ನವದೆಹಲಿ: ಭಾರತೀಯ ರೈಲ್ವೆಯ ಪ್ರೀಮಿಯಂ ರೈಲುಗಳಲ್ಲಿ ಒಂದಾದ ತೇಜಸ್ ಎಕ್ಸ್‌ಪ್ರೆಸ್‌ನಲ್ಲಿ ಪ್ರಯಾಣಿಸಿದ್ದ ಆಮ್ ಆದ್ಮಿ ಪಕ್ಷದ (AAP) ರಾಜ್ಯಸಭಾ ಸಂಸದ ಸಂಜಯ್ ಸಿಂಗ್ ಅವರ ಪತ್ನಿ ಅನಿತಾ ಸಿಂಗ್, ರೈಲಿನಲ್ಲಿ ನೀಡಿದ ಆಹಾರದ ಗುಣಮಟ್ಟದ ಬಗ್ಗೆ ತೀವ್ರ ಅಸಮಾಧಾನ ಹೊರಹಾಕಿದ್ದಾರೆ. “ಇದೇನಾ ರೈಲ್ವೆಯ ‘ವಿಶ್ವ ದರ್ಜೆಯ’ ಸೇವೆ?” ಎಂದು ಪ್ರಶ್ನಿಸಿ, ಪ್ರಯಾಣಿಕರ ಆರೋಗ್ಯದೊಂದಿಗೆ ಆಟವಾಡದಂತೆ ಅವರು ರೈಲ್ವೆ ಸಚಿವ ಅಶ್ವಿನ್ ವೈಷ್ಣವ್ ಅವರಿಗೆ ಮನವಿ ಮಾಡಿದ್ದಾರೆ.
ರೊಟ್ಟಿ ಹಪ್ಪಳದಷ್ಟು ಗಟ್ಟಿ, ಪನೀರ್ ಹಳಸಿತ್ತು, ದಾಲ್ ಬದಲು ನೀರು !
ಶುಕ್ರವಾರ ಎಕ್ಸ್‌ನಲ್ಲಿ (ಹಿಂದೆ ಟ್ವಿಟರ್) ಊಟದ ಚಿತ್ರದೊಂದಿಗೆ ಪೋಸ್ಟ್ ಮಾಡಿದ ಅನಿತಾ, “ತೇಜಸ್ ಎಕ್ಸ್‌ಪ್ರೆಸ್‌ನಲ್ಲಿ ನೀಡಿದ ಆಹಾರ ಸಂಪೂರ್ಣವಾಗಿ ಕಳಪೆಯಾಗಿತ್ತು. ರೊಟ್ಟಿ ಹಪ್ಪಳದಷ್ಟು ಗಟ್ಟಿಯಾಗಿತ್ತು, ಪನೀರ್ ಹಳಸಿತ್ತು, ಮತ್ತು ದಾಲ್ ಬದಲು ಬರೀ ನೀರು ಬಡಿಸಲಾಗಿತ್ತು. ಪ್ರಯಾಣಿಕರ ಆರೋಗ್ಯದೊಂದಿಗೆ ಆಟವಾಡುವುದನ್ನು ನಿಲ್ಲಿಸಿ” ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
IRCTCಯಿಂದ ಪ್ರತಿಕ್ರಿಯೆ
ಆಪ್ ನಾಯಕನ ಪತ್ನಿಯ ಪೋಸ್ಟ್‌ಗೆ ಐಆರ್‌ಸಿಟಿಸಿ (IRCTC) ಸುಮಾರು ಒಂದು ದಿನದ ನಂತರ ಪ್ರತಿಕ್ರಿಯಿಸಿದೆ. “ಊಟವನ್ನು ಬಡಿಸುವ ಮೊದಲು ಪರಿಶೀಲಿಸಲಾಗಿತ್ತು ಮತ್ತು ಅದೇ ಕೋಚ್‌ನಲ್ಲಿರುವ ಇತರ ಪ್ರಯಾಣಿಕರಿಂದ ಯಾವುದೇ ದೂರುಗಳು ಬಂದಿಲ್ಲ. ವಾಸ್ತವವಾಗಿ, ಅಡುಗೆ ಸೇವೆಯನ್ನು ಸಾಮಾನ್ಯವಾಗಿ ಮೆಚ್ಚಲಾಗಿದೆ” ಎಂದು ಐಆರ್‌ಸಿಟಿಸಿ ತಿಳಿಸಿದೆ. ಆದಾಗ್ಯೂ, ದೂರು ಗಂಭೀರವಾಗಿ ಪರಿಗಣಿಸಿರುವುದಾಗಿ ಮತ್ತು ಗುಣಮಟ್ಟವನ್ನು ಖಚಿತಪಡಿಸಿಕೊಳ್ಳಲು ಹಿರಿಯ ಅಧಿಕಾರಿಯನ್ನು ನೇಮಿಸಲಾಗಿದೆ ಎಂದು ಭರವಸೆ ನೀಡಿದೆ. ಆನ್‌ಬೋರ್ಡ್ ಅಡುಗೆ ತಂಡವು ಅನಿತಾ ಅವರಿಗೆ ಪರ್ಯಾಯ ಊಟವನ್ನು ನೀಡಲು ಮುಂದಾಗಿತ್ತು ಎಂದೂ ಐಆರ್‌ಸಿಟಿಸಿ ಸ್ಪಷ್ಟಪಡಿಸಿದೆ.
ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ಚರ್ಚೆ: “ದೂರು ಕೊಟ್ಟವರನ್ನೇ ದೂಷಿಸಬೇಡಿ!”
ಈ ಪೋಸ್ಟ್ ಪ್ರೀಮಿಯಂ ರೈಲುಗಳಲ್ಲಿ ನೀಡಲಾಗುವ ಆಹಾರದ ಗುಣಮಟ್ಟದ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಯನ್ನು ಹುಟ್ಟುಹಾಕಿದೆ. ಅನೇಕ ಬಳಕೆದಾರರು ತೇಜಸ್ ಎಕ್ಸ್‌ಪ್ರೆಸ್ ಸೇರಿದಂತೆ ಇತರ ರೈಲುಗಳಲ್ಲಿ ತಮ್ಮ ಕೆಟ್ಟ ಅನುಭವಗಳನ್ನು ಹಂಚಿಕೊಂಡರೆ, ಇನ್ನು ಕೆಲವರು ಐಆರ್‌ಸಿಟಿಸಿಯ ಪ್ರತಿಕ್ರಿಯೆಯ ಸ್ವರವನ್ನು ತೀವ್ರವಾಗಿ ಟೀಕಿಸಿದರು.
ಒಬ್ಬ ಬಳಕೆದಾರರು, “ಐಆರ್‌ಸಿಟಿಸಿ, ಇದು ಎಂತಹ ಹಾಸ್ಯಾಸ್ಪದ ಉತ್ತರ? ದೂರು ನೀಡಿದವರನ್ನು ದೂಷಿಸುವ ಬದಲು ನಿಮ್ಮ ಸೇವೆಯನ್ನು ಸುಧಾರಿಸಿ” ಎಂದು ಕೆಂಡಕಾರಿದ್ದಾರೆ. ಇನ್ನೊಬ್ಬರು, “ಐಆರ್‌ಸಿಟಿಸಿಯ ಈ ಉತ್ತರ ವ್ಯವಸ್ಥೆಯಲ್ಲಿನ ಭ್ರಷ್ಟಾಚಾರವನ್ನು ಬಹಿರಂಗಪಡಿಸುತ್ತದೆ. ರೈಲುಗಳಲ್ಲಿ ಊಟ ಮತ್ತು ನೀರಿಗೆ ಅತಿಯಾದ ಶುಲ್ಕ ವಿಧಿಸುವುದು ಎಲ್ಲೆಡೆ ವ್ಯಾಪಕವಾಗಿದೆ” ಎಂದು ಆರೋಪಿಸಿದ್ದಾರೆ. “ಜನರು ದೂರು ನೀಡುವುದಿಲ್ಲ ಏಕೆಂದರೆ ಏನೂ ಸುಧಾರಿಸುವುದಿಲ್ಲ ಎಂದು ಅವರಿಗೆ ತಿಳಿದಿದೆ” ಎಂದು ಮತ್ತೊಬ್ಬ ಬಳಕೆದಾರರು ಹೇಳಿದ್ದಾರೆ.
Loading ...
