ರಾಜ್ಯದಲ್ಲಿ ದಿನದಿಂದ ದಿನಕ್ಕೆ ಹೆಚ್ಚುತ್ತಿರುವ ಅಪಾರ್ಟ್ಮೆಂಟ್ ಸಂಸ್ಕೃತಿಯನ್ನು ಗಮನದಲ್ಲಿಟ್ಟುಕೊಂಡು, ಫ್ಲಾಟ್ ಮಾಲೀಕರ ಹಿತರಕ್ಷಣೆಗಾಗಿ ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ. ಬಹುನಿರೀಕ್ಷಿತ ಕರ್ನಾಟಕ ಅಪಾರ್ಟ್ಮೆಂಟ್ (ಮಾಲೀಕತ್ವ ಮತ್ತು ನಿರ್ವಹಣೆ) ವಿಧೇಯಕ 2026 ಸೇರಿದಂತೆ ಒಟ್ಟು ಮೂರು ಪ್ರಮುಖ ತಿದ್ದುಪಡಿ ಮಸೂದೆಗಳನ್ನು ನಗರಾಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಅವರು ವಿಧಾನಸಭೆಯಲ್ಲಿ ಮಂಡಿಸಿದರು.
ಪ್ರತಿಪಕ್ಷಗಳ ಗದ್ದಲದ ನಡುವೆಯೇ ಈ ವಿಧೇಯಕಗಳನ್ನು ಸಭೆಯ ಮುಂದಿಡಲಾಯಿತು. ಅಪಾರ್ಟ್ಮೆಂಟ್ ಮಸೂದೆ ಹೊರತಾಗಿ, ಕರ್ನಾಟಕ ನಗರ ಪಾಲಿಕೆಗಳ (ತಿದ್ದುಪಡಿ) ವಿಧೇಯಕ ಹಾಗೂ ಕರ್ನಾಟಕ ಮುನ್ಸಿಪಾಲಿಟಿಗಳ (ತಿದ್ದುಪಡಿ) ವಿಧೇಯಕಗಳನ್ನೂ ಮಂಡಿಸಲಾಗಿದೆ.
ಹೊಸ ಅಪಾರ್ಟ್ಮೆಂಟ್ ಕಾಯ್ದೆಯ ಪ್ರಮುಖ ಅಂಶಗಳು
1972ರ ಹಳೆಯ ಕಾಯ್ದೆಯಲ್ಲಿ ಇಂದಿನ ಅಪಾರ್ಟ್ಮೆಂಟ್ ವ್ಯವಸ್ಥೆಗೆ ತಕ್ಕಂತೆ ಸ್ಪಷ್ಟ ನಿಯಮಗಳಿರಲಿಲ್ಲ. ಹೀಗಾಗಿ 20 ವರ್ಷಗಳ ಬೇಡಿಕೆಯನ್ನು ಈಡೇರಿಸುವ ನಿಟ್ಟಿನಲ್ಲಿ ಈ ಹೊಸ ಮಸೂದೆ ತರಲಾಗಿದೆ. ಎಂಟು ಅಥವಾ ಅದಕ್ಕಿಂತ ಹೆಚ್ಚು ಫ್ಲಾಟ್ಗಳಿರುವ ಎಲ್ಲಾ ಕಟ್ಟಡಗಳಿಗೆ ಇದು ಅನ್ವಯವಾಗಲಿದೆ.
ಮಾಲೀಕರಿಗೆ ಸಂಪೂರ್ಣ ಹಕ್ಕು: ಫ್ಲಾಟ್ ಖರೀದಿಸಿದ ವ್ಯಕ್ತಿಗೆ ಆ ಆಸ್ತಿಯ ಮೇಲೆ ಪೂರ್ಣ ಹಕ್ಕು ಸಿಗಲಿದೆ. ಜೊತೆಗೆ ಲಿಫ್ಟ್, ಮೆಟ್ಟಿಲು, ಟೆರೇಸ್, ಪಾರ್ಕಿಂಗ್ ಮತ್ತು ಪಾರ್ಕ್ನಂತಹ ಸಾಮಾನ್ಯ ಪ್ರದೇಶಗಳಲ್ಲೂ (Common Areas) ಸ್ಪಷ್ಟ ಪಾಲುದಾರಿಕೆ ಇರಲಿದೆ.
ಸಂಘ ರಚನೆ ಕಡ್ಡಾಯ: ಬಹುಪಾಲು ಫ್ಲಾಟ್ಗಳು ಮಾರಾಟವಾದ ಮೂರು ತಿಂಗಳೊಳಗೆ ಡೆವಲಪರ್ಗಳು ನಿವಾಸಿಗಳ ಸಂಘ (Association) ರಚನೆಗೆ ಅನುವು ಮಾಡಿಕೊಡಬೇಕು. ಪ್ರತಿಯೊಬ್ಬ ಫ್ಲಾಟ್ ಮಾಲೀಕರೂ ಇದರ ಸದಸ್ಯರಾಗುವುದು ಕಡ್ಡಾಯ.
ಬಿಲ್ಡರ್ಗಳ ಜವಾಬ್ದಾರಿ: ಕಟ್ಟಡ ಪೂರ್ಣಗೊಂಡ ನಂತರ ಭೂಮಿ ಮತ್ತು ಸಾಮಾನ್ಯ ಪ್ರದೇಶದ ಹಕ್ಕನ್ನು ನಿವಾಸಿಗಳ ಸಂಘಕ್ಕೆ ಕಾಲಮಿತಿಯಲ್ಲಿ ವರ್ಗಾಯಿಸಬೇಕು. ಅಗ್ನಿಶಾಮಕ ಹಾಗೂ ಲಿಫ್ಟ್ ಸುರಕ್ಷತಾ ಪ್ರಮಾಣಪತ್ರಗಳನ್ನು ಹಸ್ತಾಂತರಿಸುವುದು ಬಿಲ್ಡರ್ಗಳ ಹೊಣೆ.
ಮರು ನಿರ್ಮಾಣಕ್ಕೆ ಶೇ. 75 ಒಪ್ಪಿಗೆ: 30 ವರ್ಷಕ್ಕಿಂತ ಹಳೆಯ ಕಟ್ಟಡಗಳಿಗೆ ಪ್ರತಿ 5 ವರ್ಷಕ್ಕೊಮ್ಮೆ ಭದ್ರತಾ ಪ್ರಮಾಣಪತ್ರ ಪಡೆಯಬೇಕು. ಕಟ್ಟಡ ಪುನರ್ನಿರ್ಮಾಣ (Re-development) ಮಾಡುವುದಿದ್ದರೆ ಶೇ. 75ರಷ್ಟು ಮಾಲೀಕರ ಒಪ್ಪಿಗೆ ಕಡ್ಡಾಯ. ಒಪ್ಪದವರಿಗೆ ಮಾರುಕಟ್ಟೆ ಮೌಲ್ಯಕ್ಕಿಂತ ಎರಡು ಪಟ್ಟು ಪರಿಹಾರ ನೀಡುವ ಪ್ರಸ್ತಾಪವಿದೆ.
ಪಾರ್ಕಿಂಗ್ ಮಾರಾಟಕ್ಕೆ ತಡೆ: ತಳಮಹಡಿ ಅಥವಾ ತೆರೆದ ಜಾಗದ ಪಾರ್ಕಿಂಗ್ ಪ್ರದೇಶಗಳನ್ನು ವೈಯಕ್ತಿಕವಾಗಿ ಮಾರಾಟ ಮಾಡುವಂತಿಲ್ಲ. ಅವು ಸಾಮಾನ್ಯ ಆಸ್ತಿಯಾಗಿಯೇ ಉಳಿಯಲಿವೆ.
ನಿಯಮ ಉಲ್ಲಂಘಿಸಿದರೆ ದಂಡ:
ಅನುಮತಿ ಇಲ್ಲದೆ ಸ್ವಾಧೀನ ಹಸ್ತಾಂತರಿಸುವುದು, ನಿಯಮ ಪಾಲಿಸದಿರುವುದು ಅಥವಾ ಸಂಘ ರಚನೆಗೆ ಅಡ್ಡಿಪಡಿಸಿದರೆ ಬಿಲ್ಡರ್ ಅಥವಾ ಮಾಲೀಕರಿಗೆ ಗರಿಷ್ಠ 1 ಲಕ್ಷ ರೂ.ವರೆಗೆ ದಂಡ ವಿಧಿಸಬಹುದು. ಉಲ್ಲಂಘನೆ ಮುಂದುವರಿದಲ್ಲಿ ಪ್ರತಿದಿನ 1,000 ರೂ.ನಿಂದ 20,000 ರೂ.ವರೆಗೆ ಹೆಚ್ಚುವರಿ ದಂಡ ಬೀಳಲಿದೆ.
ಉಳಿದೆರಡು ಮಸೂದೆಗಳ ಉದ್ದೇಶವೇನು?
ನಗರ ಪಾಲಿಕೆ ಮತ್ತು ಮುನ್ಸಿಪಾಲಿಟಿ ತಿದ್ದುಪಡಿ ಮಸೂದೆಗಳ ಮೂಲಕ ಖಾಸಗಿ ರಸ್ತೆ ಹಾಗೂ ಚರಂಡಿಗಳ ನಿರ್ವಹಣೆಗೆ ಸಂಬಂಧಿಸಿದಂತೆ ಕಮಿಷನರ್ ಅಥವಾ ಚೀಫ್ ಆಫೀಸರ್ಗಳಿಗೆ ಹೆಚ್ಚಿನ ಅಧಿಕಾರ ನೀಡಲಾಗಿದೆ.
ಖಾಸಗಿ ರಸ್ತೆಗಳು ಅಥವಾ ಚರಂಡಿಗಳು ಕಳಪೆ ಸ್ಥಿತಿಯಲ್ಲಿದ್ದು, ಸಾರ್ವಜನಿಕ ಆರೋಗ್ಯ ಮತ್ತು ಸುರಕ್ಷತೆಗೆ ಧಕ್ಕೆಯುಂಟಾದರೆ ಅಧಿಕಾರಿಗಳು ನೇರವಾಗಿ ಪ್ರವೇಶಿಸಿ, ನೋಟಿಸ್ ನೀಡುವ ಮೂಲಕ ಅವುಗಳನ್ನು ಸಾರ್ವಜನಿಕ ರಸ್ತೆಯನ್ನಾಗಿ ಘೋಷಿಸಬಹುದು. ಇದಕ್ಕೆ ಸಾರ್ವಜನಿಕರು ಅಥವಾ ಆಸ್ತಿ ಮಾಲೀಕರು ಆಕ್ಷೇಪಣೆ ಸಲ್ಲಿಸಲು 1 ತಿಂಗಳ ಕಾಲಾವಕಾಶ ನೀಡಲಾಗುತ್ತದೆ.
