ಬೆಂಗಳೂರು: ಬಿಸಿಲ ಬೇಗೆ ತೀವ್ರ ಏರಿಕೆಯ ಪರಿಣಾಮ ಕೋಳಿ ಮತ್ತು ಮೊಟ್ಟೆ ದರ ಗಣನೀಯ ಏರಿಕೆ ಕಂಡಿದೆ. ಬಿಸಿಲ ಬೇಗೆ ಕಾರಣ ಕೋಳಿ ಮತ್ತು ಮೊಟ್ಟೆ ಉತ್ಪಾದನೆಯ ಮೇಲೆ ಪರಿಣಾಮ ಬೀರಿರುವುದರಿಂದ ಕೋಳಿ ಮತ್ತು ಮೊಟ್ಟೆಯ ದರ ತೀವ್ರ ಏರಿಕೆ ಕಂಡಿದೆ.
ಏಪ್ರಿಲ್ ಮತ್ತು ಮೇ ತಿಂಗಳಲ್ಲಿ ಬೇಸಿಗೆಯ ಬಿಸಿಲಿಗೆ ಕೋಳಿಗಳು ಶಾಖದ ಒತ್ತಡ ಅನುಭವಿಸಿದ್ದು, ಇದರ ಪರಿಣಾಮ ಮೊಟ್ಟೆ ಉತ್ಪಾದನೆ ಸಾಮರ್ಥ್ಯದ ಮೇಲೆ ಉಂಟಾಗಿದೆ. ಬೇಸಿಗೆಯಲ್ಲಿ ಕೋಳಿಗಳು ಆಹಾರ ಸೇವನೆ ಕಡಿಮೆ ಮಾಡಿ ಹೆಚ್ಚಿನ ಪ್ರಮಾಣದ ನೀರು ಕುಡಿಯುತ್ತವೆ. ಇವುಗಳಿಗೆ ಬೆವರುವ ಸಾಮರ್ಥ್ಯ ಇರುವುದಿಲ್ಲ. ಗರಿಗಳು ಇರುವ ಕಾರಣ ದೇಹದ ಶಾಖ ಕಡಿಮೆ ಮಾಡಿಕೊಳ್ಳಲು ಸಾಧ್ಯವಾಗುವುದಿಲ್ಲ.
ಇದರಿಂದಾಗಿ ಕಡಿಮೆ ತೂಕ, ಕಳಪೆ ಚಿಪ್ಪಿನ, ಕಡಿಮೆ ಗುಣಮಟ್ಟದ ಮೊಟ್ಟೆಗಳು ಉತ್ಪತ್ತನೆಯಾಗುತ್ತಿವೆ. ಉತ್ಪಾದನಾ ಸಾಮರ್ಥ್ಯ ಕೂಡ ಕಡಿಮೆಯಾಗಿದೆ. ಉತ್ಪಾದನೆಯಲ್ಲಿ ಇಳಿಕೆಯಾದ ಪರಿಣಾಮ ಮೊಟ್ಟೆಗಳ ದರ ಏರಿಕೆ ಕಂಡಿದೆ. ರಾಜ್ಯದಲ್ಲಿ ಸಾಮಾನ್ಯ ದಿನಗಳಲ್ಲಿ ದಿನಕ್ಕೆ 1.8 ಕೋಟಿ ಅಧಿಕ ಮೊಟ್ಟೆ ಉತ್ಪಾದನೆಯಿದ್ದು, ಮೇ ತಿಂಗಳಲ್ಲಿ 1.6 ಕೋಟಿಗೆ ಇಳಿಕೆಯಾಗಿದೆ.
ಬೇಸಿಗೆ ಕಾರಣಕ್ಕೆ ಅನೇಕ ಕೋಳಿ ಸಾಕಾಣಿಕೆದಾರರು ಹೊಸ ಮರಿಗಳನ್ನು ಸಾಕಲು ಮುಂದಾಗಿಲ್ಲ. ಇದು ಕೂಡ ಕೋಳಿ ಮತ್ತು ಮೊಟ್ಟೆ ಉತ್ಪಾದನೆ ಕುಸಿತಕ್ಕೆ ಕಾರಣವಾಗಿದ್ದು, ಮಳೆಗಾಲದಲ್ಲಿ ಮೊಟ್ಟೆ ಉತ್ಪಾದನೆ ಹೆಚ್ಚಾಗಲಿದೆ.
ಮೊಟ್ಟೆ ಬೆಲೆ ಏರಿಕೆಯ ಜೊತೆಗೆ ಚಿಕನ್ ದರ ಕೂಡ ಏರಿಕೆ ಕಂಡಿದೆ. ಉತ್ಪಾದನೆ ಕಡಿಮೆ ಮತ್ತು ಆಹಾರದ ಬೆಲೆ ಹೆಚ್ಚಳ ಪರಿಣಾಮ ಚಿಕನ್ ಬೆಲೆ ಗಗನಕ್ಕೇರಿದ್ದು, ಮಾಂಸಪ್ರಿಯರಿಗೆ ಹೊರೆಯಾಗಿದೆ. ರೆಡಿ ಚಿಕನ್ ಕೆಜಿಗೆ 200 ರಿಂದ 250 ರೂ., ಸ್ಕಿನ್ ಲೆಸ್ ಚಿಕನ್ 230 ರಿಂದ 280 ರೂ., ನಾಟಿ ಕೋಳಿ ಚಿಕನ್ ಕೆಜಿಗೆ 500 ರಿಂದ 600 ರೂ.ವರೆಗೆ ಏರಿಕೆಯಾಗಿದೆ. ಮೊಟ್ಟೆ ಸಗಟು ದರ 5.50 ರೂಪಾಯಿ, ರಿಟೇಲ್ 5.65 ರಿಂದ 7 ರೂ.ವರೆಗೆ ಏರಿಕೆಯಾಗಿದೆ.
