ಸೆಲ್ಫಿ ಕೇಳಿದ ಅಭಿಮಾನಿಯ ಕುತ್ತಿಗೆ ಹಿಡಿದು ದೂಡಿದ ಖ್ಯಾತ ಕ್ರಿಕೆಟಿಗ; ವಿಡಿಯೋ ವೈರಲ್

ಕ್ರಿಕೆಟ್ ಮತ್ತು ಕ್ರಿಕೆಟಿಗರ ಮೇಲೆ ಅಭಿಮಾನಿಗಳು ಸಾಕಷ್ಟು ಪ್ರೀತಿ ಇಟ್ಟುಕೊಂಡಿರುತ್ತಾರೆ. ತಮ್ಮ ನೆಚ್ಚಿನ ಕ್ರಿಕೆಟಿಗನನ್ನು ಹತ್ತಿರದಿಂದ ನೋಡುವ , ಫೋಟೋ ತೆಗೆದುಕೊಳ್ಳುವ ಆಸೆ ಸಾಮಾನ್ಯ. ಇಂತಹ ಆಸೆ ಹೊಂದಿದ್ದ ಅಭಿಮಾನಿಯೊಬ್ಬ ಬಾಂಗ್ಲಾದೇಶದ ಕ್ರಿಕೆಟಿಗ ಶಕೀಬ್ ಅಲ್ ಹಸನ್ ನನ್ನು ಸೆಲ್ಫಿಗಾಗಿ ವಿನಂತಿಸಿದಾಗ ನಡೆದಿದ್ದೇ ಬೇರೆ. ಸೆಲ್ಫಿ ಕೇಳಿದ ವ್ಯಕ್ತಿಯ ಕುತ್ತಿಗೆಯನ್ನು ಹಿಡಿದು ಹೊರಹೋಗುವಂತೆ ಶಕೀಬ್ ಅಲ್ ಹಸನ್ ದೂಡಿದ್ದಾರೆ.

ಈ ವಿಡಿಯೋ ವೈರಲ್ ಆಗಿದೆ. ಶಕೀಬ್ ಅಲ್ ಹಸನ್ ತನ್ನ ಸಹೋದ್ಯೋಗಿಗಳೊಂದಿಗೆ ಮಾತನಾಡುತ್ತಿದ್ದಾಗ ವ್ಯಕ್ತಿಯೊಬ್ಬ ಸೆಲ್ಫಿ ತೆಗೆದುಕೊಳ್ಳಲು ಪ್ರಯತ್ನಿಸುತ್ತಾ ಫೋಟೋಗೆ ಪೋಸ್ ನೀಡುವಂತೆ ಕೇಳುತ್ತಾನೆ. ಈ ವೇಳೆ ಹಸನ್ ಫೋನ್ ಪಕ್ಕಕ್ಕೆ ಸರಿಸಿ ಆತನನ್ನು ದೂರ ಹೋಗುವಂತೆ ಸೂಚಿಸುತ್ತಾರೆ. ಆದರೆ ವ್ಯಕ್ತಿ ಫೋಟೋಗಾಗಿ ನಿರಂತರ ಮನವಿ ಮಾಡುತ್ತಾ ಹಠ ಹಿಡಿದಾಗ ಹಸನ್ ಆತನ ಕುತ್ತಿಗೆಯನ್ನು ಹಿಡಿದು ಮೈದಾನದಿಂದ ತಳ್ಳುತ್ತಾರೆ.

ಆ ವ್ಯಕ್ತಿ ಇದರಿಂದ ನೊಂದುಕೊಂಡು ಮೈದಾನದ ಹೊರಗಡೆ ಬೇಸರದಿಂದ ಕುಳಿತಿರುವುದನ್ನು ವಿಡಿಯೋದಲ್ಲಿ ಕಾಣಬಹುದು. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ಸಂಚಲನ ಮೂಡಿಸಿದ್ದು ಶಕೀಬ್ ಅಲ್ ಹಸನ್ ನಡೆಯನ್ನು ಕೆಲವರು ಟೀಕಿಸಿದರೆ, ಫೋಟೋ ತೆಗೆದುಕೊಳ್ಳಬೇಡ ಎಂದು ಹೇಳಿದ ಮೇಲೂ ವ್ಯಕ್ತಿ ಹಠದ ಹಿಡಿದ ಬಗ್ಗೆಯೂ ಹಲವರು ಟೀಕಿಸಿದ್ದಾರೆ.