ಯಶ್ ರಾಜ್ ಫಿಲ್ಮ್ಸ್ (YRF) ನಿರ್ಮಾಣದ ಬಹುನಿರೀಕ್ಷಿತ ಸ್ಪೈ ಯುನಿವರ್ಸ್ ಚಿತ್ರ ‘ಆಲ್ಫಾ’ದ ಮೊದಲ ಟೀಸರ್ ಬಿಡುಗಡೆಯಾಗಿದ್ದು, ಸಿನಿರಸಿಕರಲ್ಲಿ ಭಾರಿ ಕುತೂಹಲ ಮೂಡಿಸಿದೆ. ಆಲಿಯಾ ಭಟ್ ಮತ್ತು ಶರ್ವರಿ ಮುಖ್ಯ ಭೂಮಿಕೆಯಲ್ಲಿರುವ ಈ ಆ್ಯಕ್ಷನ್ ಚಿತ್ರದ ಮೊದಲ ಝಲಕ್ ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿದೆ. ಆದರೆ, ಚಿತ್ರದ ಮತ್ತೊಬ್ಬ ಪ್ರಮುಖ ನಾಯಕಿ ಶರ್ವರಿ ಟೀಸರ್‌ನಲ್ಲಿ ಒಂದೇ ಒಂದು ಫ್ರೇಮ್‌ನಲ್ಲೂ ಕಾಣಿಸಿಕೊಳ್ಳದಿರುವುದು ಸದ್ಯ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ.
ಚಿತ್ರದ ಮೊದಲ ಟೀಸರ್ ಸಂಪೂರ್ಣವಾಗಿ ಆಲಿಯಾ ಭಟ್ ಅವರ ಪಾತ್ರದ ಸುತ್ತ ಸುತ್ತುತ್ತದೆ. ಬಾಬಿ ಡಿಯೋಲ್ ಅವರಿಂದ ಬಾಲ್ಯದಿಂದಲೇ ಕಠಿಣ ತರಬೇತಿ ಪಡೆದು, ಕೇವಲ ಕೊಲ್ಲುವುದಕ್ಕಾಗಿಯೇ ಬೆಳೆಯುವ ಯುವ ಮಹಿಳಾ ಪ್ರೇಕ್ಷಕ ಕಿಲ್ಲರ್ (ಅಸಾಸಿನ್) ಪಾತ್ರದಲ್ಲಿ ಆಲಿಯಾ ಕಾಣಿಸಿಕೊಂಡಿದ್ದಾರೆ. ಆಲಿಯಾ ಅವರ 18ನೇ ಹುಟ್ಟುಹಬ್ಬದ ಸಂದರ್ಭದಲ್ಲಿ ಬಾಬಿ ಡಿಯೋಲ್ ಒಂದು ರಹಸ್ಯ ಮಿಷನ್ ನೀಡುವ ಮೂಲಕ ಕಥೆ ಆರಂಭವಾಗುತ್ತದೆ. ಈ ಹೈ-ವೋಲ್ಟೇಜ್ ಟೀಸರ್‌ನಲ್ಲಿ ಆಲಿಯಾ ಅವರ ಸಾಹಸ ದೃಶ್ಯಗಳು ಎಲ್ಲರ ಗಮನ ಸೆಳೆಯುತ್ತಿವೆಯಾದರೂ, ಪೋಸ್ಟರ್‌ಗಳಲ್ಲಿ ಹೈಲೈಟ್ ಆಗಿದ್ದ ಶರ್ವರಿ ಯಾಕೆ ಕಾಣಿಸಿಕೊಂಡಿಲ್ಲ ಎಂಬ ಪ್ರಶ್ನೆ ಮೂಡುವುದು ಸಹಜ.
ಮೂಲಗಳ ಪ್ರಕಾರ, ಯಶ್ ರಾಜ್ ಫಿಲ್ಮ್ಸ್ ತನ್ನ ಸಿನಿಮಾ ಪ್ರಚಾರಕ್ಕಾಗಿ ಒಂದು ವ್ಯವಸ್ಥಿತ ಮಾರುಕಟ್ಟೆ ತಂತ್ರವನ್ನು (ಮಾರ್ಕೆಟಿಂಗ್ ಕ್ಯಾಂಪೇನ್) ರೂಪಿಸಿದೆ. ಪ್ರತಿಯೊಂದು ಪಾತ್ರವನ್ನೂ ಹಂತ ಹಂತವಾಗಿ ಪ್ರೇಕ್ಷಕರ ಮುಂದೆ ಅನಾವರಣಗೊಳಿಸುವುದು ಚಿತ್ರತಂಡದ ಉದ್ದೇಶವಾಗಿದೆ. ಹೀಗಾಗಿಯೇ ಮೊದಲ ಟೀಸರ್‌ನಲ್ಲಿ ಕೇವಲ ಆಲಿಯಾ ಪಾತ್ರದ ಪರಿಚಯ ಮಾಡಿಸಲಾಗಿದ್ದು, ಶೀಘ್ರದಲ್ಲೇ ಶರ್ವರಿ ಅವರ ರಗಡ್ ಲುಕ್ ಮತ್ತು ಪಾತ್ರದ ಹಿನ್ನೆಲೆಯನ್ನು ಪ್ರತ್ಯೇಕವಾಗಿ ಬಿಡುಗಡೆ ಮಾಡಲು ವೈಆರ್‌ಎಫ್ ಯೋಜಿಸಿದೆ.
ಶಿವ್ ರವೈಲ್ ನಿರ್ದೇಶನದ ‘ಆಲ್ಫಾ’ ಸಿನಿಮಾವು ಸಂಪೂರ್ಣವಾಗಿ ಮಹಿಳಾ ಪ್ರಧಾನ ಆ್ಯಕ್ಷನ್ ಎಂಟರ್ಟೈನರ್ ಆಗಿದ್ದು, ಚಿತ್ರದಲ್ಲಿ ಇಬ್ಬರು ನಾಯಕಿಯರು ಹಿಂದೆಂದೂ ಕಾಣದ ಆ್ಯಕ್ಷನ್ ಅವತಾರದಲ್ಲಿ ಅಬ್ಬರಿಸಲಿದ್ದಾರೆ. ಚಿತ್ರದ ಬಗ್ಗೆ ಮಾತನಾಡಿರುವ ನಟ ಬಾಬಿ ಡಿಯೋಲ್, ಭಾರತದಲ್ಲಿ ಇಬ್ಬರು ಯುವತಿಯರನ್ನು ಇಟ್ಟುಕೊಂಡು ಇಷ್ಟೊಂದು ದೊಡ್ಡ ಮಟ್ಟದ ಆ್ಯಕ್ಷನ್ ಸಿನಿಮಾ ಮಾಡುತ್ತಿರುವುದು ನಿಜಕ್ಕೂ ಅದ್ಭುತ ಮತ್ತು ಹೊಸ ಅನುಭವ. ರಣಬೀರ್ ಕಪೂರ್ ಜೊತೆ ‘ಅನಿಮಲ್’ ಮಾಡಿದ ನಂತರ, ಈಗ ಅವರ ಪತ್ನಿ ಆಲಿಯಾ ಭಟ್ ಜೊತೆ ನಟಿಸಿರುವುದು ಖುಷಿ ಕೊಟ್ಟಿದೆ ಎಂದು ತಿಳಿಸಿದ್ದಾರೆ.
ಅನಿಲ್ ಕಪೂರ್ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ‘ಆಲ್ಫಾ’ ಸಿನಿಮಾವು ಇದೇ ಜುಲೈ 3, 2026 ರಂದು ವಿಶ್ವಾದ್ಯಂತ ಚಿತ್ರಮಂದಿರಗಳಲ್ಲಿ ಅದ್ಧೂರಿಯಾಗಿ ಬಿಡುಗಡೆಯಾಗಲಿದೆ.
