ನವದೆಹಲಿ: ಕೃತಕ ಬುದ್ಧಿಮತ್ತೆ (AI) ಜಾಗತಿಕ ಉದ್ಯೋಗ ಮಾರುಕಟ್ಟೆಯಲ್ಲಿ ದೊಡ್ಡ ಬದಲಾವಣೆಗಳನ್ನು ತರುತ್ತಿರುವ ನಡುವೆ, ಅಮೆರಿಕ ಮೂಲದ ರಿಯಲ್ ಎಸ್ಟೇಟ್ ತಂತ್ರಜ್ಞಾನ ಸಂಸ್ಥೆ Opendoor Technologies ಭಾರತದಲ್ಲಿನ ತನ್ನ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಲು ನಿರ್ಧರಿಸಿದೆ. ಈ ಕ್ರಮದಿಂದ ಸುಮಾರು 250 ಭಾರತೀಯ ಉದ್ಯೋಗಿಗಳು ಉದ್ಯೋಗ ಕಳೆದುಕೊಳ್ಳಲಿದ್ದಾರೆ.
ಕಂಪನಿಯ ಕಾರ್ಯನಿರ್ವಾಹಕ Kaz Nejatian ಉದ್ಯೋಗಿಗಳಿಗೆ ಕಳುಹಿಸಿದ ಸಂದೇಶದಲ್ಲಿ, ಕೆಲವು ತಿಂಗಳ ಹಿಂದೆ ಆರಂಭವಾದ “OpenDoor 2.0” ಯೋಜನೆಯ ವೇಳೆ ಭಾರತದಲ್ಲಿ ಸುಮಾರು 250 ಉದ್ಯೋಗಿಗಳು ಕಾರ್ಯನಿರ್ವಹಿಸುತ್ತಿದ್ದರು ಎಂದು ತಿಳಿಸಿದ್ದಾರೆ.
AI ಆಧಾರಿತ ಹೊಸ ಕಾರ್ಯವ್ಯವಸ್ಥೆ
ಕಳೆದ ಕೆಲವು ತಿಂಗಳುಗಳಿಂದ ಭಾರತದಲ್ಲಿದ್ದ ಕೆಲವು ಹುದ್ದೆಗಳನ್ನು ಅಮೆರಿಕಕ್ಕೆ ಸ್ಥಳಾಂತರಿಸಲಾಗಿತ್ತು. ಇದೀಗ ಉಳಿದ ಎಲ್ಲಾ ಕಾರ್ಯಾಚರಣೆಗಳನ್ನೂ ಅಮೆರಿಕದ ಗ್ರಾಹಕರಿಗೆ ಸಮೀಪದಲ್ಲೇ ನಿರ್ವಹಿಸುವ ಉದ್ದೇಶದಿಂದ ಭಾರತದಲ್ಲಿನ ಕಾರ್ಯಾಚರಣೆಯನ್ನು ಸಂಪೂರ್ಣವಾಗಿ ಮುಚ್ಚಲಾಗುತ್ತಿದೆ ಎಂದು ಕಂಪನಿ ತಿಳಿಸಿದೆ.
“ಇದು ಭಾರತ ತಂಡದ ಕಾರ್ಯಕ್ಷಮತೆಯ ಬಗ್ಗೆ ತೆಗೆದುಕೊಂಡ ನಿರ್ಧಾರವಲ್ಲ. ನಮ್ಮ ಭಾರತೀಯ ಸಹೋದ್ಯೋಗಿಗಳು ಅತ್ಯುತ್ತಮ ಕೆಲಸ ಮಾಡಿದ್ದಾರೆ. ಅವರನ್ನು ನಾವು ಇತರ ಸಂಸ್ಥೆಗಳಿಗೆ ಶಿಫಾರಸು ಮಾಡುತ್ತೇವೆ” ಎಂದು ನೆಜಾಟಿಯನ್ ಹೇಳಿದ್ದಾರೆ.
ಈ ನಿರ್ಧಾರದ ಹಿಂದಿನ ಕಾರಣವೇನು ?
ಕಂಪನಿಯ ಪ್ರಕಾರ, ಇದುವರೆಗೆ ವಿವಿಧ ಸಾಫ್ಟ್‌ವೇರ್ ವ್ಯವಸ್ಥೆಗಳ ನಡುವೆ ನಡೆಯುತ್ತಿದ್ದ ಅನೇಕ ಕೈಚಾಲಿತ (Manual) ಕಾರ್ಯಗಳನ್ನು ಭಾರತ ತಂಡ ನಿರ್ವಹಿಸುತ್ತಿತ್ತು. ಆದರೆ ಈಗ ಕಂಪನಿಯು ಎಲ್ಲಾ ವ್ಯವಸ್ಥೆಗಳನ್ನು ಏಕೀಕರಿಸಿ, AI ಆಧಾರಿತ ಸಣ್ಣ ಮತ್ತು ಪರಿಣಾಮಕಾರಿ ತಂಡಗಳನ್ನು ಅಮೆರಿಕದಲ್ಲಿ ನಿರ್ಮಿಸಿದೆ.
“ನಮ್ಮ ಗ್ರಾಹಕರು ಅಮೆರಿಕದಲ್ಲಿದ್ದಾರೆ. ಅವರಿಗಾಗಿ ಮಾಡುವ ಕಾರ್ಯಗಳು ಅವರ ಸಮೀಪದಲ್ಲೇ ನಡೆದರೆ ಹೆಚ್ಚು ಪರಿಣಾಮಕಾರಿ” ಎಂದು ಕಂಪನಿ ಹೇಳಿದೆ.
ಭಾರತದ ಔಟ್‌ಸೋರ್ಸಿಂಗ್ ಮಾದರಿಗೆ ಎಚ್ಚರಿಕೆಯ ಗಂಟೆ?
ಈ ಬೆಳವಣಿಗೆ ಭಾರತವನ್ನು ಜಾಗತಿಕ ಔಟ್‌ಸೋರ್ಸಿಂಗ್ ಕೇಂದ್ರವನ್ನಾಗಿ ರೂಪಿಸಿದ ಉದ್ಯೋಗ ಮಾದರಿಯ ಭವಿಷ್ಯದ ಕುರಿತು ಹೊಸ ಚರ್ಚೆಗೆ ಕಾರಣವಾಗಿದೆ.
ತಂತ್ರಜ್ಞಾನ ವಲಯದ ವಿಶ್ಲೇಷಕರು, AI ಅಭಿವೃದ್ಧಿಯ ಪರಿಣಾಮವಾಗಿ ಕಂಪನಿಗಳು ದೊಡ್ಡ ಪ್ರಮಾಣದ ಔಟ್‌ಸೋರ್ಸಿಂಗ್ ತಂಡಗಳ ಬದಲಿಗೆ ಸಣ್ಣ AI-ಸಹಿತ ಸ್ಥಳೀಯ ತಂಡಗಳತ್ತ ಮುಖ ಮಾಡುತ್ತಿರುವುದಾಗಿ ಅಭಿಪ್ರಾಯಪಟ್ಟಿದ್ದಾರೆ.
ಉದ್ಯೋಗ ಕಳೆದುಕೊಂಡವರಿಗೆ ನೆರವು
ಕಂಪನಿ ಉದ್ಯೋಗ ಕಳೆದುಕೊಳ್ಳುವ ಸಿಬ್ಬಂದಿಗೆ ಪರಿಹಾರ ಪ್ಯಾಕೇಜ್, ಸೇವರೆನ್ಸ್ ಬೆನಿಫಿಟ್‌, ಹೊಸ ಉದ್ಯೋಗ ಹುಡುಕಲು ನೆರವು ಸೇರಿದಂತೆ ವಿವಿಧ ಸಹಾಯಗಳನ್ನು ಒದಗಿಸುವುದಾಗಿ ತಿಳಿಸಿದೆ. ಕೆಲವು ಪ್ರಮುಖ ಕಾರ್ಯಗಳ ವರ್ಗಾವಣೆ ಪೂರ್ಣಗೊಳ್ಳುವವರೆಗೆ ಕೆಲ ಸಿಬ್ಬಂದಿ ತಾತ್ಕಾಲಿಕವಾಗಿ ಮುಂದುವರಿಯಲಿದ್ದಾರೆ.
ಆದರೆ ಕಂಪನಿಯು ತನ್ನ ವ್ಯವಹಾರಿಕ ದಿಕ್ಕಿನಲ್ಲಿ ಯಾವುದೇ ಬದಲಾವಣೆ ಇಲ್ಲ ಎಂದು ಸ್ಪಷ್ಟಪಡಿಸಿದ್ದು, AI ನೆರವಿನಿಂದ ಕಡಿಮೆ ಸಿಬ್ಬಂದಿಯೊಂದಿಗೆ ಹೆಚ್ಚು ಪರಿಣಾಮಕಾರಿ ಕಾರ್ಯನಿರ್ವಹಣೆಯತ್ತ ಸಾಗುತ್ತಿದೆ ಎಂದು ಹೇಳಿದೆ.
AI ಯುಗದಲ್ಲಿ ಉದ್ಯೋಗಗಳ ಸ್ವರೂಪ ವೇಗವಾಗಿ ಬದಲಾಗುತ್ತಿದ್ದು, ಭಾರತ ಸೇರಿದಂತೆ ಜಾಗತಿಕ ಔಟ್‌ಸೋರ್ಸಿಂಗ್ ಕ್ಷೇತ್ರಕ್ಕೆ ಇದು ಮಹತ್ವದ ಎಚ್ಚರಿಕೆಯ ಬೆಳವಣಿಗೆಯಾಗಿ ಪರಿಣಮಿಸಿದೆ.
