ಮೀರತ್: ಪತಿಯನ್ನು ಉಸಿರುಗಟ್ಟಿಸಿ ಕೊಂದು, ಬಳಿಕ ಆತನ ಶವದ ಕೆಳಗೆ ಹಾವನ್ನು ಇರಿಸಿ ಹಾವು ಕಡಿತದಿಂದ ಸಾವು ಸಂಭವಿಸಿದೆ ಎಂದು ನಾಟಕವಾಡಿದ ಮಹಿಳೆ ಮತ್ತು ಆಕೆಯ ಪ್ರಿಯಕರನಿಗೆ ನ್ಯಾಯಾಲಯ ಮರಣದಂಡನೆ ವಿಧಿಸಿದೆ.
ಉತ್ತರ ಪ್ರದೇಶದ ಮೀರತ್‌ನ ಹೆಚ್ಚುವರಿ ಜಿಲ್ಲಾ ನ್ಯಾಯಾಧೀಶರು-12ರ ನ್ಯಾಯಾಲಯವು ರವಿತಾ ಮತ್ತು ಆಕೆಯ ನೆರೆಮನೆಯ ನಿವಾಸಿ ಅಮರದೀಪ್‌ಗೆ ಅಕ್ಟೋಬರ್ 7ರಂದು ಕೊಲೆ ಹಾಗೂ ಕ್ರಿಮಿನಲ್ ಪಿತೂರಿ ಆರೋಪಗಳಲ್ಲಿ ದೋಷಿಗಳೆಂದು ತೀರ್ಪು ನೀಡಿತ್ತು. ಶುಕ್ರವಾರ, ಅಕ್ಟೋಬರ್ 16ರಂದು ಇಬ್ಬರಿಗೂ ಮರಣದಂಡನೆ ವಿಧಿಸಲಾಗಿದೆ.
ಹಾವಿನ ಕಡಿತವೆಂದು ನಂಬಿಸಲು ಸಂಚು!
ಈ ಪ್ರಕರಣವು ಮೀರತ್ ಜಿಲ್ಲೆಯ ಬಹ್ಸುಮಾ ಪೊಲೀಸ್ ಠಾಣಾ ವ್ಯಾಪ್ತಿಯ ಅಕ್ಬರ್‌ಪುರ ಸಾದತ್ ಗ್ರಾಮದಲ್ಲಿ ನಡೆದಿತ್ತು. 2025ರ ಏಪ್ರಿಲ್ 12ರಂದು ಅಮಿತ್ ಕಶ್ಯಪ್ ಅಲಿಯಾಸ್ ಮಿಕ್ಕಿ ತನ್ನ ಮನೆಯಲ್ಲೇ ಶವವಾಗಿ ಪತ್ತೆಯಾಗಿದ್ದರು.
ಅಮಿತ್ ಅವರ ದೇಹದ ಕೆಳಗೆ ಹಾವೊಂದು ಸಿಲುಕಿಕೊಂಡಿದ್ದರಿಂದ ಆರಂಭದಲ್ಲಿ ಕುಟುಂಬದವರು ಹಾವು ಕಡಿತದಿಂದ ಸಾವು ಸಂಭವಿಸಿರಬಹುದು ಎಂದು ಶಂಕಿಸಿದ್ದರು. ಆದರೆ, ಅವರ ಕುತ್ತಿಗೆಯ ಮೇಲಿದ್ದ ಗಾಯಗಳು ಮತ್ತು ದೇಹದ ಮೇಲಿನ ಉಗುರಿನ ಗುರುತುಗಳು ಅನುಮಾನಕ್ಕೆ ಕಾರಣವಾಗಿದ್ದವು.
ನಂತರ ನಡೆದ ಮರಣೋತ್ತರ ಪರೀಕ್ಷೆಯಲ್ಲಿ ಅಮಿತ್ ಹಾವು ಕಡಿತದಿಂದ ಮೃತಪಟ್ಟಿಲ್ಲ, ಬದಲಾಗಿ ಉಸಿರುಗಟ್ಟಿಸಿ ಕೊಲೆ ಮಾಡಲಾಗಿದೆ ಎಂಬುದು ಪತ್ತೆಯಾಯಿತು.
ಹಾವಿನ ವಿಷದ ಚೀಲವನ್ನೇ ತೆಗೆದಿದ್ದರೇ?
ಪ್ರಾಸಿಕ್ಯೂಷನ್ ಪ್ರಕಾರ, ರವಿತಾ ಮತ್ತು ಅಮರದೀಪ್ ಪ್ರೀತಿಯಲ್ಲಿದ್ದರು. ಈ ಸಂಬಂಧಕ್ಕೆ ಅಡ್ಡಿಯಾಗಿದ್ದ ಪತಿ ಅಮಿತ್‌ನನ್ನು ಕೊಲ್ಲಲು ಇಬ್ಬರೂ ಸಂಚು ರೂಪಿಸಿದ್ದರು ಎನ್ನಲಾಗಿದೆ.
ಅಮಿತ್‌ನನ್ನು ಉಸಿರುಗಟ್ಟಿಸಿ ಕೊಂದ ಬಳಿಕ, ಅದು ಹಾವು ಕಡಿತದಿಂದ ಸಂಭವಿಸಿದ ಸಾವು ಎಂದು ನಂಬಿಸುವ ಉದ್ದೇಶದಿಂದ ಶವದ ಕೆಳಗೆ ಹಾವನ್ನು ಇರಿಸಿದ್ದರು ಎಂದು ಆರೋಪಿಸಲಾಗಿದೆ.ಬಂಧಿಸಲಾದ ಹಾವನ್ನು ಒಂದು ಪಾತ್ರೆಯಲ್ಲಿ ಇರಿಸಲಾಗಿತ್ತು. ಅದನ್ನು ಪರಿಶೀಲಿಸಿದ ಹಾವು ಹಿಡಿಯುವವರು, ಹಾವಿನ ವಿಷದ ಚೀಲವನ್ನು ತೆಗೆದುಹಾಕಲಾಗಿತ್ತು ಎಂದು ವರದಿ ಮಾಡಿದ್ದಾಗಿ ಪ್ರಾಸಿಕ್ಯೂಷನ್ ತಿಳಿಸಿದೆ. ಇದರಿಂದ ಹಾವು ಕಡಿತವೇ ಸಾವಿಗೆ ಕಾರಣ ಎಂಬ ವಾದಕ್ಕೆ ಬಲವಾದ ಅನುಮಾನ ಮೂಡಿತು.
ಹಾವನ್ನು ಪೂರೈಸಿದ್ದ ಎನ್ನಲಾದ ವ್ಯಕ್ತಿಯನ್ನೂ ಪೊಲೀಸರು ವಿಚಾರಣೆ ನಡೆಸಿದ ಬಳಿಕ ರವಿತಾ ಮತ್ತು ಅಮರದೀಪ್ ಅವರನ್ನು ಬಂಧಿಸಿದ್ದರು.
500 ಪುಟಗಳ ಚಾರ್ಜ್‌ಶೀಟ್, 500ಕ್ಕೂ ಹೆಚ್ಚು ಕರೆಗಳ ದಾಖಲೆ!
ಈ ಪ್ರಕರಣದಲ್ಲಿ ಪೊಲೀಸರು 500ಕ್ಕೂ ಹೆಚ್ಚು ಪುಟಗಳ ಆರೋಪಪಟ್ಟಿ ಸಲ್ಲಿಸಿದ್ದರು. ವಿಚಾರಣೆ ವೇಳೆ ಹನ್ನೆರಡಕ್ಕೂ ಹೆಚ್ಚು ಸಾಕ್ಷಿಗಳನ್ನು ಪ್ರಾಸಿಕ್ಯೂಷನ್ ಹಾಜರುಪಡಿಸಿತ್ತು.ಪ್ರಕರಣದಲ್ಲಿ ಮರಣೋತ್ತರ ಪರೀಕ್ಷೆಯ ವರದಿ ಮತ್ತು ಮೊಬೈಲ್ ಫೋನ್ ಕರೆಗಳ ದಾಖಲೆಗಳು ಪ್ರಮುಖ ಸಾಕ್ಷ್ಯಗಳಾಗಿದ್ದವು ಎಂದು ಹೆಚ್ಚುವರಿ ಜಿಲ್ಲಾ ಸರ್ಕಾರಿ ಅಭಿಯೋಜಕಿ ಫರ್ಜಾನಾ ತಿಳಿಸಿದ್ದಾರೆ.
ಅಮಿತ್ ಮೃತಪಟ್ಟ ಬಳಿಕದ ನಾಲ್ಕು ದಿನಗಳಲ್ಲಿ ರವಿತಾ ಮತ್ತು ಅಮರದೀಪ್ 70ಕ್ಕೂ ಹೆಚ್ಚು ಬಾರಿ ಮಾತನಾಡಿದ್ದರು ಎಂದು ಅವರು ಹೇಳಿದ್ದಾರೆ. ತನಿಖೆಯ ವೇಳೆ ಅಮರದೀಪ್ ಬಳಸಿದ್ದ ಸಂಖ್ಯೆಯ ಮೂಲಕ ಇಬ್ಬರ ನಡುವೆ 500ಕ್ಕೂ ಹೆಚ್ಚು ಕರೆಗಳು ನಡೆದಿರುವುದು ಪತ್ತೆಯಾಗಿತ್ತು ಎಂದು ಪ್ರಾಸಿಕ್ಯೂಷನ್ ತಿಳಿಸಿದೆ.
ಆ ಸಿಮ್ ಕಾರ್ಡ್ ಜಾಗೃತಿ ವಿಹಾರ್‌ನ ಸೋನು ಎಂಬ ವ್ಯಕ್ತಿಯ ಹೆಸರಿನಲ್ಲಿ ನೋಂದಣಿಯಾಗಿತ್ತು. ಆದರೆ, ತಾನು ಆ ಸಂಖ್ಯೆಯನ್ನು ಬಳಸಿಲ್ಲ ಮತ್ತು ಆರೋಪಿಗಳಿಬ್ಬರನ್ನೂ ಪರಿಚಯವಿಲ್ಲ ಎಂದು ಸೋನು ನ್ಯಾಯಾಲಯಕ್ಕೆ ತಿಳಿಸಿದ್ದಾನೆ.
ಇಬ್ಬರಿಗೂ ಮರಣದಂಡನೆ ವಿಧಿಸಲು ಮನವಿ
ಶಿಕ್ಷೆಯ ಪ್ರಮಾಣದ ಕುರಿತು ನಡೆದ ವಾದದ ವೇಳೆ, ಜಿಲ್ಲಾ ಸರ್ಕಾರಿ ಅಭಿಯೋಜಕ ಕೆ.ಕೆ. ಚೌಬೆ ಅವರು ಇದು ಪೂರ್ವಯೋಜಿತ ಕೊಲೆ ಹಾಗೂ ಸಾಕ್ಷ್ಯ ನಾಶಪಡಿಸುವ ಪ್ರಯತ್ನವಾಗಿರುವುದರಿಂದ ಇಬ್ಬರಿಗೂ ಮರಣದಂಡನೆ ವಿಧಿಸಬೇಕೆಂದು ನ್ಯಾಯಾಲಯವನ್ನು ಕೋರಿದರು.
ಕೊಲೆಯ ಉದ್ದೇಶ, ಅದನ್ನು ನಡೆಸಿದ ರೀತಿ ಮತ್ತು ಆರೋಪಿಗಳ ಮನೋಭಾವವನ್ನು ಪರಿಗಣಿಸಬೇಕೆಂದು ಅವರು ಮನವಿ ಮಾಡಿದರು. ತಮ್ಮ ವಾದಕ್ಕೆ ಬೆಂಬಲವಾಗಿ ಶಬ್ನಮ್ ಕೊಲೆ ಪ್ರಕರಣ ಸೇರಿದಂತೆ ಹೈಕೋರ್ಟ್ ಮತ್ತು ಸುಪ್ರೀಂ ಕೋರ್ಟ್‌ನ ಹಿಂದಿನ ತೀರ್ಪುಗಳನ್ನು ಉಲ್ಲೇಖಿಸಿದರು.
ಮೃತ ಅಮಿತ್ ಕಶ್ಯಪ್ ಅವರ ಕುಟುಂಬದ ಪರ ವಕೀಲರಾದ ಫರ್ಜಾನಾ ಮತ್ತು ಬಲರಾಜ್ ಸಿಂಗ್ ಕೂಡ ಇಬ್ಬರು ಆರೋಪಿಗಳಿಗೆ ಮರಣದಂಡನೆ ವಿಧಿಸಬೇಕೆಂದು ನ್ಯಾಯಾಲಯವನ್ನು ಕೋರಿದ್ದರು.
