ಚಿತ್ರಮಂದಿರಗಳಲ್ಲಿ ಸೂಪರ್‌ಸ್ಟಾರ್ ರಜನಿಕಾಂತ್ ಅವರ ಅಬ್ಬರವನ್ನು ಕಣ್ತುಂಬಿಕೊಂಡ ಅಭಿಮಾನಿಗಳಿಗೆ ಮತ್ತೊಂದು ಸರ್ಪ್ರೈಸ್ ಸಿಗುವ ಸಾಧ್ಯತೆಯಿದೆ. ಬಹುನಿರೀಕ್ಷಿತ ‘ಜೈಲರ್ 2’ ಸಿನಿಮಾ ಒಟಿಟಿಗೆ ಬಂದಾಗ ಚಿತ್ರಮಂದಿರಗಳಲ್ಲಿ ನೋಡಲು ಸಾಧ್ಯವಾಗದ ಹೆಚ್ಚುವರಿ ದೃಶ್ಯಗಳನ್ನು ವೀಕ್ಷಿಸುವ ಅವಕಾಶ ಸಿಗಬಹುದು ಎಂಬ ಸುದ್ದಿ ಇದೀಗ ಸಿನಿಪ್ರಿಯರಲ್ಲಿ ಕುತೂಹಲ ಮೂಡಿಸಿದೆ.
ಹೌದು, ಜೈಲರ್ 2 ಚಿತ್ರದ ಒಟಿಟಿ ಆವೃತ್ತಿಯಲ್ಲಿ ಬರೋಬ್ಬರಿ 30 ನಿಮಿಷಗಳ ಹೆಚ್ಚುವರಿ ದೃಶ್ಯಗಳನ್ನು ಸೇರಿಸುವ ಸಾಧ್ಯತೆಯಿದೆ ಎಂದು ವರದಿಗಳು ತಿಳಿಸಿವೆ. ಅದರಲ್ಲೂ ಮೋಹನ್‌ಲಾಲ್, ವಿಜಯ್ ಸೇತುಪತಿ ಸೇರಿದಂತೆ ಪ್ರಮುಖ ಕಲಾವಿದರು ನಟಿಸಿದ್ದ, ಚಿತ್ರಮಂದಿರದ ಆವೃತ್ತಿಯಲ್ಲಿ ಕಟ್ ಆಗಿದ್ದ ದೃಶ್ಯಗಳು ಮತ್ತೆ ತೆರೆಯ ಮೇಲೆ ಕಾಣಿಸಿಕೊಳ್ಳಬಹುದು ಎನ್ನಲಾಗಿದೆ.
ಚಿತ್ರಮಂದಿರದಲ್ಲಿ ಮಿಸ್ ಆದ ದೃಶ್ಯಗಳು OTTಯಲ್ಲಿ ನೋಡಲು ಸಿಗುತ್ತಾ?
ಸಾಮಾನ್ಯವಾಗಿ ಸಿನಿಮಾದ ಅವಧಿ ಮತ್ತು ಕಥೆಯ ವೇಗವನ್ನು ಗಮನದಲ್ಲಿಟ್ಟುಕೊಂಡು ನಿರ್ದೇಶಕರು ಎಡಿಟಿಂಗ್ ಸಂದರ್ಭದಲ್ಲಿ ಕೆಲವು ದೃಶ್ಯಗಳನ್ನು ತೆಗೆದುಹಾಕುತ್ತಾರೆ. ಜೈಲರ್ 2 ಸಿನಿಮಾದಲ್ಲಿಯೂ ಇದೇ ರೀತಿ ಕೆಲವು ದೃಶ್ಯಗಳನ್ನು ಕೈಬಿಡಲಾಗಿದೆ ಎನ್ನಲಾಗಿದೆ.
ಆದರೆ ಒಟಿಟಿಯಲ್ಲಿ ಬಿಡುಗಡೆಯಾಗುವಾಗ ಸುಮಾರು 30 ನಿಮಿಷಗಳ ಹೆಚ್ಚುವರಿ ದೃಶ್ಯಗಳನ್ನು ಸೇರಿಸಿ ವಿಸ್ತೃತ ಆವೃತ್ತಿಯನ್ನು ನೀಡುವ ಸಾಧ್ಯತೆಯಿದೆ. ಇದು ನಿಜವಾದರೆ, ಚಿತ್ರಮಂದಿರಗಳಲ್ಲಿ ಸಿನಿಮಾ ನೋಡಿದವರಿಗೂ ಒಟಿಟಿಯಲ್ಲಿ ಮತ್ತೊಮ್ಮೆ ಹೊಸ ಅನುಭವ ಸಿಗಲಿದೆ.
ಮೋಹನ್‌ಲಾಲ್, ವಿಜಯ್ ಸೇತುಪತಿ ದೃಶ್ಯಗಳಿಗಾಗಿ ಅಭಿಮಾನಿಗಳ ಕಾತರ!
ಜೈಲರ್ ಸರಣಿಯ ಸಿನಿಮಾಗಳಲ್ಲಿ ರಜನಿಕಾಂತ್ ಅವರ ಜೊತೆಗೆ ಕಾಣಿಸಿಕೊಳ್ಳುವ ಪ್ರಮುಖ ನಟರ ಪಾತ್ರಗಳೂ ಅಭಿಮಾನಿಗಳ ಗಮನ ಸೆಳೆಯುತ್ತವೆ. ಅದರಲ್ಲೂ ಮೋಹನ್‌ಲಾಲ್ ಮತ್ತು ವಿಜಯ್ ಸೇತುಪತಿ ಅವರ ದೃಶ್ಯಗಳನ್ನು ಮತ್ತೆ ನೋಡುವ ಅವಕಾಶ ಸಿಗಬಹುದು ಎಂಬ ಸುದ್ದಿ ಅಭಿಮಾನಿಗಳ ನಿರೀಕ್ಷೆಯನ್ನು ಹೆಚ್ಚಿಸಿದೆ.
ಚಿತ್ರಮಂದಿರಗಳಲ್ಲಿ ಕಾಣಿಸದಿದ್ದ ಕೆಲವು ಪ್ರಮುಖ ಕ್ಷಣಗಳು ಒಟಿಟಿಯಲ್ಲಿ ಸೇರ್ಪಡೆಯಾದರೆ, ಅಭಿಮಾನಿಗಳಿಗೆ ಅದು ನಿಜಕ್ಕೂ ವಿಶೇಷ ಉಡುಗೊರೆಯಾಗಲಿದೆ.
ಜೈಲರ್ 2 OTT ಬಿಡುಗಡೆ ಯಾವಾಗ?
ವರದಿಗಳ ಪ್ರಕಾರ, ನವೆಂಬರ್ 10ರ ನಂತರ ಜೈಲರ್ 2 ಸಿನಿಮಾ ಒಟಿಟಿಗೆ ಬರುವ ಸಾಧ್ಯತೆಯಿದೆ. ಅಮೆಜಾನ್ ಪ್ರೈಮ್ ವಿಡಿಯೋ ಮತ್ತು Sun NXT ವೇದಿಕೆಗಳ ಹೆಸರು ಕೂಡ ಕೇಳಿಬರುತ್ತಿದೆ.
ಆದರೆ ಚಿತ್ರದ ನಿಖರ ಒಟಿಟಿ ಬಿಡುಗಡೆ ದಿನಾಂಕ, ಪ್ರಸಾರ ವೇದಿಕೆ ಹಾಗೂ 30 ನಿಮಿಷಗಳ ಹೆಚ್ಚುವರಿ ದೃಶ್ಯಗಳ ಸೇರ್ಪಡೆ ಕುರಿತು ಚಿತ್ರತಂಡದಿಂದ ಅಧಿಕೃತ ಘೋಷಣೆ ಹೊರಬಿದ್ದಿಲ್ಲ.
ಜೈಲರ್ 2 ಚಿತ್ರದ ಕಥೆ ಏನು?
ಮೊದಲ ಭಾಗದಲ್ಲಿ ನಿವೃತ್ತ ಜೈಲರ್ ಆಗಿದ್ದರೂ ಅನ್ಯಾಯದ ವಿರುದ್ಧ ಸಿಡಿದೆದ್ದು ಹೋರಾಡಿದ್ದ ಟೈಗರ್ ಮುತ್ತುವೇಲ್ ಪಾಂಡಿಯನ್ ಪಾತ್ರದಲ್ಲಿ ರಜನಿಕಾಂತ್ ಅಭಿಮಾನಿಗಳ ಮನಗೆದ್ದಿದ್ದರು. ಇದೀಗ ‘ಜೈಲರ್ 2’ ಸಿನಿಮಾದಲ್ಲೂ ಅದೇ ಖಡಕ್ ಅವತಾರದಲ್ಲಿ ರಜನಿಕಾಂತ್ ಕಾಣಿಸಿಕೊಂಡಿದ್ದಾರೆ. ಈ ಬಾರಿ ಅವರ ಮುಂದೆ ಎದುರಾಗುವ ಸವಾಲುಗಳು ಇನ್ನಷ್ಟು ದೊಡ್ಡದಾಗಿವೆ.
ಮೊದಲ ಭಾಗದ ಘಟನೆಗಳು ಮುಗಿದ ಸುಮಾರು ಮೂರು ತಿಂಗಳ ನಂತರ ಎರಡನೇ ಭಾಗದ ಕಥೆ ಆರಂಭವಾಗುತ್ತದೆ. ವರ್ಮನ್ ಸಾವಿನ ಬಳಿಕ ಆತನನ್ನು ಕೊಂದವರು ಯಾರು ಎಂಬುದನ್ನು ಪತ್ತೆಹಚ್ಚಲು ಒಂದು ಗ್ಯಾಂಗ್ ಹುಡುಕಾಟ ಆರಂಭಿಸುತ್ತದೆ. ಇದೇ ಸಂದರ್ಭದಲ್ಲಿ ಮುತ್ತುವೇಲ್ ಪಾಂಡಿಯನ್ ಅಡಗಿಸಿಟ್ಟಿರುವ ಮೂರು ಕಂಟೇನರ್‌ಗಳಲ್ಲಿನ ಅಮೂಲ್ಯ ವಿಗ್ರಹಗಳ ಮೇಲೂ ದುಷ್ಟರ ಕಣ್ಣು ಬೀಳುತ್ತದೆ.
ಈ ವಿಗ್ರಹಗಳನ್ನು ತಮ್ಮ ವಶಕ್ಕೆ ಪಡೆಯಲು ಕೆಲವರು ನಡೆಸುವ ಸಂಚು ಮತ್ತು ಅದನ್ನು ತಡೆಯಲು ಮುತ್ತುವೇಲ್ ಪಾಂಡಿಯನ್ ನಡೆಸುವ ಹೋರಾಟವೇ ಕಥೆಗೆ ಪ್ರಮುಖ ತಿರುವು ನೀಡುತ್ತದೆ. ಇದರ ನಡುವೆ ಪ್ರಭಾವಿ ಕಲ್ಪಕ್ ಕುಟುಂಬದೊಂದಿಗೆ ದೊಡ್ಡ ಸಂಘರ್ಷವೂ ಎದುರಾಗುತ್ತದೆ.ಹೀಗೆ ಕುಟುಂಬ, ಅಧಿಕಾರ, ವಿಗ್ರಹಗಳ ಕಳ್ಳಸಾಗಣೆ ಮತ್ತು ಸೇಡಿನ ಸುತ್ತ ಕಥೆ ಸಾಗುತ್ತದೆ. ರಜನಿಕಾಂತ್ ಅವರ ಮಾಸ್ ಲುಕ್, ಆಕ್ಷನ್ ದೃಶ್ಯಗಳು ಮತ್ತು ಅನಿರೀಕ್ಷಿತ ತಿರುವುಗಳು ಸಿನಿಮಾದ ಪ್ರಮುಖ ಆಕರ್ಷಣೆಗಳಾಗಿವೆ.
