ವಾಷಿಂಗ್ಟನ್: ವಿಶ್ವದಾದ್ಯಂತ ಖಗೋಳ ವಿಜ್ಞಾನಿಗಳು ಮತ್ತು ಬಾಹ್ಯಾಕಾಶ ಆಸಕ್ತರು ವರ್ಷದ ಮೊದಲ ಸೂರ್ಯಗ್ರಹಣವನ್ನು ವೀಕ್ಷಿಸಲು ಸಜ್ಜಾಗುತ್ತಿದ್ದಾರೆ. ಈ ಅಪರೂಪದ ಖಗೋಳ ವಿದ್ಯಮಾನವು ಇದೇ ತಿಂಗಳು ನಡೆಯಲಿದ್ದು, ಸೂರ್ಯನು ಸ್ವಲ್ಪ ಸಮಯದವರೆಗೆ ಮಸುಕಾಗಲಿದ್ದಾನೆ. ಈ ಸಂದರ್ಭದಲ್ಲಿ ವಿಶ್ವದ ಕೆಲವು ಭಾಗಗಳಲ್ಲಿ ಸೂರ್ಯನು ಆಕಾಶದಲ್ಲಿ ‘ಬೆಂಕಿಯ ಉಂಗುರದಂತೆ’ ಕಾಣಿಸಿಕೊಳ್ಳಲಿದ್ದಾನೆ. ಇದನ್ನು ‘ರಿಂಗ್ ಆಫ್ ಫೈರ್’ (Ring of Fire) ಎಂದು ಕರೆಯಲಾಗುತ್ತದೆ. ಚಂದ್ರನು ಭೂಮಿಯಿಂದ ಅತಿ ದೂರದ ಬಿಂದುವಿನಲ್ಲಿದ್ದಾಗ ಈ ರೀತಿಯ ಗ್ರಹಣ ಸಂಭವಿಸುತ್ತದೆ.
ವರ್ಷದ ಮೊದಲ ಸೂರ್ಯಗ್ರಹಣದ ಬಗ್ಗೆ ನೀವು ತಿಳಿಯಲೇಬೇಕಾದ ಪ್ರಮುಖ ವಿಷಯಗಳು ಇಲ್ಲಿವೆ:
- ದಿನಾಂಕ: ವರ್ಷದ ಮೊದಲ ಸೂರ್ಯಗ್ರಹಣವು ಫೆಬ್ರವರಿ 17ರಂದು ಸಂಭವಿಸಲಿದೆ. ಅಂದು ಚಂದ್ರನು ಸೂರ್ಯ ಮತ್ತು ಭೂಮಿಯ ನಡುವೆ ಹಾದುಹೋಗುವಾಗ ಸೂರ್ಯನ ಬಹುತೇಕ ಭಾಗವನ್ನು ಮುಚ್ಚಲಿದ್ದಾನೆ.
- ರಿಂಗ್ ಆಫ್ ಫೈರ್ ವಿಶೇಷತೆ: ಇದು ‘ಕಂಕಣ ಸೂರ್ಯಗ್ರಹಣ’ವಾಗಿದ್ದು, ಚಂದ್ರನು ಭೂಮಿಯಿಂದ ದೂರವಿರುವುದರಿಂದ ಸೂರ್ಯನನ್ನು ಪೂರ್ಣವಾಗಿ ಮುಚ್ಚಲು ಸಾಧ್ಯವಾಗುವುದಿಲ್ಲ. ಹೀಗಾಗಿ ಸೂರ್ಯನ ಹೊರಭಾಗವು ಉರಿಯುತ್ತಿರುವ ಉಂಗುರದಂತೆ ಗೋಚರಿಸುತ್ತದೆ.
- ಸಮಯ: ನಾಸಾ ವರದಿಯ ಪ್ರಕಾರ, ‘ರಿಂಗ್ ಆಫ್ ಫೈರ್’ ಪ್ರಕ್ರಿಯೆಯು ಬೆಳಿಗ್ಗೆ 7.12 ಗಂಟೆಗೆ (ಅಮೆರಿಕದ ಸಮಯದ ಪ್ರಕಾರ) ಆರಂಭವಾಗಲಿದ್ದು, 1 ನಿಮಿಷ 52 ಸೆಕೆಂಡುಗಳ ಕಾಲ ಇರಲಿದೆ. ನಂತರ ಚಂದ್ರನ ನೆರಳು ಸೂರ್ಯನ ಬಿಂಬದಿಂದ ನಿಧಾನವಾಗಿ ಸರಿಯಲಿದೆ.
- ಯಾರಿಗೆ ಕಾಣಿಸಲಿದೆ?: ಅಂಟಾರ್ಕ್ಟಿಕಾ ಖಂಡದ ಭಾಗಗಳಲ್ಲಿ ಮಾತ್ರ ಈ ‘ರಿಂಗ್ ಆಫ್ ಫೈರ್’ ದೃಶ್ಯ ಸ್ಪಷ್ಟವಾಗಿ ಕಾಣಿಸಲಿದೆ. ಈ ಕತ್ತಲೆಯಿಂದಾಗಿ ಅಲ್ಲಿನ ಲಕ್ಷಾಂತರ ಪೆಂಗ್ವಿನ್ಗಳು ಗೊಂದಲಕ್ಕೊಳಗಾಗುವ ಸಾಧ್ಯತೆಯಿದೆ.
- ಆಂಶಿಕ ಗ್ರಹಣ: ದಕ್ಷಿಣ ಅಮೆರಿಕದ ದಕ್ಷಿಣ ತುದಿ, ದಕ್ಷಿಣ ಆಫ್ರಿಕಾ ಸೇರಿದಂತೆ ಪೆಸಿಫಿಕ್, ಅಟ್ಲಾಂಟಿಕ್ ಮತ್ತು ಹಿಂದೂ ಮಹಾಸಾಗರದ ಕೆಲವು ಭಾಗಗಳಲ್ಲಿ ಆಂಶಿಕ ಸೂರ್ಯಗ್ರಹಣ ಗೋಚರಿಸಲಿದೆ.
- ಭಾರತದಲ್ಲಿ ಗೋಚರವಿಲ್ಲ: ಈ ಸೂರ್ಯಗ್ರಹಣದ ಮಾರ್ಗವು ಅಂಟಾರ್ಕ್ಟಿಕಾದ ಮೂಲಕ ಸಾಗುತ್ತಿರುವುದರಿಂದ ಭಾರತದಲ್ಲಿ ಇದು ಕಾಣಿಸುವುದಿಲ್ಲ.
- ವೀಕ್ಷಕರು ವಿರಳ: ಅಂಟಾರ್ಕ್ಟಿಕಾದಲ್ಲಿ ಜನವಸತಿ ಇಲ್ಲದ ಕಾರಣ ಈ ಅದ್ಭುತವನ್ನು ನೋಡುವವರು ಬಹಳ ಕಡಿಮೆ. ಅಲ್ಲಿನ ಕೇವಲ ಎರಡು ಸಂಶೋಧನಾ ಕೇಂದ್ರಗಳಲ್ಲಿರುವ ವಿಜ್ಞಾನಿಗಳು ಮಾತ್ರ ಇದನ್ನು ನೇರವಾಗಿ ವೀಕ್ಷಿಸುವ ಅವಕಾಶ ಪಡೆಯಲಿದ್ದಾರೆ.
ಸೂರ್ಯಗ್ರಹಣ ಎಂದರೇನು?
ಸೂರ್ಯಗ್ರಹಣವು ಒಂದು ಖಗೋಳ ವಿದ್ಯಮಾನ. ಚಂದ್ರನು ಭೂಮಿಯ ಸುತ್ತ ಸುತ್ತುವಾಗ ಸೂರ್ಯ ಮತ್ತು ಭೂಮಿಯ ನಡುವೆ ಬಂದಾಗ ಇದು ಸಂಭವಿಸುತ್ತದೆ. ಒಂದು ಕೌತುಕದ ಸಂಗತಿಯೆಂದರೆ, ಚಂದ್ರನು ಸೂರ್ಯನಿಗಿಂತ 400 ಪಟ್ಟು ಚಿಕ್ಕವನಾಗಿದ್ದರೂ, ಸೂರ್ಯನಿಗಿಂತ 400 ಪಟ್ಟು ಭೂಮಿಗೆ ಹತ್ತಿರವಾಗಿದ್ದಾನೆ. ಈ ಕಾಕತಾಳೀಯದಿಂದಾಗಿ ಆಕಾಶದಲ್ಲಿ ಚಂದ್ರ ಮತ್ತು ಸೂರ್ಯ ಒಂದೇ ಗಾತ್ರದಲ್ಲಿ ಕಾಣುತ್ತಾರೆ. ಹಾಗಾಗಿ ಚಂದ್ರನು ಸೂರ್ಯನ ಎದುರಿಗೆ ಬಂದಾಗ ಸೂರ್ಯನ ಬಿಂಬವನ್ನು ಸಂಪೂರ್ಣವಾಗಿ ಅಥವಾ ಭಾಗಶಃ ಮುಚ್ಚಲು ಸಾಧ್ಯವಾಗುತ್ತದೆ.
