ದೇಶಾದ್ಯಂತ ನವರಾತ್ರಿ ಹಬ್ಬದ ಸಂಭ್ರಮ ಕಳೆಗಟ್ಟಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಬಣ್ಣ ಬಣ್ಣದ ಸಾಂಪ್ರದಾಯಿಕ ಉಡುಪುಗಳು, ಗಾರ್ಬಾ ನೃತ್ಯ ಹಾಗೂ ವಿಭಿನ್ನ ವೈರಲ್ ಟ್ರೆಂಡ್‌ಗಳ ಸದ್ದು ಜೋರಾಗಿದೆ. ಇದೀಗ ಈ ಸಂಭ್ರಮದ ಅಲೆಯಲ್ಲಿ ಬಾಲಿವುಡ್‌ನ ಫಿಟ್‌ನೆಸ್ ಹಾಗೂ ಫ್ಯಾಷನ್ ಐಕಾನ್ ಶಿಲ್ಪಾ ಶೆಟ್ಟಿ ಕೂಡ ಭಾಗಿಯಾಗಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಗಾರ್ಬಾ ಡ್ಯಾನ್ಸ್ ಟ್ರೆಂಡ್‌ಗೆ ಹೆಜ್ಜೆ ಹಾಕಿ ಅಭಿಮಾನಿಗಳ ಮನಗೆದ್ದಿದ್ದಾರೆ.
ಈ ವೈರಲ್ ಟ್ರೆಂಡ್‌ನಲ್ಲಿ ಜನರು ಆರಂಭದಲ್ಲಿ ದಿನನಿತ್ಯದ ಸಾಧಾರಣ ಉಡುಪಿನಲ್ಲಿ ಗಾರ್ಬಾ ಹೆಜ್ಜೆಗಳನ್ನು ಹಾಕುತ್ತಾ, ಏಕಾಏಕಿ ಸಂಗೀತದ ಬೀಟ್‌ಗೆ ತಕ್ಕಂತೆ ಕಣ್ಣಿಮೆ ಮುಚ್ಚಿ ತೆರೆಯುವುದರೊಳಗೆ ಅದ್ಧೂರಿ ಹಬ್ಬದ ಉಡುಪಿಗೆ ಬದಲಾಗುತ್ತಾರೆ. ಶಿಲ್ಪಾ ಶೆಟ್ಟಿ ಹಂಚಿಕೊಂಡಿರುವ ವಿಡಿಯೋದಲ್ಲಿ, ಆರಂಭದಲ್ಲಿ ಅವರು ಅತ್ಯಂತ ಸರಳವಾದ ದೊಗಲೆಯಾದ ಶರ್ಟ್ ಧರಿಸಿ ಕ್ಯಾಶುಯಲ್ ಲುಕ್‌ನಲ್ಲಿ ನರ್ತಿಸುತ್ತಾರೆ. ನಂತರ ಸಂಗೀತದ ಲಯ ಬದಲಾಗುತ್ತಿದ್ದಂತೆ, ಗುಲಾಬಿ ಬಣ್ಣದ ಭವ್ಯವಾದ ಲಹಂಗಾ ಹಾಗೂ ಕಸೂತಿ ಕೆಲಸವಿರುವ ಹಾಲ್ಟರ್ ನೆಕ್ ಬ್ಲೌಸ್ ಧರಿಸಿ ದೇವತೆಯಂತೆ ಕಂಗೊಳಿಸಿದ್ದಾರೆ.
ಈ ಸಾಂಪ್ರದಾಯಿಕ ಉಡುಗೆಗೆ ಸೂಕ್ತವಾಗುವಂತೆ ಶಿಲ್ಪಾ ಶೆಟ್ಟಿ ಅವರು ಕಿವಿಗೆ ಆಕರ್ಷಕ ಆಭರಣ, ಮಾಂಗ್ ಟಿಕ್ಕಾ ಹಾಗೂ ತಲೆಗೆ ಸೂಕ್ತವಾದ ಸಾಂಪ್ರದಾಯಿಕ ಆಭರಣಗಳನ್ನು ಧರಿಸಿ ಕಂಪ್ಲೀಟ್ ನವರಾತ್ರಿ ಲುಕ್ ಪಡೆದುಕೊಂಡಿದ್ದಾರೆ. ಅವರ ಚುರುಕಾದ ನೃತ್ಯದ ಹೆಜ್ಜೆಗಳು ಹಾಗೂ ಸರಳ ಉಡುಪಿನಿಂದ ದಿಢೀರ್ ಸಾಂಪ್ರದಾಯಿಕ ಅವತಾರಕ್ಕೆ ಬದಲಾದ ಪರಿ ಸೋಷಿಯಲ್ ಮೀಡಿಯಾದಲ್ಲಿ ವ್ಯಾಪಕ ಮೆಚ್ಚುಗೆಗೆ ಪಾತ್ರವಾಗಿದೆ. ಬಾಲಿವುಡ್ ಮಸಾಲೆಯೊಂದಿಗೆ ಮೂಡಿಬಂದಿರುವ ಈ ವಿಡಿಯೋ ಪ್ರಸ್ತುತ ವೈರಲ್ ಆಗಿದ್ದು, ಹಬ್ಬದ ಸಂಭ್ರಮವನ್ನು ಮತ್ತಷ್ಟು ಇಮ್ಮಡಿಗೊಳಿಸಿದೆ.
