ಪನ್ವೇಲ್ನಿಂದ ಛತ್ರಪತಿ ಶಿವಾಜಿ ಮಹಾರಾಜ್ ಟರ್ಮಿನಸ್ (ಸಿಎಸ್ಎಮ್ಟಿ) ಕಡೆಗೆ ಪ್ರಯಾಣಿಸುತ್ತಿದ್ದ ಹವಾನಿಯಂತ್ರಿತ (ಎಸಿ) ಲೋಕಲ್ ರೈಲಿನಲ್ಲಿ ಭೀತಿಯ ವಾತಾವರಣ ನಿರ್ಮಾಣವಾಗಿದ್ದು, ಇದಕ್ಕೆ ಸಂಬಂಧಿಸಿದ ದೃಶ್ಯಾವಳಿಗಳು ಪ್ರಸ್ತುತ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ವೈರಲ್ ಆಗುತ್ತಿವೆ. ರೈಲು ತನ್ನ ನಿಗದಿತ ಮಾರ್ಗದಲ್ಲಿದ್ದ ಯಾವುದೇ ರೈಲ್ವೆ ನಿಲ್ದಾಣಗಳಲ್ಲಿಯೂ ನಿಲ್ಲದೆ ಸತತವಾಗಿ ಮುನ್ನಡೆದಿದ್ದರಿಂದ ಒಳಗಿದ್ದ ಪ್ರಯಾಣಿಕರು ತೀವ್ರ ಆತಂಕಕ್ಕೆ ಒಳಗಾಗಿದ್ದಾರೆ.
ಮುಂಬೈನ ಹಳೆಯ ಪ್ರಯಾಣಿಕರ ಒಕ್ಕೂಟವಾದ ‘ಮುಂಬೈ ರೈಲ್ ಪ್ರವಾಸಿ ಸಂಘ’ ತನ್ನ ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಈ ವಿಡಿಯೋವನ್ನು ಹಂಚಿಕೊಂಡಿದೆ. ವಿಡಿಯೋದಲ್ಲಿ ಬೋಗಿಯಲ್ಲಿದ್ದ ಎಂಟತ್ತು ಪ್ರಯಾಣಿಕರು ಹಾಗೂ ಮಗುವೊಂದು ಮುಂದೆ ಏನಾಗುವುದೋ ಎಂಬ ಗೊಂದಲ ಮತ್ತು ಭಯದಿಂದ ಇರುವುದು ಕಂಡುಬಂದಿದೆ. ರೈಲು ನಿಲ್ಲದಿರುವುದಕ್ಕೆ ಕಾರಣ ತಿಳಿಯಲು ಹಾಗೂ ಮೋಟಾರ್ಮ್ಯಾನ್ ಅವರನ್ನು ಸಂಪರ್ಕಿಸಲು ಕೆಲ ಪ್ರಯಾಣಿಕರು ತುರ್ತು ಇಂಟರ್ಕಾಮ್ ಬಳಸಿ ಮಾತುಕತೆ ನಡೆಸಲು ಯತ್ನಿಸುತ್ತಿರುವುದು ಸೆರೆಯಾಗಿದೆ. ಪ್ರಯಾಣಿಕರ ಸುರಕ್ಷತೆಯ ದೃಷ್ಟಿಯಿಂದ ಈ ಘಟನೆ ಅತ್ಯಂತ ಗಂಭೀರವಾಗಿದ್ದು, ರೈಲ್ವೆ ಇಲಾಖೆ ತಕ್ಷಣವೇ ತನಿಖೆ ನಡೆಸಿ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಒಕ್ಕೂಟವು ಆಗ್ರಹಿಸಿದೆ. ಅಲ್ಲದೆ, ರೈಲ್ವೆ ಸಚಿವ ಅಶ್ವಿನ್ ವೈಷ್ಣವ್ ಹಾಗೂ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಅವರಿಗೆ ಟ್ಯಾಗ್ ಮಾಡಿ ಗಮನ ಸೆಳೆದಿದೆ.
ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸ್ಪಂದಿಸಿರುವ ‘ರೈಲ್ವೆ ಸೇವಾ’ ಅಧಿಕೃತ ಸಂಸ್ಥೆಯು, ಈ ವಿಷಯವನ್ನು ಮುಂಬೈ ವಿಭಾಗೀಯ ರೈಲ್ವೆ ಪ್ರಬಂಧಕರ ಗಮನಕ್ಕೆ ತರಲಾಗಿದ್ದು ಅಗತ್ಯ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದೆ. ಮತ್ತೊಂದೆಡೆ, ಈ ರೈಲು ತಾಂತ್ರಿಕ ನಿರ್ವಹಣೆಗಾಗಿ ‘ಕಾರ್ ಶೆಡ್’ ಕಡೆಗೆ ತೆರಳುತ್ತಿತ್ತು ಮತ್ತು ಈ ಕುರಿತು ನಿಲ್ದಾಣದಲ್ಲಿ ಮುಂಚಿತವಾಗಿಯೇ ಮೈಕ್ನಲ್ಲಿ ಸೂಚನೆ ನೀಡಲಾಗಿತ್ತು, ಆದಾಗ್ಯೂ ಪ್ರಯಾಣಿಕರು ರೈಲು ಹತ್ತಿದ್ದಾರೆ ಎಂದು ಕೆಲ ನೆಟ್ಟಿಗರು ಕಮೆಂಟ್ ಮಾಡಿದ್ದಾರೆ. ಆದರೆ ಈ ದೂರುಗಳು ಮತ್ತು ರೈಲ್ವೆ ಇಲಾಖೆಯ ಅಧಿಕೃತ ಸ್ಪಷ್ಟನೆ ಇನ್ನಷ್ಟೇ ಹೊರಬೀಳಬೇಕಿದೆ.
