ಬ್ರೆಜಿಲ್ ಅಥವಾ ಇತರೆಡೆ ಮಾತ್ರವಲ್ಲದೆ ಈಕ್ವೆಡಾರ್ ಫುಟ್‌ಬಾಲ್ ಅಂಗಳದಲ್ಲೂ ಆಘಾತಕಾರಿ ಘಟನೆಯೊಂದು ನಡೆದಿದ್ದು, ಪಂದ್ಯದ ವೇಳೆ ಲೈನ್‌ಮ್ಯಾನ್ ಮೇಲೆ ಕಲ್ಲು ತೂರಾಟ ನಡೆಸಿರುವ ಗಂಭೀರ ಪ್ರಕರಣ ಬೆಳಕಿಗೆ ಬಂದಿದೆ. ಈಕ್ವೆಡಾರ್‌ನಲ್ಲಿ ಸಿಯುಡಾಡ್ ಡಿ ಯಂಟ್ಜಾಸಾ ಮತ್ತು ರಿಯೊ ಅಗುವಾರಿಕೋ ಎಫ್‌ಸಿ ನಡುವಿನ ಫುಟ್‌ಬಾಲ್ ಪಂದ್ಯದ ವೇಳೆ ಸಹಾಯಕ ರೆಫರಿ ಲೆನಿನ್ ಒಜೆಡಾ ಅವರ ಮೇಲೆ ಕಲ್ಲು ತೂರಾಟ ನಡೆಸಲಾಗಿದ್ದು, ಗಾಯಗೊಂಡ ಅವರನ್ನು ತುರ್ತು ವಾಹನದಲ್ಲಿ ಆಸ್ಪತ್ರೆಗೆ ಸಾಗಿಸಲಾಗಿದೆ.
ಅಕ್ಟೋಬರ್ 17ರ ಶನಿವಾರದಂದು ಜಮೋರಾ ಚಿಂಚಿಪೆಯ ಮುನ್ಸಿಪಲ್ ಜುವಾನ್ ಗಾಲಾರ್ಜಾ ಮಾರ್ಕ್ವೆಸ್ ಕ್ರೀಡಾಂಗಣದಲ್ಲಿ ಈ ಘಟನೆ ನಡೆದಿದೆ. ಪಂದ್ಯದ ವೇಳೆ ಬದಲಿ ಆಟಗಾರರ ಬೆಂಚ್‌ನಲ್ಲಿದ್ದ ವ್ಯಕ್ತಿಯೊಬ್ಬರು ಕಲ್ಲುಗಳನ್ನು ಎಸೆದಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ. ಈ ಕಲ್ಲು ನೇರವಾಗಿ ಸಹಾಯಕ ರೆಫರಿ ಲೆನಿನ್ ಒಜೆಡಾ ಅವರ ಮುಖಕ್ಕೆ ಬಡಿದಿದ್ದು, ತೀವ್ರ ರಕ್ತಸ್ರಾವ ಹಾಗೂ ಗಾಯಗೊಂಡ ಕಾರಣ ಪಂದ್ಯವನ್ನು ಅರ್ಧದಲ್ಲೇ ಸ್ಥಗಿತಗೊಳಿಸಲಾಯಿತು. ಗಂಭೀರವಾಗಿ ಗಾಯಗೊಂಡ ಅವರಿಗೆ ಕನ್ನೆಮೂಳೆ ಮುರಿತ (Cheekbone fracture) ಸಂಭವಿಸಿರಬಹುದು ಎಂದು ವರದಿಯಾಗಿದೆ.
ಫುಟ್‌ಬಾಲ್ ಮೈದಾನದಲ್ಲಿ ರೆಫರಿಗಳು ಹಾಗೂ ಅತಿಥಿ ಆಟಗಾರರ ಸುರಕ್ಷತೆಯ ಪ್ರಶ್ನೆಯು ಈ ಘಟನೆಯಿಂದ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದ್ದು, ತಪ್ಪು ಮಾಡಿದವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಕ್ರೀಡಾಪ್ರೇಮಿಗಳಿಂದ ಒತ್ತಡ ಕೇಳಿಬಂದಿದೆ.
