ಆಸ್ಟ್ರೇಲಿಯಾದ ಕ್ರಿಕೆಟ್ ದಿಗ್ಗಜ ಹಾಗೂ ವಿಕೆಟ್‌ಕೀಪರ್ ಬ್ಯಾಟರ್ ಆಡಮ್ ಗಿಲ್ಕ್ರಿಸ್ಟ್ ಹೆಸರು ಕೇಳಿದರೆ ಕ್ರಿಕೆಟ್ ಪ್ರೇಮಿಗಳಿಗೆ ಅವರ ಸ್ಪೋಟಕ ಬ್ಯಾಟಿಂಗ್ ನೆನಪಾಗುತ್ತದೆ. ಆದರೆ ಇದೀಗ ಪಾಕಿಸ್ತಾನದ ಶಾಲಾ ಕ್ರಿಕೆಟ್‌ನಲ್ಲಿ ಆಡಮ್ ಗಿಲ್ಕ್ರಿಸ್ಟ್ ಹೆಸರಿನ ಯುವ ಕ್ರಿಕೆಟಿಗನೊಬ್ಬ 108 ಎಸೆತಗಳಲ್ಲಿ 117 ರನ್‌ ಬಾರಿಸುವ ಮೂಲಕ ಭಾರಿ ಸದ್ದು ಮಾಡಿದ್ದಾನೆ. ಕಾಮ್ರಾನ್ ಪಬ್ಲಿಕ್ ಶೂಲ್ ಪರ ಆಡುತ್ತಿರುವ ಈ ಯುವಕ ಕೂಡ ಎಡಗೈ ವಿಕೆಟ್‌ಕೀಪರ್ ಬ್ಯಾಟರ್ ಆಗಿರುವುದು ವಿಶೇಷ.
ಜಿನ್ನಾ ಕಾಲೇಜು ಮೈದಾನದಲ್ಲಿ ಹ್ಯಾಪಿ ಪ್ಯಾಲೇಸ್ ಗ್ರಾಮ್ ಶಾಲೆಯ ವಿರುದ್ಧ ನಡೆದ ಪಂದ್ಯದಲ್ಲಿ ಗಿಲ್ಕ್ರಿಸ್ಟ್ ಈ ಅದ್ಭುತ ಶತಕ ಸಿಡಿಸಿ ಗಮನ ಸೆಳೆದಿದ್ದಾನೆ.
ಹೆಸರಿನ ಹಿಂದಿದೆ ಅಪರೂಪದ ಕಥೆ:
ಆಸ್ಟ್ರೇಲಿಯಾದ ಪ್ರಸಿದ್ಧ ಕ್ರಿಕೆಟಿಗನ ಹೆಸರು ತಮಗೆ ಹೇಗೆ ಬಂತು ಎಂಬುದರ ಕುರಿತು ಮಾತನಾಡಿರುವ ಯುವಕ, “ನನ್ನ ತಾಯಿ ನನಗೆ ‘ಆಡಮ್’ ಎಂದು ಹೆಸರಿಟ್ಟಿದ್ದರು. ನನ್ನ ತಂದೆಗೆ ಕ್ರಿಕೆಟ್ ಎಂದರೆ ತುಂಬಾ ಇಷ್ಟ, ಅವರು ಅಪಾರ ಪ್ರಮಾಣದಲ್ಲಿ ಕ್ರಿಕೆಟ್ ಪಂದ್ಯಗಳನ್ನು ವೀಕ್ಷಿಸುತ್ತಿದ್ದರು. ಆಸ್ಟ್ರೇಲಿಯಾದ ಆಡಮ್ ಗಿಲ್ಕ್ರಿಸ್ಟ್ ಬ್ಯಾಟಿಂಗ್‌ಗೆ ಮಾರುಹೋಗಿದ್ದ ನನ್ನ ತಂದೆ, ನನ್ನ ಹೆಸರಿನ ಜೊತೆಗೆ ‘ಗಿಲ್ಕ್ರಿಸ್ಟ್’ ಎಂದು ಸೇರಿಸಿದರು. ಹಾಗಾಗಿ ನನ್ನ ಹೆಸರು ಆಡಮ್ ಗಿಲ್ಕ್ರಿಸ್ಟ್ ಆಯಿತು,” ಎಂದು ವಿವರಣೆ ನೀಡಿದ್ದಾನೆ.
ಪಿಸಿಬಿ ಟ್ಯಾಲೆಂಟ್ ಪ್ರೋಗ್ರಾಂ ಭಾಗ:
ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯ (PCB) ಅಂಡರ್-15 ಹಾಗೂ ಅಂಡರ್-17 ವಿಭಾಗದ ಪ್ರತಿಭಾ ಅನ್ವೇಷಣೆ ಕಾರ್ಯಕ್ರಮದಲ್ಲಿ ಈ ಯುವಕ ಭಾಗವಹಿಸಿದ್ದಾನೆ. ಯುವ ಆಟಗಾರರಿಗೆ ಉತ್ತಮ ವೇದಿಕೆ ಕಲ್ಪಿಸಿಕೊಟ್ಟಿದ್ದಕ್ಕಾಗಿ ಪಿಸಿಬಿ ಅಧ್ಯಕ್ಷ ಮೊಹ್ಸಿನ್ ನಖ್ವಿ ಅವರಿಗೆ ಗಿಲ್ಕ್ರಿಸ್ಟ್ ಧನ್ಯವಾದ ತಿಳಿಸಿದ್ದಾನೆ.
ಆಸ್ಟ್ರೇಲಿಯಾದ ದಿಗ್ಗಜನ ಹೆಸರನ್ನೇ ಹೊಂದಿದ್ದರೂ, ಈ ಯುವಕನ ಸಾರ್ವಕಾಲಿಕ ನೆಚ್ಚಿನ ಆಟಗಾರ ಗಿಲ್ಕ್ರಿಸ್ಟ್ ಅಲ್ಲವಂತೆ. ಶ್ರೀಲಂಕಾದ ದಂತಕಥೆ ಕುಮಾರ ಸಂಗಕ್ಕಾರ ಅವರಂತೆ ಬೆಳೆಯುವುದು ತಮ್ಮ ಕನಸು ಎಂದು ಈ ಯುವ ಬ್ಯಾಟರ್ ಹೇಳಿಕೊಂಡಿದ್ದಾನೆ.
