ಡಿವೋರ್ಸ್ ಕೇಸ್‌ನಲ್ಲಿ ಪತ್ನಿಗೆ ಬಿಗ್ ರಿಲೀಫ್ :ಪತ್ನಿಯ ಜೀವನಾಂಶ ₹1.20 ಲಕ್ಷಕ್ಕೆ ಹೆಚ್ಚಳ; ಮಗುವಿನ ಶಿಕ್ಷಣ ವೆಚ್ಚ ಭರಿಸಲು ಹೈಕೋರ್ಟ್ ಆದೇಶ

ಬೆಂಗಳೂರು: ಷೇರುಗಳ ವ್ಯವಹಾರದಿಂದ ಹಣ ಗಳಿಸುತ್ತಿದ್ದರೆ ಅದನ್ನೂ ಆದಾಯವೆಂದೇ ಪರಿಗಣಿಸಬೇಕು. ಪತ್ನಿ ಮತ್ತು ಮಗುವಿಗೆ ನೀಡಬೇಕಾದ ಜೀವನಾಂಶ ಲೆಕ್ಕ ಹಾಕುವಾಗ ಈ ಆದಾಯವನ್ನು ಕಡೆಗಣಿಸುವಂತಿಲ್ಲ ಎಂದು ಕರ್ನಾಟಕ ಹೈಕೋರ್ಟ್ ಹೇಳಿದೆ.

ಈ ಪ್ರಕರಣದಲ್ಲಿ ಪತ್ನಿಗೆ ನೀಡುತ್ತಿದ್ದ ಮಾಸಿಕ ₹50,000 ಜೀವನಾಂಶವನ್ನು ₹1.20 ಲಕ್ಷಕ್ಕೆ ಹೆಚ್ಚಿಸಿ ನ್ಯಾಯಾಲಯ ಆದೇಶಿಸಿದೆ. ನ್ಯಾಯಮೂರ್ತಿ ಲಲಿತಾ ಕನ್ನೆಗಂಟಿ ಅವರಿದ್ದ ಏಕಸದಸ್ಯ ಪೀಠವು ಪತಿ ಮತ್ತು ಪತ್ನಿ ಸಲ್ಲಿಸಿದ್ದ ಅರ್ಜಿಗಳ ವಿಚಾರಣೆ ನಡೆಸಿ ಈ ತೀರ್ಪು ನೀಡಿದೆ.

ಷೇರುಗಳಿಂದ ವರ್ಷಕ್ಕೆ ₹28 ಲಕ್ಷ ಆದಾಯ

ಪತಿಗೆ ಷೇರುಗಳ ವ್ಯವಹಾರದಿಂದ ವರ್ಷಕ್ಕೆ ಸುಮಾರು ₹28 ಲಕ್ಷ ಆದಾಯ ಬರುತ್ತಿದೆ ಎಂಬ ಅಂಶವನ್ನು ಹೈಕೋರ್ಟ್ ಗಮನಿಸಿದೆ. ಪ್ರತಿ ತಿಂಗಳು ಬ್ಯಾಂಕ್ ಖಾತೆಗೆ ಹಣ ಬಾರದಿದ್ದರೂ, ವರ್ಷಕ್ಕೆ ಇಷ್ಟು ದೊಡ್ಡ ಮೊತ್ತದ ಆದಾಯ ಸಿಗುತ್ತಿದ್ದರೆ ಅದನ್ನು ಜೀವನಾಂಶದ ಲೆಕ್ಕದಿಂದ ಹೊರಗಿಡಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಹೇಳಿದೆ.

ಪತ್ನಿ ಕೆಲಸ ಕಳೆದುಕೊಂಡಿದ್ದು, ಗ್ಲುಕೋಮಾ ಮತ್ತು ಆಟೋಇಮ್ಯೂನ್ ಕಾಯಿಲೆಯಿಂದ ಬಳಲುತ್ತಿದ್ದಾರೆ. ಇದರಿಂದಾಗಿ ಅವರಿಗೆ ಕೆಲಸ ಮಾಡಲು ಸಾಧ್ಯವಾಗದ ಸ್ಥಿತಿ ಇದೆ ಎಂಬುದನ್ನೂ ನ್ಯಾಯಾಲಯ ಪರಿಗಣಿಸಿದೆ.

ಪತಿ ಸಾಲದ ಇಎಂಐ ಪಾವತಿಸುತ್ತಿರುವುದನ್ನೂ ಜೀವನಾಂಶ ಕಡಿಮೆ ಮಾಡಲು ಕಾರಣವಾಗಿ ತೋರಿಸಲಾಗದು ಎಂದು ನ್ಯಾಯಪೀಠ ಸ್ಪಷ್ಟಪಡಿಸಿದೆ. ಸಾಲದ ಮೂಲಕ ಆಸ್ತಿ ಸೃಷ್ಟಿಯಾಗುತ್ತಿದ್ದರೂ, ಪತ್ನಿ ಮತ್ತು ಮಗುವಿನ ನಿರ್ವಹಣೆಯ ಜವಾಬ್ದಾರಿಯನ್ನು ಕಡೆಗಣಿಸುವಂತಿಲ್ಲ ಎಂದು ಹೇಳಿದೆ.

ಪತ್ನಿಗೆ ಯಾವಾಗಿನಿಂದ ಎಷ್ಟು ಹಣ ಸಿಗಲಿದೆ?

ಪತ್ನಿ ಉದ್ಯೋಗದಲ್ಲಿದ್ದ ಅವಧಿಗೆ ತಿಂಗಳಿಗೆ ₹30,000 ಹಾಗೂ ಕೆಲಸ ಕಳೆದುಕೊಂಡ ನಂತರ ತಿಂಗಳಿಗೆ ₹1.20 ಲಕ್ಷ ಜೀವನಾಂಶ ನೀಡಬೇಕು ಎಂದು ಹೈಕೋರ್ಟ್ ಆದೇಶಿಸಿದೆ. ಈ ಮೊತ್ತವನ್ನು ಕೌಟುಂಬಿಕ ನ್ಯಾಯಾಲಯದ ಆದೇಶದ ದಿನಾಂಕದಿಂದ ಲೆಕ್ಕ ಹಾಕಿ ಪಾವತಿಸಬೇಕು ಎಂದು ಸೂಚಿಸಿದೆ.

ಮಗುವಿನ ಶಿಕ್ಷಣ ಮತ್ತು ಶಾಲೆಯ ಸಂಪೂರ್ಣ ವೆಚ್ಚವನ್ನೂ ಪತಿಯೇ ಭರಿಸಬೇಕು. ಬಾಕಿ ಇರುವ ಹಣವನ್ನು ಆದೇಶ ಹೊರಬಿದ್ದ ನಾಲ್ಕು ವಾರಗಳೊಳಗೆ ಪತ್ನಿಯ ಬ್ಯಾಂಕ್ ಖಾತೆಗೆ ಜಮೆ ಮಾಡಬೇಕು ಎಂದು ನ್ಯಾಯಾಲಯ ತಿಳಿಸಿದೆ.

ಪ್ರಕರಣದ ಹಿನ್ನೆಲೆ ಏನು?

ಬೆಂಗಳೂರಿನ ಜೆ.ಪಿ. ನಗರದಲ್ಲಿ ವಾಸಿಸುವ ದಂಪತಿ ವಿಚ್ಛೇದನಕ್ಕಾಗಿ ಕೌಟುಂಬಿಕ ನ್ಯಾಯಾಲಯದ ಮೊರೆ ಹೋಗಿದ್ದರು. ಪತಿ ಸಿಸ್ಕೊ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದರು. ಪ್ರಕರಣದ ವಿಚಾರಣೆ ನಡೆಯುತ್ತಿದ್ದ ವೇಳೆ, ಪತ್ನಿ ಮತ್ತು ಮಗುವಿನ ನಿರ್ವಹಣೆಗಾಗಿ ತಿಂಗಳಿಗೆ ₹50,000 ಜೀವನಾಂಶ ನೀಡಬೇಕು ಹಾಗೂ ಮಗುವಿನ ಶಾಲಾ ಶುಲ್ಕವನ್ನು ಪಾವತಿಸಬೇಕು ಎಂದು ಕೌಟುಂಬಿಕ ನ್ಯಾಯಾಲಯ ಆದೇಶಿಸಿತ್ತು.

ಈ ಮೊತ್ತ ಸಾಕಾಗುವುದಿಲ್ಲ ಎಂದು ಪತ್ನಿ ಜೀವನಾಂಶ ಹೆಚ್ಚಿಸುವಂತೆ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದರು. ಮತ್ತೊಂದೆಡೆ, ಜೀವನಾಂಶದ ಮೊತ್ತವನ್ನು ಕಡಿಮೆ ಮಾಡುವಂತೆ ಪತಿಯೂ ಅರ್ಜಿ ಸಲ್ಲಿಸಿದ್ದರು. ಎರಡೂ ಅರ್ಜಿಗಳನ್ನು ವಿಚಾರಣೆ ನಡೆಸಿದ ಹೈಕೋರ್ಟ್, ಪತ್ನಿಗೆ ನೀಡಬೇಕಾದ ಜೀವನಾಂಶವನ್ನು ಹೆಚ್ಚಿಸಿ ಆದೇಶಿಸಿದೆ.