ಮುಂಬೈ-ರ್ಯಾಂಪ್ ಮೇಲೆ ಮೈಮನ ಸೆಳೆಯುವ ಬಣ್ಣಬಣ್ಣದ ಉಡುಪುಗಳು, ತಲೆಮಾಡಿಸುವ ಮೇಕಪ್, ಕಣ್ಣು ಕೋರೈಸುವ ಬೆಳಕಿನ ಪ್ರಭೆ ಹಾಗೂ ಮಾಡೆಲ್‌ಗಳ ಗಂಭೀರ ನಡಿಗೆ – ಇದು ಸಾರ್ವಜನಿಕವಾಗಿ ನಮಗೆ ಕಾಣಿಸುವ ಗ್ಲಾಮರ್ ಪ್ರಪಂಚದ ಒಂದು ಮುಖ. ಆದರೆ, ಆ ಹೊಳಪಿನ ಹಿಂದಿರುವ ಸಾಮಾನ್ಯ ಬದುಕು ಮತ್ತು ಸಾಗಿಬಂದ ಕಠಿಣ ಹಾದಿ ಹೇಗಿರುತ್ತದೆ? ಈ ಪ್ರಶ್ನೆಗೆ ಪ್ರಸ್ತುತ ಇನ್‌ಸ್ಟಾಗ್ರಾಮ್‌ನಲ್ಲಿ ವೈರಲ್ ಆಗುತ್ತಿರುವ ‘ಹೋಮ್‌ಟೌನ್ vs ರನ್‌ವೇ’ (Hometown vs Runway) ಎಂಬ ಹೊಸ ಟ್ರೆಂಡ್ ಸ್ಪಷ್ಟ ಉತ್ತರ ನೀಡುತ್ತಿದೆ.
ಕಳೆದ ಕೆಲವು ವಾರಗಳಿಂದ ಭಾರತೀಯ ಫ್ಯಾಷನ್ ಮಾಡೆಲ್‌ಗಳು ತಮ್ಮ ದೈನಂದಿನ ಸರಳ ಜೀವನ ಮತ್ತು ರನ್‌ವೇಯ ಗ್ಲಾಮರಸ್ ಜಗತ್ತಿನ ನಡುವಿನ ವ್ಯತ್ಯಾಸವನ್ನು ಅನಾವರಣಗೊಳಿಸುವ ವೀಡಿಯೊಗಳನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳುತ್ತಿದ್ದು, ಜಾಲತಾಣಗಳಲ್ಲಿ ಭಾರಿ ಮೆಚ್ಚುಗೆಗೆ ಪಾತ್ರವಾಗುತ್ತಿದ್ದಾರೆ.
ಸ್ವಾಮಿ ಪರದೇಶ’ ಧ್ವನಿಯಲ್ಲಿ ಬದುಕಿನ ಯಶೋಗಾಥೆ
‘ಸ್ವಾಮಿ ಪರದೇಶ’ ಧ್ವನಿಯಲ್ಲಿ ಬದುಕಿನ ಯಶೋಗಾಥೆ
ಈ ಟ್ರೆಂಡ್‌ನ ಬಹುತೇಕ ವೀಡಿಯೊಗಳು “ಸ್ವಾಮಿ ಪರದೇಶ” ಎಂಬ ಜನಪ್ರಿಯ ಹಿನ್ನೆಲೆ ಸಂಗೀತದೊಂದಿಗೆ ಪ್ರಾರಂಭವಾಗುತ್ತವೆ. ವೀಡಿಯೊದ ಮೊದಲ ಭಾಗದಲ್ಲಿ “ನಾನು ನನ್ನ ಊರಿನಲ್ಲಿ…” (Me in my hometown) ಎಂಬ ಶೀರ್ಷಿಕೆಯೊಂದಿಗೆ ಮಾಡೆಲ್‌ಗಳು ಯಾವುದೇ ಮೇಕಪ್ ಇಲ್ಲದೆ, ತೀರಾ ಸಾಧಾರಣ ಉಡುಪಿನಲ್ಲಿ ಕಾಣಿಸಿಕೊಳ್ಳುತ್ತಾರೆ.
ಹಳ್ಳಿಗಳಲ್ಲಿ ಅಥವಾ ಸಣ್ಣ ಪಟ್ಟಣಗಳಲ್ಲಿ ತಮ್ಮ ಮನೆಕೆಲಸಗಳನ್ನು ಮಾಡುವುದು, ಚಪಾತಿ ಲಟ್ಟಿಸುವುದು, ನೀರಿನ ಬಕೆಟ್ ಹೊರುವುದು, ಕೃಷಿ ಭೂಮಿಯಲ್ಲಿ ಬೆಳೆ ಕೊಯ್ಯುವುದು, ಕಟ್ಟಿಗೆ ಕಡಿಯುವುದು ಅಥವಾ ಅಡುಗೆಮನೆಯಲ್ಲಿ ಸಹಾಯ ಮಾಡುವುದನ್ನು ಈ ವೀಡಿಯೊಗಳಲ್ಲಿ ಸೆರೆಹಿಡಿಯಲಾಗಿದೆ.
ವೀಡಿಯೊದ ದ್ವಿತೀಯಾರ್ಧದಲ್ಲಿ ಸಂಗೀತದ ಲಯ ಬದಲಾಗುತ್ತಿದ್ದಂತೆ, ಅವರ ವೇಷಭೂಷಣ ಮತ್ತು ಪರಿಸರ ಸಂಪೂರ್ಣ ಬದಲಾಗುತ್ತದೆ. ಸಣ್ಣ ಹಳ್ಳಿಗಳ ಮೂಲೆಯಿಂದ ಬಂದ ಈ ಯುವಕ-ಯುವತಿಯರು ಅಂತರರಾಷ್ಟ್ರೀಯ ಬ್ರ್ಯಾಂಡ್‌ಗಳಾದ ವರ್ಸೇಸ್ (Versace) ಅಥವಾ ಪ್ರತಿಷ್ಠಿತ ಲಕ್ಮೆ ಫ್ಯಾಷನ್ ವೀಕ್ (Lakme Fashion Week) ನಂತಹ ಬೃಹತ್ ವೇದಿಕೆಗಳಲ್ಲಿ ಅತ್ಯಾಕರ್ಷಕ ಉಡುಪುಗಳನ್ನು ಧರಿಸಿ ರ್ಯಾಂಪ್ ವಾಕ್ ಮಾಡುವುದನ್ನು ಕಾಣಬಹುದು.
ಗಮನ ಸೆಳೆದ ಪ್ರಮುಖ ಮಾಡೆಲ್‌ಗಳ ಪ್ರಯಾಣ:
ಗಮನ ಸೆಳೆದ ಪ್ರಮುಖ ಮಾಡೆಲ್‌ಗಳ ಪ್ರಯಾಣ:
ದೀಕ್ಷಾ: ನೆಲದ ಮೇಲೆ ಕುಳಿತು ಚಪಾತಿ ಉರುಳಿಸುತ್ತಿದ್ದ ಸಾಧಾರಣ ಹುಡುಗಿ, ಕ್ಷಣಮಾತ್ರದಲ್ಲಿ ಲಕ್ಮೆ ಫ್ಯಾಷನ್ ವೀಕ್‌ನ ಮುಖ್ಯ ರ‍್ಯಾಂಪ್‌ನಲ್ಲಿ ಹೆಜ್ಜೆ ಹಾಕುವ ದೃಶ್ಯ ನೆಟ್ಟಿಗರ ಮನಗೆದ್ದಿದೆ.
ಸಾಕ್ಷಿ ಕುಂಭಾರ್: ಮಹಾರಾಷ್ಟ್ರದ ಈ ಮಾಡೆಲ್ ಹಳ್ಳಿಯ ಹೊಲದಲ್ಲಿ ಕುರ್ತಾ ಧರಿಸಿ ಬೆಳೆ ಕೊಯ್ಲು ಮಾಡುತ್ತಿದ್ದ ದೃಶ್ಯದಿಂದ ನೇರವಾಗಿ ಬ್ಲ್ಯಾಕ್ ಹೈ-ಫ್ಯಾಷನ್ ಗೌನ್‌ನಲ್ಲಿ ರ‍್ಯಾಂಪ್‌ಗೆ ಕಾಲಿಡುವ ಶೈಲಿ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಕರಣ್ ಮತ್ತು ರಾಜ್ ದೋಬಲ್: ಬಕೆಟ್‌ನಲ್ಲಿ ನೀರು ಹೊರುವುದು ಹಾಗೂ ಮರ ಕಡಿಯುವಂತಹ ಕಠಿಣ ಗ್ರಾಮೀಣ ಕಾಯಕದಿಂದ ಆರಂಭಿಸಿ, ಫ್ಯಾಷನ್ ವೀಕ್‌ನ ಬೆಳಕಿನಲ್ಲಿ ಮಿಂಚಿದ ಯುವಕರ ಕಥೆ ಇದು.
ನಕುಲ್ ಭಾರದ್ವಾಜ್: ಹಳ್ಳಿಯ ಮನೆಕೆಲಸದಿಂದ ಜಾಗತಿಕ ಬ್ರ್ಯಾಂಡ್ ‘ವರ್ಸೇಸ್’ ರ‍್ಯಾಂಪ್‌ವರೆಗೆ ತಲುಪಿದ ತಮ್ಮ ಜರ್ನಿಗೆ “ಮನೆಯಿಂದ ಸುದೀರ್ಘ ಪ್ರಯಾಣ, ಆದರೆ ಪ್ರತಿಯೊಂದು ಕ್ಷಣಕ್ಕೂ ಇದು ಯೋಗ್ಯ” ಎಂದು ಬರೆದುಕೊಂಡಿದ್ದಾರೆ.
ಸಂಗೀತಾ ರಮೇಶ್: ಬೆಂಗಳೂರು ಮೂಲದ ಈ ಮಾಡೆಲ್ ಕೂಡ ತಮ್ಮ ಅಡುಗೆಮನೆಯ ಚಪಾತಿ ಲಟ್ಟಿಸುವ ಸರಳ ಬದುಕಿನಿಂದ ಬೆಳ್ಳಿ ಬಣ್ಣದ ರ್ಯಾಂಪ್ ಡ್ರೆಸ್‌ವರೆಗಿನ ಟ್ರಾನ್ಸ್‌ಫಾರ್ಮೇಷನ್ ಹಂಚಿಕೊಂಡಿದ್ದಾರೆ.
ಹಳೆಯ ಕಟ್ಟುಪಾಡುಗಳನ್ನು ಮುರಿದ ಹೊಸ ಅಲೆ
ಹಳೆಯ ಕಟ್ಟುಪಾಡುಗಳನ್ನು ಮುರಿದ ಹೊಸ ಅಲೆ
ಒಂದು ಕಾಲದಲ್ಲಿ ಫ್ಯಾಷನ್ ಮತ್ತು ಮಾಡೆಲಿಂಗ್ ಜಗತ್ತು ಕೇವಲ ಮೆಟ್ರೋ ನಗರಗಳ, ದೊಡ್ಡ ಮನೆತನದ ಯುವಕ-ಯುವತಿಯರಿಗೆ ಮಾತ್ರ ಸೀಮಿತ ಎಂಬ ಭಾವನೆಯಿತ್ತು. ಇತ್ತೀಚೆಗೆ ಭಾರತದ ಸಾಫ್ಟ್‌ವೇರ್ ಎಂಜಿನಿಯರ್ ಒಬ್ಬರು ತಿಂಗಳಿಗೆ ₹3.6 ಲಕ್ಷ ಸಂಬಳದ ಕೆಲಸ ತೊರೆದು ಮಿಲನ್‌ನಲ್ಲಿ ಅರ್ಮಾನಿ (Armani) ಬ್ರ್ಯಾಂಡ್‌ಗೆ ಮಾಡೆಲ್ ಆಗಿ ದಿನಕ್ಕೆ ₹5 ಲಕ್ಷ ಗಳಿಸುವ ಹಂತಕ್ಕೆ ತಲುಪಿದ್ದು ದೊಡ್ಡ ಸುದ್ದಿಯಾಗಿತ್ತು. ಅದೇ ಸಾಲಿಗೆ ಈಗ ಸಣ್ಣ ಪಟ್ಟಣ ಮತ್ತು ಹಳ್ಳಿಗಳಿಂದ ಬಂದ ಯುವಜನತೆ ಸೇರುತ್ತಿದ್ದಾರೆ.
ರಿಯಲ್ ಲೈಫ್‌ಗೂ ಮತ್ತು ರ್ಯಾಂಪ್ ಲೈಫ್‌ಗೂ ಇರುವ ವ್ಯತ್ಯಾಸವನ್ನು ಮುಚ್ಚಿಡದೆ, ತಮ್ಮ ಗ್ರಾಮೀಣ ಹಿನ್ನೆಲೆಯನ್ನು ಹೆಮ್ಮೆಯಿಂದ ಪ್ರದರ್ಶಿಸುತ್ತಿರುವುದು ಈ ಟ್ರೆಂಡ್‌ನ ವಿಶೇಷತೆಯಾಗಿದೆ.
ಆಕರ್ಷಕ ಗ್ಲಾಮರ್ ಪ್ರಪಂಚದ ಹಿಂದೆ ಅಪಾರ ಶ್ರಮ, ಶಿಸ್ತು ಮತ್ತು ತಮ್ಮ ಮೂಲವನ್ನು ಮರೆಯದ ವಿನಯತೆಯಿದೆ ಎಂಬುದಕ್ಕೆ ಈ ‘ಹೋಮ್‌ಟೌನ್ vs ರನ್‌ವೇ’ ಟ್ರೆಂಡ್ ಜೀವಂತ ಸಾಕ್ಷಿಯಾಗಿದೆ. ನೆಟ್ಟಿಗರು ಈ ಮಾಡೆಲ್‌ಗಳ ಪರಿಶ್ರಮ ಮತ್ತು ಸಾಧನೆಯನ್ನು ಮುಕ್ತಕಂಠದಿಂದ ಶ್ಲಾಘಿಸುತ್ತಿದ್ದಾರೆ.
