ಬಾಲಿವುಡ್ ಸುಂದರಿ ಐಶ್ವರ್ಯ ರೈ ನಟನೆಯ ಸಿನಿಮಾಗಳಲ್ಲಿ ಅವರ ಉಡುಗೆ ತೊಡುಗೆಗಳು ಸದಾ ಪ್ರೇಕ್ಷಕರ ಮನಸ್ಸಿನಲ್ಲಿ ಉಳಿದುಕೊಳ್ಳುತ್ತವೆ. ಅದರಲ್ಲೂ ವಿಶೇಷವಾಗಿ 2003 ರ ದಿಲ್ ಕಾ ರಿಶ್ತಾ ಚಿತ್ರದ ‘ಸಾಜನ್ ಸಾಜನ್’ ಹಾಡಿನಲ್ಲಿ ಅವರು ಧರಿಸಿದ್ದ ವಿಭಿನ್ನ ಶೈಲಿಯ ಕೆಂಪು ಮತ್ತು ಕಪ್ಪು ಮಿಶ್ರಿತ ಲೆಹಂಗಾ ಇಂದಿಗೂ ಫ್ಯಾಷನ್ ಲೋಕದಲ್ಲಿ ಚರ್ಚೆಯಾಗುತ್ತಿದೆ. ಪ್ರಸಿದ್ಧ ಫ್ಯಾಷನ್ ಡಿಸೈನರ್ ನೀತಾ ಲೂಲ್ಲಾ ಈ ಐಕಾನಿಕ್ ಉಡುಗೆಯ ವಿನ್ಯಾಸದ ಹಿಂದಿನ ಸ್ವಾರಸ್ಯಕರ ಸಂಗತಿಗಳನ್ನು ಇತ್ತೀಚೆಗೆ ಹಂಚಿಕೊಂಡಿದ್ದಾರೆ.
ಸಂದರ್ಶನವೊಂದರಲ್ಲಿ ಮಾತನಾಡಿದ ನೀತಾ ಲೂಲ್ಲಾ, ಆ ಕಾಲದಲ್ಲೇ ಈ ರೀತಿಯ ಮಾಡರ್ನ್ ಲುಕ್ ನೀಡಲು ತಾವು ನಡೆಸಿದ ಪ್ರಯೋಗಗಳ ಬಗ್ಗೆ ನೆನಪಿಸಿಕೊಂಡಿದ್ದಾರೆ. ಹಾಡಿನ ಸಂದರ್ಭಕ್ಕೆ ತಕ್ಕಂತೆ ಗ್ಲಾಮರಸ್ ಹಾಗೂ ಆಕರ್ಷಕವಾಗಿ ಕಾಣಬೇಕು ಮತ್ತು ಅದೇ ಸಮಯದಲ್ಲಿ ಭಾರತೀಯ ಸಾಂಪ್ರದಾಯಿಕ ಕರಕುಶಲತೆಗೆ ತಕ್ಕಂತೆ ಇರಬೇಕು ಎಂಬ ಉದ್ದೇಶದಿಂದ ಈ ಉಡುಗೆಯನ್ನು ವಿನ್ಯಾಸಗೊಳಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಈ ವಿಶೇಷ ಉಡುಗೆಯ ಬ್ಲೌಸ್ ಕಾರ್ಸೆಟ್ ಮಾದರಿಯಲ್ಲಿದ್ದು, ಸ್ಕರ್ಟ್ ಭಾಗವು ಸ್ಲಿಮ್ ಫಿಟ್ ಹೊಂದಿತ್ತು ಮತ್ತು ಅದರ ಅಡಿಯಲ್ಲಿ ಟ್ರೌಸರ್ಸ್ ವಿನ್ಯಾಸವನ್ನು ನೀಡಲಾಗಿತ್ತು. ಆ ಕಾಲದ ಟ್ರೆಂಡ್‌ಗೆ ತಕ್ಕಂತೆ ಬೋಲ್ಡ್ ಲೆಪರ್ಡ್ ಪ್ರಿಂಟ್ ಜತೆಗೆ ಜರ್ಡೋಸಿ ಎಂಬ ಸಂಕೀರ್ಣ ಎಂಬ್ರಾಯ್ಡರಿ ಕೆಲಸವನ್ನು ಮಾಡಲಾಗಿತ್ತು. ಸಾಮಾನ್ಯ ಸಾಂಪ್ರದಾಯಿಕ ಲೆಹಂಗಾಕ್ಕಿಂತ ಇದು ಸಂಪೂರ್ಣ ಭಿನ್ನವಾಗಿ ಮೂಡಿಬಂದಿತ್ತು.
ಸಿನಿಮಾದ ಹಾಡಿನಲ್ಲಿ ನಟಿ ನೃತ್ಯ ಮಾಡುವಾಗ, ತಿರುಗುವಾಗ ಯಾವುದೇ ಅಡಚಣೆಯಿಲ್ಲದೆ ಸರಾಗವಾಗಿ ಚಲಿಸುವಂತೆ ಈ ವಿನ್ಯಾಸವನ್ನು ರೂಪಿಸಲಾಗಿತ್ತು. ಕಾಲ ಬದಲಾದಂತೆ ಫ್ಯಾಷನ್ ಮರುಕಳಿಸುತ್ತದೆ ಎಂಬುದಕ್ಕೆ ಈ ವಿನ್ಯಾಸವೇ ಸಾಕ್ಷಿಯಾಗಿದೆ ಎಂದು ಡಿಸೈನರ್ ಅಭಿಪ್ರಾಯಪಟ್ಟಿದ್ದಾರೆ.
