ನವರಾತ್ರಿ ಹಬ್ಬದ ಸಮಯದಲ್ಲಿ ಒಂಬತ್ತು ದಿನಗಳ ಕಾಲ ಉಪವಾಸ ವ್ರತ ಆಚರಿಸುವವರು ಆಹಾರಕ್ರಮದ ವಿಷಯದಲ್ಲಿ ಬಹಳ ಎಚ್ಚರಿಕೆ ವಹಿಸುತ್ತಾರೆ. ಸಾಮಾನ್ಯವಾಗಿ ಈ ಸಮಯದಲ್ಲಿ ಸಾಬೂದಾನ ಕಿಚಡಿ ಅಥವಾ ಪಾಯಸಗಳನ್ನು ಹೆಚ್ಚಾಗಿ ಸೇವಿಸಲಾಗುತ್ತದೆ. ಆದರೆ ಪ್ರತಿದಿನ ಒಂದೇ ರೀತಿಯ ಆಹಾರ ಸೇವಿಸಿ ಬೇಸರವಾಗಿದ್ದರೆ ಹಾಗೂ ಸಂಜೆಯ ವೇಳೆಗೆ ನಿರಾಸಕ್ತಿ ಅಥವಾ ಆಯಾಸ ಕಾಣಿಸಿಕೊಳ್ಳುತ್ತಿದ್ದರೆ, ದೇಹಕ್ಕೆ ತಕ್ಷಣ ಶಕ್ತಿ ನೀಡುವ ಸಾತ್ವಿಕ ಆಹಾರಗಳನ್ನು ಸೇವಿಸುವುದು ಅಗತ್ಯ. ಈ ನಿಟ್ಟಿನಲ್ಲಿ ಜೀರ್ಣಕ್ರಿಯೆಗೆ ನೆರವಾಗುವ ಮತ್ತು ಹೊಟ್ಟೆಯನ್ನು ದೀರ್ಘಕಾಲ ತುಂಬಿರುವಂತೆ ನೋಡಿಕೊಳ್ಳುವ ಬೀಟ್‌ರೂಟ್ ಹಾಗೂ ಮಖಾನಾ ರಾಯತಾ ಅತ್ಯುತ್ತಮ ಆಯ್ಕೆಯಾಗಿದೆ.
ಪೌಷ್ಟಿಕತಜ್ಞೆ ಕಿರಣ್ ಕುಕ್ರೇಜಾ ಅವರು ಹಂಚಿಕೊಂಡಿರುವ ಈ ರಾಯತಾ ಆರೋಗ್ಯಕ್ಕೆ ಅತ್ಯಂತ ಹಿತಕರವಾಗಿದೆ. ಬಣ್ಣಬಣ್ಣದ ತರಕಾರಿಗಳು ಹಾಗೂ ಪೋಷಕಾಂಶಯುಕ್ತ ಧಾನ್ಯಗಳನ್ನು ಒಳಗೊಂಡಿರುವ ಈ ಖಾದ್ಯವು ಉಪವಾಸದ ಸಮಯದಲ್ಲಿ ದೇಹದ ಶಕ್ತಿಯನ್ನು ಕಾಯ್ದುಕೊಳ್ಳಲು ಸಹಾಯ ಮಾಡುತ್ತದೆ.
ಏಕೆ ಈ ರಾಯತಾ ಉಪವಾಸಕ್ಕೆ ಸೂಕ್ತ?
ಬೀಟ್‌ರೂಟ್‌ನಲ್ಲಿ ನೈಸರ್ಗಿಕ ಸಿಹಿ ಮತ್ತು ಪೋಷಕಾಂಶಗಳಿದ್ದು, ಮಖಾನಾ ರಾಯತಾಗೆ ಉತ್ತಮ ರುಚಿ ನೀಡುತ್ತದೆ. ಮೊಸರು ದೇಹವನ್ನು ತಂಪಾಗಿರಿಸಿದರೆ, ಸೌತೆಕಾಯಿ ಮತ್ತು ಕ್ಯಾರೆಟ್ ತಾಜಾತನವನ್ನು ನೀಡುತ್ತವೆ. ಇವೆಲ್ಲದರ ಜೊತೆಗೆ ಸೇರಿಸುವ ಜೀರಿಗೆ ಹಾಗೂ ಚಿಯಾ ಬೀಜಗಳು ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸಿ, ಹಸಿವನ್ನು ನಿಯಂತ್ರಣದಲ್ಲಿಡಲು ನೆರವಾಗುತ್ತವೆ.
ಅಗತ್ಯವಿರುವ ಸಾಮಗ್ರಿಗಳು:
ಒಂದು ಕಪ್ ಗಟ್ಟಿ ಮೊಸರು, ತುರಿದ ಕ್ಯಾರೆಟ್, ತುರಿದ ಬೀಟ್‌ರೂಟ್, ಸಣ್ಣಗೆ ಹೆಚ್ಚಿದ ಸೌತೆಕಾಯಿ, ಕೊತ್ತಂಬರಿ ಸೊಪ್ಪು, ರುಚಿಗೆ ತಕ್ಕಷ್ಟು ಉಪ್ಪು, ಹುರಿದ ಜೀರಿಗೆ ಪುಡಿ, ಒಂದು ಚಮಚ ನೆನೆಸಿದ ಚಿಯಾ ಬೀಜಗಳು.
ಮೇಲೋಗರಕ್ಕೆ (ಟಾಪಿಂಗ್ಸ್): ಹುರಿದ ಮಖಾನಾ, ಹುರಿದ ಶೇಂಗಾ ಬೀಜ, ದಾಳಿಂಬೆ ಕಾಳುಗಳು ಮತ್ತು ಕೊತ್ತಂಬರಿ ಸೊಪ್ಪು.
ತಯಾರಿಸುವ ವಿಧಾನ:
ಮೊದಲು ಒಂದು ಪಾತ್ರೆಯಲ್ಲಿ ಗಟ್ಟಿ ಮೊಸರು, ತುರಿದ ಕ್ಯಾರೆಟ್, ಬೀಟ್‌ರೂಟ್, ಸೌತೆಕಾಯಿ, ಕೊತ್ತಂಬರಿ ಸೊಪ್ಪು, ಉಪ್ಪು, ಹುರಿದ ಜೀರಿಗೆ ಪುಡಿ ಹಾಗೂ ನೆನೆಸಿದ ಚಿಯಾ ಬೀಜಗಳನ್ನು ಹಾಕಿ ಸರಿಯಾಗಿ ಮಿಶ್ರಣ ಮಾಡಿ.
ಮಿಶ್ರಣ ಸಿದ್ಧವಾದ ನಂತರ ಅದರ ಮೇಲೆ ಹುರಿದ ಮಖಾನಾ, ಶೇಂಗಾ, ಕೆಂಪು ದಾಳಿಂಬೆ ಕಾಳುಗಳು ಹಾಗೂ ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿದರೆ ರುಚಿಕರ ಹಾಗೂ ಪೌಷ್ಟಿಕಾಂಶಯುಕ್ತ ಬೀಟ್‌ರೂಟ್-ಮಖಾನಾ ರಾಯತಾ ಸೇವನೆಗೆ ಸಿದ್ಧ.
