ಭಾರತೀಯ ವಾಯುಯಾನ ಕ್ಷೇತ್ರಕ್ಕೆ ಮತ್ತೊಂದು ಹೊಸ ಅತಿಥಿಯ ಆಗಮನವಾಗುತ್ತಿದೆ. ಕೇರಳ ಮೂಲದ ಪ್ರಸಿದ್ಧ ‘ಅಲ್ ಹಿಂದ್ ಸಮೂಹ’ (alhind Group) ಈಗ ವಿಮಾನಯಾನ ಕ್ಷೇತ್ರಕ್ಕೆ ಅಧಿಕೃತವಾಗಿ ಕಾಲಿಡುತ್ತಿದೆ. ನಾಗರಿಕ ವಿಮಾನಯಾನ ಸಚಿವಾಲಯದಿಂದ ನಿರಾಕ್ಷೇಪಣಾ ಪತ್ರ (NOC) ಪಡೆದುಕೊಂಡಿರುವ ‘ಅಲ್ ಹಿಂದ್ ಏರ್’ (alHindAir), ಶೀಘ್ರದಲ್ಲೇ ತನ್ನ ಕಾರ್ಯಾಚರಣೆಯನ್ನು ಆರಂಭಿಸಲು ಸಜ್ಜಾಗಿದೆ. ಈ ಹೊಸ ವಿಮಾನಯಾನ ಸಂಸ್ಥೆಯ ಹಿಂದಿರುವ ಶಕ್ತಿ ಮೊಹಮ್ಮದ್ ಹಾರಿಸ್ ಟಿ.
ಯಾರು ಈ ಮೊಹಮ್ಮದ್ ಹಾರಿಸ್?
ಕೇರಳದ ಕ್ಯಾಲಿಕಟ್ ಮೂಲದವರಾದ ಮೊಹಮ್ಮದ್ ಹಾರಿಸ್ ಟಿ, ಅಲ್ ಹಿಂದ್ ಗ್ರೂಪ್ ಆಫ್ ಕಂಪನೀಸ್ನ ಪ್ರವರ್ತಕರು. ಕಳೆದ ಮೂರು ದಶಕಗಳಿಂದ ಪ್ರವಾಸೋದ್ಯಮ ಮತ್ತು ಟ್ರಾವೆಲ್ಸ್ ಕ್ಷೇತ್ರದಲ್ಲಿ ಸಕ್ರಿಯರಾಗಿರುವ ಇವರು, ಶೂನ್ಯದಿಂದ ಬೃಹತ್ ಸಾಮ್ರಾಜ್ಯ ಕಟ್ಟಿದವರು. ಕ್ಯಾಲಿಕಟ್ನಲ್ಲಿ ಶಿಕ್ಷಣ ಮುಗಿಸಿರುವ ಇವರು ಇತಿಹಾಸ ಮತ್ತು ಅರ್ಥಶಾಸ್ತ್ರದಲ್ಲಿ ಬಿಎ ಪದವಿ ಹಾಗೂ ಫಾರ್ಮಕಾಲಜಿಯಲ್ಲಿ ಪದವಿ ಪಡೆದಿದ್ದಾರೆ. ಪ್ರಸ್ತುತ ಇವರು ಇಂಡಿಯನ್ ಹಜ್ ಉಮ್ರಾ ಅಸೋಸಿಯೇಷನ್ನ ಸ್ಥಾಪಕ ಪ್ರಧಾನ ಕಾರ್ಯದರ್ಶಿಯಾಗಿಯೂ ಸೇವೆ ಸಲ್ಲಿಸುತ್ತಿದ್ದಾರೆ.
ಅಲ್ ಹಿಂದ್ ಏರ್ ಪಯಣದ ಹಾದಿ
1990ರಲ್ಲಿ ಆರಂಭವಾದ ಅಲ್ ಹಿಂದ್ ಸಮೂಹ ಇಂದು ಏಷ್ಯಾದ ಪ್ರಮುಖ ಟ್ರಾವೆಲ್ ಮ್ಯಾನೇಜ್ಮೆಂಟ್ ಸಂಸ್ಥೆಗಳಲ್ಲಿ ಒಂದಾಗಿ ಬೆಳೆದಿದೆ. ಭಾರತ ಮಾತ್ರವಲ್ಲದೆ ಯುಎಇ, ಸೌದಿ ಅರೇಬಿಯಾ, ಕತಾರ್, ಓಮನ್ ಮತ್ತು ಬಾಂಗ್ಲಾದೇಶ ಸೇರಿದಂತೆ ಹಲವು ದೇಶಗಳಲ್ಲಿ ಈ ಸಂಸ್ಥೆ ತನ್ನ ಶಾಖೆಗಳನ್ನು ಹೊಂದಿದೆ. ಈಗ ತನ್ನದೇ ಆದ ಏರ್ಲೈನ್ ಆರಂಭಿಸುವ ಮೂಲಕ ವಾಯುಯಾನ ಕ್ಷೇತ್ರದಲ್ಲೂ ಹೊಸ ಸಂಚಲನ ಮೂಡಿಸಲು ಹಾರಿಸ್ ಮುಂದಾಗಿದ್ದಾರೆ.
ಪ್ರಾದೇಶಿಕ ಸಂಪರ್ಕಕ್ಕೆ ಮೊದಲ ಆದ್ಯತೆ
ಅಲ್ ಹಿಂದ್ ಏರ್ ಆರಂಭದಲ್ಲಿ ‘ರೀಜನಲ್ ಕಮ್ಯೂಟರ್ ಏರ್ಲೈನ್’ ಆಗಿ ಕಾರ್ಯನಿರ್ವಹಿಸಲಿದೆ. ಇದಕ್ಕಾಗಿ ಎಟಿಆರ್ 72-600 ಮಾದರಿಯ ವಿಮಾನಗಳನ್ನು ಬಳಸಿಕೊಳ್ಳಲು ಸಂಸ್ಥೆ ನಿರ್ಧರಿಸಿದೆ. ದೇಶೀಯ ಮಟ್ಟದಲ್ಲಿ ಸುಗಮ ಮತ್ತು ವಿಶ್ವಾಸಾರ್ಹ ವಿಮಾನಯಾನ ಸೇವೆ ನೀಡುವುದು ಸಂಸ್ಥೆಯ ಮುಖ್ಯ ಗುರಿಯಾಗಿದೆ. ಇದರ ಜೊತೆಗೆ ‘ಫ್ಲೈ ಎಕ್ಸ್ಪ್ರೆಸ್’ ಎಂಬ ಮತ್ತೊಂದು ವಿಮಾನಯಾನ ಸಂಸ್ಥೆಗೂ ಕೇಂದ್ರ ಸರ್ಕಾರ ಅನುಮತಿ ನೀಡಿದ್ದು, ಭಾರತದ ಆಕಾಶದಲ್ಲಿ ಶೀಘ್ರದಲ್ಲೇ ಸ್ಪರ್ಧೆ ಹೆಚ್ಚಾಗಲಿದೆ.
