ನಮಿತ್ ಮಲ್ಹೋತ್ರಾ ಅವರ ನಿರ್ಮಾಣದಲ್ಲಿ ಮೂಡಿಬಂದಿರುವ 4,000 ಕೋಟಿ ರೂಪಾಯಿ ವೆಚ್ಚದ ಬೃಹತ್ ಬಜೆಟ್‌ನ ‘ರಾಮಾಯಣ’ ಸಿನಿಮಾ ವಿಶ್ವದಾದ್ಯಂತ ಅತ್ಯಂತ ಅದ್ದೂರಿಯಾಗಿ ಬಿಡುಗಡೆಯಾಗಿದ್ದು, ಪ್ರೇಕ್ಷಕರಿಂದ ಹಾಗೂ ವಿಮರ್ಶಕರಿಂದ ಅಭೂತಪೂರ್ವ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ. ಈ ಅದ್ಭುತ ದೃಶ್ಯ ಕಾವ್ಯದಲ್ಲಿ ಲಂಕಾಧಿಪತಿ ರಾವಣನಾಗಿ ಅಭಿನಯಿಸಿರುವ ರಾಕಿಂಗ್ ಸ್ಟಾರ್ ಯಶ್ ಅವರ ಗಂಭೀರ, ರಾಜಸಿಕ ಹಾಗೂ ಶಕ್ತಿಶಾಲಿ ನೋಟ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಪ್ರಶಂಸೆಗೆ ಪಾತ್ರವಾಗಿದೆ. ಯಶ್ ಅವರ ಈ ರೌದ್ರಾವತಾರದ ಹಿಂದಿನ ಪ್ರಮುಖ ಆಕರ್ಷಣೆ ಅಂದರೆ ಅವರು ಧರಿಸಿರುವ ವಿಶಿಷ್ಟ ಹಾಗೂ ವೈಭವೋಪೇತ ಆಭರಣಗಳು.
ಸುಪ್ರಸಿದ್ಧ ಆಭರಣ ಸಂಸ್ಥೆ ‘ಹೌಸ್ ಆಫ್ ಆಮ್ರಪಾಲಿ’ಯ ಕ್ರಿಯೇಟಿವ್ ಹೆಡ್ ತರಂಗ್ ಅರೋರಾ ಅವರು ರಾವಣನ ಈ ಅದ್ದೂರಿ ಗೆಟಪ್ ನಿರ್ಮಾಣವಾದ ಬಗೆಯನ್ನು ಎಕ್ಸ್‌ಕ್ಲೂಸಿವ್ ಆಗಿ ಹಂಚಿಕೊಂಡಿದ್ದಾರೆ. ‘ರಾಮಾಯಣ’ ಚಿತ್ರದ ಬೆಳ್ಳಿ ಪರದೆಯ ರೂಪಾಂತರಕ್ಕಾಗಿ ಒಟ್ಟು 18 ತಿಂಗಳ ಸುದೀರ್ಘ ಅವಧಿಯಲ್ಲಿ 4,500ಕ್ಕೂ ಹೆಚ್ಚು ಆಭರಣಗಳನ್ನು ತಯಾರಿಸಲಾಗಿದ್ದು, ರಾವಣನ ಪಾತ್ರಕ್ಕಾಗಿಯೇ ಅತ್ಯಂತ ಸಂಕೀರ್ಣ ಮತ್ತು ವಿಶಿಷ್ಟ ವಿನ್ಯಾಸಗಳನ್ನು ರೂಪಿಸಲಾಗಿದೆ.
130 ಆಭರಣಗಳು ಮತ್ತು 13 ವಿಭಿನ್ನ ಲುಕ್
ಚಿತ್ರದಲ್ಲಿ ರಾವಣನ ಪಾತ್ರದ ವೈವಿಧ್ಯತೆಯನ್ನು ತೋರಿಸಲು ಯಶ್ ಅವರಿಗಾಗಿ ಒಟ್ಟು 13 ವಿಭಿನ್ನ ಲುಕ್‌ಗಳನ್ನು ವಿನ್ಯಾಸಗೊಳಿಸಲಾಗಿತ್ತು. ಪ್ರತಿಯೊಂದು ಲುಕ್‌ನಲ್ಲೂ 8 ರಿಂದ 10 ಅತ್ಯಂತ ಭಾರವಾದ ಆಭರಣಗಳಿದ್ದವು. ಅಂದರೆ ಒಟ್ಟಾರೆಯಾಗಿ ಯಶ್ ಅವರ ಪಾತ್ರವೊಂದಕ್ಕಾಗಿಯೇ 104 ರಿಂದ 130 ವಿಶೇಷ ಆಭರಣಗಳನ್ನು ಸಿದ್ಧಪಡಿಸಲಾಗಿತ್ತು. ವಿಶೇಷವೆಂದರೆ ಪ್ರತಿಯೊಂದು ಲುಕ್‌ನ ಆಭರಣಗಳ ಒಟ್ಟು ತೂಕ ಸುಮಾರು 6 ರಿಂದ 7 ಕೆಜಿ ಇತ್ತು.
ರಾವಣನ ಆಭರಣಗಳಲ್ಲಿದೆ ಶಿವನ ಭಕ್ತಿ ಮತ್ತು ರಾಕ್ಷಸನ ರೌದ್ರತೆ
ವನವಾಸದಲ್ಲಿದ್ದ ಶ್ರೀರಾಮ, ಸೀತೆ ಮತ್ತು ಲಕ್ಷ್ಮಣರ ಆಭರಣಗಳನ್ನು ಅತ್ಯಂತ ಸರಳವಾಗಿ ಅಂದರೆ ರುದ್ರಾಕ್ಷಿ ಹಾಗೂ ನೈಸರ್ಗಿಕ ಅಂಶಗಳಿಂದ ರೂಪಿಸಲಾಗಿದ್ದರೆ, ಸುವರ್ಣ ಲಂಕೆಯ ಅಧಿಪತಿ ರಾವಣನ ಆಭರಣಗಳನ್ನು ಅತ್ಯಂತ ವೈಭವೋಪೇತವಾಗಿ ಸಿದ್ಧಪಡಿಸಲಾಗಿತ್ತು. ಇದಕ್ಕಾಗಿ ಬ್ರಾಸ್ ಹಾಗೂ ಚಿನ್ನದ ಲೇಪಿತ (Gold-Plated) ಲೋಹಗಳನ್ನು ಬಳಸಲಾಗಿದೆ.
-
ವಿಶೇಷ ಕೆತ್ತನೆಗಳು: ರಾವಣ ಪರಮಶಿವನ ಮಹಾನ್ ಭಕ್ತನಾಗಿದ್ದರಿಂದ ಅವರ ಎದೆಕವಚ ಹಾಗೂ ಆಭರಣಗಳಲ್ಲಿ ತ್ರಿಶೂಲ ಮತ್ತು ಹಾವುಗಳ ಚಿಹ್ನೆಗಳನ್ನು ಅಳವಡಿಸಲಾಗಿದೆ. ಇದರ ಜೊತೆಗೆ ರಾವಣನ ರೌದ್ರತೆಯನ್ನು ಬಿಂಬಿಸಲು ರಾಕ್ಷಸನ ಮುಖ ಹಾಗೂ ಸಿಂಹದ ಕೆತ್ತನೆಗಳನ್ನು ಸೇರಿಸಲಾಗಿದೆ.
-
ಬಣ್ಣದ ಆಯ್ಕೆ: ರಾವಣನ ರಕ್ಷಸ ರಾಜನ ಲುಕ್‌ಗೆ ತಕ್ಕಂತೆ ನೀಲಿ, ಕಪ್ಪು, ಹಸಿರು ಹಾಗೂ ಗಾಢ ಲೋಹದ ಬಣ್ಣಗಳನ್ನು ಬಳಸಿ ಆಭರಣಗಳನ್ನು ತಯಾರಿಸಲಾಗಿತ್ತು.
-
ಬೃಹತ್ ಆಭರಣಗಳು: ರಾವಣನ ಪಾತ್ರಕ್ಕಾಗಿ ಬೃಹತ್ ಎದೆಕವಚ , ದಪ್ಪನೆಯ ಬಾಜುಬಂದ್ , ಹ್ಯಾಂಡ್‌ಕಫ್ ಹಾಗೂ ಭಾರವಾದ ಕಾಲ್ಕಡಗಗಳನ್ನು (Anklets) ವಿಶೇಷವಾಗಿ ವಿನ್ಯಾಸಗೊಳಿಸಲಾಗಿತ್ತು.
6 ಗಂಟೆ ತೊಟ್ಟರೂ ತೊಂದರೆಯಾಗದಂತೆ ವಿನ್ಯಾಸ
ರಾವಣನ ಪ್ರತಿಯೊಂದು ಆಭರಣವನ್ನು ತಯಾರಿಸುವುದು ವಿನ್ಯಾಸಕರಿಗೆ ಅತ್ಯಂತ ಸವಾಲಿನ ಕೆಲಸವಾಗಿತ್ತು. ಶೂಟಿಂಗ್ ವೇಳೆ ಯಶ್ ಅವರು ಈ ಆಭರಣಗಳನ್ನು 5 ರಿಂದ 6 ಗಂಟೆಗಳ ಕಾಲ ಧರಿಸಿ ನಟಿಸಬೇಕಿದ್ದರಿಂದ, ಯಾವುದೇ ಕಿರಿಕಿರಿ ಅಥವಾ ಗಾಯಗಳಾಗದಂತೆ ಲೋಹದ ಒಳಭಾಗದಲ್ಲಿ ಮೃದುವಾದ ಲೈನಿಂಗ್ ನೀಡಲಾಗಿತ್ತು. ಕುಶಲಕರ್ಮಿಗಳು ತಾವೇ ಈ ಆಭರಣಗಳನ್ನು ಧರಿಸಿ ಪರೀಕ್ಷಿಸಿದ ನಂತರವೇ ಶೂಟಿಂಗ್‌ಗೆ ಬಳಸಲಾಯಿತು. ರಾವಣನ ಪಾತ್ರಕ್ಕೆ ಯಶ್ ಅವರ ಸೌಂದರ್ಯ, ಗಾಂಭೀರ್ಯ ಮತ್ತು ನಟನೆ ಅತ್ಯಂತ ಅದ್ಭುತವಾಗಿ ಹೊಂದಿಕೆಯಾಗಿದೆ ಎಂದು ಆಮ್ರಪಾಲಿ ಸಂಸ್ಥೆ ಶ್ಲಾಘಿಸಿದೆ.
