ನವದೆಹಲಿ: ಬ್ಯಾಂಕ್ ಖಾತೆಯಲ್ಲಿ ಹಣ ಇಟ್ಟುಕೊಂಡರೆ ಸಾಕು, ಅಗತ್ಯವಿದ್ದಾಗ ಹಣ ಹಿಂಪಡೆಯಬಹುದು, ಜಮೆ ಮಾಡಬಹುದು, ವಹಿವಾಟು ನಡೆಸಬಹುದು ಎಂಬುದು ಸಾಮಾನ್ಯ ಗ್ರಾಹಕರ ನಿರೀಕ್ಷೆ. ಆದರೆ ಬ್ಯಾಂಕ್ ವಿಧಿಸುವ ವಿವಿಧ ಸೇವಾ ಶುಲ್ಕಗಳು ಕೆಲವೊಮ್ಮೆ ಗ್ರಾಹಕರ ಜೇಬಿಗೆ ಹೊರೆಯಾಗುತ್ತವೆ. ಇದೀಗ ಆಕ್ಸಿಸ್ ಬ್ಯಾಂಕ್ ಗ್ರಾಹಕರಿಗೂ ಇಂತಹದ್ದೇ ಆತಂಕ ಎದುರಾಗಿದೆ.
ಆಕ್ಸಿಸ್ ಬ್ಯಾಂಕ್ ತನ್ನ ಆಯ್ದ ಉಳಿತಾಯ ಖಾತೆಗಳ ಸೇವಾ ಶುಲ್ಕಗಳಲ್ಲಿ ಬದಲಾವಣೆ ಮಾಡಿದ್ದು, 2026ರ ಡಿಸೆಂಬರ್ 1ರಿಂದ ಹೊಸ ನಿಯಮಗಳು ಜಾರಿಗೆ ಬರಲಿವೆ. ವಿಶೇಷವಾಗಿ ಪದೇಪದೇ ನಗದು ವಹಿವಾಟು ನಡೆಸುವವರು ಹಾಗೂ ಖಾತೆಯಲ್ಲಿ ಕನಿಷ್ಠ ಬ್ಯಾಲೆನ್ಸ್ ಕಾಯ್ದುಕೊಳ್ಳಲು ಸಾಧ್ಯವಾಗದವರಿಗೆ ಈ ಬದಲಾವಣೆ ಪರಿಣಾಮ ಬೀರಬಹುದು.
ಹಾಗಾದರೆ ಇನ್ಮುಂದೆ ಬ್ಯಾಂಕ್ ಖಾತೆಯಿಂದ ಹಣ ತೆಗೆಯುವಾಗ ಅಥವಾ ಜಮೆ ಮಾಡುವಾಗ ಯಾವ ನಿಯಮಗಳು ಅನ್ವಯಿಸುತ್ತವೆ? ಕನಿಷ್ಠ ಬ್ಯಾಲೆನ್ಸ್ ಇಲ್ಲದಿದ್ದರೆ ಎಷ್ಟು ದಂಡ ಬೀಳಬಹುದು? ನಿಮ್ಮ ಖಾತೆಗೆ ಈ ನಿಯಮಗಳು ಅನ್ವಯಿಸುತ್ತವೆಯೇ? ಎಂಬುದನ್ನು ತಿಳಿದುಕೊಳ್ಳುವುದು ಮುಖ್ಯ.
ತಿಂಗಳಿಗೆ ನಾಲ್ಕು ಉಚಿತ ವಹಿವಾಟು ಇನ್ಮುಂದೆ ಮೂರಕ್ಕೆ ಇಳಿಕೆ!
ಸಾಮಾನ್ಯವಾಗಿ ಗ್ರಾಹಕರು ತಮ್ಮ ಅಗತ್ಯಕ್ಕೆ ಅನುಗುಣವಾಗಿ ಬ್ಯಾಂಕ್‌ಗೆ ತೆರಳಿ ಹಣ ಜಮೆ ಮಾಡುತ್ತಾರೆ ಅಥವಾ ಹಿಂಪಡೆಯುತ್ತಾರೆ. ಆದರೆ ಆಕ್ಸಿಸ್ ಬ್ಯಾಂಕ್‌ನ ಆಯ್ದ EASY ACCESS, KRISHI ಮತ್ತು SAHAJ ಸೇರಿದಂತೆ ಕೆಲವು ಉಳಿತಾಯ ಖಾತೆಗಳಿಗೆ ನೀಡಲಾಗುತ್ತಿದ್ದ ಉಚಿತ ನಗದು ವಹಿವಾಟುಗಳ ಸಂಖ್ಯೆಯನ್ನು ಕಡಿತಗೊಳಿಸಲಾಗಿದೆ.
ಈ ಹಿಂದೆ ತಿಂಗಳಿಗೆ ಗರಿಷ್ಠ ನಾಲ್ಕು ಉಚಿತ ನಗದು ವಹಿವಾಟುಗಳಿಗೆ ಅವಕಾಶವಿತ್ತು. ಡಿಸೆಂಬರ್ 1ರಿಂದ ಈ ಮಿತಿಯನ್ನು ಮೂರಕ್ಕೆ ಇಳಿಸಲಾಗುತ್ತಿದೆ.
ಆದರೆ ಗ್ರಾಹಕರಿಗೆ ₹1 ಲಕ್ಷದವರೆಗಿನ ನಗದು ವಹಿವಾಟಿನ ಮಿತಿಯಲ್ಲಿ ಯಾವುದೇ ಬದಲಾವಣೆ ಇಲ್ಲ. ವಹಿವಾಟುಗಳ ಸಂಖ್ಯೆ ಅಥವಾ ಒಟ್ಟು ಮೊತ್ತದ ಮಿತಿಯಲ್ಲಿ ಯಾವುದು ಮೊದಲು ಪೂರ್ಣಗೊಳ್ಳುತ್ತದೆಯೋ, ಆ ಬಳಿಕ ಹೆಚ್ಚುವರಿ ಶುಲ್ಕ ಅನ್ವಯಿಸಬಹುದು.
ಖಾತೆಯಲ್ಲಿ ಕನಿಷ್ಠ ಹಣ ಇಲ್ಲದಿದ್ದರೆ ₹600 ದಂಡ!
ಬ್ಯಾಂಕ್ ಖಾತೆಯಲ್ಲಿ ನಿರ್ದಿಷ್ಟ ಮೊತ್ತದ ಹಣವನ್ನು ನಿರ್ವಹಿಸುವುದು ಹಲವರಿಗೆ ಸವಾಲಿನ ಸಂಗತಿ. ತಿಂಗಳ ಕೊನೆಯಲ್ಲಿ ಖರ್ಚು ಹೆಚ್ಚಾದಾಗ ಖಾತೆಯಲ್ಲಿನ ಬ್ಯಾಲೆನ್ಸ್ ಕಡಿಮೆಯಾಗುವುದು ಸಾಮಾನ್ಯ. ಆದರೆ ಇಂತಹ ಸಂದರ್ಭದಲ್ಲಿ ಬ್ಯಾಂಕ್ ವಿಧಿಸುವ ದಂಡದ ಬಗ್ಗೆ ಗ್ರಾಹಕರು ಎಚ್ಚರಿಕೆ ವಹಿಸಬೇಕು.
ಆಕ್ಸಿಸ್ ಬ್ಯಾಂಕ್‌ನ ಪರಿಷ್ಕೃತ ನಿಯಮದ ಪ್ರಕಾರ, ಕೆಲವು ದೇಶೀಯ ಉಳಿತಾಯ ಖಾತೆಗಳಲ್ಲಿ ಕನಿಷ್ಠ ಬ್ಯಾಲೆನ್ಸ್ ನಿರ್ವಹಿಸದಿದ್ದರೆ ಗರಿಷ್ಠ ದಂಡದ ಮೊತ್ತ ಹೆಚ್ಚಾಗಲಿದೆ.
-
ಮೆಟ್ರೋ ಮತ್ತು ನಗರ ಪ್ರದೇಶ: ₹600
-
ಅರೆನಗರ ಪ್ರದೇಶ: ₹600
-
ಗ್ರಾಮೀಣ ಪ್ರದೇಶ: ₹600
ಈ ಹಿಂದೆ ಅರೆನಗರ ಪ್ರದೇಶಗಳಿಗೆ ₹300 ಮತ್ತು ಗ್ರಾಮೀಣ ಪ್ರದೇಶಗಳಿಗೆ ₹150 ಗರಿಷ್ಠ ದಂಡದ ಮಿತಿ ಇತ್ತು. ಇದೀಗ ಎರಡೂ ವಿಭಾಗಗಳಿಗೆ ಗರಿಷ್ಠ ದಂಡವನ್ನು ₹600ಕ್ಕೆ ಹೆಚ್ಚಿಸಲಾಗಿದೆ.
NRI ಖಾತೆದಾರರೂ ಎಚ್ಚರ!
ವಿದೇಶಗಳಲ್ಲಿ ವಾಸಿಸುವ ಭಾರತೀಯರು ಹೊಂದಿರುವ ಆಯ್ದ NRI EASY ACCESS ಖಾತೆಗಳಿಗೂ ಹೊಸ ಶುಲ್ಕ ನಿಯಮಗಳು ಅನ್ವಯಿಸಲಿವೆ. ಅರೆನಗರ ಮತ್ತು ಗ್ರಾಮೀಣ ಪ್ರದೇಶಗಳ ಶಾಖೆಗಳಿಗೆ ಸಂಬಂಧಿಸಿದ ಗರಿಷ್ಠ ದಂಡವನ್ನು ₹300ರಿಂದ ₹600ಕ್ಕೆ ಹೆಚ್ಚಿಸಲಾಗಿದೆ. ಮೆಟ್ರೋ ಮತ್ತು ನಗರ ಪ್ರದೇಶಗಳ ₹600ರ ಮಿತಿಯಲ್ಲಿ ಬದಲಾವಣೆ ಇಲ್ಲ.
ಸಂಬಳ ಖಾತೆ ಹೊಂದಿರುವವರಿಗೆ ಸಮಾಧಾನ
ಆಕ್ಸಿಸ್ ಬ್ಯಾಂಕ್‌ನಲ್ಲಿ ಸಂಬಳ ಖಾತೆ ಹೊಂದಿರುವ ಗ್ರಾಹಕರಿಗೆ ಕನಿಷ್ಠ ಬ್ಯಾಲೆನ್ಸ್ ನಿರ್ವಹಿಸದಿರುವುದಕ್ಕೆ ಸಂಬಂಧಿಸಿದ ಶುಲ್ಕದಿಂದ ವಿನಾಯಿತಿ ಪಡೆಯುವ ಅವಕಾಶವಿದೆ. ಹೀಗಾಗಿ ಪ್ರತಿಯೊಬ್ಬ ಗ್ರಾಹಕರಿಗೂ ಒಂದೇ ರೀತಿಯ ನಿಯಮ ಅನ್ವಯಿಸುವುದಿಲ್ಲ.
ಗ್ರಾಹಕರು ಈಗ ಏನು ಮಾಡಬೇಕು?
ಡಿಸೆಂಬರ್ 1ರಿಂದ ಹೊಸ ಶುಲ್ಕಗಳು ಜಾರಿಗೆ ಬರುವುದರಿಂದ ಆಕ್ಸಿಸ್ ಬ್ಯಾಂಕ್ ಗ್ರಾಹಕರು ತಮ್ಮ ಖಾತೆಯ ಪ್ರಕಾರ ಅನ್ವಯಿಸುವ ನಿಯಮಗಳನ್ನು ಪರಿಶೀಲಿಸಿಕೊಳ್ಳುವುದು ಉತ್ತಮ. ಅನಗತ್ಯ ನಗದು ವಹಿವಾಟುಗಳನ್ನು ಕಡಿಮೆ ಮಾಡುವುದು, ಕನಿಷ್ಠ ಬ್ಯಾಲೆನ್ಸ್ ಕಾಯ್ದುಕೊಳ್ಳುವುದು ಹಾಗೂ ಬ್ಯಾಂಕ್‌ನ ಪರಿಷ್ಕೃತ ಶುಲ್ಕಗಳ ಪಟ್ಟಿಯನ್ನು ಗಮನಿಸುವುದು ಹೆಚ್ಚುವರಿ ಖರ್ಚು ತಪ್ಪಿಸಲು ನೆರವಾಗಬಹುದು.
