ಬೆಂಗಳೂರು-ರಾಜ್ಯದ ಕರಾವಳಿ ಪ್ರವಾಸೋದ್ಯಮಕ್ಕೆ ಹೊಸ ಆಯಾಮ ನೀಡುವ ಉದ್ದೇಶದಿಂದ ಕರ್ನಾಟಕ ಸರ್ಕಾರವು ಉತ್ತರ ಕನ್ನಡ ಜಿಲ್ಲೆಯ ಅರಬ್ಬಿ ಸಮುದ್ರ ತೀರದಲ್ಲಿರುವ ಏಳು ದ್ವೀಪಗಳನ್ನು ವಿಶ್ವದರ್ಜೆಯ ಪ್ರವಾಸಿ ತಾಣಗಳನ್ನಾಗಿ ಅಭಿವೃದ್ಧಿಪಡಿಸಲು ಮಹತ್ವಾಕಾಂಕ್ಷಿ ಯೋಜನೆ ರೂಪಿಸಿದೆ. ಒಟ್ಟು ₹307.71 ಕೋಟಿ ವೆಚ್ಚದ ಈ ಯೋಜನೆಯನ್ನು ಸಾರ್ವಜನಿಕ-ಖಾಸಗಿ ಸಹಭಾಗಿತ್ವ (PPP) ಮಾದರಿಯಲ್ಲಿ ಅನುಷ್ಠಾನಗೊಳಿಸಲು ನಿರ್ಧರಿಸಲಾಗಿದ್ದು, ಇದರಿಂದ ರಾಜ್ಯದ ಕರಾವಳಿ ಪ್ರದೇಶದಲ್ಲಿ ಪ್ರವಾಸೋದ್ಯಮ ಚಟುವಟಿಕೆಗಳಿಗೆ ಹೊಸ ವೇಗ ಸಿಗುವ ನಿರೀಕ್ಷೆಯಿದೆ.
ಕಾರವಾರ, ಭಟ್ಕಳ ಮತ್ತು ಅಂಕೋಲಾ ತಾಲೂಕುಗಳ ವ್ಯಾಪ್ತಿಯಲ್ಲಿರುವ ಏಳು ದ್ವೀಪಗಳನ್ನು ಗುರುತಿಸಲಾಗಿದ್ದು, ಖಾಸಗಿ ಹೂಡಿಕೆ ಮೂಲಕ ಅಗತ್ಯ ಪ್ರವಾಸೋದ್ಯಮ ಮೂಲಸೌಕರ್ಯಗಳನ್ನು ಅಭಿವೃದ್ಧಿಪಡಿಸುವ ಉದ್ದೇಶ ಹೊಂದಲಾಗಿದೆ. ಪ್ರವಾಸಿಗರಿಗೆ ಸಮುದ್ರ ವಿಹಾರ, ದ್ವೀಪದಿಂದ ದ್ವೀಪಕ್ಕೆ ಪ್ರಯಾಣ (Island Hopping), ವಸತಿ ಹಾಗೂ ಮನರಂಜನಾ ಸೌಲಭ್ಯಗಳನ್ನು ಕಲ್ಪಿಸುವ ಮೂಲಕ ಈ ಪ್ರದೇಶವನ್ನು ಪ್ರಮುಖ ಪ್ರವಾಸಿ ಆಕರ್ಷಣೆಯನ್ನಾಗಿ ರೂಪಿಸುವ ಯೋಜನೆ ಸರ್ಕಾರದ ಮುಂದಿದೆ.
ಯಾವುವು ಆ ಏಳು ದ್ವೀಪಗಳು?
ಸರ್ಕಾರ ಅಭಿವೃದ್ಧಿಗೆ ಗುರುತಿಸಿರುವ ದ್ವೀಪಗಳೆಂದರೆ ಮಧ್ಯಲಿಂಗಡ್ (ಸನ್ಯಾಸಿ), ಹಾಗ್, ದೇವಗಡ್ (ಆಯ್ಸ್ಟರ್), ಮೊಂಗೇರಗುಡ, ಕಿರಿ ಕುಂದಾ, ಅಂಕನಿ ಚೆಗ್ಗುಡು ಮತ್ತು ಕುರುಮಗಡ್. ಈ ಏಳು ದ್ವೀಪಗಳು ಒಟ್ಟು 135.04 ಎಕರೆ ವಿಸ್ತೀರ್ಣ ಹೊಂದಿದ್ದು, ಪ್ರಾಥಮಿಕವಾಗಿ 59.31 ಎಕರೆ ಪ್ರದೇಶವನ್ನು ಅಭಿವೃದ್ಧಿ ಚಟುವಟಿಕೆಗಳಿಗೆ ಮೀಸಲಿಡಲಾಗಿದೆ.
ಇವುಗಳಲ್ಲಿ ಕುರುಮಗಡ್ ದ್ವೀಪವನ್ನು ಈಗಾಗಲೇ ಕೆಲವು ಮೂಲಸೌಕರ್ಯ ಹೊಂದಿರುವ ಬ್ರೌನ್‌ಫೀಲ್ಡ್ ದ್ವೀಪವೆಂದು ಗುರುತಿಸಲಾಗಿದೆ. ಉಳಿದ ಆರು ದ್ವೀಪಗಳು ಸಂಪೂರ್ಣವಾಗಿ ಹೊಸದಾಗಿ ಅಭಿವೃದ್ಧಿಪಡಿಸಬೇಕಾದ ಗ್ರೀನ್‌ಫೀಲ್ಡ್ ಯೋಜನೆಗಳಾಗಿವೆ.
ಯಾವ ದ್ವೀಪಕ್ಕೆ ಎಷ್ಟು ಕೋಟಿ ಹೂಡಿಕೆ?
ಯೋಜನೆಯಡಿ ದ್ವೀಪವಾರು ಪ್ರಸ್ತಾಪಿಸಿರುವ ಹೂಡಿಕೆ ಮೊತ್ತ ಹೀಗಿದೆ:
ದೇವಗಡ್ (ಆಯ್ಸ್ಟರ್) ದ್ವೀಪ – ₹74.99 ಕೋಟಿ
ಹಾಗ್ ದ್ವೀಪ – ₹59.99 ಕೋಟಿ
ಮಧ್ಯಲಿಂಗಡ್ (ಸನ್ಯಾಸಿ) ದ್ವೀಪ – ₹45 ಕೋಟಿ
ಕುರುಮಗಡ್ ದ್ವೀಪ – ₹39.76 ಕೋಟಿ
ಅಂಕನಿ ಚೆಗ್ಗುಡು ದ್ವೀಪ – ₹36 ಕೋಟಿ
ಮೊಂಗೇರಗುಡ ದ್ವೀಪ – ₹27.98 ಕೋಟಿ
ಕಿರಿ ಕುಂದಾ ದ್ವೀಪ – ₹23.99 ಕೋಟಿ
ಈ ಪೈಕಿ ಕಾರವಾರದ ಸಮೀಪವಿರುವ ದೇವಗಡ್ ದ್ವೀಪಕ್ಕೆ ಅತಿ ಹೆಚ್ಚು ಹೂಡಿಕೆ ಪ್ರಸ್ತಾಪಿಸಲಾಗಿದೆ. ಭಟ್ಕಳದ ಹಾಗ್ ದ್ವೀಪ ಎರಡನೇ ಸ್ಥಾನದಲ್ಲಿದೆ.
318 ಹೋಟೆಲ್ ಕೊಠಡಿಗಳು; ದಿನಕ್ಕೆ 2,606 ಪ್ರವಾಸಿಗರಿಗೆ ಅವಕಾಶ
ಏಳು ದ್ವೀಪಗಳಲ್ಲಿ ಒಟ್ಟು 318 ಹೋಟೆಲ್ ಕೊಠಡಿಗಳನ್ನು ನಿರ್ಮಿಸುವ ಪ್ರಾಥಮಿಕ ಯೋಜನೆಯಿದೆ. ಇದರಿಂದ ಪ್ರತಿದಿನ ಸುಮಾರು 2,606 ಪ್ರವಾಸಿಗರಿಗೆ ಆತಿಥ್ಯ ಒದಗಿಸುವ ಸಾಮರ್ಥ್ಯ ಸೃಷ್ಟಿಯಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಆದರೆ, ದ್ವೀಪಗಳ ನೈಸರ್ಗಿಕ ಪರಿಸರಕ್ಕೆ ಧಕ್ಕೆಯಾಗದಂತೆ ಪ್ರವಾಸಿಗರ ಸಂಖ್ಯೆಯನ್ನು ನಿರ್ಧರಿಸಲು ಧಾರಣಾ ಸಾಮರ್ಥ್ಯ (Carrying Capacity) ಅಧ್ಯಯನ ನಡೆಸಲಾಗುತ್ತದೆ. ಈ ಅಧ್ಯಯನದ ಆಧಾರದ ಮೇಲೆ ವಸತಿ, ಮನರಂಜನೆ ಮತ್ತು ಇತರ ಪ್ರವಾಸೋದ್ಯಮ ಚಟುವಟಿಕೆಗಳ ಪ್ರಮಾಣವನ್ನು ಅಂತಿಮಗೊಳಿಸಲಾಗುತ್ತದೆ.
30 ವರ್ಷಗಳ ಗುತ್ತಿಗೆ; ಖಾಸಗಿ ಸಂಸ್ಥೆಗಳಿಗೆ ಅವಕಾಶ
ಯೋಜನೆಗೆ ಸಂಬಂಧಿಸಿದಂತೆ ಸ್ಪರ್ಧಾತ್ಮಕ ಟೆಂಡರ್ ಪ್ರಕ್ರಿಯೆ ಮೂಲಕ ಖಾಸಗಿ ಅಭಿವೃದ್ಧಿದಾರರನ್ನು ಆಯ್ಕೆ ಮಾಡಲಾಗುತ್ತದೆ. ಹೆಚ್ಚಿನ ಆದಾಯ ಹಂಚಿಕೆಯ ಪ್ರಸ್ತಾಪ ಸಲ್ಲಿಸುವ ಸಂಸ್ಥೆಗಳಿಗೆ ಆದ್ಯತೆ ನೀಡುವ ವ್ಯವಸ್ಥೆ ರೂಪಿಸಲಾಗಿದೆ.
ವಿನ್ಯಾಸ, ನಿರ್ಮಾಣ, ಹಣಕಾಸು, ನಿರ್ವಹಣೆ ಮತ್ತು ಹಸ್ತಾಂತರ (DBFOT) ಮಾದರಿಯಲ್ಲಿ ಯೋಜನೆ ಜಾರಿಯಾಗಲಿದೆ. ಆರಂಭದಲ್ಲಿ 30 ವರ್ಷಗಳ ಅವಧಿಗೆ ಗುತ್ತಿಗೆ ನೀಡಲಾಗುತ್ತಿದ್ದು, ಅಗತ್ಯ ಅನುಮೋದನೆ ಮತ್ತು ಷರತ್ತುಗಳೊಂದಿಗೆ ಮತ್ತಷ್ಟು 30 ವರ್ಷಗಳವರೆಗೆ ವಿಸ್ತರಿಸುವ ಅವಕಾಶವೂ ಇರಲಿದೆ. ಕರ್ನಾಟಕ ಕಡಲ ಮಂಡಳಿಯು ಯೋಜನೆಯ ಮೇಲ್ವಿಚಾರಣೆ ನಡೆಸಲಿದೆ.
ಯೋಜನೆಯಿಂದ ಮೊದಲ ವರ್ಷದಲ್ಲಿ ವಾರ್ಷಿಕ ರಿಯಾಯಿತಿ ಶುಲ್ಕದ ರೂಪದಲ್ಲಿ ₹8.70 ಕೋಟಿ ಸಂಗ್ರಹವಾಗುವ ನಿರೀಕ್ಷೆಯಿದೆ. ಒಪ್ಪಂದದ ಅವಧಿಯಲ್ಲಿ ಆದಾಯ ಹಂಚಿಕೆಯ ಮೂಲಕ ಸಂಬಂಧಪಟ್ಟ ಪ್ರಾಧಿಕಾರಕ್ಕೆ ಸುಮಾರು ₹145.87 ಕೋಟಿ ಆದಾಯ ಬರಲಿದೆ ಎಂದು ಅಂದಾಜಿಸಲಾಗಿದೆ.
ಪರಿಸರ ಸಂರಕ್ಷಣೆಗೆ ಆದ್ಯತೆ
ದ್ವೀಪಗಳ ಅಭಿವೃದ್ಧಿ ಹೆಸರಿನಲ್ಲಿ ಪರಿಸರಕ್ಕೆ ಹಾನಿಯಾಗದಂತೆ ಸರ್ಕಾರ ಕೆಲವು ಕಡ್ಡಾಯ ಷರತ್ತುಗಳನ್ನು ವಿಧಿಸಿದೆ. ಖಾಸಗಿ ಅಭಿವೃದ್ಧಿದಾರರು ಸಮಗ್ರ ದ್ವೀಪ ನಿರ್ವಹಣಾ ಯೋಜನೆ (Integrated Island Management Plan) ಸಿದ್ಧಪಡಿಸಬೇಕು. ಪರಿಸರ ಮತ್ತು ಅರಣ್ಯ ಇಲಾಖೆಗಳ ಅನುಮತಿ ಸೇರಿದಂತೆ ಎಲ್ಲ ಶಾಸನಬದ್ಧ ಅನುಮೋದನೆಗಳನ್ನು ಪಡೆಯುವುದು ಕಡ್ಡಾಯವಾಗಿದೆ.
ವಿಶೇಷವಾಗಿ ಸಮುದ್ರ ಜೀವವೈವಿಧ್ಯ, ಕರಾವಳಿ ಪರಿಸರ ವ್ಯವಸ್ಥೆ ಹಾಗೂ ದ್ವೀಪಗಳ ನೈಸರ್ಗಿಕ ಸಂಪನ್ಮೂಲಗಳ ಸಂರಕ್ಷಣೆಗೆ ಒತ್ತು ನೀಡಬೇಕಿದೆ. ಪರಿಸರದ ಧಾರಣಾ ಸಾಮರ್ಥ್ಯಕ್ಕೆ ಅನುಗುಣವಾಗಿಯೇ ಅಭಿವೃದ್ಧಿ ಕಾರ್ಯಗಳನ್ನು ಕೈಗೊಳ್ಳಬೇಕೆಂಬುದು ಯೋಜನೆಯ ಪ್ರಮುಖ ಷರತ್ತಾಗಿದೆ.
ಪರಿಸರ ಸಂರಕ್ಷಣೆಗೆ ಆದ್ಯತೆ
ದ್ವೀಪಗಳ ಅಭಿವೃದ್ಧಿ ಹೆಸರಿನಲ್ಲಿ ಪರಿಸರಕ್ಕೆ ಹಾನಿಯಾಗದಂತೆ ಸರ್ಕಾರ ಕೆಲವು ಕಡ್ಡಾಯ ಷರತ್ತುಗಳನ್ನು ವಿಧಿಸಿದೆ. ಖಾಸಗಿ ಅಭಿವೃದ್ಧಿದಾರರು ಸಮಗ್ರ ದ್ವೀಪ ನಿರ್ವಹಣಾ ಯೋಜನೆ (Integrated Island Management Plan) ಸಿದ್ಧಪಡಿಸಬೇಕು. ಪರಿಸರ ಮತ್ತು ಅರಣ್ಯ ಇಲಾಖೆಗಳ ಅನುಮತಿ ಸೇರಿದಂತೆ ಎಲ್ಲ ಶಾಸನಬದ್ಧ ಅನುಮೋದನೆಗಳನ್ನು ಪಡೆಯುವುದು ಕಡ್ಡಾಯವಾಗಿದೆ.
ವಿಶೇಷವಾಗಿ ಸಮುದ್ರ ಜೀವವೈವಿಧ್ಯ, ಕರಾವಳಿ ಪರಿಸರ ವ್ಯವಸ್ಥೆ ಹಾಗೂ ದ್ವೀಪಗಳ ನೈಸರ್ಗಿಕ ಸಂಪನ್ಮೂಲಗಳ ಸಂರಕ್ಷಣೆಗತ್ತು ನೀಡಬೇಕಿದೆ. ಪರಿಸರದ ಧಾರಣಾ ಸಾಮರ್ಥ್ಯಕ್ಕೆ ಅನುಗುಣವಾಗಿಯೇ ಅಭಿವೃದ್ಧಿ ಕಾರ್ಯಗಳನ್ನು ಕೈಗೊಳ್ಳಬೇಕೆಂಬುದು ಯೋಜನೆಯ ಪ್ರಮುಖ ಷರತ್ತಾಗಿದೆ.
ಆದರೆ, ಯೋಜನೆಯ ಯಶಸ್ಸು ಕೇವಲ ಹೂಡಿಕೆ ಮತ್ತು ಮೂಲಸೌಕರ್ಯ ನಿರ್ಮಾಣಕ್ಕೆ ಸೀಮಿತವಾಗಿಲ್ಲ. ಪರಿಸರ ಸಂರಕ್ಷಣೆ, ಸ್ಥಳೀಯ ಸಮುದಾಯಗಳ ಹಿತಾಸಕ್ತಿ, ಸುಸ್ಥಿರ ಪ್ರವಾಸೋದ್ಯಮ ಮತ್ತು ವೈಜ್ಞಾನಿಕ ಯೋಜನೆಗಳ ಸಮರ್ಪಕ ಅನುಷ್ಠಾನವೂ ನಿರ್ಣಾಯಕವಾಗಲಿದೆ. ಈ ಎಲ್ಲ ಅಂಶಗಳನ್ನು ಸಮತೋಲನದಿಂದ ನಿರ್ವಹಿಸಿದರೆ ಕರ್ನಾಟಕದ ಕರಾವಳಿ ಪ್ರವಾಸೋದ್ಯಮಕ್ಕೆ ಜಾಗತಿಕ ಮಟ್ಟದಲ್ಲಿ ಹೊಸ ಗುರುತು ದೊರೆಯಬಹುದು.
