ಮಾಜಿ ಒಲಿಂಪಿಯನ್ನರೂ ಆದ ಸ್ಕೇಟಿಂಗ್ ವಿಶ್ವ ಚಾಂಪಿಯನ್‌ಗಳಾದ ಮೆರೈಲ್ ಡೇವಿಸ್ ಹಾಗೂ ಚಾರ್ಲಿ ವೈಟ್ ಬಾಲಿವುಡ್‌ನ ಜನಪ್ರಿಯ ಹಾಡುಗಳಿಗೆ ಹೆಜ್ಜೆ ಹಾಕುತ್ತಿರುವ ಹಳೆಯ ವಿಡಿಯೋವೊಂದು ವೈರಲ್ ಆಗಿದೆ.
ಅಂತಾರಾಷ್ಟ್ರೀಯ ನೃತ್ಯ ದಿನಾಚರಣೆಯಂದು, ಒಲಿಂಪಿಕ್ಸ್‌ನ ಅಧಿಕೃತ ಪೇಜ್ ಈ ಜೋಡಿಯ ಐಸ್‌ ಸ್ಕೇಟಿಂಗ್ ವಿಡಿಯೋ ಶೇರ್‌ ಮಾಡಿದೆ. ಸ್ಕೇಟಿಂಗ್ ಬಾಲೆಯರ ಹಾಡಿನ ಆಯ್ಕೆ ಹಾಗೂ ಆಕರ್ಷಕ ಉಡುಗೆಗಳು ಈ ವಿಡಿಯೋವನ್ನು ಇನ್ನಷ್ಟು ಸುಂದರವಾಗಿಸಿದೆ.
2005ರ ’ಬಂಟಿ ಔರ್‌ ಬಬ್ಲಿ’ ಚಿತ್ರದ ’ಕಜ್ರಾ ರೇ’ ಹಾಡಿಗೆ ಮಸ್ತ್‌ ಸ್ಟೆಪ್ ಹಾಕಿರುವ ಈ ಜೋಡಿ, 2010ರಲ್ಲಿ ವ್ಯಾಂಕುವರ್‌‌ನಲ್ಲಿ ಪ್ರದರ್ಶನ ನೀಡುವ ವೇಳೆ ಇನ್ನೆರೆಡು ಬಾಲಿವುಡ್ ಹಾಡುಗಳಿಗೆ ಹೆಜ್ಜೆ ಹಾಕಿತ್ತು. 2002ರಲ್ಲಿ ಬಿಡುಗಡೆಯಾದ ’ದೇವದಾಸ್’ ಚಿತ್ರದ ’ಸಿಲ್ಸಿಲಾ ಯೇ ಚಾಹತ್‌ ಕಾ’ ಮತ್ತು ’ಡೋಲಾ ರೇ ಡೋಲಾ’ ಹಾಡುಗಳಿಗೆ ಈ ಜೋಡಿ ಕುಣಿದಿತ್ತು.
ನಾಜೂಕಾದ ತಿರುವುಗಳು, ಕಥಕ್ ಹೆಜ್ಜೆಗಳು ಹಾಗೂ ನೆಗೆತಗಳಿಂದ ತುಂಬಿರು ಈ ನೃತ್ಯವನ್ನು ನೋಡಿದ ನೆಟ್ಟಿಗರು ಭೇಷ್ ಎನ್ನುತ್ತಿದ್ದಾರೆ. ಈ ವಿಡಿಯೋಗೆ 46,000+ ಲೈಕ್‌ಗಳು ಸಂದಾಯವಾಗಿವೆ.
