ದೀಪಾವಳಿ ಹಬ್ಬ ಬಂತೆಂದರೆ ಸಾಕು, ಮನೆಗಳಲ್ಲಿ ಸಂಭ್ರಮವೋ ಸಂಭ್ರಮ! ಹೊಸ ಬಟ್ಟೆ, ಸಿಹಿತಿಂಡಿ, ಪಟಾಕಿಗಳ ಖರೀದಿಯ ನಡುವೆ ಚಿನ್ನದ ಮೇಲೂ ಜನರ ಆಸಕ್ತಿ ಹೆಚ್ಚಾಗುತ್ತದೆ. ಕೆಲವರು ತಮ್ಮ ಸಂತೋಷಕ್ಕಾಗಿ ಚಿನ್ನದ ಆಭರಣ ಖರೀದಿಸಿದರೆ, ಇನ್ನು ಕೆಲವರು ಪ್ರೀತಿಪಾತ್ರರಿಗೆ ಚಿನ್ನದ ನಾಣ್ಯ ಅಥವಾ ಆಭರಣಗಳನ್ನು ಉಡುಗೊರೆಯಾಗಿ ನೀಡುತ್ತಾರೆ. ಆದರೆ ಹೀಗೆ ಚಿನ್ನ ಖರೀದಿಸುವಾಗ ಅಥವಾ ಉಡುಗೊರೆಯಾಗಿ ಪಡೆಯುವಾಗ ಒಂದು ಸಣ್ಣ ತಪ್ಪು ಮಾಡಿದರೂ ತೆರಿಗೆ ವಿಚಾರದಲ್ಲಿ ಸಮಸ್ಯೆ ಎದುರಾಗಬಹುದು ಎಂಬುದು ನಿಮಗೆ ಗೊತ್ತೇ?
ಹೌದು, ಚಿನ್ನದ ಉಡುಗೊರೆಗೆ ಸಂಬಂಧಿಸಿದಂತೆ ಆದಾಯ ತೆರಿಗೆ ಇಲಾಖೆಯ ಕೆಲವು ನಿಯಮಗಳಿವೆ. ಅದರಲ್ಲೂ ಸಂಬಂಧಿಕರಿಂದ ಪಡೆದ ಚಿನ್ನಕ್ಕೂ, ಸ್ನೇಹಿತರು ಅಥವಾ ಇತರರಿಂದ ಪಡೆದ ಚಿನ್ನಕ್ಕೂ ತೆರಿಗೆ ನಿಯಮಗಳು ಒಂದೇ ಆಗಿರುವುದಿಲ್ಲ. ಹಾಗಾದರೆ ದೀಪಾವಳಿಗೆ ಎಷ್ಟು ಮೌಲ್ಯದ ಚಿನ್ನವನ್ನು ತೆರಿಗೆ ಭಯವಿಲ್ಲದೆ ಉಡುಗೊರೆಯಾಗಿ ಪಡೆಯಬಹುದು? ₹50,000 ಮಿತಿ ದಾಟಿದರೆ ಏನಾಗುತ್ತದೆ? ಇಲ್ಲಿದೆ ಸಂಪೂರ್ಣ ಮಾಹಿತಿ.
ಸಂಬಂಧಿಕರು ಚಿನ್ನ ಉಡುಗೊರೆಯಾಗಿ ಕೊಟ್ಟರೆ ತೆರಿಗೆ ಕಟ್ಟಬೇಕಾ?
ನಿಮ್ಮ ತಂದೆ-ತಾಯಿ, ಪತಿ ಅಥವಾ ಪತ್ನಿ, ಸಹೋದರರು, ಸಹೋದರಿಯರು ಅಥವಾ ಅಜ್ಜ-ಅಜ್ಜಿಯರು ದೀಪಾವಳಿಗೆ ನಿಮಗೆ ಚಿನ್ನದ ಆಭರಣ ಅಥವಾ ನಾಣ್ಯವನ್ನು ಉಡುಗೊರೆಯಾಗಿ ನೀಡಿದರೆ ಚಿಂತಿಸುವ ಅಗತ್ಯವಿಲ್ಲ.
ಆದಾಯ ತೆರಿಗೆ ಕಾಯ್ದೆ 2025ರ ಸೆಕ್ಷನ್ 92ರ ಪ್ರಕಾರ, ಕಾನೂನಿನಲ್ಲಿ ನಿರ್ದಿಷ್ಟಪಡಿಸಿರುವ ಸಂಬಂಧಿಕರಿಂದ ಉಡುಗೊರೆಯಾಗಿ ಪಡೆದ ಚಿನ್ನಕ್ಕೆ ಅದರ ಮೌಲ್ಯ ಎಷ್ಟೇ ಇದ್ದರೂ ಆದಾಯ ತೆರಿಗೆಯಿಂದ ವಿನಾಯಿತಿ ಇರುತ್ತದೆ. ಅಂದರೆ ₹50 ಸಾವಿರವಾಗಲಿ, ₹5 ಲಕ್ಷವಾಗಲಿ ಅಥವಾ ಅದಕ್ಕಿಂತ ಹೆಚ್ಚಿನ ಮೌಲ್ಯದ ಚಿನ್ನವಾಗಲಿ, ಅರ್ಹ ಸಂಬಂಧಿಕರಿಂದ ಉಡುಗೊರೆಯಾಗಿ ಪಡೆದಿದ್ದರೆ ಅದರ ಮೇಲೆ ಆದಾಯ ತೆರಿಗೆ ಪಾವತಿಸುವ ಅಗತ್ಯವಿಲ್ಲ.
ಇದಲ್ಲದೆ, ಕಾನೂನಿನ ನಿಯಮಗಳಿಗೆ ಒಳಪಟ್ಟು ಜೀವನ ಸಂಗಾತಿಯ ಕಡೆಯ ಕೆಲವು ಸಂಬಂಧಿಕರು ಹಾಗೂ ಹಿಂದೂ ಅವಿಭಕ್ತ ಕುಟುಂಬದ (HUF) ಸದಸ್ಯರು ಕೂಡ ಈ ವಿನಾಯಿತಿ ವ್ಯಾಪ್ತಿಗೆ ಬರುತ್ತಾರೆ.
ಸ್ನೇಹಿತರು ಚಿನ್ನದ ಉಡುಗೊರೆ ನೀಡಿದರೆ ₹50 ಸಾವಿರ ರೂಲ್ಸ್!
ಇಲ್ಲಿ ನೀವು ಮುಖ್ಯವಾಗಿ ಗಮನಿಸಬೇಕಾದ ಅಂಶವಿದೆ. ಸಂಬಂಧಿಕರಲ್ಲದ ಸ್ನೇಹಿತರು, ಸಹೋದ್ಯೋಗಿಗಳು ಅಥವಾ ಇತರ ವ್ಯಕ್ತಿಗಳು ನಿಮಗೆ ಚಿನ್ನವನ್ನು ಉಡುಗೊರೆಯಾಗಿ ನೀಡಿದರೆ ತೆರಿಗೆ ನಿಯಮಗಳು ಬದಲಾಗುತ್ತವೆ.
ಒಂದು ಹಣಕಾಸು ವರ್ಷದಲ್ಲಿ ಇಂತಹ ವ್ಯಕ್ತಿಗಳಿಂದ ಪಡೆದ ಎಲ್ಲಾ ಉಡುಗೊರೆಗಳ ಒಟ್ಟು ಮೌಲ್ಯ ₹50,000 ಮೀರದಿದ್ದರೆ ತೆರಿಗೆ ವಿನಾಯಿತಿ ಸಿಗುತ್ತದೆ. ಆದರೆ ಒಟ್ಟು ಮೌಲ್ಯ ₹50,000 ದಾಟಿದರೆ, ಕೇವಲ ಹೆಚ್ಚುವರಿ ಮೊತ್ತಕ್ಕೆ ಮಾತ್ರವಲ್ಲದೆ ಸಾಮಾನ್ಯವಾಗಿ ಸಂಪೂರ್ಣ ಉಡುಗೊರೆಯ ಮೌಲ್ಯವೇ ತೆರಿಗೆಗೆ ಒಳಪಡುವ ಆದಾಯವಾಗುತ್ತದೆ.
ಉದಾಹರಣೆಗೆ, ದೀಪಾವಳಿಗೆ ನಿಮ್ಮ ಮೂವರು ಸ್ನೇಹಿತರು ತಲಾ ₹20,000 ಮೌಲ್ಯದ ಚಿನ್ನವನ್ನು ಉಡುಗೊರೆಯಾಗಿ ನೀಡಿದರೆ, ಒಟ್ಟು ಮೌಲ್ಯ ₹60,000 ಆಗುತ್ತದೆ. ಇದು ₹50,000 ಮಿತಿಯನ್ನು ಮೀರಿರುವುದರಿಂದ ತೆರಿಗೆ ಅನ್ವಯವಾಗಬಹುದು. ಇಲ್ಲಿ ಪ್ರತಿ ವ್ಯಕ್ತಿಯಿಂದ ಪಡೆದ ಮೊತ್ತವನ್ನು ಪ್ರತ್ಯೇಕವಾಗಿ ಲೆಕ್ಕ ಹಾಕುವುದಿಲ್ಲ. ಎಲ್ಲ ಉಡುಗೊರೆಗಳ ಒಟ್ಟು ಮೌಲ್ಯವನ್ನು ಪರಿಗಣಿಸಲಾಗುತ್ತದೆ.
ಚಿನ್ನ ಖರೀದಿಸುವ ಮುನ್ನ ಈ ವಿಚಾರ ನೆನಪಿಡಿ!
ಹೀಗಾಗಿ ಈ ದೀಪಾವಳಿಗೆ ಚಿನ್ನ ಖರೀದಿಸುವ ಅಥವಾ ಉಡುಗೊರೆಯಾಗಿ ಪಡೆಯುವ ಯೋಜನೆಯಲ್ಲಿದ್ದರೆ ತೆರಿಗೆ ನಿಯಮಗಳ ಬಗ್ಗೆ ತಿಳಿದುಕೊಳ್ಳಿ. ಮುಖ್ಯವಾಗಿ ಸಂಬಂಧಿಕರಿಂದ ಪಡೆದ ಚಿನ್ನ ಮತ್ತು ಸಂಬಂಧಿಕರಲ್ಲದವರಿಂದ ಪಡೆದ ಚಿನ್ನದ ನಡುವಿನ ವ್ಯತ್ಯಾಸವನ್ನು ಅರ್ಥಮಾಡಿಕೊಳ್ಳಿ. ಉಡುಗೊರೆಯ ಮೂಲ ಹಾಗೂ ಖರೀದಿಗೆ ಬಳಸಿದ ಹಣದ ಮೂಲಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಸುರಕ್ಷಿತವಾಗಿ ಇಟ್ಟುಕೊಳ್ಳುವುದೂ ಉತ್ತಮ.
ಡಿಸ್ಕ್ಲೈಮರ್: ಈ ಲೇಖನವು ಸಾಮಾನ್ಯ ಮಾಹಿತಿ ಉದ್ದೇಶಕ್ಕಾಗಿ ಮಾತ್ರ. ವೈಯಕ್ತಿಕ ತೆರಿಗೆ ಹೊಣೆಗಾರಿಕೆ ನಿಮ್ಮ ಪರಿಸ್ಥಿತಿ ಮತ್ತು ಅನ್ವಯವಾಗುವ ಕಾನೂನು ನಿಯಮಗಳನ್ನು ಅವಲಂಬಿಸಿರುತ್ತದೆ. ತೆರಿಗೆ ಸಲಹೆಗಾಗಿ ತಜ್ಞರನ್ನು ಸಂಪರ್ಕಿಸಿ.
