ಹತ್ತು ಅಡಿ ಸುರಂಗ ಕೊರೆದು ಆಭರಣದ ಅಂಗಡಿಯೊಂದರಲ್ಲಿ 15 ಲಕ್ಷ ರೂ. ಬೆಲೆ ಬಾಳುವ ಆಭರಣಗಳನ್ನು ಲೂಟಿ ಮಾಡಿದ ಘಟನೆ ಉತ್ತರ ಪ್ರದೇಶದ ಮೀರತ್‌ನಲ್ಲಿ ಜರುಗಿದೆ.
ಅಂಗಡಿಯ ಪಕ್ಕದ ಚರಂಡಿಯ ಇಟ್ಟಿಗೆಗಳನ್ನು ತೆಗೆದು, ಅಲ್ಲಿಂದ ಅಂಗಡಿಯೊಳಗೆ ಸುರಂಗ ಕೊರೆದಿದ್ದಾರೆ ಈ ಕಳ್ಳರು. ಸೋಮವಾರ-ಮಂಗಳವಾರ ಬೆಳಗ್ಗಿನ ಜಾವದ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ.
ಪಿಯೂಶ್ ಗಾರ್ಗ್ ಹೆಸರಿನ ಅಂಗಡಿ ಮಾಲೀಕ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, 10-15 ಲಕ್ಷ ರೂ. ಬೆಲೆ ಬಾಳುವ ಆಭರಣದ ಕಳುವಾಗಿರುವುದಾಗಿ ತಿಳಿಸಿದ್ದಾರೆ. ಮಂಗಳವಾರ ಬೆಳಿಗ್ಗೆ ತಮ್ಮ ಅಂಗಡಿಯನ್ನು ತೆರೆದ ವೇಳೆ ಹೀಗೆ ಸುರಂಗ ಕೊರೆದಿದ್ದನ್ನು ಕಂಡ ಅಂಗಡಿ ಮಾಲೀಕ ಅಕ್ಷರಶಃ ದಂಗಾಗಿದ್ದಾರೆ.
ಕಳ್ಳರು ಪರಾರಿಯಾಗಿದ್ದು, ಅವರನ್ನು ಸೆರೆ ಹಿಡಿಯಲು ಪೊಲೀಸರು ಕಾರ್ಯಪ್ರವೃತ್ತರಾಗಿದ್ದಾರೆ.
