ಪಾರಂಪರಿಕ ತಾಣವಾಗಿ ಬದಲಾಗಲಿದೆ ಊಟಿಯಲ್ಲಿರುವ ಶತಮಾನದ ಸೇತುವೆ….!

ತಮಿಳುನಾಡಿನ ಊಟಿ ಒಂದು ರಮಣೀಯ ಪ್ರವಾಸಿ ತಾಣ. ನವದಂಪತಿಗಳು ಹನಿಮೂನ್ ಅಂತೆಲ್ಲಾ ಹೇಳಿಕೊಂಡು ಇಲ್ಲಿಗೆ ಭೇಟಿ ನೀಡುತ್ತಾರೆ. ಆದರೆ, ಈ ಸ್ಥಳವು ಶ್ರೀಮಂತ ಇತಿಹಾಸವನ್ನು ಹೊಂದಿದೆ ಎಂದು ನಿಮಗೆ ತಿಳಿದಿದೆಯೇ ?

ತೊಟ್ಟಿಪಾಲಂ ಅಥವಾ ಕಲ್ಲರ್ ಸೇತುವೆ ಎಂದು ಕರೆಯಲ್ಪಡುವ 100 ವರ್ಷಗಳಷ್ಟು ಹಳೆಯದಾದ ಸೇತುವೆ ಇದೆ. ಇದು ಕೂನೂರು ರಸ್ತೆಯ ಮೆಟ್ಟುಪಾಳ್ಯಂ ಬಳಿ ಇದೆ. ಶತಮಾನದಷ್ಟು ಹಳೆಯದಾದ ಈ ಉಕ್ಕಿನ ಸೇತುವೆಯು 20 ಮೀಟರ್‌ಗಳಷ್ಟು ವಿಸ್ತಾರವಾಗಿದೆ ಮತ್ತು ವಿಶೇಷ ಅಂದ್ರೆ ಪಿಲ್ಲರ್‌ಗಳಿಂದ ಇದು ಮುಕ್ತವಾಗಿದೆ.

ಈ ಸೇತುವೆಯನ್ನು 1923ರಲ್ಲಿ ನಿರ್ಮಿಸಲಾಯಿತು. ಇದು ಕಲ್ಲರ್ ನದಿಯನ್ನು ವ್ಯಾಪಿಸಿರುವ ಮಹತ್ವದ ಕೊಂಡಿಯಾಗಿ ಕಾರ್ಯನಿರ್ವಹಿಸುತ್ತದೆ. ಇದು ಕುನೂರ್ ಮತ್ತು ಉದಗಮಂಡಲಂ ಎರಡಕ್ಕೂ ಮೆಟ್ಟುಪಾಳಯಂ ಅನ್ನು ಸಂಪರ್ಕಿಸುತ್ತದೆ. ಈ ತೂಗುಸೇತುವೆಯನ್ನು ಪ್ರವಾಸಿಗರಿಗೆ ಪಾರಂಪರಿಕ ತಾಣವನ್ನಾಗಿ ಮಾಡಲು ಸ್ಥಳೀಯ ಪಂಚಾಯತ್ ಯೋಜಿಸಿದೆ. ಮೆಟ್ಟುಪಾಳ್ಯಂ ರಸ್ತೆಯ ಉದ್ದಕ್ಕೂ 7 ಕಿಲೋಮೀಟರ್ ದೂರದಲ್ಲಿರುವ ಈ ಸೇತುವೆಯು ವಿವಿಧ ಸ್ಥಳಗಳನ್ನು ಸಂಪರ್ಕಿಸುತ್ತದೆ.

ಬ್ರಿಟಿಷ್ ವಸಾಹತುಶಾಹಿ ಕಾಲದಲ್ಲಿ ನಿರ್ಮಿಸಲಾದ ಕಲ್ಲರ್ ಸೇತುವೆಯು ಪಂಜರದ ಆಕಾರವನ್ನು ಹೊಂದಿದ್ದು, ಕಬ್ಬಿಣದಿಂದ ಮಾಡಲ್ಪಟ್ಟಿದೆ. ಸುಮಾರು 65 ಮೀಟರ್ ಉದ್ದ ಮತ್ತು 10 ಮೀಟರ್ ಎತ್ತರ ಹೊಂದಿದ್ದು, ಕಾಲು ಸೇತುವೆಯಾಗಿ ಕಾರ್ಯನಿರ್ವಹಿಸುತ್ತದೆ. ತೂಗು ಸೇತುವೆಯ ನಿರ್ಮಾಣಕ್ಕೆ ಮುಂಚಿತವಾಗಿ, ಬ್ರಿಟಿಷರು 1894ರಲ್ಲಿ ನದಿಗೆ ಅಡ್ಡಲಾಗಿ ಕಲ್ಲಿನ ಸೇತುವೆಯನ್ನು ನಿರ್ಮಿಸಿದ್ರು. ದುರದೃಷ್ಟವಶಾತ್, ಏಕಪಥದ ಕಲ್ಲಿನ ಸೇತುವೆಯು ಹದಗೆಟ್ಟಿದೆ. 2015 ರಲ್ಲಿ ಹೆದ್ದಾರಿ ಇಲಾಖೆಯಿಂದ ಕೆಡವಲಾಯಿತು.

ಕಲ್ಲಾರ್ ಸೇತುವೆಯನ್ನು ಬ್ರಿಟಿಷರ ವಸಾಹತುಶಾಹಿ ಕಾಲದಲ್ಲಿ ವಾಹನಗಳ ಸಂಚಾರಕ್ಕೆ ಅನುಕೂಲವಾಗುವಂತೆ ನಿರ್ಮಿಸಲಾಗಿತ್ತು. ಈ ಸೇತುವೆಯು 100 ವರ್ಷಗಳ ಪ್ರಭಾವಶಾಲಿ ಅವಧಿಯವರೆಗೆ ಸ್ಥಿರವಾಗಿದೆ. ಎತ್ತರದ ಮತ್ತು ಸ್ವಾವಲಂಬಿಯಾಗಿ ನಿಂತಿರುವ ಸೇತುವೆಯನ್ನು ಇತ್ತೀಚೆಗೆ ಮುಚ್ಚಲಾಗಿದೆ. ಭಾರಿ ವಾಹನಗಳಿಂದ ಸೇತುವೆಗೆ ಅಪಾಯವಾಗುತ್ತದೆ ಅನ್ನೋ ಮುನ್ನಚ್ಚರಿಕೆಯಾಗಿ ಅದನ್ನು ಮುಚ್ಚಲಾಯಿತು. ಹೀಗಾಗಿ ವಾಹನಗಳು ಪರ್ಯಾಯ ಮಾರ್ಗವನ್ನು ಅವಲಂಬಿಸಿದೆ.

ಬೆಂಬಲಕ್ಕಾಗಿ ನೆಲದ ಕಂಬಗಳನ್ನು ಹೊಂದಿರುವ ಸಾಂಪ್ರದಾಯಿಕ ಸೇತುವೆಯ ನಿರ್ಮಾಣಕ್ಕಿಂತ ಭಿನ್ನವಾಗಿ, ಈ 65 ಮೀಟರ್ ತೂಗು ಸೇತುವೆಯು ಪ್ರತ್ಯೇಕವಾಗಿ ನಿಂತಿದೆ. ಈ ಸೇತುವೆಯಿಂದ ಕೇವಲ ಒಂದು ವಾಹನ ಮಾತ್ರ ಸಂಚರಿಸುತ್ತಿತ್ತು. ಅದರ ನಂತರ, ಕಬ್ಬಿಣದ ತೂಗು ಸೇತುವೆಯ ಜೊತೆಯಲ್ಲಿ ನಾಲ್ಕು ಹೊಸ ಪಿಯರ್‌ಗಳನ್ನು ಮಾಡಲಾಗಿದ್ದು, ಮೂರು ವಾಹನಗಳು ಏಕಕಾಲದಲ್ಲಿ ದಾಟಲು ಅನುವು ಮಾಡಿಕೊಡುತ್ತದೆ. ಸೇತುವೆಯ ಮೇಲಿನ ಟಾರ್ ರಸ್ತೆಯನ್ನು ಎರಡು ಬಾರಿ ದುರಸ್ತಿ ಮಾಡಲಾಗಿದ್ದು, ಕಬ್ಬಿಣದ ಕಂಬಗಳು ಇಂದಿಗೂ ಹಾಳಾಗದೆ ಉಳಿದಿವೆ.

ಈ ಸೇತುವೆಯನ್ನು ಸ್ಮಾರಕವಾಗಿ ಪರಿಗಣಿಸಲು ಯೋಜಿಸಿದ್ದೇವೆ. ಇದನ್ನು ಸಂರಕ್ಷಿಸುವುದು ನಮ್ಮ ಜವಾಬ್ದಾರಿಯಾಗಿದೆ. ನಾವು ಸೇತುವೆಯ ಮೇಲೆ ಪೇಂಟಿಂಗ್ ಮತ್ತು ಇತರ ಚಟುವಟಿಕೆಗಳನ್ನು ಪ್ರಾರಂಭಿಸಿದ್ದೇವೆ. ಇದನ್ನು ಪಾರಂಪರಿಕ ಸೇತುವೆ ಎಂದು ಗುರುತಿಸುವಂತೆ ಒತ್ತಾಯಿಸಿ ಜಿಲ್ಲಾಡಳಿತದ ಮೂಲಕ ರಾಜ್ಯ ಸರ್ಕಾರಕ್ಕೆ ಮನವಿಯನ್ನೂ ಸಲ್ಲಿಸಿದ್ದೇವೆ ಎಂದು ಒಡಂತುರೈ ಪಂಚಾಯತ್ ಅಧ್ಯಕ್ಷ ಆರ್. ತಂಗವೇಲು ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.