸದ ಸ್ಟ್ರಾಪ್‌ಲೆಸ್ ಬ್ಲೌಸ್, ವಜ್ರ ಮತ್ತು ಚಿನ್ನದ ಆಭರಣಗಳು, ಸೊಂಟದ ಪಟ್ಟಿ (ಕಮರಬಂಧ್) ಧರಿಸಿ ಅತ್ಯಂತ ಸುಂದರವಾಗಿ ಕಾಣುತ್ತಿದ್ದರು. ಲಕ್ಷ್ಮಣನ ಪಾತ್ರದಲ್ಲಿ ನಟಿಸುತ್ತಿರುವ ರವಿ ದುಬೆ ಕೂಡ ನವಿಲು ನೀಲಿ ಬಣ್ಣದ ಬಂದ್‌ಗಲಾ ಸೂಟ್ ಧರಿಸಿ ಸ್ಟೈಲಿಶ್ ಆಗಿ ಕಾಣಿಸಿಕೊಂಡರು.
ಚಿತ್ರದ ಬಗ್ಗೆ ಮಾಹಿತಿ: ಖ್ಯಾತ ನಿರ್ದೇಶಕ ನಿತೇಶ್ ತಿವಾರಿ ನಿರ್ದೇಶನದಲ್ಲಿ ಮತ್ತು ನಮಿತ್ ಮಲ್ಹೋತ್ರಾ ಅವರ ನಿರ್ಮಾಣದಲ್ಲಿ ‘ರಾಮಾಯಣ’ ಸಿನಿಮಾ ಎರಡು ಭಾಗಗಳಾಗಿ ಮೂಡಿಬರುತ್ತಿದೆ. ಚಿತ್ರದಲ್ಲಿ ರಣಬೀರ್ ಕಪೂರ್, ಸಾಯಿ ಪಲ್ಲವಿ, ರವಿ ದುಬೆ ಅವರೊಂದಿಗೆ ಲಂಕಾಧೀಶ ರಾವಣನಾಗಿ ರಾಕಿಂಗ್ ಸ್ಟಾರ್ ಯಶ್ ಕಾಣಿಸಿಕೊಳ್ಳುತ್ತಿದ್ದಾರೆ. ಸನ್ನಿ ಡಿಯೋಲ್, ಕಾಜಲ್ ಅಗರ್ವಾಲ್, ಕುನಾಲ್ ಕಪೂರ್ ಮತ್ತು ವಿವೇಕ್ ಒಬೆರಾಯ್ ಪ್ರಮುಖ ಪಾತ್ರಗಳಲ್ಲಿದ್ದಾರೆ.
ಜುಲೈ 18 ರಂದು ನಡೆದ ಸಮಾರಂಭದಲ್ಲಿ ಚಿತ್ರದ ಟ್ರೈಲರ್ ಅನ್ನು ಕೇವಲ ಅತಿಥಿಗಳಿಗಾಗಿ ಲಾಂಚ್ ಮಾಡಲಾಗಿದ್ದು, ಜುಲೈ 24 ರಂದು ವಿಶ್ವಾದ್ಯಂತ ಅಧಿಕೃತವಾಗಿ ಯೂಟ್ಯೂಬ್‌ನಲ್ಲಿ ಬಿಡುಗಡೆಯಾಗಲಿದೆ. ಚಿತ್ರದ ಮೊದಲ ಭಾಗ 2026 ರ ದೀಪಾವಳಿ ಹಬ್ಬಕ್ಕೆ ಮತ್ತು ಎರಡನೇ ಭಾಗ 2027 ರ ದೀಪಾವಳಿಗೆ ತೆರೆಕಾಣಲಿದೆ.
