ದುಬೈ: “ಅಪ್ಪಾ, ಕಾರಿನ ಟೈರ್ ಪಂಕ್ಚರ್ ಆಗಿದೆ. ರಸ್ತೆಯ ಬದಿಯಲ್ಲಿ ನಿಂತಿದ್ದೇನೆ” ಎಂದು ತಂದೆಗೆ ಕರೆ ಮಾಡಿ ತಿಳಿಸಿದ್ದಳು. ಮಗಳ ಮಾತು ಕೇಳಿದ ತಂದೆ, ಆತಂಕಪಡಬೇಡ, ರೋಡ್‌ಸೈಡ್ ಅಸಿಸ್ಟೆನ್ಸ್‌ಗೆ ಕರೆ ಮಾಡು, ಕಾರನ್ನು ವರ್ಕ್‌ಶಾಪ್‌ಗೆ ಕಳುಹಿಸಿ ಟ್ಯಾಕ್ಸಿಯಲ್ಲಿ ಕಾಲೇಜಿಗೆ ಹೋಗು ಎಂದು ಸಲಹೆ ನೀಡಿದ್ದರು. ಆದರೆ, ಆ ತಂದೆಗೆ ಗೊತ್ತಿರಲಿಲ್ಲ, ಮಗಳೊಂದಿಗೆ ತಾನು ಮಾತನಾಡುತ್ತಿರುವುದು ಕೊನೆಯ ಮಾತಾಗುತ್ತದೆ ಎಂದು! ಫೋನ್ ಕರೆ ಮುಗಿದ ಐದೇ ನಿಮಿಷಗಳಲ್ಲಿ ನಡೆದ ಭೀಕರ ಅಪಘಾತ ಇಡೀ ಕುಟುಂಬದ ಬದುಕನ್ನೇ ಕತ್ತಲೆಗೆ ತಳ್ಳಿದೆ.
ದುಬೈನಲ್ಲಿ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಕೇರಳ ಮೂಲದ 21 ವರ್ಷದ ಭಾರತೀಯ ವಿದ್ಯಾರ್ಥಿನಿ ನೈಫಾ ಬಲ್ಕೀಸ್ ಹಮೀದ್ ಮೃತಪಟ್ಟಿದ್ದಾಳೆ. ದುಬೈನ ಕೆನಡಿಯನ್ ವಿಶ್ವವಿದ್ಯಾಲಯದಲ್ಲಿ ಆರ್ಕಿಟೆಕ್ಚರ್ ಪದವಿಯ ಅಂತಿಮ ವರ್ಷದಲ್ಲಿ ಓದುತ್ತಿದ್ದ ಆಕೆ, ಉಜ್ವಲ ಭವಿಷ್ಯದ ಕನಸು ಕಂಡಿದ್ದಳು. ಆದರೆ, ವಿಧಿಯ ಆಟಕ್ಕೆ ಆಕೆಯ ಬದುಕು ದುರಂತ ಅಂತ್ಯ ಕಂಡಿದೆ.
ತಂದೆಗೆ ಕರೆ ಮಾಡಿದ ಕೆಲವೇ ನಿಮಿಷಗಳಲ್ಲಿ ದುರಂತ!
ಗಲ್ಫ್ ನ್ಯೂಸ್ ವರದಿಯ ಪ್ರಕಾರ, ನೈಫಾ ಅಲ್ ಖವಾನೀಜ್ ರಸ್ತೆಯಲ್ಲಿ ಕಾರಿನಲ್ಲಿ ಕಾಲೇಜಿಗೆ ತೆರಳುತ್ತಿದ್ದಾಗ ವಾಹನದ ಟೈರ್ ಪಂಕ್ಚರ್ ಆಗಿತ್ತು. ಹೀಗಾಗಿ ರಸ್ತೆಯ ಬದಿಯಲ್ಲಿ ಕಾರು ನಿಲ್ಲಿಸಿ, ಭಾರತದಲ್ಲಿ ಕುಟುಂಬದ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿದ್ದ ತಂದೆ ಹಮೀದ್ ಅವರಿಗೆ ಕರೆ ಮಾಡಿದ್ದಳು.
ಮಗಳ ಪರಿಸ್ಥಿತಿ ತಿಳಿದ ತಂದೆ, ರಸ್ತೆ ಸಹಾಯ ಸೇವೆಗೆ ಕರೆ ಮಾಡುವಂತೆ ಸಲಹೆ ನೀಡಿದ್ದರು. ಅಲ್ಲದೆ, ಕಾರನ್ನು ವರ್ಕ್‌ಶಾಪ್‌ಗೆ ಕಳುಹಿಸಿ ಟ್ಯಾಕ್ಸಿಯಲ್ಲಿ ಕಾಲೇಜಿಗೆ ತೆರಳುವಂತೆ ಸೂಚಿಸಿದ್ದರು.
ತಂದೆಯೊಂದಿಗೆ ಮಾತನಾಡಿದ ಬಳಿಕ ಎಲ್ಲವೂ ಸರಿಯಾಗಬಹುದು ಎಂಬ ನಿರೀಕ್ಷೆಯಲ್ಲಿದ್ದ ನೈಫಾಗೆ ವಿಧಿ ಬೇರೆಯದೇ ತೀರ್ಮಾನ ಮಾಡಿತ್ತು. ಕೇವಲ ಐದು ನಿಮಿಷಗಳ ನಂತರ ತಂದೆ ಮತ್ತೆ ಕರೆ ಮಾಡಿದಾಗ ಆಕೆ ಫೋನ್ ಸ್ವೀಕರಿಸಲಿಲ್ಲ. ಮಗಳ ಸಂಪರ್ಕ ಸಿಗದಿದ್ದಾಗ ಆತಂಕಗೊಂಡ ಕುಟುಂಬಕ್ಕೆ ಕೆಲವೇ ಸಮಯದಲ್ಲಿ ದುಬೈ ಪೊಲೀಸರಿಂದ ಆಘಾತಕಾರಿ ಕರೆ ಬಂದಿತ್ತು.
ಮಗಳಿಗಾಗಿ ಕಾಯುತ್ತಿದ್ದ ಕುಟುಂಬಕ್ಕೆ ಬಂದಿದ್ದು ಸಾವಿನ ಸುದ್ದಿ!
ಟೈರ್ ಪಂಕ್ಚರ್ ಆಗಿದ್ದ ಕಾರಿನ ಹಿಂದೆ ರಸ್ತೆಯ ಬದಿಯಲ್ಲಿ ನಿಂತು ಸಹಾಯಕ್ಕಾಗಿ ಕಾಯುತ್ತಿದ್ದ ನೈಫಾಗೆ ವೇಗವಾಗಿ ಬಂದ ಮತ್ತೊಂದು ವಾಹನ ಡಿಕ್ಕಿ ಹೊಡೆದಿದೆ. ಅಪಘಾತದ ತೀವ್ರತೆಗೆ ಆಕೆ ಸ್ಥಳದಲ್ಲೇ ಮೃತಪಟ್ಟಿದ್ದಾಳೆ ಎಂದು ಪೊಲೀಸರು ಕುಟುಂಬಕ್ಕೆ ತಿಳಿಸಿದ್ದಾರೆ.
ಅಪಘಾತಕ್ಕೆ ಕಾರಣವಾದ ವಾಹನದ ಚಾಲಕನನ್ನು ಪೊಲೀಸರು ಬಂಧಿಸಿದ್ದು, ಪ್ರಕರಣದ ತನಿಖೆ ಮುಂದುವರಿಸಿದ್ದಾರೆ.
ಮಗಳ ಭವಿಷ್ಯಕ್ಕಾಗಿ ದುಬೈಗೆ ಬಂದಿದ್ದ ಕುಟುಂಬ!
ನೈಫಾ ಕುಟುಂಬ ಕೇರಳದ ತೊಡುಪುಳ ಮೂಲದವರು. ಮಗಳ ಉನ್ನತ ಶಿಕ್ಷಣ ಮತ್ತು ಉತ್ತಮ ಭವಿಷ್ಯಕ್ಕಾಗಿ ಕುಟುಂಬ ದುಬೈನಲ್ಲಿ ನೆಲೆಸಿತ್ತು. ಇತ್ತೀಚೆಗೆ ಕೇರಳದಲ್ಲಿ ನಡೆದ ಮದುವೆ ಸಮಾರಂಭದಲ್ಲಿ ಭಾಗವಹಿಸಲು ನೈಫಾ ಕುಟುಂಬದೊಂದಿಗೆ ತಾಯ್ನಾಡಿಗೆ ತೆರಳಿದ್ದಳು. ಬಳಿಕ ಕಾಲೇಜಿನ ತರಗತಿಗಳಿಗಾಗಿ ತಾಯಿಯೊಂದಿಗೆ ದುಬೈಗೆ ಮರಳಿದ್ದಳು. ತಂದೆ ಮತ್ತು ಸಹೋದರ ಕೇರಳದಲ್ಲೇ ಉಳಿದಿದ್ದರು.
ಮಗಳ ವಿದ್ಯಾಭ್ಯಾಸ, ಕನಸುಗಳು ಮತ್ತು ಭವಿಷ್ಯದ ಬಗ್ಗೆ ನೂರಾರು ನಿರೀಕ್ಷೆಗಳನ್ನು ಇಟ್ಟುಕೊಂಡಿದ್ದ ಕುಟುಂಬಕ್ಕೆ ಈ ಸಾವು ಬರಸಿಡಿಲಿನಂತೆ ಎರಗಿದೆ. ಕೆಲವೇ ನಿಮಿಷಗಳ ಹಿಂದೆ ಪ್ರೀತಿಯಿಂದ ಮಾತನಾಡಿದ್ದ ಮಗಳು ಇನ್ನಿಲ್ಲ ಎಂಬ ಸತ್ಯವನ್ನು ಅರಗಿಸಿಕೊಳ್ಳಲಾಗದೆ ಕುಟುಂಬದವರು ಕಣ್ಣೀರಿನಲ್ಲಿ ಮುಳುಗಿದ್ದಾರೆ. ನೈಫಾಳ ಅಕಾಲಿಕ ನಿಧನಕ್ಕೆ ಕೇರಳ ಮೂಲದವರು ಸೇರಿದಂತೆ ಹಲವರು ಸಂತಾಪ ಸೂಚಿಸಿದ್ದಾರೆ.
