ಉತ್ತರ ಭಾರತದ ಅತ್ಯಂತ ಜನಪ್ರಿಯ ತಳಿಗಳಲ್ಲೊಂದಾದ ಕುಲ್ಚಾ ಎಂದರೆ ಪ್ರತಿಯೊಬ್ಬರಿಗೂ ಇಷ್ಟ. ಸಾಮಾನ್ಯವಾಗಿ ಕಡಾಯಿ ಪನೀರ್, ಛೋಲೆ ಅಥವಾ ಚಿಕನ್ ಕರಿ ಜತೆಗೆ ಸೇವಿಸುವ ಈ ಖಾದ್ಯವನ್ನು ರೆಸ್ಟೋರೆಂಟ್‌ಗಳಲ್ಲಿ ತಂದೂರ್ ಬಳಸಿ ತಯಾರಿಸಲಾಗುತ್ತದೆ. ಆದರೆ ಮನೆಯಲ್ಲಿ ತಂದೂರ್ ಇಲ್ಲ ಎಂಬ ಚಿಂತೆ ನಿಮಗಿದ್ದರೆ, ಯಾವುದೇ ಓವನ್ ಅಥವಾ ಈಸ್ಟ್ (Yeast) ಬಳಸದೇ ಕೇವಲ ಕಾವಲಿ (ತವಾ) ಬಳಸಿ ಅತ್ಯಂತ ಮೃದುವಾದ ಹಾಗೂ ರುಚಿಕರವಾದ ಆಲೂ ಕುಲ್ಚಾ ತಯಾರಿಸುವ ಸುಲಭ ವಿಧಾನವನ್ನು ಡಿಜಿಟಲ್ ಕ್ರಿಯೇಟರ್ ನೂಪುರ್ ಹಂಚಿಕೊಂಡಿದ್ದಾರೆ.
ಈ ರೆಸಿಪಿಯ ಪ್ರಮುಖ ವಿಶೇಷತೆಯೆಂದರೆ ಕುಲ್ಚಾದ ಹಿಟ್ಟನ್ನು ಹಗುರಗೊಳಿಸಲು ಮತ್ತು ಮೃದುವಾಗಿಸಲು ಮೈದಾ ಹಿಟ್ಟಿನೊಂದಿಗೆ ಮೊಸರು, ಬೇಕಿಂಗ್ ಪೌಡರ್, ಬೇಕಿಂಗ್ ಸೋಡಾ, ಎಣ್ಣೆ, ಸಕ್ಕರೆ ಹಾಗೂ ಉಪ್ಪನ್ನು ಬೆರೆಸಿ ಹದವಾಗಿ ಕಲಸಲಾಗುತ್ತದೆ. ನಂತರ ಕಾವಲಿಯ ಮೇಲೆ ಸುಲಭವಾಗಿ ಬೇಯಿಸಲು ಕುಲ್ಚಾದ ಒಂದು ಬದಿಗೆ ಸ್ವಲ್ಪ ನೀರನ್ನು ಚಿಮುಕಿಸಿ ಕಾವಲಿಗೆ ಅಂಟುವಂತೆ ಮಾಡಲಾಗುತ್ತದೆ. ಇದರಿಂದ ತಂದೂರ್‌ನಲ್ಲಿ ಬೇಯಿಸಿದಷ್ಟೇ ಮೃದುವಾದ ಹಾಗೂ ರುಚಿಕರವಾದ ಕುಲ್ಚಾ ಸಿದ್ಧವಾಗುತ್ತದೆ.
ಬೇಕಾಗುವ ಸಾಮಗ್ರಿಗಳು:
ಹಿಟ್ಟು ತಯಾರಿಸಲು: ೨ ಕಪ್ ಮೈದಾ ಹಿಟ್ಟು, ೧ ಚಮಚ ಉಪ್ಪು, ೧ ಚಮಚ ಸಕ್ಕರೆ ಪುಡಿ, ಅರ್ಧ ಕಪ್ ತಾಜಾ ಮೊಸರು, ಒಂದೂವರೆ ಚಮಚ ಬೇಕಿಂಗ್ ಪೌಡರ್ ಹಾಗೂ ಕಾಲು ಚಮಚ ಬೇಕಿಂಗ್ ಸೋಡಾ.
ಸ್ಟಫಿಂಗ್ ತಯಾರಿಸಲು: ೨ ಬೇಯಿಸಿದ ಆಲೂಗಡ್ಡೆ, ೧ ಸಣ್ಣಗೆ ಹೆಚ್ಚಿದ ಈರುಳ್ಳಿ, ೧ ಚಮಚ ತುರಿದ ಶುಂಠಿ, ೧ ಹಸಿಮೆಣಸಿನಕಾಯಿ, ರುಚಿಗೆ ತಕ್ಕಷ್ಟು ಉಪ್ಪು, ೨ ಚಮಚ ಕಾಶ್ಮೀರಿ ಅಚ್ಚಖಾರದ ಪುಡಿ, ೧ ಚಮಚ ಕಪ್ಪು ಉಪ್ಪು, ಕೊತ್ತಂಬರಿ ಸೊಪ್ಪು ಹಾಗೂ ಕರಿಜೀರಿಗೆ (ಕಲೋಂಜಿ).
ತಯಾರಿಸುವ ವಿಧಾನ:
ಮೊದಲಿಗೆ ಒಂದು ಪಾತ್ರೆಯಲ್ಲಿ ಮೈದಾ, ಉಪ್ಪು, ಸಕ್ಕರೆ ಪುಡಿ, ಮೊಸರು, ಬೇಕಿಂಗ್ ಪೌಡರ್ ಮತ್ತು ಬೇಕಿಂಗ್ ಸೋಡಾ ಹಾಕಿ ಮೃದುವಾಗಿ ಹಿಟ್ಟು ಕಲಸಿ, ತೇವವಿರುವ ಬಟ್ಟೆಯಿಂದ ಮುಚ್ಚಿ ಸ್ವಲ್ಪ ಸಮಯ ಪಕ್ಕಕ್ಕೆ ಇಡಿ. ಮತ್ತೊಂದು ಪಾತ್ರೆಯಲ್ಲಿ ಬೇಯಿಸಿದ ಆಲೂಗಡ್ಡೆಯನ್ನು ಹರಿದು ಅದಕ್ಕೆ ಈರುಳ್ಳಿ, ಶುಂಠಿ, ಹಸಿಮೆಣಸಿನಕಾಯಿ, ಕೊತ್ತಂಬರಿ ಸೊಪ್ಪು, ಕಪ್ಪು ಉಪ್ಪು, ಉಪ್ಪು ಹಾಗೂ ಅಚ್ಚಖಾರದ ಪುಡಿ ಸೇರಿಸಿ ಚೆನ್ನಾಗಿ ಬೆರೆಸಿ.
ಈಗ ಕಲಸಿಟ್ಟ ಹಿಟ್ಟಿನಿಂದ ಸಣ್ಣ ಉಂಡೆಗಳನ್ನು ಮಾಡಿ, ಮಧ್ಯದಲ್ಲಿ ಆಲೂಗಡ್ಡೆ ಮಿಶ್ರಣವನ್ನು ಇಟ್ಟು ಅಂಚುಗಳನ್ನು ಮುಚ್ಚಿ ಮೆಲ್ಲನೆ ಕುಲ್ಚಾ ಆಕಾರಕ್ಕೆ ಲಟ್ಟಿಸಿ. ಮೇಲ್ಭಾಗದಲ್ಲಿ ಸ್ವಲ್ಪ ಕರಿಜೀರಿಗೆ ಮತ್ತು ಕೊತ್ತಂಬರಿ ಸೊಪ್ಪನ್ನು ಒತ್ತಿ. ನಂತರ ಕುಲ್ಚಾದ ಹಿಂಭಾಗಕ್ಕೆ ಸ್ವಲ್ಪ ನೀರು ಚಿಮುಕಿಸಿ, ಬಿಸಿಯಾದ ಕಾವಲಿಯ ಮೇಲೆ ನೀರಿರುವ ಭಾಗ ಕೆಳಗಾಗುವಂತೆ ಹಾಕಿ ಮುಚ್ಚಳ ಮುಚ್ಚಿ ಬೇಯಿಸಿ. ಕುಲ್ಚಾ ಉಬ್ಬಿ ಬಂದ ಮೇಲೆ ಎರಡೂ ಬದಿ ಹೊಂಬಣ್ಣ ಬರುವವರೆಗೆ ಕಾಯಿಸಿದರೆ ಬಿಸಿಬಿಸಿಯಾದ ಆಲೂ ಕುಲ್ಚಾ ಸಿದ್ಧ. ಇದನ್ನು ಛೋಲೆ ಅಥವಾ ರಾಯ್ತಾ ಜೊತೆ ಸವಿಯಬಹುದು.
