ಬೇಸಿಗೆಯ ಬಿಸಿಗೆ ತಂಪು ನೀಡುವ ದ್ರಾಕ್ಷಿ ಹಣ್ಣುಗಳು ಈಗ ಮಾರುಕಟ್ಟೆಯಲ್ಲಿ ಹೇರಳವಾಗಿ ಲಭ್ಯವಿವೆ. ಆದರೆ, ಇಳುವರಿ ಹೆಚ್ಚಿಸಲು ಮತ್ತು ಕೀಟಗಳಿಂದ ರಕ್ಷಿಸಲು ಬೆಳೆಗಾರರು ಬಳಸುತ್ತಿರುವ ಅತಿಯಾದ ಹಾನಿಕಾರಕ ಕೀಟನಾಶಕಗಳು (Pesticides) ಗ್ರಾಹಕರ ಪ್ರಾಣಕ್ಕೆ ಸಂಚಕಾರ ತರುತ್ತಿವೆ. ಕೇವಲ ನೀರಿನಿಂದ ತೊಳೆದು ಈ ಹಣ್ಣುಗಳನ್ನು ಸೇವಿಸುವುದು ಅಪಾಯಕಾರಿ ಎಂದು ವಿಜ್ಞಾನಿಗಳು ಎಚ್ಚರಿಸಿದ್ದು, ದ್ರಾಕ್ಷಿಯನ್ನು ಸುರಕ್ಷಿತವಾಗಿ ಸ್ವಚ್ಛಗೊಳಿಸಿ ಸೇವಿಸುವಂತೆ ಆರೋಗ್ಯ ತಜ್ಞರು ಮಹತ್ವದ ಮಾರ್ಗಸೂಚಿಗಳನ್ನು ನೀಡಿದ್ದಾರೆ.
ಬೇಸಿಗೆ ಆರಂಭವಾಗುತ್ತಿದೆ. ಈ ಸಮಯದಲ್ಲಿ ಮಾರುಕಟ್ಟೆಯಲ್ಲಿ ಹಸಿರು ಮತ್ತು ಕಪ್ಪು ದ್ರಾಕ್ಷಿ ಹಣ್ಣುಗಳು ಹೇರಳವಾಗಿ ಕಂಡುಬರುತ್ತವೆ. ಆದರೆ, ಈ ಹಣ್ಣುಗಳ ಮೇಲೆ ಹಾನಿಕಾರಕ ರಾಸಾಯನಿಕಗಳು ಇರುತ್ತವೆ ಎಂಬ ವಿಷಯ ನಿಮಗೆ ತಿಳಿದಿದೆಯೇ? ಇಳುವರಿ ಹೆಚ್ಚಿಸಲು ಮತ್ತು ಕೀಟಗಳಿಂದ ಬೆಳೆಯನ್ನು ರಕ್ಷಿಸಲು ಬಳಸುವ ಕೀಟನಾಶಕಗಳು ನಾವು ಮಾರುಕಟ್ಟೆಯಲ್ಲಿ ಕೊಳ್ಳುವ ದ್ರಾಕ್ಷಿಯ ಮೇಲೆ ದಟ್ಟವಾಗಿ ಅಂಟಿಕೊಂಡಿರುತ್ತವೆ.
ಕೇವಲ ನೀರಿನಿಂದ ತೊಳೆದರೆ ಸಾಕೆ ? ದ್ರಾಕ್ಷಿಯನ್ನು ಕೇವಲ ನೀರಿನಿಂದ ತೊಳೆದರೆ ಈ ರಾಸಾಯನಿಕಗಳು ಹೋಗುತ್ತವೆಯೇ ಎಂಬ ಪ್ರಶ್ನೆ ಅನೇಕರಲ್ಲಿದೆ. ದ್ರಾಕ್ಷಿ ಹಣ್ಣಿನ ಸಿಪ್ಪೆ ಬಹಳ ತೆಳುವಾಗಿರುತ್ತದೆ ಮತ್ತು ಇವು ಗುಂಪುಗಳಾಗಿ (ಗೊಂಚಲು) ಇರುತ್ತವೆ. ಇದರಿಂದಾಗಿ ಸಿಂಪಡಿಸಿದ ಕೀಟನಾಶಕಗಳು ಹಣ್ಣುಗಳ ನಡುವಿನ ಸಣ್ಣ ಸಣ್ಣ ಸಂಧುಗಳಲ್ಲಿ ಶೇಖರಣೆಯಾಗುತ್ತವೆ. ಮಾರುಕಟ್ಟೆಯಲ್ಲಿ ಮಾರಾಟಕ್ಕಿರುವ ದ್ರಾಕ್ಷಿಗಳ ಮೇಲೆ ತೀವ್ರ ಮಟ್ಟದ ವಿಷಕಾರಿ ರಾಸಾಯನಿಕಗಳಿರುವುದು ಆಹಾರ ಸುರಕ್ಷತಾ ಸಂಸ್ಥೆಗಳ ಅಧ್ಯಯನದಲ್ಲಿ ದೃಢಪಟ್ಟಿದೆ.
ಸ್ವಚ್ಛಗೊಳಿಸುವ ಸರಿಯಾದ ವಿಧಾನಗಳು:
- ಉಪ್ಪು ನೀರಿನ ಬಳಕೆ: ಮಾರುಕಟ್ಟೆಯಿಂದ ತಂದ ತಕ್ಷಣ ದ್ರಾಕ್ಷಿಯನ್ನು ತಿನ್ನಬೇಡಿ. ಒಂದು ಲೀಟರ್ ನೀರಿಗೆ ಒಂದು ಚಮಚ ಉಪ್ಪು ಬೆರೆಸಿ, ಅದರಲ್ಲಿ ದ್ರಾಕ್ಷಿಯನ್ನು 15-20 ನಿಮಿಷಗಳ ಕಾಲ ನೆನೆಸಿಡಿ. ಇದು ಹಣ್ಣಿಗೆ ಅಂಟಿಕೊಂಡಿರುವ ಬ್ಯಾಕ್ಟೀರಿಯಾ ಮತ್ತು ರಾಸಾಯನಿಕಗಳನ್ನು ಸಡಿಲಗೊಳಿಸುತ್ತದೆ.
- ಬೇಕಿಂಗ್ ಸೋಡಾ: ವಿವಿಧ ಅಧ್ಯಯನಗಳ ಪ್ರಕಾರ, ಬೇಕಿಂಗ್ ಸೋಡಾ ಬೆರೆಸಿದ ನೀರಿನಲ್ಲಿ ಹಣ್ಣುಗಳನ್ನು 10-15 ನಿಮಿಷ ನೆನೆಸಿಡುವುದರಿಂದ ಕೀಟನಾಶಕದ ಪದರಗಳು ಸುಲಭವಾಗಿ ನಾಶವಾಗುತ್ತವೆ.
- ಗೊಂಚಲಿನಿಂದ ಬೇರ್ಪಡಿಸಿ: ದ್ರಾಕ್ಷಿಯನ್ನು ಗೊಂಚಲಿನಿಂದ ಬಿಡಿಸಿ, ನಂತರ 2-3 ಬಾರಿ ಶುದ್ಧ ನೀರಿನಲ್ಲಿ ತೊಳೆಯಿರಿ. ಇದರಿಂದ ಹಣ್ಣುಗಳ ನಡುವೆ ಅಡಗಿರುವ ಕೊಳೆ ಮತ್ತು ವಿಷ ಅಂಶ ದೂರವಾಗುತ್ತದೆ.
- ಒಣಗಿಸುವುದು: ತೊಳೆದ ನಂತರ ಶುದ್ಧವಾದ ಬಟ್ಟೆ ಅಥವಾ ಟಿಶ್ಯೂ ಪೇಪರ್‌ನಿಂದ ಹಣ್ಣುಗಳನ್ನು ಒರೆಸಿ ಹೆಚ್ಚುವರಿ ತೇವಾಂಶವನ್ನು ತೆಗೆದುಹಾಕಿ.
ಫ್ರಿಜ್‌ನಲ್ಲಿಡುವ ಮುನ್ನ ಗಮನಿಸಿ: ಅನೇಕರು ಹಣ್ಣುಗಳನ್ನು ತಂದ ತಕ್ಷಣ ಹಾಗೆಯೇ ಫ್ರಿಜ್‌ನಲ್ಲಿ ಇಡುತ್ತಾರೆ. ಆದರೆ, ತೊಳೆಯದೆ ಫ್ರಿಜ್‌ನಲ್ಲಿ ಇಟ್ಟರೆ ಆ ರಾಸಾಯನಿಕಗಳು ಇತರ ಆಹಾರ ಪದಾರ್ಥಗಳಿಗೂ ಹರಡುವ ಸಾಧ್ಯತೆ ಇರುತ್ತದೆ. ಆದ್ದರಿಂದ ಮೊದಲು ಸ್ವಚ್ಛಗೊಳಿಸಿ ನಂತರ ಶೇಖರಿಸಿಡುವುದು ಉತ್ತಮ. ವಿಶೇಷವಾಗಿ ಮಕ್ಕಳು, ವೃದ್ಧರು ಮತ್ತು ರೋಗಿಗಳಿಗೆ ಹಣ್ಣುಗಳನ್ನು ನೀಡುವಾಗ ಹೆಚ್ಚಿನ ಜಾಗರೂಕತೆ ವಹಿಸುವುದು ಅವಶ್ಯಕ.
