ಹಿಂದಿ ಕಿರುತೆರೆಯ ಜನಪ್ರಿಯ ನಟ ಅನುಜ್ ಠಾಕೂರ್ (33) ಅವರು ನವೆಂಬರ್ ಅಂಚಿನಲ್ಲಿ ಅಂದರೆ ಅಕ್ಟೋಬರ್ 27 ರಂದು ನಿಧನರಾಗಿದ್ದಾರೆ. ನಿದ್ದೆಯಲ್ಲಿದ್ದಾಗ ಇದ್ದಕ್ಕಿದ್ದಂತೆ ಫಿಟ್ಸ್ (ಸೀಝರ್) ಬಂದ ಪರಿಣಾಮ ಅವರು ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದೆ. ಅನುಜ್ ಅವರ ಆಪ್ತ ಸ್ನೇಹಿತ ಹಾಗೂ ಕ್ಯಾಸ್ಟಿಂಗ್ ಡೈರೆಕ್ಟರ್ ರೂಪೇಶ್ ಸೋನಾರ್ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಭಾವುಕ ಪೋಸ್ಟ್ ಹಂಚಿಕೊಳ್ಳುವ ಮೂಲಕ ಈ ದುಃಖದ ಸುದ್ದಿಯನ್ನು ಖಚಿತಪಡಿಸಿದ್ದಾರೆ.
‘ಧೂಮ್ ಮಚಾವೋ ಧೂಮ್’, ‘ಬಂಧನ್ ಸಾಥ್ ಜನ್ಮೋ ಕಾ’, ‘ಬೀಂಧ್ ಬನೂಂಗಾ ಘೋಡಿ ಚಡುಂಗಾ’ ಹಾಗೂ ‘ಮಹಿಸಾಗರ್’ ನಂತಹ ಸಾಲು ಸಾಲು ಹಿಟ್ ಧಾರಾವಾಹಿಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದ ಅನುಜ್, ಶೀಘ್ರದಲ್ಲೇ ಮತ್ತೆ ಕಿರುತೆರೆಗೆ ಕಂಬ್ಯಾಕ್ ಮಾಡಲು ಸಿದ್ಧತೆ ನಡೆಸುತ್ತಿದ್ದರು. ಪ್ರತಿದಿನ ಬೆಳಿಗ್ಗೆ 4:30ಕ್ಕೆ ಎದ್ದು ಜಾಗಿಂಗ್ ಹಾಗೂ ಫಿಟ್‌ನೆಸ್ ಅಭ್ಯಾಸ ಮಾಡುತ್ತಿದ್ದ ಅನುಜ್, ಅಂದು ಬೆಳಿಗ್ಗೆ ಅಲಾರಾಂ ಬಾರಿಸಿದರೂ ಏಳಲಿಲ್ಲ. ಅನುಮಾನಗೊಂಡು ತಾಯಿ ಕೊಠಡಿಗೆ ಹೋಗಿ ನೋಡಿದಾಗ ಅವರು ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದು, ನಿದ್ದೆಯಲ್ಲೇ ಪ್ರಾಣ ಪಕ್ಷಿ ಹಾರಿಹೋಗಿತ್ತು.
ನಟನ ಅಕಾಲಿಕ ಮರಣಕ್ಕೆ ಕಿರುತೆರೆ ರಂಗದ ಹಲವು ಕಲಾವಿದರು ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ. 17 ವರ್ಷಗಳ ಒಡನಾಟ ಹೊಂದಿದ್ದ ರೂಪೇಶ್ ಸೋನಾರ್, “ಅನುಜ್ ನನಗೆ ತಮ್ಮನಂತಿದ್ದ. ಕೆಲವೇ ದಿನಗಳ ಹಿಂದಷ್ಟೇ ಸಿಕ್ಕಿ ಹೊಸ ಪ್ರಾಜೆಕ್ಟ್‌ಗಳ ಬಗ್ಗೆ ಮಾತನಾಡಿದ್ದ. ಅವನು ಇಷ್ಟು ಬೇಗ ನಮ್ಮನ್ನು ಅಗಲುತ್ತಾನೆ ಎಂದು ಊಹಿಸಲೂ ಸಾಧ್ಯವಿಲ್ಲ” ಎಂದು ಕಂಬನಿ ಮಿಡಿದಿದ್ದಾರೆ. ನಟ ವಖಾರ್ ಶೇಖ್ ಹಾಗೂ ಬಿಗ್ ಬಾಸ್ ಖ್ಯಾತಿಯ ಯಾಮಿನಿ ಮಲ್ಹೋತ್ರಾ ಸೇರಿದಂತೆ ಹಲವು ನಟ-ನಟಿಯರು ಅನುಜ್ ಸಾವಿಗೆ ಸಂತಾಪ ಸೂಚಿಸಿದ್ದಾರೆ.
